Ũhoro Mwega Ũrĩa Waandĩkirũo nĩ Mariko

10 Jesu oima kũu agĩthiĩ mĩhaka-inĩ ya Judea mũrĩmo wa Jorodani, na o rĩngĩ kĩrĩndĩ kĩnene kĩa andũ gĩgĩũka harĩ we. Na o ta ũrĩa aamenyerete gwĩka-rĩ, akĩambĩrĩria kũmaruta.+ 2 Na Afarisai magĩthiĩ harĩ we marĩ na muoroto wa kũmũgeria, na makĩmũũria kana nĩ kwagĩrĩire mũndũ atigane na mũtumia wake.+ 3 Akĩmoria atĩrĩ: “Musa aamwathire atĩa?” 4 Makĩmwĩra ũũ: “Musa nĩ eetĩkĩrĩtie mũndũ andĩkĩre mũtumia wake marũa ma ndigano na matigane.”+ 5 No Jesu akĩmeera atĩrĩ: “Aamwandĩkĩire rĩathani rĩu+ nĩ ũndũ wanyu kũũmia ngoro.+ 6 Ĩndĩ kuuma o kĩambĩrĩria kĩa ũũmbi, ‘Aamombire marĩ mũndũrũme na mũtumia.+ 7 Nĩ ũndũ ũcio, mũndũrũme nĩ agaatiga ithe na nyina,+ 8 nao eerĩ matuĩke mwĩrĩ ũmwe,’+ nĩ ũndũ ũcio ti erĩ rĩngĩ, no nĩ mwĩrĩ ũmwe. 9 Kwoguo-rĩ, arĩa Ngai anyitithanĩtie, mũndũ ndakanamatigithanie.”+ 10 Na rĩrĩa maarĩ nyũmba, arutwo ake makĩambĩrĩria kũmũũria ũhoro ũcio. 11 Akĩmeera ũũ: “Mũndũ o wothe angĩtigana na mũtumia wake na ahikie ũngĩ+ nĩ atharĩtie, 12 na mũtumia angĩtigana na mũthuri wake ahikĩre ũngĩ, nĩ atharĩtie.”+

13 Na rĩrĩ, andũ makĩambĩrĩria kũmũrehera twana nĩguo atũhutie, no arutwo ake makĩmakaania.+ 14 Rĩrĩa Jesu oonire ũguo akĩrakara na akĩmeera: “Rekei twana tũũke harĩ niĩ; na mũtikagerie gũtũgiria, nĩ gũkorũo Ũthamaki wa Ngai nĩ wa arĩa matariĩ ta tuo.+ 15 Ngũmwĩra atĩrĩ o ma, mũndũ wothe ũtamũkagĩra Ũthamaki wa Ngai ta kaana kanini ndakaingĩra thĩinĩ waguo.”+ 16 Akĩoya twana tũu agĩtũnyita na moko na akĩambĩrĩria gũtũrathima, agĩtũigagĩrĩra moko.+

17 Rĩrĩa aathiaga, mũndũ ũmwe agĩtengʼera harĩ we, agĩturia maru mbere yake na akĩmũũria: “Mũrutani Mwega, njagĩrĩirũo gwĩka atĩa nĩguo ngaagaya muoyo wa tene na tene?”+ 18 Jesu akĩmũũria atĩrĩ: “Wanjĩta mwega nĩkĩ? Gũtirĩ o na ũmwe mwega, tiga Ngai.+ 19 Nĩ ũĩ maathani: ‘Ndũkanoragane,+ ndũkanatharie,+ ndũkanaiye,+ ndũkanarute ũira wa maheeni,+ ndũkanatunyane,+ tĩaga thoguo na nyũkwa.’”+ 20 Mũndũ ũcio akĩmwĩra: “Mũrutani, ndũire nũmĩtie maũndũ macio mothe kuuma ũnyinyi-inĩ wakwa.” 21 Jesu akĩmũrora akĩigua amwenda na akĩmwĩra atĩrĩ, “Harĩ ũndũ ũmwe ũtigarĩtie: Thiĩ, wendie indo iria ũrĩ nacio ũhe athĩni, na nĩ ũkũgĩa na mũthithũ kũrĩa igũrũ; ũcoke ũũke ũtuĩke mũrũmĩrĩri wakwa.”+ 22 No akĩnyitwo nĩ ihooru aigua macokio macio na agĩthiĩ arĩ na kĩeha, nĩ gũkorũo aarĩ na indo nyingĩ.+

