Famĩlĩ cia Gĩkristiano—“Ikaragai Mwĩiguĩte”

“[Rekei] tũikarage twĩiguĩte na tũterigĩtwo.”​—1 THES. 5:6.

1, 2. Nĩ kĩĩ kĩrabatarania nĩguo famĩlĩ ĩikare ĩiguĩte kĩĩroho?

AKĨARIA ũhoro wa ‘mũthenya ũrĩa mũnene na wa kũmakania wa Jehova-rĩ,’ mũtũmwo Paulo aandĩkĩire Akristiano a Thesalonike ũũ: “Inyuĩ ariũ a Ithe witũ-rĩ, mũtikĩrĩ nduma-inĩ, atĩ mũthenya ũcio ũmũkorere ta mũici; nĩ gũkorũo inyuothe mũrĩ ciana cia ũtheri na ciana cia mũthenya. Tũtikĩrĩ a ũtukũ kana a nduma.” Agĩcoka akĩmera ũũ: “Nĩ ũndũ ũcio nĩtũtigei gũkoma toro ta acio angĩ, no makĩria nĩtũikarage twĩiguĩte na tũterigĩtwo.”—Joel 2:31; 1 Thes. 5:4-6.

2 Ũtaaro ũcio Paulo aaheire Athesalonike nĩ wagĩrĩire makĩria harĩ Akristiano arĩa maratũũra “hĩndĩ ĩno ya ithirĩro.” (Dan. 12:4) O ũrĩa mũico wa mũtabarĩre ũyũ mũũru wa Shaitani ũrakuhĩrĩria-rĩ, noguo arerutanĩria o ũrĩa angĩhota kũgarũra athathaiya a ma matige gũtungatĩra Ngai. Kwoguo harĩ bata twathĩkĩre ũtaaro wa Paulo wa gũikaraga twĩiguĩte kĩĩroho. Nĩguo famĩlĩ ya Gĩkristiano ĩhote gũikara ĩiguĩte kĩĩroho-rĩ, harĩ bata o mũndũ ahingie maũndũ marĩa athĩtwo nĩ Maandĩko. Hakĩrĩ ũguo-rĩ, nĩ itemi rĩrĩkũ athuri, atumia na ciana makoragwo narĩo harĩ gũteithia famĩlĩ ciao ciikarage ‘ciĩiguĩte’?

Inyuĩ Athuri—Wĩgerekaniei na “Mũrĩithi Ũrĩa Mwega”

3. Kũringana na 1 Timotheo 5:8 wĩra wa mũthuri arĩ mũtwe wa famĩlĩ nĩ ũrĩkũ?

3 Bibilia yugaga atĩ, “mũtwe wa mũndũ-wa-nja nĩwe mũndũ mũrũme.”(1 Kor. 11:3) Wĩra wa mũthuri arĩ mũtwe wa famĩlĩ nĩ ũrĩkũ? Maandĩko magĩtaarĩria wĩra ũmwe wa mũtwe wa famĩlĩ, moigaga ũũ: “Mũndũ angĩikara ategũteithia andũ ao, o na makĩria andũ a gwake mũciĩ-rĩ, nĩ gũkaana akaanĩte ũrutani ũrĩa wa Wĩtĩkio, na nĩ mũũru gũkĩra mũndũ ũtarĩ etĩkia.” (1 Tim. 5:8) Hatarĩ nganja mũthuri nĩ agĩrĩirũo nĩ kũhingĩria famĩlĩ yake mabataro ma kĩĩmwĩrĩ. No angĩkorũo nĩ egũteithia famĩlĩ yake gũikaraga ĩiguĩte kĩĩroho, ndarabatara o kũmĩhe mabataro mayo ma kĩĩmwĩrĩ moiki. Nĩ arabatara gwaka andũ a nyũmba yake kĩĩroho, agateithagia o mũndũ thĩinĩ wa famĩlĩ yake gwĩkĩra hinya ũkuruhanu wake na Ngai. (Thim. 24:3, 4) Angĩka ũguo atĩa?

