Marũa ma Kerĩ Kũrĩ Athesalonike
3 Ngĩrĩkĩrĩria ariũ a Ithe witũ-rĩ, thiĩi na mbere gũtũhoera,+ nĩgetha kiugo kĩa Jehova* gĩthiĩ na mbere gũtherema na ihenya+ na gũtũũgĩrio, o ta ũrĩa gĩtariĩ harĩ inyuĩ, 2 na atĩ tũhonokio kuuma kũrĩ andũ oru na aganu,+ nĩ gũkorũo wĩtĩkio ti kĩndũ kĩa andũ othe.+ 3 No Mwathani nĩ mwĩhokeku, na nĩ ekũmwĩkĩra hinya na amũgitĩre kuumana na ũrĩa mũũru. 4 Makĩria ma ũguo, tũrĩ na ma thĩinĩ wa Mwathani ũhoro-inĩ wanyu, atĩ nĩ mũrarũmĩrĩra na nĩ mũgũthiĩ na mbere kũrũmĩrĩra motaaro maitũ. 5 Mwathani arothiĩ na mbere gũtongoria ngoro cianyu wega nĩguo mwende Ngai+ na mũgĩe na ũkirĩrĩria+ nĩ ũndũ wa Kristo.
6 Rĩu ariũ a Ithe witũ tũramũtaara thĩinĩ wa rĩĩtwa rĩa Mwathani witũ Jesu Kristo, atĩ mũtige gũthiaga thiritũ na mũrũ wa Ithe witũ o wothe ũrathiĩ na mĩthiĩre ĩrĩa ĩtagĩrĩire+ na ũtarũmagĩrĩra ũrutani* ũrĩa mwaamũkĩrire kuuma kũrĩ ithuĩ.+ 7 Nĩ gũkorũo inyuĩ ene nĩ mũĩ ũrĩa mwagĩrĩirũo nĩ kwĩgerekania na ithuĩ,+ tondũ tũtiathiaga na mĩthiĩre ĩtarĩ mĩagĩrĩru gatagatĩ-inĩ kanyu, 8 o na tũtiarĩaga irio cia mũndũ o na ũrĩkũ tũhũ.*+ Ithenya rĩa ũguo, twarutaga wĩra mũritũ na wa mĩnoga ũtukũ na mũthenya nĩgetha tũtigatuĩke mũrigo mũritũ harĩ mũndũ o na ũmwe wanyu.+ 9 Ti atĩ tũtirĩ na kĩhooto,+ ĩndĩ tweendaga kwĩrutĩra ithuĩ ene tũrĩ kĩonereria harĩ inyuĩ nĩguo mwĩgerekanagie na ithuĩ.+ 10 Rĩrĩa twarĩ hamwe na inyuĩ, nĩ twamũheaga watho ũyũ: “Mũndũ angĩkorũo ndarenda kũruta wĩra, o na kũrĩa ndakarĩe.”+ 11 Nĩ gũkorũo tũraigua atĩ harĩ amwe marathiĩ na mĩthiĩre ĩtarĩ mĩagĩrĩru gatagatĩ-inĩ kanyu,+ makaga kũruta wĩra o na hanini, ĩndĩ meingĩragia maũndũ-inĩ matamakoniĩ.+ 12 Andũ ta acio-rĩ, tũramaatha na tũkamaringĩrĩria thĩinĩ wa Mwathani Jesu Kristo atĩ marutage wĩra mekirĩire na marĩage irio iria o ene marutĩire wĩra.+
13 No inyuĩ ariũ a Ithe witũ-rĩ, mũtikanakue ngoro harĩ gwĩkaga wega. 14 No mũndũ o na ũrĩkũ angĩaga gwathĩkĩra kiugo gitũ kĩrĩa kĩrĩ marũa-inĩ maya, mwĩkĩrei rũũri na mũtige gũthiaga thiritũ nake,+ nĩgetha aconoke. 15 Ĩndĩ o na kũrĩ ũguo mũtikamũtue thũ, no thiĩi na mbere kũmũtaara+ o ta mũrũ wa Ithe witũ.
16 Rĩu-rĩ, Mwathani mwene thayũ aromũheaga thayũ hĩndĩ ciothe maũndũ-inĩ mothe.+ Mwathani aroikara hamwe na inyuĩ inyuothe.
17 Ici nĩ ngeithi ciakwa, niĩ Paulo, nyandĩkĩte na guoko gwakwa mwene,+ na nĩ rũũri marũa-inĩ makwa mothe; ũguo nĩguo nyandĩkaga.
18 Ũtugi mũnene wa Mwathani witũ Jesu Kristo ũroikara hamwe na inyuĩ inyuothe.