23 Jesu akĩrora mĩena yothe, agĩcoka akĩra arutwo ake atĩrĩ: “Kaĩ nĩ ũgaakorũo ũrĩ ũndũ mũritũ harĩ arĩa marĩ mbeca gũtonya Ũthamaki-inĩ wa Ngai-ĩ!”+ 24 No arutwo ake makĩmakio mũno nĩ ciugo icio ciake. Nĩ ũndũ ũcio Jesu akĩmeera: “Ciana ciakwa, kaĩ nĩ ũndũ mũritũ gũtonya Ũthamaki-inĩ wa Ngai-ĩ! 25 Nĩ ũndũ mũhũthũ harĩ ngamĩra gũtonyera karima ga cindano gũkĩra mũndũ mũtongu gũtonya Ũthamaki-inĩ wa Ngai.”+ 26 Makĩgega o na makĩria, makĩmũũria* atĩrĩ: “Nũũ ũngĩkĩhonokio?”+ 27 Jesu akĩmarora akĩmeera atĩrĩ: “Ũndũ ũcio ndũngĩhoteka harĩ andũ, no tiguo harĩ Ngai, nĩ gũkorũo maũndũ mothe no mahoteke harĩ Ngai.”+ 28 Petero akĩmwĩra: “Atĩrĩrĩ, ithuĩ nĩ tũtigĩte indo ciothe na tũgakũrũmĩrĩra.”+ 29 Jesu akiuga: “Ngũmwĩra atĩrĩ na ma, gũtirĩ mũndũ ũtigĩte nyũmba kana ariũ a nyina kana aarĩ a nyina kana nyina kana ithe kana ciana kana mĩgũnda nĩ ũndũ wakwa na nĩ ũndũ wa ũhoro ũrĩa mwega+ 30 ũtekwamũkĩra maita 100 makĩria, ihinda-inĩ rĩrĩ—nyũmba, ariũ a nyina, aarĩ a nyina, nyina, ciana, na mĩgũnda, hamwe na mĩnyamaro+—na mũtabarĩre-inĩ wa maũndũ ũrĩa ũroka,* aheo muoyo wa tene na tene. 31 No andũ aingĩ arĩa marĩ mbere magaatuĩka a thutha, nao arĩa marĩ thutha matuĩke a mbere.”+

32 Na rĩrĩ, hĩndĩ ĩyo maarĩ njĩra-inĩ merekeire Jerusalemu, na Jesu aathiaga arĩ mbere yao, nao makĩgega, no arĩa maamarũmĩrĩire makĩnyitwo nĩ guoya. O rĩngĩ agĩtwara acio Ikũmi na Erĩ keheri-inĩ akĩambĩrĩria kũmeera maũndũ maya marĩa maarĩ hakuhĩ kũmũkora:+ 33 “Atĩrĩrĩ, twambatĩte twerekeire Jerusalemu, na Mũrũ wa mũndũ nĩ ekũneanwo kũrĩ anene a athĩnjĩri-Ngai na andĩki-watho. Nao nĩ mekũmũtuĩra oragwo na mamũneane kũrĩ andũ a ndũrĩrĩ, 34 nao mamũnyũrũrie na mamũtuĩre mata, mamũhũũre iboko na mamũũrage, no thutha wa thikũ ithatũ nĩ akaariũka.”+