4. Nĩ kĩĩ kĩngĩteithia mũthuri ahote gwaka andũ a nyũmba yake kĩĩroho?

4 Tondũ ‘mũthuri nĩwe mũtwe wa mũtumia wake o ta ũrĩa Kristo arĩ mũtwe wa kanitha-rĩ,’ mũthuri ũhikanĩtie agĩrĩirũo nĩ kwĩruta na kwĩgerekania na ũrĩa Jesu atongoragia kĩũngano. (Ef. 5:23) Ta rora wone ũrĩa Jesu aatarĩirie ũkuruhanu wake na arũmĩrĩri ake. (Thoma Johana 10:14, 15.) Nĩ ũndũ ũrĩkũ ũngĩteithia mũthuri ũrerirĩria gwaka famĩlĩ yake kĩĩroho? Nĩ ũndũ ũyũ: Kwĩruta maũndũ marĩa Jesu oigire na marĩa eekire arĩ we “mũrĩithi ũrĩa mwega,” acoke ‘akinyage makinya-inĩ make.’—1 Pet. 2:21.

5. Nĩ ũmenyo ũrĩkũ wĩgiĩ kĩũngano Mũrĩithi ũrĩa Mwega akoragwo naguo?

5 Rekei tũthuthurie tuone maũndũ marĩa mũtwe wa famĩlĩ angĩĩruta kuumana na kĩonereria kĩa Jesu. Kwa ngerekano-rĩ, ũkuruhanu wa mũrĩithi na ngʼondu ciake ũkoragwo wĩhocetie harĩ kũmenyana na kwĩhokana. Mũrĩithi akoragwo oĩ maũndũ mothe makoniĩ ngʼondu ciake nacio cikamũmenya na cikamwĩhoka. Nĩ cimenyaga na igathĩkĩra mũgambo wake. Jesu oigire ũũ: “Nĩ njũĩ ngʼondu ciakwa mwene, o nacio ngʼondu ciakwa nĩinjũĩ.” Jesu nĩ akoragwo oĩ maũndũ mothe megiĩ kĩũngano. Kiugo gĩa Kĩgiriki kĩrĩa gĩtaũrĩtwo “nĩnjũĩ” nĩ kuuga “kũmenya mũndũ wega biũ.” Ĩĩni, Mũrĩithi ũrĩa Mwega nĩ akoragwo oĩ ngʼondu ciake. Nĩ akoragwo oĩ mabataro, mawathe na hinya wa o ĩmwe yacio. Gũtirĩ ũndũ o na ũmwe wĩgiĩ ngʼondu ciake ũhĩtũkaga Jesu we Kĩonereria giitũ. Nacio ngʼondu nĩ ciũĩ mũrĩithi ũcio wega biũ na nĩ ciĩhokaga ũtongoria wake.

6. Athuri mangĩĩgerekania atĩa na Mũrĩithi ũrĩa Mwega?

6 Nĩguo ahote kwĩgerekania na ũtongoria wa Kristo, no mũhaka mũthuri erute kwĩyona ta mũrĩithi na andũ a famĩlĩ yake ta ngʼondu. Agĩrĩirũo nĩ kwĩrutanĩria kũmenya andũ a famĩlĩ yake wega biũ. Hihi mũthuri no ahote kũgĩa na ũmenyo ta ũcio? Ĩĩ no ahote, angĩkorũo nĩ arĩaranagĩria wega na andũ othe thĩinĩ wa famĩlĩ yake, akamathikagĩrĩria, agatongoragia maũndũ ma famĩlĩ, na akerutanagĩria gũtua matua mega megiĩ maũndũ ta ũthathaiya wa famĩlĩ, kũhunjia, gũthiĩ mĩcemanio, na maũndũ ma gwĩkenia. Mũthuri Mũkristiano angĩtongoria famĩlĩ yake akĩhũthĩra ũmenyo wa Kiugo kĩa Ngai na amenye wega andũ a nyũmba yake, no kũhoteke andũ a famĩlĩ yake mehoke ũtongoria wake, nake akaiguaga aiganĩire nĩ ũndũ wa kuona marĩ na ũrũmwe ũthathaiya-inĩ wa ma.

7, 8. Mũthuri angĩĩgerekania na Mũrĩithi ũrĩa Mwega atĩa harĩ kwenda andũ a famĩlĩ yake?

