Wagĩrĩirũo Kwĩyamũrĩra Jehova Nĩkĩ?

“Ngai ũrĩa niĩ ndĩ wake . . . atũmire mũraika wake ũtukũ, arũgama hakuhĩ na niĩ.”—ATŨM. 27:23.

1. Arĩa marenda kũbatithio makoragwo moete makinya marĩkũ, na ũndũ ũcio ũraumĩria ciũria irĩkũ?

“HIHI nĩ wĩrirĩte mehia maku, ũkeyamũrĩra Jehova, na ũgetĩkĩra njĩra yake ya kũhonokania kũgerera harĩ Jesu Kristo?” Kĩu nĩ kĩũria kĩmwe harĩ ciũria iria igĩrĩ ciũragio arĩa marabatithio mũthia-inĩ wa mĩario ya kũbatithio. Akristiano mabataraga kwĩyamũrĩra Jehova nĩkĩ? Kwĩyamũrĩra Ngai gũtũgunaga atĩa? Nĩkĩ ũthathaiya witũ ndũngĩtĩkĩrĩka harĩ Ngai tũtamwĩyamũrĩire? Nĩguo tũmenye macokio ma ciũria icio, reke twambe tũmenye kwĩyamũrĩra Ngai nĩ kuuga atĩa.

2. Kwĩyamũrĩra Jehova nĩ kuuga atĩa?

² Kwĩyamũrĩra Ngai nĩ kuuga atĩa? Rora wone ũrĩa mũtũmwo Paulo aataarĩirie ũrata wake hamwe na Ngai. Paulo akĩaria na andũ meri-inĩ ĩrĩa yathũkangire eetire Jehova “Ngai ũrĩa niĩ ndĩ wake.” (Thoma Atũmwo 27:22-24.) Akristiano othe a ma nĩ a Jehova. Ngũrani na ũguo, thĩ yothe “ĩkoragwo rungu rwa hinya wa ũrĩa mũũru.” (1 Joh. 5:19) Akristiano matuĩkaga a Jehova rĩrĩa mamwĩyamũrĩra kũgerera mahoya. Mũndũ ekaga ũguo na njĩra ya kwĩhĩta mbere ya Ngai. Thutha-inĩ agacoka akabatithio maĩ-inĩ.

3. Kũbatithio kwa Jesu kuoonanagia ũndũ ũrĩkũ, na arũmĩrĩri ake mangĩĩgerekania na kĩonereria gĩake atĩa?

³ Jesu nĩ aatũigĩire kĩonereria rĩrĩa aatuire itua rĩa gwĩka wendi wa Ngai. Tondũ aaciarĩirũo rũrĩrĩ-inĩ rwa Aisiraeli rũrĩa rweyamũrĩire Ngai, nĩ kuonania atĩ o nake nĩ eyamũrĩire Ngai. O na kũrĩ ũguo, rĩrĩa aabatithirio, eekire ũndũ mũnene gũkĩra ũrĩa wabataranagia Watho-inĩ. Kiugo kĩa Ngai kĩonanagia atĩ aaugire: “Nĩ ndoka nĩguo njĩke wendi waku, wee Ngai.” (Ahib. 10:7; Luk. 3:21) Kwoguo ũbatithio wa Jesu wonanagia atĩ Jesu nĩ eerutĩire harĩ Ngai biũ nĩguo ahingie wendi wa Ithe. Arũmĩrĩri ake megerekanagia nake rĩrĩa mabatithio. No rĩrĩa o mabatithio na maĩ, makoragwo makĩonia andũ othe atĩ nĩ meyamũrĩire Ngai kũgerera mahoya.

Ũrĩa Kwĩyamũrĩra Ngai Gũtũgunaga

4. Ũrata gatagatĩ ka Daudi na Jonathani ũratũruta atĩa ũhoro wĩgiĩ kwĩrutĩra?

