Twagĩrĩirũo Kwaranĩria na Ũ Ciikaro-inĩ cia Roho?
NGAI MWENE-HINYA-WOTHE nĩ ehokeire ciũmbe cia roho mawĩra ngũrani. Kwa ngerekano-rĩ, nĩ aheete Jesu Kristo wĩra wa gwathana gũkũ thĩ, na ningĩ nĩ amũrĩte araika ehokeku gũteithĩrĩria wĩra wa kũhunjia ũhoro mwega. (Kũguũrĩrio 14:6) No rĩrĩ, ndekĩte ũguo igũrũ rĩgiĩ mahoya. Gũtirĩ kĩũmbe aheete wĩra wa kũigua mahoya. Mahoya maitũ magĩrĩirũo kwerekerio kũrĩ o Ngai we mwene.
Jehova nĩwe “mũigua wa mahoya.” (Thaburi 65:2) Nĩ athikagĩrĩria mahoya maitũ, na akamacokia. Mũtũmwo Johana akĩandĩkĩra ndungata iria ingĩ cia Jehova igũrũ rĩgiĩ mahoya-rĩ, oigire ũũ: “Twahoya ũndũ waganĩrĩire na kwenda gwake, nĩatũiguaga; no ongorũo nĩtũũĩ atĩ twahoya ũndũ o ũrĩkũ no atũiguaga-rĩ, nĩtũũĩ atĩ maũndũ macio tũmũhoete tũrĩ ahe.”—1 Johana 5:14, 15.
Araika arĩa ehokeku matiendaga tũmoorie matũthaithanĩrĩre kana tũmahoe. Nĩ mamenyaga wega na makanyitanĩra na mũbango wa Ngai wa mahoya, ũrĩa rĩmwe ũkoragwo ũkĩmahuutia ĩmwe kwa ĩmwe. Na njĩra ĩrĩkũ? Rĩrĩa mũnabii Danieli aahoire Jehova igũrũ rĩgiĩ kwanangwo kwa Jerusalemu, Ngai nĩ aacokirie mahoya ma Danieli na njĩra ya gũtũma mũraika Jibiraeli arĩ na ndũmĩrĩri ya kũmũũmĩrĩria.—Danieli 9:3, 20-22.
Ĩ Nacio Ndũmĩrĩri Kuuma Kũrĩ Akuũ?
Hihi nĩ twagĩrĩirũo kũgeria kwaranĩria na arĩa makuĩte? Ngʼano nyingĩ nĩ iganagwo cia ũrĩa andũ maanaranĩria na maroho ma arĩa makuĩte. Kwa ngerekano-rĩ, mũtumia ũmwe wa Ireland nĩ aakorirũo nĩ mũragũri ũmwe, ũrĩa wamwĩrire atĩ ũtukũ ũcio wahĩtũkĩte nĩ maaranĩirie na Fred, mũthuri wa mũtumia ũcio. No Fred nĩ akuĩte ciumia ciigana ũna mbere ĩyo. Mũragũri ũcio, akĩmwĩra maũndũ marĩa “Fred” oigĩte, marĩa mũtumia wake eeciragia atĩ nowe tu wamoĩ. Ndũngĩarĩ ũndũ mũritũ harĩ we gwĩtĩkia atĩ Fred aarĩ muoyo arĩ kĩũmbe kĩa roho na atĩ nĩ aageragia kwaranĩria nake kũgerera mũndũ ũcio. No rĩrĩ, ũndũ ũcio nĩ ũraregana na ũrĩa Bibilia yugaga igũrũ rĩgiĩ akuũ.—Rora ithandũkũ haha mũhuro.
No ngʼano ta icio ingĩtaarĩrio atĩa? Ũndũ ũmwe ndaimono ihũthĩraga kũheenia andũ, nĩ gwĩtua mũndũ ũkuĩte, haha cietuĩte Fred. Muoroto wacio nĩ ũrĩkũ? Nĩ gũthengia andũ kuuma ũrutani-inĩ wa Bibilia na kũnyihia wĩtĩkio na mwĩhoko wao harĩ Jehova. Hatarĩ nganja Shaitani na ndaimono mahĩtithagia andũ ‘na ũhoti wothe, na ciama, o na morirũ ma kũheenania, ningĩ na wara wothe ũtarĩ wa ũthingu, nĩguo maheenie andũ arĩa marĩ njĩra ya kũũra na maũndũ macio.’—2 Athesalonike 2:9, 10.
Nĩ ma, nĩ kũrĩ aragũri na arĩa meingĩranagia nao na nĩmetĩkĩtie biũ atĩ nĩ maranagĩria na akuũ. Ũrĩa kũrĩ nĩ atĩ, angĩkorũo he kĩndũ maranagĩria nakĩo, nĩ maroho marĩa mareganĩte na Jehova. O ũndũ ũmwe-rĩ, nĩ kũrĩ andũ makoragwo metĩkĩtie atĩ marathathaiya Ngai no tiguo. Mũtũmwo Paulo nĩ aatongoririo nĩ roho kwandĩka mũkaana ũyũ mũrũmu: “Indo iria andũ a Ndũrĩrĩ marutaga cia igongona nĩ ndaimono marutagĩra, ti Ngai.”—1 Akorintho 10:20, 21.
Tũkĩmenyaga atĩ no tũhoe Ũrĩa Mũnene Mũno, ũrĩa ũtwendete na ũtũrũmbũyagia-rĩ, nĩ kĩĩ kĩngĩtũma twende kũhoya mũndũ ũngĩ? Ningĩ-rĩ, Bibilia ĩtũũmagĩrĩria ũũ: “Nĩ gũkorũo Jehova orũragia maitho kũndũ guothe thĩ yothe akĩonania atĩ e na hinya mũno wa gũteithia andũ arĩa mamũrũmagĩrĩra na ngoro yao yothe.”—2 Maũndũ ma Matukũ ma Tene 16:9.