7 Ningĩ mũrĩithi mwega nĩ endete ngʼondu ciake. Rĩrĩa tũgũthoma ũhoro wa ũtũũro na ũtungata wa Jesu thĩinĩ wa Injiri, ngoro ciitũ nĩ ihutagio mũno nĩ kuona ũrĩa Jesu eendete arutwo ake. Nginya ‘akĩruta muoyo wake nĩ ũndũ wa ngʼondu.’ Athuri magĩrĩirũo nĩ kwĩgerekania na Jesu harĩ kwenda andũ a famĩlĩ ciao. Handũ ha gwatha mũtumia wake na hinya, mũthuri wendaga gwĩtĩkĩrĩka nĩ Ngai agĩrĩirũo nĩ gũthiĩ na mbere kũmwenda “o ta ũrĩa Kristo nake endire kanitha.” (Ef. 5:25) Ciugo ciake ciagĩrĩirũo nĩ gũkorũo irĩ cia ũtugi na cia tha, tondũ mũtumia wake nĩ agĩrĩirũo nĩ kũheo gĩtĩo.—1 Pet. 3:7.

8 Mũthuri agĩrĩirũo nĩ kũhũthĩra biũ mootaro ma Bibilia akĩrera ciana. Ona kũrĩ ũguo, ndagĩrĩirũo nĩ kwaga kuonia ciana ciake wendo. Hĩndĩ ĩrĩa kwabatarania ciagĩrĩirũo kũrũithio na njĩra ya wendo. Ciana imwe nĩ cioyaga kahinda karaihu kũrĩ iria ingĩ igĩkaanyita ũrĩa irendwo ciĩke. Hĩndĩ ta ĩyo mũthuri agĩrĩirũo nĩ gũcikirĩrĩria makĩria. Athuri maarũmĩrĩra kĩonereria kĩa Jesu hĩndĩ ciothe, mĩciĩ yao ĩkoragwo na thayũ na ũgitĩri. Famĩlĩ ciao cikenagĩra ũgitĩri wa kĩĩroho ta ũrĩa mũtungi wa Thaburi aainire igũrũ rĩaguo.—Thoma Thaburi 23:1-6.

9. O ta Nuhu-rĩ, athuri Akristiano marĩ na wĩra ũrĩkũ, na nĩ kĩĩ kĩngĩmateithia kũũhingia?

9 Kĩonereria kĩngĩ kĩega harĩ mĩtwe ya famĩlĩ nĩ Nuhu. Aatũũraga matukũ-inĩ ma kũrigĩrĩria ma thĩ ya hĩndĩ yake. No Jehova nĩ ‘aamũhonokirie o na andũ angĩ mũgwanja hamwe nake, hĩndĩ ĩrĩa aarehithĩirie kĩrĩndĩ kĩu gĩteetigagĩra Ngai kĩguũ kĩnene.’ (2 Pet. 2:5) Nuhu nĩwe wehokeirũo gũteithia famĩlĩ yake kũhonoka Kĩguũ kĩu. Arĩa maratongoria famĩlĩ cia Gĩkristiano matukũ-inĩ maya ma kũrigĩrĩria marĩ na wĩra o ta wa Nuhu. (Mat. 24:37) Na githĩ ndũkĩrĩ ũndũ wa bata mũno merute na kĩonereria kĩa “mũrĩithi ũrĩa mwega” na merutanĩrie kwĩgerekania nake!

Inyuĩ Atumia—‘Akagai Nyũmba Cianyu’

10. Mũtumia gwathĩkĩra mũthuri wake nĩ kuuga atĩa?

10 Mũtũmwo Paulo aandĩkire ũũ: “Inyuĩ atumia, athĩkagĩrai athuri anyu inyuene, o ta ũrĩa mũngĩathĩkagĩra Mwathani.” (Ef. 5:22) Ciugo icio itionanagia atĩ mũtumia ti wa bata. Mbere ya kũũmba Hawa, mũtumia ũrĩa wa mbere, Ngai ũrĩa wa ma oigire ũũ: “Ti wega mũndũ ũyũ aikare wiki; nĩngũmũũmbĩra mũmũteithia o ũrĩa maaganĩrĩirũo nake.” (Kĩam. 2:18) Kiugo “mũmũteithia” na “maaganĩrĩirũo” cionanagia atĩ itemi rĩa mũtumia rĩa kũnyita mbaru mũthuri wake mawĩra-inĩ make ma famĩlĩ nĩ rĩa bata mũno.