⁴ Harĩ Akristiano, kwĩyamũrĩra Ngai nĩ ũndũ wa bata mũno. Kwĩyamũrĩra Ngai kũbataraga mũndũ erutĩre biũ, no ningĩ nĩ kũhutĩtie maũndũ mangĩ makĩria. No rĩrĩ, kwĩyamũrĩra Ngai gũtũgunaga atĩa? Rekei tũringithanie ũndũ ũcio na ũrĩa andũ magunĩkaga rĩrĩa merutĩra biũ maũndũ-inĩ matiganĩte ma ũtũũro. Ngerekano ĩmwe nĩ ũrata. Nĩguo ũgunĩke nĩ ũndũ wa kũgĩa na mũrata, no mũhaka wĩtĩkĩre ũigĩrĩrĩki ũrĩa uumanaga na mũndũ gũkorũo arĩ mũrata. Ũndũ ũcio ũbataraga mũndũ erutĩre biũ tondũ nĩ aiguaga arĩ na ũigĩrĩrĩki wa kũrũmbũiya mũrata wake. Ũrata ũmwe warĩrĩirio Bibilia-inĩ nĩ wa Daudi na Jonathani. Maathondekire nginya kĩrĩkanĩro kĩa ũrata wao. (Thoma 1 Samueli 17:57; 18:1, 3.) O na gũtuĩka arata ta acio ti aingĩ, kaingĩ ũrata nĩ ũgĩaga na hinya rĩrĩa arata maigua marĩ na ũigĩrĩrĩki wa kũrũmbũyania.—Thim. 17:17; 18:24.

5. Ngombo ĩngĩagunĩkire atĩa nĩ ũndũ wa gũthiĩ na mbere gũikara kwa mwathi wayo mwega?

⁵ Watho ũrĩa Aisiraeli maaheetwo nĩ Ngai, nĩ ũndũ ũngĩ wonanagia ũrĩa andũ maagunĩkaga nĩ ũndũ wa kwĩrutĩra. Ngombo ĩngĩendire gũthiĩ na mbere gũikara kwa mwathi wayo mwega nĩguo ĩkenere ũgitĩri wake, yabatiĩ kũrĩkanĩra kĩrĩkanĩro na mwathi wayo gĩa gũtũũra tene na tene. Watho waugĩte ũũ: “No ngombo ĩyo ĩngiuga ũũ: ‘Nĩ nyendete mwathi wakwa, mũtumia wakwa o na ciana ciakwa; ndikwenda kũrekererio,’ mwathi wayo nĩ akaamĩtwara mbere ya Ngai ũrĩa wa ma. Ningĩ amĩtware mũrango-inĩ kana gĩtugĩ-inĩ kĩa mũrango, acoke amĩtũre gũtũ na mũkuha, nayo ĩtuĩke ngombo yake ũtũũro-inĩ wayo wothe.”—Tham. 21:5, 6.

6, 7. (a) Kũrĩkanĩra maũndũ kũgunaga andũ atĩa? (b) Ũndũ ũcio ũronania atĩa ũhoro-inĩ wĩgiĩ ũrata witũ na Jehova?

⁶ Kĩhiko nĩ ũndũ ũngĩ ũbataraga kwĩrutĩra gwa gĩkĩro kĩa igũrũ mũno. Mũndũ erutagĩra biũ nĩguo ahingie mwĩhĩtwa wake to harĩ kĩhiko tu, no nĩ nginya harĩ mũndũ ũcio mahikanĩtie nake. Andũ erĩ maraikarania matahikanĩtie kĩwatho, matingĩkenera ũgitĩri ta ũcio na nginya ciana ciao itingĩkorũo naguo. No andũ erĩ matuĩte itua irũmu rĩa gũikarania hamwe thĩinĩ wa kĩhiko gĩtheru, nĩ makoragwo na itũmi cia Kĩĩmandĩko cia gũikarania hamwe mendaine na kũhiũrania na mathĩna marĩa maumĩra.—Mat. 19:5, 6; 1 Kor. 13:7, 8; Ahib. 13:4.

