Athamaki wa Mbere

15 Na rĩrĩ, mwaka-inĩ wa 18 wa Mũthamaki Jeroboamu+ mũrũ wa Nebati, Abijamu agĩtuĩka mũthamaki wa Juda.+ 2 Aathanire mĩaka ĩtatũ thĩinĩ wa Jerusalemu. Nyina eetagwo Maaka+ mũcũkũrũ wa* Abishalomu. 3 Agĩthiĩ na mbere gwĩka mehia mothe marĩa ithe eekire mbere yake, na ngoro yake ndĩeheanĩte biũ* harĩ Jehova Ngai wake ta ngoro ya Daudi ithe wao wa tene. 4 No rĩrĩ, nĩ ũndũ wa Daudi,+ Jehova Ngai wake nĩ aamũheire tawa thĩinĩ wa Jerusalemu+ na njĩra ya kwarahũra mũrũwe thutha wake na gũtũma Jerusalemu ĩthiĩ o na mbere gũkorũo ho. 5 Nĩ gũkorũo Daudi nĩ eekire maũndũ marĩa magĩrĩire maitho-inĩ ma Jehova, na ndaigana kũgarũrũka kuuma ũndũ-inĩ o na ũmwe ũrĩa Aamwathĩte matukũ-inĩ mothe ma ũtũũro wake, o tiga ũhoro-inĩ wĩgiĩ Uria Mũhiti.+ 6 Na gwakoragwo na mbaara gatagatĩ-inĩ ka Rehoboamu na Jeroboamu matukũ-inĩ mothe ma ũtũũro wake.+

7 Ha ũhoro wa maũndũ macio mangĩ megiĩ Abijamu, ũrĩa wothe eekire, na githĩ ti maandĩke ibuku-inĩ rĩa maũndũ ma mahinda ma athamaki a Juda?+ Ningĩ nĩ kwarĩ na mbaara gatagatĩ-inĩ ka Abijamu na Jeroboamu.+ 8 Thutha ũcio Abijamu akĩhurũkio hamwe na maithe make ma tene, na makĩmũthika Itũũra-inĩ rĩa Daudi; na mũrũwe Asa+ agĩtuĩka mũthamaki ithenya rĩake.+

9 Mwaka-inĩ wa 20 wa Mũthamaki Jeroboamu wa Isiraeli, Asa akĩambĩrĩria gwathana thĩinĩ wa Juda. 10 Aathanire mĩaka 41 thĩinĩ wa Jerusalemu. Cũwe eetagwo Maaka+ mũcũkũrũ wa* Abishalomu. 11 Asa eekire maũndũ marĩa magĩrĩire maitho-inĩ ma Jehova,+ o ta Daudi ithe wao wa tene. 12 Aaingatire arũme arĩa maahũũraga ũmaraya hekarũ-inĩ kuuma bũrũri-inĩ+ na akĩeheria mĩhianano yothe ĩrĩ magigi* ĩrĩa maithe make ma tene maathondekete.+ 13 O na akĩeheria nginya cũwe Maaka+ kuuma gaturũa-inĩ gake ga gũkorũo arĩ nyina wa mũthamaki, tondũ nĩ aathondekete mũhianano ũrĩ magigi nĩ ũndũ wa ũthathaiya wa mũtĩ wa kũhoywo.* Asa agĩtemanga mũhianano ũcio ũrĩ magigi wa cũwe+ na akĩũcinĩra Mũkuru-inĩ wa Kidironi.+ 14 Ĩndĩ kũndũ kũrĩa gũtũũgĩru gũtieheririo.+ O na kũrĩ ũguo Asa nĩ eeheanĩte na ngoro yothe* harĩ Jehova ũtũũro-inĩ wake wothe.* 15 Na akĩrehe indo nyũmba-inĩ ya Jehova iria we na ithe maamũrĩte—betha, thahabu, na indo cia mĩthemba ĩtiganĩte.+