11. Mũtumia mwega ‘akaga nyũmba yake’ atĩa?

11 Mũtumia mwega nĩ erutanagĩria kwagĩria mũciĩ wake. (Thoma Thimo 14:1.) Ngũrani na mũtumia mũkĩgu ũrĩa ũtatĩaga mũbango wa ũtongoria thĩinĩ wa famĩlĩ, mũtumia mũũgĩ nĩ atĩaga mũno mũbango ũcio. Handũ ha gũkorũo na roho wa gũkũ thĩ wa ũremi na kwĩyatha-rĩ, we nĩ athĩkagĩra mũthuri wake. (Ef. 2:2) Mũtumia mũkĩgu ndamakaga agĩcambia mũthuriwe, no mũtumia mũũgĩ erutanagĩria gũtũma ciana o hamwe na andũ angĩ mahe mũthuri wake gĩtĩo makĩria. Mũtumia ta ũcio abaragĩrĩra mũno ndakaage gĩtĩo harĩ ũtongoria wa mũthuri wake na njĩra ya kũmũthumbũra kana gũkararania nake. Ũndũ ũngĩ nĩ kũhũthĩra mbeca na ũbarĩrĩru. Mũtumia mũkĩgu no aitange mbeca cia famĩlĩ iria ithũkũmĩtwo na thĩna. Mũtumia ũnyitaga mũthuri wake mbaru ndatariĩ ũguo. Anyitanagĩra wega na mũthuri wake maũndũ-inĩ megiĩ mbeca. Ekaga maũndũ na ũũgĩ na akahũthĩra indo na ũbarĩrĩri. Ndatindĩkagĩrĩria mũthuri wake arute wĩra mathaa maingĩ makĩria.

12. Mũtumia angĩka atĩa nĩguo ateithie famĩlĩ yake ‘ĩikarage ĩiguĩte’?

12 Mũtumia mwega ateithagia famĩlĩ gũikaraga ‘ĩiguĩte’ na njĩra ya gũteithia mũthuri wake gũthomithia ciana ciao maũndũ ma kĩĩroho. (Thim. 1:8) Nĩ anyitaga mbaru mũbango wa Ũthathaiya wa Famĩlĩ. Makĩria ma ũguo-rĩ, nĩ anyitanagĩra na mũthuri wake rĩrĩa egũtaara na akĩrũithia ciana ciao. Kaĩ nĩ ngũrani na mũtumia mũkĩgu, ũrĩa ciana ciake ikoragwo na mathĩna ma kĩĩmwĩrĩ o na ma kĩĩroho-ĩ!

13. Nĩkĩ nĩ ũndũ wa bata mũtumia kũnyita mũthuri wake mbaru maũndũ-inĩ ma gĩtheokrasi?

13 Mũtumia mũũgĩ aiguaga atĩa rĩrĩa mũthuri wake arĩ na maũndũ maingĩ ma gwĩka thĩinĩ wa kĩũngano gĩa Gĩkristiano? Akenaga mũno! Mũthuri wake angĩkorũo nĩ mũteithia wa ũtungata, kana nĩ mũthuri wa kĩũngano, kana hihi akoragwo arĩ wa Kamĩtĩ ya Ũiguano na Thibitarĩ, kana Kamĩtĩ ya Mĩako, mũtumia ũcio nĩ akenagĩra mweke ũcio wa mũthuriwe. Gũthiĩ na mbere kũnyita mbaru mũthuri wake na ciĩko na ciugo kũbataraga kwĩima. No nĩ amenyaga atĩ mũthuri wake gũkorũo arĩ na maũndũ maingĩ ma gwĩka ma gĩtheokrasi gũteithagia famĩlĩ yake yothe gũikaraga ĩiguĩte kĩĩroho.

14. (a) Nĩ ũndũ ũrĩkũ ũngĩritũhĩra mũtumia mwega, na angĩhota kũhiũrania naguo atĩa? (b) Mũtumia atũmaga atĩa famĩlĩ yothe ĩgaacĩre?

14 Ti ũndũ mũhũthũ mũtumia kũiga kĩonereria kĩega harĩ kũnyita mũthuri wake mbaru rĩrĩa atua itua ataraiguithanĩria narĩo. No ona hĩndĩ ta ĩyo, onanagia ‘ũhoreri na gũkindĩria ngoro,’ na akanyitanĩra na mũthuri kũgaacĩrithia itua rĩake. (1 Pet. 3:4) Mũtumia mwega ageragia kũrũmĩrĩra cionereria njega cia atumia a tene arĩa maarĩ etigĩri Ngai, ta Sara, Ruthu, Abigaili na Mariamu nyina wa Jesu. (1 Pet. 3:5, 6) Ningĩ nĩ egerekanagia na atumia arĩa akũrũ a mahinda maya arĩa maikaraga na “mĩikarĩre ĩrĩa ya ũtheru.” (Tit. 2:3, 4) Nĩ ũndũ wa kwenda na gũtĩa mũthuri wake, mũtumia mwega nĩ atũmaga kĩhiko na famĩlĩ yothe ĩgaacĩre. Mũciĩ wake ũkoragwo ũrĩ kũndũ kwega gwa kũhurũka na kũrĩ na ũgitĩri. Harĩ mũthuri wa kĩĩroho, mũtumia ũmũnyitaga mbaru nĩ wa bata mũno!—Thim. 18:22.

