Iburahimu Mũthuri Warĩ na Wĩnyihia

Iburahimu aikarĩte hema-inĩ yake, agĩkenera kĩĩruru kĩayo tondũ kũrĩ na ũrugarĩ. Atiira maitho, akona athuri atatũ marorete gwake.a Atekũrĩa marĩgu, agatengʼera agathagane ageni acio, akamathaitha metĩkĩre kũhurũka hanini nĩguo matugwo. Akamera athiĩ kũmagĩrĩra “tũirio,” ĩndĩ akamaharĩrĩria ndĩa nene ĩrĩ na mĩgate ya hĩhio, ngorono, iria na nyama njega njororo. Na njĩra ya kũhaarĩrĩria ageni ake ndĩa ĩyo, Iburahimu onanirie ũtaana mũnene ningĩ ta ũrĩa tũkuona nĩ onanirie wĩnyihia wa ma.—Kĩambĩrĩria 18:1-8.

WĨNYIHIA NĨ KĨĨ? Wĩnyihia nĩ gũkorũo mũndũ atarĩ na mwĩgatho na mwĩtĩo. Mũndũ mwĩnyihia nĩ amenyaga atĩ andũ othe nĩ mamũkĩrĩte na njĩra ĩmwe kana ĩrĩa ĩngĩ. (Afilipi 2:3) Nĩ athikagĩrĩria mawoni ma andũ arĩa angĩ, na nĩ akoragwo eharĩirie kũruta mawĩra ma kĩrathi gĩa thĩ akĩmatungatĩra.

IBURAHIMU ONANIRIE WĨNYIHIA NA NJĨRA IRĨKŨ? Iburahimu aatungatagĩra andũ arĩ na gĩkeno. O ta ũrĩa tũkũgwetete, rĩrĩa Iburahimu onire ageni acio atatũ, ategũte ihinda akĩoya ikinya rĩa kũhangʼĩra mabataro mao. Sara mũtumia wake akĩambĩrĩria kũhaarĩria irio o na ihenya. O na kũrĩ ũguo-rĩ, ta rora wone nũ warutire wĩra ũrĩa mũingĩ: Iburahimu nĩwe watengʼerire agathagane ageni acio, nĩwe wamaheire gĩa kũrĩa, nĩwe watengʼerire mahiũ-inĩ agĩthuura ndegwa ya gũthĩnja, na nowe waigire indo icio ciothe mbere ya ageni acio. Handũ ha gũtigĩra ndungata ciake wĩra wothe, mũthuri ũcio mwĩnyihia nĩ aarutire mawĩra macio ma kĩrathi gĩa thĩ. Ndoonaga gũtungatĩra arĩa angĩ ũrĩ wĩra ũtarĩ kĩene.

Iburahimu nĩ aathikagĩrĩria mawoni ma arĩa maakoragwo rungu rwake. Bibilia ĩgwetete o ndeereti nyinyi gatagatĩ ka Iburahimu na Sara. Ĩndĩ, tũthomaga maita merĩ atĩ Iburahimu nĩ aathikĩrĩirie mawoni ma Sara na akĩmarũmĩrĩra. (Kĩambĩrĩria 16:2; 21:8-14) Rĩmwe rĩa mahinda macio merĩ, Iburahimu nĩ aambĩte ‘kũiguithio ũũru mũno’ nĩ mawoni ma mũtumia wake. O na kũrĩ ũguo-rĩ, rĩrĩa Jehova aarĩirie Iburahimu akĩmuonia atĩ mawoni ma mũtumia wake maarĩ mega, nĩ ũndũ wa wĩnyihia, Iburahimu nĩ eetĩkĩrire kũrũmĩrĩra mawoni macio.

TŨRERUTA ATĨA? Angĩkorũo kũna tũrĩ enyihia, nĩ tũrĩkenagĩra gũtungatĩra arĩa angĩ. Nĩ tũrĩkenaga tũgĩka o ũrĩa wothe tũngĩhota nĩguo twagĩrie mũtũũrĩre wao makĩria.

Ningĩ no tuonanie wĩnyihia na njĩra ya ũrĩa tũiyũkagia mawoni ma andũ arĩa angĩ. Handũ ha kũregana na ũndũ tondũ atĩ ti ithuĩ twoima naguo, nĩ ũndũ wa ũũgĩ gũthikĩrĩria mawoni ma andũ arĩa angĩ. (Thimo 15:22) Nĩ wega makĩria harĩ arĩa mehokeirũo gũtongoria makorũo na mwerekera ta ũcio mwega. Mũrũgamĩrĩri ũmwe wĩtagwo John oigire ũũ: “Nyonete atĩ mũrori mwega nĩ ũrĩa ũheaga andũ wĩyathi wa kwĩyaria.” Aacokire akiuga ũũ: “Wĩnyihia nĩ ũbataranagia nĩguo wĩtĩkĩre atĩ mũndũ ũrĩ rungu rwa ũtongoria waku no akorũo na njĩra njega makĩria ya gwĩka maũndũ gũgũkĩra. Ĩndĩ gũtirĩ mũndũ o na ũmwe—o na angĩkorũo nĩ mũrori—ũngĩkorũo atĩ nowe ũmenyaga njĩra iria ciagĩrĩire cia gwĩka maũndũ.”

Twegerekania na Iburahimu na njĩra ya gũthikĩrĩria mawoni ma andũ arĩa angĩ, na kũruta mawĩra ma kĩrathi gĩa thĩ tũkĩmatungatĩra, nĩ twĩtĩkĩrĩkaga nĩ Jehova. Ningĩ-rĩ, “Ngai nĩareganaga na arĩa etĩi, no arĩa menyihĩtie nĩamakinyagĩria Wega wake.”—1 Petero 5:5.

[Kohoro ka magũrũ-inĩ]