⁷ Mahinda-inĩ ma Bibilia, andũ nĩ maagunĩkaga nĩ ũndũ wa kũiguithanĩria na kwandĩkanĩra maũndũ-inĩ ma biacara na rĩrĩa mũndũ arandĩkwo wĩra. (Mat. 20:1, 2, 8) O na mahinda-inĩ maya noguo kũrĩ. Kwa ngerekano, nĩ tũgunĩkaga rĩrĩa twandĩkanĩra maũndũ megiĩ biacara, kana tũtanambĩrĩria kũruta wĩra kambũni-inĩ. Kwoguo angĩkorũo kwĩrutĩra na kũrĩkanĩra maũndũ nĩ gũteithagia andũ mũno ũhoro-inĩ wĩgiĩ ũrata, kĩhiko, na wĩra-rĩ, githĩ ti kuonania atĩ kwĩyamũrĩra Ngai no gũteithie mũndũ mũno ũhoro-inĩ wĩgiĩ ũrata wake hamwe na Jehova! Rekei twarĩrĩrie ũrĩa tene andũ maagunĩkaga nĩ ũndũ kwĩyamũrĩra Jehova Ngai, na ũrĩa ũndũ ũcio ũrĩ mwega makĩria o na gũkĩra kwĩrutĩra.

Ũrĩa Kwĩyamũrĩra Ngai Kwagunire Aisiraeli

8. Aisiraeli gũkorũo meyamũrĩire Ngai kuonanagia ũndũ ũrĩkũ?

⁸ Rũrĩrĩ rwa Isiraeli rũrĩ ruothe nĩ rweyamũrĩire Ngai rĩrĩa rwehĩtire mwĩhĩtwa harĩ Ngai. Jehova eerire Aisiraeli macemanie Kĩrĩma-inĩ gĩa Sinai na akĩmeera ũũ: “Mũngĩathĩkĩra mũgambo wakwa biũ na mũmenyagĩrĩre kĩrĩkanĩro gĩakwa, nĩ mũgũtuĩka kĩndũ gĩakwa kĩa mwanya kuuma harĩ ikundi ciothe cia andũ.” Nao Aisiraeli magĩtĩkanĩria makiuga ũũ: “Nĩ twĩhaarĩirie gwĩka ũrĩa wothe Jehova oigĩte.” (Tham. 19:4-8) Aisiraeli gũkorũo meyamũrĩire Ngai nĩ kwahutĩtie ũndũ ũngĩ makĩria ma gũkorũo na ũigĩrĩrĩki wa gwĩka ũndũ mũna. Ũndũ ũcio wonanirie atĩ nĩ maatuĩkĩte a Jehova, na Jehova akĩambĩrĩria kũmona marĩ ‘kĩndũ gĩake kĩa mwanya.’

9. Aisiraeli maagunĩkaga atĩa nĩ ũndũ wa gũkorũo meyamũrĩire Ngai?

⁹ Aisiraeli nĩ maagunĩkaga nĩ ũndũ wa gũkorũo marĩ a Jehova. Aakoragwo arĩ mwĩhokeku harĩ o, na aamarũmbũyagia o ta ũrĩa mũciari arũmbũyagia kaana gake. Eerire Aisiraeli ũũ: “Hihi mũtumia no ariganĩrũo nĩ kaana karĩa arongithia kana age kũiguĩra tha mũrũwe ũrĩa woimire nda yake? O na atumia acio mangĩriganĩrũo, niĩ ndirĩ hĩndĩ ingĩriganĩrũo nĩwe.” (Isa. 49:15) Jehova nĩ aamaheaga ũtongoria kũgerera Watho, akamekĩra ngoro kũgerera anabii, na akamagitĩra kũgerera araika. Mwandĩki ũmwe wa thaburi aandĩkire ũũ: “Nĩ amenyithagia Jakubu kiugo gĩake, na akamenyithia Isiraeli mawatho na matuĩro make. Ndarĩ eka ũguo harĩ rũrĩrĩ rũngĩ o ruothe.” (Thab. 147:19, 20; thoma Thaburi 34:7, 19; 48:14.) O ta ũrĩa Jehova aarũmbũyagia rũrĩrĩ rwake tene, noguo arũmbũyagia arĩa mamwĩyamũragĩra ũmũthĩ.

Twagĩrĩirũo Kwĩyamũrĩra Ngai Nĩkĩ?

10, 11. Hihi andũ maciaragwo marĩ famĩlĩ-inĩ ya Ngai? Taarĩria.

