Ũguni wa Gũkorũo na Gĩcigo Gĩaku Kĩũmbe
1. Gĩcigo kĩa mũndũ kĩũmbe nĩ kĩĩ?
1 Gĩcigo kĩa mũndũ kĩũmbe nĩ kĩĩ? Harĩ ciũngano iria ikoragwo na gĩcigo kĩnene gĩa kũhunjia, gĩcigo kĩa mũndũ kĩũmbe nĩ kĩrĩa ũngĩheo, kũngĩhoteka hakuhĩ na kũrĩa ũikaraga. Ibuku rĩa Tengenezo, karatathi ka 103, rĩtaaragĩria ũũ: “Gũkorũo na gĩcigo gĩaku kĩrĩa ũrĩhotaga gũkinya na njĩra hũthũ, nĩ kũrĩgũteithagia kũhũthĩra mahinda maku wega thĩinĩ wa ũtungata. Ningĩ no ũnyite ũgeni mũhunjia ũngĩ mũhunjie nake gĩcigo-inĩ gĩaku kĩũmbe.”
2. Makĩria ma kũhunjia na ikundi-rĩ, gĩcigo kĩa mũndũ kĩũmbe kĩngĩhũthĩka atĩa?
2 Makĩria ma Kũhunjia Hamwe na Gĩkundi: Ũngĩgĩa na gĩcigo gĩaku mwene gũkuhĩ na kũrĩa ũrutagĩra wĩra, no ũhote kũhunjia hĩndĩ ya irio cia mĩaraho kana mbere ya kũinũka, kũngĩhoteka mũrĩ na mũhunjia ũngĩ ũrutaga wĩra hakuhĩ. Ũngĩgĩa na gĩcigo ta kĩu hakuhĩ na kwanyu mũciĩ, no ũkorũo ũrĩ ũndũ mũhũthũ kũhunjia hwaĩ-inĩ mũrĩ na famĩlĩ yaku. Angĩkorũo ndũgũthiĩ mũcemanio-inĩ wa gũthiĩ kũhunjia, nĩ wega kũhoya Jehova agũtongorie mbere ya kwambĩrĩria kũhunjia. (Afil. 4:6) Makĩria ma ũguo, wagĩrĩirũo kũgĩa na ũigananĩru harĩ mahinda marĩa ũhũthagĩra gĩcigo-inĩ gĩaku kĩũmbe, na marĩa ũhũthagĩra kũnyita mbaru mũbango wa kĩũngano wa kũhunjia na ikundi. Makĩria mũthia-inĩ wa kiumia rĩrĩa ahunjia aingĩ mathiaga mũcemanio wa kũhunjia, nĩ wega mũno kũnyita mbaru gĩkundi kĩanyu gĩa kũhunjia.
3. Kũrĩ na ũguni ũrĩkũ wa gũkorũo na gĩcigo kĩa mũndũ kĩũmbe?
3 Ũguni: Ũngĩkorũo na gĩcigo gĩaku kĩũmbe, ndũrĩagaga gwa kũhunjia hĩndĩ o yothe rĩrĩa maũndũ maku magwĩtĩkĩria. Ũrĩhũthagĩra mahinda maingĩ makĩria ũkĩhunjia tondũ ndũrĩbataraga gũthiĩ kũraihu. Mũbango ũcio nĩ ũteithagia ahunjia amwe gũtuĩka mapainia a gũteithĩrĩria kana a hĩndĩ ciothe. Tondũ ene nyũmba arĩa mekuonania wendi harĩ ũhoro wa Ũthamaki marĩ gĩcigo-inĩ kĩmwe-rĩ, nĩ ũndũ mũhũthũ kũmacokera na kũmaruta Bibilia. Aingĩ nĩ monete atĩ kũhunjia gĩcigo-inĩ kĩa mũndũ kĩũmbe nĩ kũmateithagia kũmenyana wega na ene nyũmba na makagĩa na ũrata, makĩria angĩkorũo mekũhunjia gĩcigo kĩu makĩria ma rita rĩmwe mbere ya gũgĩcokia nĩguo kĩhunjio nĩ ahunjia angĩ. Hihi kũhunjia gĩcigo-inĩ gĩaku kĩũmbe no gũgũteithie mũrĩ na famĩlĩ yaku kũhingia ũtungata wanyu na njĩra nginyanĩru makĩria?—2 Tim. 4:5.