Bibilia nĩ Ĩgarũraga Mĩtũũrĩre ya Andũ

Nĩ kĩĩ gĩatũmire Mũrastafaria ũmwe enje rasta ciake na aniine mũthutũkanio ũrĩa aarĩ naguo kwerekera andũ erũ? Na nĩ kĩĩ kĩahotithirie mwanake ũmwe warĩ na marakara moru, ũrĩa warogotagĩra endia a ndawa cia kũrebia mbeca, acenjie mũtũũrĩre wake? Thoma wone andũ acio magĩtaarĩria rũgano rwao.

“Nĩ ndaniinire mũthutũkanio ũrĩa ndarĩ naguo.”​—HAFENI NGHAMA

MĨAKA: 34

BŨRŨRI: ZAMBIA

HISTORĨ: MŨRASTAFARIA

MŨTŨŨRĨRE WAKWA WA HAU KABERE: Ndaaciarĩirũo kambĩ-inĩ ya ethari ngũĩ bũrũri-inĩ wa Zambia. Mami oorĩire Namibia hĩndĩ ya mbaara, na akĩingĩra kĩama-inĩ gĩa SWAPO (South West Africa People’s Organization). Kĩama kĩu gĩokagĩrĩra thirikari ya South Africa ĩrĩa yaathaga Namibia ihinda-inĩ rĩu.

Nĩ ndaikarire kambĩ-inĩ cigana ũna cia ethari ngũĩ, nginya rĩrĩa ndakinyirie mĩaka 15. Ciana iria ciarĩ kambĩ-inĩ cia kĩama gĩa SWAPO nĩ ciahaaragĩrio nĩguo igaatongoria harĩ kũrũĩrĩra wĩyathi. Twekagĩrũo meciria moru ma maũndũ ma ũteti na tũkarutwo kũmena andũ erũ.

Ndĩ na mĩaka 11, nĩ ndendaga kũiyũkio nduĩke Mũkristiano kanitha-inĩ ĩrĩa yarĩ kambĩ-inĩ, ĩrĩa yatukanĩte etĩkia a Gatoreki, Lutheran, Anglican, na angĩ. No mũhunjia ũrĩa ndaaririe nake nĩ aamenereirie itua rĩu rĩakwa. Kuuma hĩndĩ ĩyo, ngĩambĩrĩria gwĩtĩkia atĩ gũtirĩ Ngai. O na kũrĩ ũguo, ndĩ na mĩaka 15, kwenda nyĩmbo cia reggae na kwĩrirĩria kũniina maũndũ mamwe matarĩ ma kĩhooto marĩa andũ airũ maageragĩra nĩ gwatũmire nyingĩre gĩkundi-inĩ kĩa Rastafaria. Ngĩambĩrĩria kũrera rasta, kũgucia bangi, ngĩtiga kũrĩaga nyama, na ngĩambĩrĩria gũtetera wĩyathi wa andũ airũ. O na kũrĩ ũguo, ndiatiganire na mĩthiĩre yakwa ya waganu, na ndiatigire kwĩrorera thenema cia mbaara. Ningĩ no ndathiire na mbere kũhũthĩra mĩario mĩũru.

ŨRĨA BIBILIA YAGARŨRIRE MŨTŨŨRĨRE WAKWA: Mwaka-inĩ wa 1995, ndĩ na mĩaka ta 20, nĩ ndambĩrĩirie gwĩciria na kinyi kũrĩa ũtũũro wakwa weerekeire. Ndathomaga mabuku mothe ma Rastafaria marĩa ingĩonire. Mamwe ma mo nĩ maagwetaga maandĩko ma Bibilia, no ndiataũkagĩrũo nĩ ũrĩa maamataaragĩria. Kwoguo ngĩtua itua rĩa gwĩthomera Bibilia.

Thutha-inĩ, mũrata ũmwe Mũrastafaria nĩ aaheire ibuku rĩa kwĩruta Bibilia rĩacabĩtwo nĩ Aira a Jehova. Ngĩambĩrĩria kwĩruta ibuku rĩu ndĩ wiki ngĩhũthĩra Bibilia. Thutha ũcio nĩ ndacemanirie na Aira a Jehova na tũkĩambĩrĩria kwĩruta Bibilia hamwe nao.

Thutha wa kwĩrutanĩria mũno, nĩ ndahotire gũtiga kũgucia bangi na kũnyua njohi gũkĩria gĩthimi. (2 Akorintho 7:1) Ningĩ nĩ ndacenjirie mwĩhumbĩre wakwa, ngĩenja rasta iria ndaarĩ nacio, ngĩtiga kwĩrorera ponografĩ na thenema cia mbaara, na ngĩtiga kũhũthĩra mĩario mĩũru. (Aefeso 5:3, 4) Marigĩrĩrio-inĩ, o na nĩ ndaniinire mũthutũkanio ũrĩa ndarĩ naguo kwerekera andũ erũ. (Atũmwo 10:34, 35) Gwĩka mogarũrũku macio kwahutĩtie gũtigana na nyĩmbo iria ciacogagĩra mũthutũkanio na gũtiga kũnyitanĩra na arata akwa a hau kabere arĩa mangĩangucĩrĩirie gũcokerera mũtũũrĩre wakwa wa tene.