¹⁰ Andũ amwe magĩciria kana nĩ mekwĩyamũrĩra Ngai na mabatithio no meyũrie ũũ: ‘Ndingĩthathaiya Ngai itamwĩyamũrĩire?’ No tuone macokio ma kĩũria kĩu, tũngĩciria ũhoro wĩgiĩ mũrũgamo witũ mbere ya Ngai ihinda-inĩ rĩrĩ. Ririkana atĩ, nĩ ũndũ wa mehia ma Adamu, ithuothe tũciaragwo nja wa famĩlĩ ya Ngai. (Rom. 3:23; 5:12) Kwoguo kwĩyamũrĩra Ngai nĩ ũndũ wa bata mũno nĩ getha twĩtĩkĩrĩke famĩlĩ-inĩ ya Ngai. Reke tuone nĩkĩ.

¹¹ Tondũ gũtirĩ mũndũ mũkinyanĩru, gũtirĩ mũciari ũngĩhota gũtũgaĩra muoyo mũkinyanĩru ta ũrĩa Ngai aatanyĩte. (1 Tim. 6:19) Tũciaragwo tũtarĩ ciana cia Ngai tondũ rĩrĩa andũ a mbere mehirie, andũ nĩ maatigithũkanirio na Ithe witũ ũrĩ wendo. (Ringithania Gũcokerithia Maathani 32:5.) Kuuma hĩndĩ ĩyo gũthiĩ na mbere, andũ makoragwo nja wa famĩlĩ ya Jehova matigithũkanĩtio na Ngai.

12. (a) Andũ matarĩ akinyanĩru mangĩka atĩa nĩguo metĩkĩrĩke famĩlĩ-inĩ ya Ngai? (b) Nĩ maũndũ marĩkũ tũrabatara gwĩka mbere ya tũbatithĩtio?

¹² O na kũrĩ ũguo, tũrĩ mũndũ ũmwe ũmwe no tũũrie Ngai atwĩtĩkĩre tũtariĩ ta ndungata thĩinĩ wa famĩlĩ yake.a Ũndũ ũcio ũngĩhoteka atĩa na tũrĩ andũ ehia? Mũtũmwo Paulo aandĩkire ũũ: “Rĩrĩa twarĩ thũ nĩ twaiguithanirio na Ngai kũgerera gĩkuũ kĩa Mũrũ wake.” (Rom. 5:10) Rĩrĩa twabatithio, tũkoragwo tũkĩra Jehova atũhe thamiri njega nĩguo twĩtĩkĩrĩke nĩwe. (1 Pet. 3:21) No nĩ harĩ maũndũ twagĩrĩirũo gwĩka mbere ya kũbatithio. Tũrabatara kũmenya Ngai, twĩrute kũmwĩhoka, twĩrire, na tũcenjie mĩthiĩre itũ. (Joh. 17:3; Atũm. 3:19; Ahib. 11:6) Harĩ na ũndũ ũngĩ twagĩrĩirũo gwĩka nĩguo twĩtĩkĩrĩke famĩlĩ-inĩ ya Ngai. Nĩ ũndũ ũrĩkũ ũcio?

13. Mũndũ agĩrĩirũo kwĩyamũrĩra Ngai nĩkĩ nĩgetha etĩkĩrĩke famĩlĩ-inĩ ya athathaiya a Ngai?

¹³ Nĩguo mũndũ wamũranĩtio na Ngai etĩkĩrĩke famĩlĩ-inĩ ya Jehova, arabatara kwamba kũrĩkanĩra kĩrĩkanĩro na Jehova. Nĩ getha tũtaũkĩrũo nĩ ũndũ ũcio, ta hũũra mbica mũthuri ũheetwo gĩtĩo onete mwana ũtarĩ aciari na akaringwo nĩ tha akerirĩria kũmũtua wa famĩlĩ yake. Andũ nĩ moĩ atĩ mũthuri ũcio akoragwo arĩ mwega. No mũthuri ũcio atanetĩkĩra mwana ũcio atuĩke mũriũ akamba akamwĩra amwĩrĩre ũndũ ũmwe. Kwoguo mũthuri ũcio akamwĩra: “Mbere ya ngwĩtĩkĩrĩte ũtuĩke mũrũ wakwa, no nyende kũmenya kana nĩ ũrĩnyonagia wendo na ũkahe gĩtĩo ndĩ ta baba wanyu.” Mwanake ũcio angĩtĩkĩra ũndũ ũcio, norĩo tu mũthuri ũcio angĩmwĩtĩkĩra famĩlĩ-inĩ yake. Hihi mwanake ũcio no auge atĩ ũndũ ũcio nĩ mũritũ? Ũndũ ũmwe na ũcio, Jehova etĩkagĩra o andũ arĩa tu mehaarĩirie kwĩhĩta mwĩhĩtwa wa kũmwĩyamũrĩra nĩguo maingĩre famĩlĩ-inĩ yake. Bibilia yugaga ũũ: “Mũrute mĩĩrĩ yanyu ĩrĩ igongona rĩrĩ muoyo, itheru na rĩretĩkĩrĩka nĩ Ngai.”—Rom. 12:1.