35 Jakubu na Johana ariũ a Zebedi,+ makĩmũkuhĩrĩria makĩmwĩra atĩrĩ: “Mũrutani, tũrenda ũtũhingĩrie ũrĩa wothe tũgũkũhoya.”+ 36 Akĩmoria: “Mũkwenda ndĩmwĩkĩre atĩa?” 37 Makĩmũcokeria atĩrĩ: “Twĩtĩkĩrie tũgaaikara ũmwe guoko-inĩ gwaku kwa ũrĩo na ũcio ũngĩ kwa ũmotho, riri-inĩ waku.”+ 38 No Jesu akĩmeera ũũ: “Inyuĩ mũtiũĩ kĩrĩa mũrahoya. Hihi no mũhote kũnyuĩra gĩkombe kĩrĩa ndĩranyuĩra kana kũbatithio na ũbatithio ũrĩa ndĩrabatithio naguo?”+ 39 Makĩmũcokeria atĩrĩ: “Ĩĩ no tũhote.” Nake Jesu akĩmeera ũũ: “Gĩkombe kĩrĩa ndĩranyuĩra nĩ mũkũnyuĩra, na ũbatithio ũrĩa ndĩrabatithio naguo, nĩ mũkũbatithio naguo.+ 40 No rĩrĩ, ha ũhoro wa gũikara guoko-inĩ gwakwa kwa ũrĩo na kwa ũmotho ti niĩ heanaga, ĩndĩ nĩ wa arĩa mahaarĩrĩirio.”

41 Rĩrĩa acio angĩ ikũmi maaiguire ũhoro ũcio, makĩrakarĩra Jakubu na Johana.+ 42 No rĩrĩ, Jesu akĩmeta harĩ we, akĩmeera: “Inyuĩ nĩ mũĩ atĩ arĩa monagwo marĩ atongoria a ndũrĩrĩ metũũgagĩria igũrũ rĩa andũ nao arĩa marĩ na ũnene mahũthagĩra hinya gwathana igũrũ rĩao.+ 43 Ũguo tiguo kwagĩrĩire gũkorũo gatagatĩ-inĩ kanyu, ĩndĩ ũrĩa ũkwenda gũtuĩka mũnene gatagatĩ-inĩ kanyu no mũhaka atuĩke ndungata yanyu,+ 44 nake ũrĩa ũkwenda gũtuĩka wa mbere gatagatĩ-inĩ kanyu no mũhaka atuĩke ngombo ya arĩa angĩ othe. 45 Nĩ gũkorũo o na Mũrũ wa mũndũ ndookire gũtungatĩrũo, ĩndĩ ookire nĩguo atungate,+ na arute muoyo* wake ũtuĩke ũkũũri nĩ ũndũ wa gũkũũra andũ aingĩ.”+

46 Magĩcoka magĩkinya Jeriko. No rĩrĩa we na arutwo ake hamwe na kĩrĩndĩ kĩnene mooimaga kũu Jeriko, mũndũ warĩ mũtumumu wahoyaga mbeca wetagwo Baritimayo (mũrũ wa Timayo) aaikarĩte thĩ mũkĩra-inĩ wa njĩra.+ 47 Rĩrĩa aaiguire atĩ nĩ Jesu ũrĩa Mũnazarethi, akĩambĩrĩria kwanĩrĩra akiugaga: “Jesu, Mũrũ wa Daudi,+ njiguĩra tha!”+ 48 Nĩ ũndũ ũcio andũ aingĩ makĩambĩrĩria kũmũkũũma makĩmwĩraga akire, no we agĩthiĩ o na mbere kwanĩrĩra: “Mũrũ wa Daudi, njiguĩra tha!” 49 Nĩ ũndũ ũcio Jesu akĩrũgama na akiuga: “Mwĩrei oke.” Nao magĩta mũndũ ũcio warĩ mũtumumu, makĩmwĩra: “Gĩa na ũmĩrĩru! Ũkĩra; nĩ aragwĩta.” 50 Akĩruta nguo yake ya igũrũ, akĩrũgama na ihenya agĩthiĩ harĩ Jesu. 51 Nake Jesu akĩmũũria atĩrĩ: “Ũkwenda ngwĩkĩre atĩa?” Mũndũ ũcio akĩmwĩra ũũ: “Rab·bo′ni,* honia njoke kuona.” 52 Nake Jesu akĩmwĩra: “Thiĩ. Wĩtĩkio waku nĩ watũma ũhone.”+ Na o hĩndĩ ĩyo akĩhota kuona rĩngĩ,+ na akĩambĩrĩria kũmũrũmĩrĩra njĩra-inĩ.