Thutha wa gwĩka mogarũrũku macio, nĩ ndacaririe Nyũmba ya Ũthamaki ya Aira a Jehova, na ngĩmoria kana no nduĩke ũmwe wao. Hĩndĩ ĩyo nĩrĩo ndambĩrĩirie kwĩruta Bibilia nao. Rĩrĩa ndatuire itua rĩa kũbatithio nduĩke Mũira wa Jehova, famĩlĩ itũ ndĩakenire. Mami aanjĩrire thuure ndini ĩngĩ ya “Gĩkristiano” no ti ya Aira a Jehova. Maama witũ ũmwe warĩ mũndũ wĩ gatũ thirikari-inĩ nĩ aandetagia mũno nĩ ũndũ wa itua rĩakwa rĩa kũnyitanĩra na Aira a Jehova.

O na kũrĩ ũguo, kwĩruta ũrĩa Jesu aarũmbũyanagia na andũ na kũrũmĩrĩra ũtaaro wake nĩ kwandeithirie gũkirĩrĩria ũkararia o hamwe na kũnyũrũrio. Rĩrĩa ndaringithanirie ũrĩa Aira a Jehova marutanaga na ũrĩa Bibilia yugaga, ndaarĩ na ma atĩ nĩ ndona ndini ĩrĩa ya ma. Kwa ngerekano, nĩ mahingagia watho wa Bibilia wĩgiĩ kũhunjĩria andũ arĩa angĩ. (Mathayo 28:19, 20; Atũmwo 15:14) Na matiĩingĩranagia na ũteti.—Thaburi 146:3, 4; Johana 15:17, 18.

ŨRĨA NGʼUNĨKĨTE: Kwĩruta gũikara kũringana na ithimi cia Bibilia nĩ kũndeithĩtie na njĩra nyingĩ. Kwa ngerekano, gũtiga bangi nĩ kũndeithĩtie kũhonokia mbeca nyingĩ o mweri. Rĩu nĩ ndatigire gũbogotha, na ũgima wakwa wa mwĩrĩ na wa meciria nĩ wagagĩrĩte.

Rĩu ũtũũro wakwa wĩ na mwerekera na muoroto ũrĩa ndatũire ndĩriragĩria kuuma ndĩ o mũnini. Na ũndũ wa bata makĩria nĩ atĩ, rĩu nĩ hotete gũkuhĩrĩria Ngai.—Jakubu 4:8.

“Nĩ ndĩrutĩte kwaga kũrakara na ihenya.”—MARTINO PEDRETTI

MĨAKA: 43

BŨRŨRI: AUSTRALIA

HISTORĨ: MWENDIA WA NDAWA CIA KŨREBIA

MŨTŨŨRĨRE WAKWA WA HAU KABERE: Ndĩ mũnini, famĩlĩ itũ nĩ yathamathamaga kaingĩ. Twanaikara tũtaũni tũnini, taũni nene, na kwa ihinda tũgĩikara gĩcagi-inĩ kĩmwe kĩa Australia gĩaikaragwo nĩ andũ a ũndũire wa kũu. Nĩ ndirikanaga mahinda mega marĩa twarĩ namo tũrĩ hamwe na aa maama na ciana ciao tũgĩtega thamaki, tũkĩhĩta, na tũgĩthondeka indo cia ũndũire wa kũu.

Baba aarĩ mũrũi wa ngundi na aambĩrĩirie kũnduta kũrũa kuuma ndĩ mũnini mũno. Nĩ ndaarũaga na andũ kaingĩ. Ndĩ mĩaka-inĩ ya ũtinĩnja, ndahũthagĩra mahinda maingĩ irabu-inĩ ngĩnyua. Nĩ twacogothaga andũ tũrĩ na arata akwa nĩguo tũrũe nao. Twahũthagĩra tũhiũ na mĩtĩ ya gũthaaka baseball gũtharĩkĩra gĩkundi kĩa andũ ta 20 kana makĩria.

Ndonaga mbeca na njĩra ya kwendia ndawa cia kũrebia na indo iria ciaiyagwo nĩ aruti wĩra a meri. Ningĩ nĩ ndaateithagia endia a ndawa cia kũrebia kũrogota mbeca kuuma kũrĩ andũ arĩa maarĩ na mathiirĩ mao na ngamahahũra ngĩhũthĩra mĩcinga. Muoroto wakwa warĩ gũtuĩka mũũragani. Ndahũthagĩra watho ũyũ: Ũragana Ũtanoragwo.