Kwĩyamũrĩra Ngai nĩ Gĩĩko kĩa Wendo na Wĩtĩkio

14. Kwĩyamũrĩra Ngai kuonanagia wendo na njĩra ĩrĩkũ?

¹⁴ Mwĩhĩtwa wa kwĩyamũrĩra Ngai nĩ gĩĩko kĩonanagia atĩ nĩ twendete Jehova kuuma ngoro. Nĩ ũhaanaine na mwĩhĩtwa wa kĩhiko na njĩra imwe. Mũkristiano ũrĩa ũrahikania onanagia wendo wake na njĩra ya kwĩhĩta gũkorũo arĩ mwĩhokeku harĩ ũrĩa marahikania nake o na moritũ mangiumĩra. To kuuga tu, no akoragwo na ma biũ atĩ nĩ ekũhingia ũndũ ũcio. Mũkristiano ũrĩa ũrahikania nĩ ataũkagĩrũo atĩ ndangĩgĩa na mweke wa gũikarania na ũrĩa marahikania nake angĩaga kwĩhĩta mwĩhĩtwa wa kĩhiko. O ũndũ ũmwe na ũcio, tũtingĩkenera biũ ũguni wa gũkorũo famĩlĩ-inĩ ya Jehova tũtehĩtĩte mwĩhĩtwa wa kwĩyamũrĩra Jehova. Kwoguo twĩyamũragĩra Ngai tondũ o na gũtuĩka tũtirĩ akinyanĩru, nĩ twĩriragĩria gũkorũo tũrĩ ake na gũtua itua rĩa gũkorũo tũrĩ ehokeku harĩ we ona gwathiĩ atĩa.—Mat. 22:37.

15. Kwĩyamũrĩra Ngai kuonanagia wĩtĩkio na njĩra ĩrĩkũ?

¹⁵ Nĩ tuonanagia tũrĩ na wĩtĩkio rĩrĩa tweyamũrĩra Ngai. Tũngiuga ũguo nĩkĩ? Wĩtĩkio witũ harĩ Jehova ũtũmaga tũgĩe na ũũma atĩ gũkuhĩrĩria Ngai nĩkuo kwega na ithuĩ. (Thab. 73:28) Nĩ tũĩ atĩ ndũrĩkoragwo ũrĩ ũndũ mũhũthũ gũtwarana na Ngai tũrĩ gatagatĩ-inĩ ka “rũciaro ruogomu na rũhĩngĩcanu,” no twĩna ma atĩ Ngai nĩ arĩhingagia kĩĩranĩro gĩake gĩa gũtũtirĩrĩra rĩrĩa twerutanĩria gwĩka ũguo. (Afil. 2:15; 4:13) Nĩ tũĩ atĩ tũtirĩ akinyanĩru, no twĩna ma atĩ Jehova nĩ arĩtuonagia tha o na rĩrĩa twahĩtia. (Thoma Thaburi 103:13, 14; Aroma 7:21-25.) Tũrĩ na wĩtĩkio atĩ Jehova nĩ arĩtũrathimaga twathiĩ na mbere kwĩrutanĩria gũtũũria wĩkindĩru witũ.—Ayub. 27:5.

Kwĩyamũrĩra Ngai nĩ Kũrehaga Gĩkeno

16, 17. Kwĩyamũrĩra Jehova kũrehaga gĩkeno nĩkĩ?