16 Na gwatũire mbaara gatagatĩ-inĩ ka Asa na Baasha+ mũthamaki wa Isiraeli. 17 Nĩ ũndũ ũcio Mũthamaki Baasha wa Isiraeli akĩambata gũũkĩrĩra Juda na akĩambĩrĩria gwaka* itũũra rĩa Rama+ nĩgetha agirĩrĩrie mũndũ o wothe kuuma kana kũingĩra kũrĩ* Mũthamaki Asa wa Juda.+ 18 Nĩ ũndũ ũcio Asa akĩoya betha yothe na thahabu ĩrĩa yatigarĩte igĩna-inĩ cia nyũmba ya Jehova na igĩna-inĩ cia nyũmba ya mũthamaki na agĩcinengera ndungata ciake. Mũthamaki Asa agĩcoka agĩtũma ndungata ciake kũrĩ Beni-hadadi mũrũ wa Tabirimoni mũrũ wa Hezioni, mũthamaki wa Siria,+ ũrĩa waikaraga Dameski, agĩciĩra ũũ: 19 “Nĩ harĩ na ũiguano* gatagatĩ gakwa nawe na gatagatĩ ka baba na baba wanyu. Nĩ ndakũneanĩra kĩheo gĩa betha na thahabu. Ũka ũniine ũiguano waku* na Mũthamaki Baasha wa Isiraeli, nĩgetha anjeherere.” 20 Beni-hadadi agĩgĩthikĩrĩria Mũthamaki Asa na agĩtũma anene ake a mbũtũ mokĩrĩre matũũra ma Isiraeli, na magĩtharĩkĩra Ijoni,+ Dani,+ Abeli-bethi-maaka, Kinerethu guothe, na bũrũri wothe wa Nafitali. 21 Rĩrĩa Baasha aaiguire ũhoro ũcio, o rĩo agĩtiga gwaka* itũũra rĩa Rama na agĩthiĩ na mbere gũikara Tiriza.+ 22 Nake Mũthamaki Asa agĩcoka agĩtũmanĩra andũ othe a Juda—gũtirĩ mũndũ o na ũmwe watigĩrĩirũo—na magĩkuua mahiga na mbaũ cia Rama iria Baasha aakoretwo agĩaka nacio, na Mũthamaki Asa agĩcihũthĩra gwaka* Geba+ thĩinĩ wa Benjamini, o hamwe na Mizipa.+

23 Ha ũhoro wa maũndũ macio mangĩ mothe megiĩ Asa, hinya wake wothe na ũrĩa wothe eekire na matũũra marĩa aakire,* na githĩ ti maandĩke ibuku-inĩ rĩa maũndũ ma mahinda ma athamaki a Juda? No ũkũrũ-inĩ wake akĩrwara magũrũ.+ 24 Thutha ũcio Asa akĩhurũkio hamwe na maithe make ma tene na agĩthikwo hamwe nao Itũũra-inĩ rĩa Daudi ithe wao wa tene; na mũrũwe Jehoshafatu+ agĩtuĩka mũthamaki ithenya rĩake.

25 Nadabu+ mũrũ wa Jeroboamu agĩtuĩka mũthamaki wa Isiraeli mwaka-inĩ wa kerĩ wa Mũthamaki Asa wa Juda, na aathanire Isiraeli mĩaka ĩĩrĩ. 26 Na agĩthiĩ na mbere gwĩka maũndũ moru maitho-inĩ ma Jehova, na akĩrũmĩrĩra njĩra ya ithe+ na mehia make marĩa aatũmire Isiraeli mehie.+ 27 Baasha mũrũ wa Ahija wa nyũmba ya Isakaru akĩbanga njama ya kũmũũkĩrĩra, na Baasha akĩmũũragĩra itũũra-inĩ rĩa Gibethoni,+ rĩrĩa rĩarĩ rĩa Afilisti, hĩndĩ ĩrĩa Nadabu na andũ othe a Isiraeli maarigicĩirie Gibethoni. 28 Nĩ ũndũ ũcio Baasha akĩmũũraga mwaka-inĩ wa gatatũ wa Mũthamaki Asa wa Juda na agĩtuĩka mũthamaki ithenya rĩake. 29 Na o rĩo aatuĩka mũthamaki, akĩniina nyũmba yothe ya Jeroboamu. Ndaatigirie mũndũ o na ũmwe wahuhagia wa nyũmba ya Jeroboamu; aamoragithirie magĩthira kũringana na uuge wa Jehova ũrĩa aarĩtie kũgerera ndungata yake Ahija Mũshiloni.+ 30 Gwathiire ũguo tondũ wa mehia marĩa Jeroboamu eekĩte na agatũma andũ a Isiraeli mehie na tondũ nĩ aarakarĩtie Jehova Ngai wa Isiraeli mũno. 31 Ha ũhoro wa maũndũ macio mangĩ megiĩ Nadabu, ũrĩa wothe eekire, na githĩ ti maandĩke ibuku-inĩ rĩa maũndũ ma mahinda ma athamaki a Isiraeli? 32 Na gwatũire mbaara gatagatĩ-inĩ ka Asa na Mũthamaki Baasha wa Isiraeli.+

33 Mwaka-inĩ wa gatatũ wa Mũthamaki Asa wa Juda, Baasha mũrũ wa Ahija agĩtuĩka mũthamaki thĩinĩ wa Tiriza wa gũthamakĩra andũ othe a Isiraeli na aathanire mĩaka 24.+ 34 No aathiire o na mbere gwĩka maũndũ moru maitho-inĩ ma Jehova,+ na akĩrũmĩrĩra njĩra ya Jeroboamu na mehia make marĩa aatũmire andũ a Isiraeli mehie.+