ŨRĨA BIBILIA YAGARŨRIRE MŨTŨŨRĨRE WAKWA: Ngĩkũra nĩ ndaiguĩte ũhoro wĩgiĩ Aira a Jehova. Rĩrĩa ndaarĩ na mĩaka ta 20, nĩ ndĩraririkana ngĩũria mami kana nĩ oĩ Mũira wa Jehova o na ũmwe kũrĩa aaikaraga. Thutha wa thikũ igĩrĩ, Mũira wa Jehova ũmwe wĩtagwo Dixon nĩ aanjereire. Thutha wa kwarangia nake maita maigana ũna, nĩ aanyitire ũgeni mĩcemanio-inĩ ya Aira a Jehova. Nĩ ndathiire mĩcemanio-inĩ ĩyo, na rĩu ngoretwo ngĩthiĩ kuo makĩria ma mĩaka 20. Aira a Jehova nĩ maahotire kũnjokeria kĩũria o gĩothe ndaarĩ nakĩo makĩhũthĩra Bibilia.

Nĩ ndakenire kwĩruta atĩ Jehova nĩ arũmbũyagia andũ othe, nginya arĩa makoragwo na mĩthiĩre mĩũru. (2 Petero 3:9) Nĩ ndamenyire atĩ nĩ Ithe witũ ũtwendete, na nĩ anũmbũyagia nginya rĩrĩa hatarĩ mũndũ ũngĩ ũreka ũguo. Ningĩ nĩ ndakenire kũmenya atĩ nĩ angĩanjoheire mehia makwa ingiagarũrĩire mĩthiĩre yakwa. Rĩandĩko rĩa Aefeso 4:22-24 nĩ rĩahutirie na njĩra nene mũno. Rĩandĩko rĩu rĩanjĩkĩrire ngoro “kwĩyaũra ũmũndũ ũrĩa wa tene” na “[kwĩhumba] ũmũndũ mwerũ ũrĩa wombirũo kũringana na wendi wa Ngai.”

Ndwarĩ ũndũ mũhũthũ gũcenjia mũtũũrĩre wakwa. Nĩ ingĩagire kũhũthĩra ndawa cia kũrebia gatagatĩ-inĩ ga kiumia, no rĩrĩa twacemania na arata akwa wikendi, ngekora ngĩcihũthĩra. Nĩ ndataũkĩirũo atĩ nĩguo ngarũrĩre ũtũũro wakwa, nĩ ndabataraga kweherera arata akwa. Na kwoguo ngĩtua itua rĩa gũthaamĩra gĩcigo kĩngĩ kĩa Australia. Arata amwe akwa maanjũririe kana no tũthiĩ nao, na ngĩtĩkĩra. Tũrĩ rũgendo-inĩ nĩ maambĩrĩirie kũgucia bangi na makĩhe o na niĩ ngucie. Ndameerire nĩ nduĩte itua rĩa gũtigana na mũtugo ũcio na tũgĩtiganĩra mũhaka-inĩ wa gĩcigo kĩu. Thutha-inĩ nĩ ndacokire kũmenya atĩ kahinda kanini thutha ũcio, arata akwa nĩ maaiyire bengi makĩhũthĩra mũcinga.

ŨRĨA NGʼUNĨKĨTE: Thutha wa gũtigana na arata acio akwa, nĩ wakorirũo ũrĩ ũndũ mũhũthũ gwĩka mogarũrũku marĩa maabataranagia ũtũũro-inĩ wakwa. Mwaka-inĩ wa 1989, nĩ ndabatithirio ngĩtuĩka Mũira wa Jehova. Thutha wa kũbatithio, mwarĩ wa maitũ, mami, na baba nĩ maanyitanĩire na niĩ gũtungatĩra Jehova.

Rĩu ngoretwo ndĩ kĩhiko-inĩ mĩaka 17 na ndĩna ciana ithatũ nyendete mũno. Nĩ ndĩrutĩte kwaga kũrakara na ihenya o na rĩrĩa arĩa angĩ mageria kũndakaria. Na nĩ ndĩrutĩte kwenda andũ a kuuma ‘ndũrĩrĩ, mĩhĩrĩga, na thiomi ciothe.’ (Kũguũrĩrio 7:9) Nĩ nyonete ũũma wa ciugo ici cia Jesu: “Mũngĩtũũra kiugo-inĩ gĩakwa, mũgũkorũo mũrĩ arutwo akwa kũna, na nĩ mũkũmenya ũhoro ũrĩa wa ma, naguo ũhoro ũrĩa wa ma ũmũkũũre ũkombo-inĩ.”—Johana 8:31, 32.