¹⁶ Kwĩyamũrĩra Jehova nĩ kũrehaga gĩkeno tondũ nĩ kũhutanĩtie na kwĩheana. Jesu aaugire ũũ: “Kũheana nĩ kũrĩ gĩkeno kĩnene gũkĩra kwamũkĩra.” (Atũm. 20:35) Jesu we mwene nĩ aagĩire na gĩkeno kĩrĩa kiumanaga na kũheana hĩndĩ ya ũtungata wake gũkũ thĩ. Kũrĩ hĩndĩ aagaga kũhurũka, akaga kũrĩa, na agaikara ũtũũro mũhũthũ nĩguo ateithie arĩa angĩ kuona njĩra ya muoyo-inĩ. (Joh. 4:34) Jesu nĩ aakenaga gwĩka maũndũ marĩa maakenagia ngoro ya Ithe. Jesu aaugire: “Hingo ciothe njĩkaga maũndũ marĩa mamũkenagia.”—Joh. 8:29; Thim. 27:11.

¹⁷ Nĩkĩo Jesu eerire arũmĩrĩri ake ũrĩa mangĩka nĩguo makorũo na ũtũũro mwega rĩrĩa aameerire ũũ: “Mũndũ o wothe angĩenda kũnũmĩrĩra, nĩ erege.” (Mat. 16:24) Gwĩka ũguo nĩ gũtũmaga tũkuhĩrĩrie Jehova makĩria. Gũtirĩ mũndũ ũngĩ tũngĩĩneana kũrĩ we ũngĩtuonia wendo mũnene gũkĩra Jehova.

18. Nĩkĩ gũtũũra kũringana na wĩyamũrĩri witũ harĩ Jehova nĩ kũrehaga gĩkeno gũkĩra kwĩyamũrĩra kĩndũ kana mũndũ ũngĩ o wothe?

¹⁸ Kwĩyamũrĩra Jehova na gũtũũra kũringana na wĩyamũrĩri ũcio na njĩra ya gwĩka wendi wake kũrehaga gĩkeno kĩnene gũkĩra kwĩyamũrĩra kĩndũ kana mũndũ ũngĩ o wothe. Kwa ngerekano, andũ aingĩ nĩ mahũthagĩra ũtũũro wao gwetha indo cia kĩĩmwĩrĩ no matigĩaga gĩkeno kĩa ma na matiiganagĩra. No arĩa meyamũragĩra Jehova nĩ magĩaga na gĩkeno gĩa gũtũũra. (Mat. 6:24) Gĩtĩo gĩa gũkorũo marĩ “arutithania wĩra hamwe na Ngai” nĩ gĩtũmaga makene, no handũ ha kwĩyamũrĩra wĩra mũna, makoragwo meyamũrĩire Ngai. (1 Kor. 3:9) Gũtirĩ mũndũ ũngĩonania ngatho nĩ ũndũ wa kwĩima kwao gũkĩra Jehova. O na nĩ agacokeria arĩa ehokeku wĩthĩ wao nĩguo makenere kũrũmbũiyo nĩwe tene na tene.—Ayub. 33:25; thoma Ahibirania 6:10.

19. Arĩa meyamũrĩire Jehova makenagĩra mweke ũrĩkũ?

¹⁹ Kwĩyamũrĩra Jehova nĩ gũtũmaga ũmũkuhĩrĩrie makĩria. Bibilia yugaga ũũ: “Kuhĩrĩriai Ngai, nake nĩ ekũmũkuhĩrĩria.” (Jak. 4:8; Thab. 25:14) Thĩinĩ wa gĩcunjĩ kĩrĩa kĩrũmĩrĩire, nĩ tũkuona kĩrĩa kĩngĩtũma tũkorũo na ma atĩ itua rĩa gũkorũo tũrĩ a Jehova nĩrĩo rĩega biũ.

[Kohoro ka magũrũ-inĩ]

Ũngĩcokia Atĩa?

• Kwĩyamũrĩra Ngai kuugĩte atĩa?

• Kwĩyamũrĩra Ngai gũtũgunaga atĩa?

• Akristiano mabataraga kwĩyamũrĩra Jehova nĩkĩ?

[Mbica karatathi ga 6]

Gũikara kũringana na wĩyamũrĩri witũ kũrehaga gĩkeno gĩa tene na tene