[Mbica karatathi ka 8]
Ma na Maheeni
MA: SHAITANI ARĨ KUO
“Shaitani o nake nĩehaananagia na mũraika wa ũtheri.”—2 Akorintho 11:14.
“Ikaragai mũterigĩtwo, na mwĩhũgage. Atĩrĩ, mũcukani, thũ yanyu, acangaga ta mũrũthi ũkũrarama, agĩcaragia mũndũ wa gũtambura.”—1 Petero 5:8.
“Ũrĩa wĩhagia nĩ wa mũcukani, amu mũcukani atũire ehagia kuuma o kĩambĩrĩria.”—1 Johana 3:8.
“Nĩ ũndũ ũcio athĩkagai nĩ Ngai; reganagai na mũcukani, nake nĩekũmũũrĩra.”—Jakubu 4:7.
“Mũcukani . . . aarĩ mũũragani kuuma o kĩambĩrĩria, na ndaigana kwĩrũgamania na ũhoro-ũrĩa-wa-ma, nĩgũkorũo ndarĩ na ũhoro-wa-ma o na hanini ngoro yake. Rĩrĩa ekwaria maheni, nĩ ũhoro wa ngoro yake mwene aaragia; amu nĩ wa maheni, na nowe ithe wamo.”—Johana 8:44.
MAHEENI: ANDŨ MAKUA MATUĨKAGA CIŨMBE CIA ROHO
“Irio ciaku-rĩ, ũrĩcirĩaga na thithino ya ũthiũ waku, o nginya rĩrĩa ũgacoka tĩri-inĩ; nĩ gũkorũo nĩkuo warutirũo; amu wee ũrĩ o rũkũngũ, ningĩ ũgacoka ũtuĩke o rũkũngũ.”—Kĩambĩrĩria 3:19.
“Arĩa me muoyo no moĩ atĩ nĩmagakua: no arĩa makuĩte-rĩ, matirĩ ũndũ moĩ, na matirĩ kĩndũ o na kĩ magacoka kuona gĩa ũtungati wao; nĩ gũkorũo kĩririkano kĩao nĩ kĩriganĩru biũ.”—Kohelethu 9:5.
“O ũrĩa ũrĩona wa gwĩka na guoko gwaku-rĩ, wĩke na kĩyo; nĩ ũndũ kũrĩa ũgathiĩ mbĩrĩra-inĩ, gũtirĩ wĩra ũrutagwo kuo, gũtirĩ rĩĩciria, kana ũmenyi, o na kana ũũgĩ.”—Kohelethu 9:10.
“Aathirũo nĩ mĩheehũ ĩo e nayo, acokaga thĩ o tĩri-inĩ na harĩa oimire; mũthenya o ro ũcio mathugunda make magathira.”—Thaburi 146:4.
MA: ARAIKA ARĨA EHOKEKU NĨ MATŨRŨMBŨYAGIA
“Arĩa etigĩri-Jehova-rĩ, mũraika wake nĩamaakagĩrĩra iraaro ciake hĩrĩrĩ, agakĩmatharaga ũgwati-inĩ.”—Thaburi 34:7; 91:11.
“Githĩ [araika] acio othe tio maroho marĩa matungatanagĩra, magatũmwo mateithanagie, nĩguo andũ monage ũteithio, o arĩa makiriĩ kũgaya igai rĩa kũhonokio? ”—Ahibirania 1:14.
“Ngĩona mũraika ũngĩ arerete rĩera-inĩ o gatagatĩ, arĩ na Ũhoro-Mwega ũtagathira o na tene wa kuumĩrĩria andũ arĩa matũire gũkũ thĩ, auumĩrĩrie ndũrĩrĩ ciothe na mĩhĩrĩga yothe na andũ a mĩario yothe na iruka ciothe; akiuga atĩrĩ, na mũgambo mũnene, Wĩtigĩrei Ngai, na mũmũgooce we.”—Kũguũrĩrio 14:6, 7.
MAHEENI: JESU NA NGAI NĨ MAIGANAINE
“Nĩngwenda mũmenye atĩrĩ, atĩ mũtwe wa mũndũ mũrũme o wothe nĩwe Kristo; na mũtwe wa mũndũ-wa-nja nĩwe mũndũ mũrũme; o na mũtwe wa Kristo nĩwe Ngai.”—1 Akorintho 11:3.
“Hĩndĩ ĩrĩa indo ciothe igakorũo irĩkĩtie gũtuĩka cia gwathagwo nĩwe, hĩndĩ ĩo Mũriũ o nake we mwene agatuĩka wa gwathagwo nĩ Ũcio watuire indo ciothe cia gwathagwo nĩwe, nĩ getha Ngai agĩtuĩke nĩwe maũndũ mothe biũ kũrĩ andũ o othe biũ.”—1 Akorintho 15:28.
“Ndamwĩra atĩrĩ, o ma, ma, Mũriũ ndangĩhota gwĩka ũndũ eĩrĩte we mwene, tiga ũrĩa onaga Ithe agĩka.”—Johana 5:19.
[Mbica karatathi ka 9]
Tũkĩmenyaga atĩ no tũhoe Ũrĩa Mũnene Mũno, ũrĩa ũtwendete na ũtũrũmbũyagia-rĩ, nĩ kĩĩ kĩngĩtũma twende kũhoya mũndũ ũngĩ?