Inyuĩ Andũ Ethĩ —‘Ikaragai Mũcũthĩrĩirie Maũndũ Marĩa Matonekaga’

15. Andũ ethĩ mangĩnyitanĩra atĩa na aciari ao nĩguo famĩlĩ yao ‘ĩikarage ĩiguĩte’?

15 Inyuĩ andũ ethĩ-rĩ, mũngĩnyitanĩra atĩa na aciari anyu nĩguo famĩlĩ yanyu ‘ĩikarage ĩiguĩte’ kĩĩroho? Ta wĩcirie ũhoro wa kĩheo kĩrĩa Jehova akũigĩire. Kwahoteka kuuma ũrĩ o mũnyinyi aciari aku nĩ maakuonagia mbica cia Paradiso. O ũrĩa wathire ũgĩkũraga kwahoteka nĩ maahũthĩrire Bibilia na mabuku ma Gĩkristiano nĩguo magũteithie ũhote kũhũra mbica ũrĩa muoyo wa tene na tene thĩinĩ wa thĩ njerũ ũgaakorũo ũtariĩ. Kũiga meciria maku ũtungata-inĩ wa Jehova na kũbanga ũtũũro waku wega kũrĩgũteithagia gũikaraga ‘wĩiguĩte.’

16, 17. Andũ ethĩ mangĩka atĩa nĩguo mahote gũtengʼera wega kĩhĩtahĩtano-inĩ kĩa muoyo?

16 Mũtũmwo Paulo aringithanĩtie ũtungata witũ harĩ Jehova na kĩhĩtahĩtano, naguo muoyo wa tene na tene akaũringithania na kĩheo. Ta wĩcũũranie ũhoro wa ciugo ciake thĩinĩ wa 1 Akorintho 9:24. (Thoma.) Tengʼera kĩhĩtahĩtano-inĩ kĩa muoyo ũrĩ na muoroto wa kũhootana. Thuura njĩra ĩrĩa ĩngĩgũteithia ũkinyĩre kĩheo kĩa muoyo wa tene na tene. Aingĩ nĩ merekereirie gũthingata indo cia kĩĩmwĩrĩ gũtũme maage gũthiĩ na mbere gũikara macũthĩrĩirie kĩheo. Kaĩ ũcio nĩ ũrimũ-ĩ! Gũthingata ũtonga ũtũũro-inĩ gũtirehaga gĩkeno kĩa ma. Indo iria cingĩgũrũo na mbeca no cia ihinda. Gũkĩrĩ ũguo-rĩ, we ikaraga o ‘ũcũthĩrĩirie maũndũ marĩa matonekaga.’ Nĩkĩ? Tondũ “maũndũ . . . marĩa matonekaga nĩ magũtũũra tene na tene.”—2 Kor. 4:18.

17 Irathimo cia Ũthamaki nĩ imwe cia ‘maũndũ marĩa matonekaga.’ Banga ũtũũro waku ũndũ ũngĩhota gũkinyĩra irathimo icio. Gĩkeno kĩa ma kiumanaga na kũhũthĩra ũtũũro waku ũtungata-inĩ wa Jehova. Gũtungatĩra Ngai ũrĩa wa ma gũteithagia mũndũ gũkinyĩra mĩoroto ya ihinda inyinyi na ya ihinda iraya.a Kwĩigĩra mĩoroto ya kĩĩroho ĩrĩa ũngĩhota gũkinyĩra, no gũgũteithie gũthiĩ na mbere gũtungatĩra Ngai ũgĩtanyaga gũkinyĩra kĩheo kĩa muoyo wa tene na tene.—1 Joh. 2:17.

18, 19. Mũndũ mwĩthĩ angĩhota kũmenya atĩa kana nĩ akũrĩtie ũkuruhanu wake mwene na Jehova?

18 Inyuĩ andũ ethĩ, ikinya rĩa mbere thĩinĩ wa barabara ya muoyo nĩ gũkũria ũkuruhanu waku mwene na Jehova. Hihi wee nĩ woete ikinya rĩu? Ta wĩyũrie ũũ: ‘Hihi niĩ ndĩ mũndũ wa kĩĩroho, kana njĩkaga maũndũ ma kĩĩroho ndĩhocitie tu harĩ aciari akwa? Hihi nĩ ngũragia ngumo iria ingĩtũma ngenagie Ngai? Hihi nĩ ndĩrutanagĩria gũthiĩ na mbere kũrũmĩrĩra mũtaratara wa gwĩka maũndũ marĩa makonainie na ũthathaiya wa ma, ta kũhoya hĩndĩ ciothe, kwĩruta, gũthiĩ mĩcemanio, na kũhunjia? Hihi no ndĩrakuhĩrĩria Ngai na njĩra ya gũkũria ũkuruhanu wa hakuhĩ nake?’—Jak. 4:8.

19 Wĩcũũranie ũhoro wa kĩonereria kĩa Musa. O na gũtuĩka aarereirũo ũgeni-inĩ-rĩ, aathurire gwĩtanio na Jehova handũ ha gwĩtwo mũriũ wa mwarĩ wa Firauni. (Thoma Ahibirania 11:24-27.) O na inyuĩ Akristiano ethĩ, nĩ mũkũbatara kwĩrutanĩria gũtungatĩra Jehova mũrĩ na wĩhokeku. Mweka ũguo-rĩ, mũkũgĩa na gĩkeno kĩa ma, mũgĩe na mũikarĩre mwega biũ mahinda-inĩ maya, na kĩĩrĩgĩrĩro gĩa ‘gũkoona muoyo ũrĩa muoyo ma.’—1 Tim. 6:19.

20. Kĩhĩtahĩtano-inĩ kĩa muoyo-rĩ, nĩa maheagwo kĩheo?

20 Hĩndĩ ya ihĩtahĩtano cia tene no mũndũ ũmwe tu wahootanaga. Ũguo tiguo kũrĩ kĩhĩtahĩtano-inĩ kĩa muoyo. Nĩ wendi wa Ngai atĩ “andũ othe mahonokio na matũĩke a kũmenya ũhoro-wa-ma.” (1 Tim. 2:3, 4) Andũ aingĩ nĩ mahotete gũtengʼera, na aingĩ no maratengʼera hamwe nawe. (Ahib. 12:1, 2) Arĩa makaaheo kĩheo kĩu nĩ arĩa othe megũthiĩ na mbere kĩhĩtahĩtano-inĩ. Kwoguo tua itua rĩa kũhootana!

21. Nĩ maũndũ marĩkũ mekwarĩrĩrio thĩinĩ wa gĩcunjĩ kĩrĩa kĩrũmĩrĩire?

21 Gũtirĩ kĩndũ kĩngĩgirĩrĩria gũũka kwa ‘mũthenya ũrĩa mũnene wa Jehova wa kũmakania.’ (Mal. 4:5) Mũthenya ũcio ndwagĩrĩirũo nĩ gũkorerera famĩlĩ cia Gĩkristiano citerĩgĩrĩire. Harĩ bata o mũndũ thĩinĩ wa famĩlĩ anyite itemi rĩake kũringana na Maandĩko. Hihi nĩ atĩa ũngĩ ũngĩka nĩguo ũikarage wĩiguĩte kĩĩroho na ũgĩkagĩra hinya ũkuruhanu waku na Ngai? Gĩcunjĩ kĩrĩa kĩrũmĩrĩire nĩ gĩkwarĩrĩria maũndũ matatũ marĩa mathũkagia ũgaacĩru wa kĩĩroho wa famĩlĩ yothe.

[Kohoro Ka magũrũ-inĩ]

Weruta Atĩa?

• Nĩkĩ nĩ ũndũ wa bata famĩlĩ cia Gĩkristiano ‘gũikaraga ciĩiguĩte’?

• Mũthuri angĩĩgerekania atĩa na Mũrĩithi ũrĩa Mwega?

• Mũtumia mwega angĩka atĩ nĩguo ahote kũnyita mũthuri wake mbaru?

• Andũ ethĩ mangĩteithia atĩa famĩlĩ ciao gũikaraga ciĩiguĩte kĩĩroho?

[Mbica karatathi ka 12]

Harĩ mũthuri wa kĩĩroho, mũtumia ũmũnyitaga mbaru nĩ wa bata mũno