‘Tũũrai Mwendaine’

“Rĩu ngũmũhe rĩathani rĩerũ, nĩ atĩ mwendane; o ta ũguo niĩ ndĩmwendete, inyuĩ mwendane o ro ũguo inyuene. Nĩ ũguo andũ othe marĩmenyaga mũrĩ arutwo akwa, mwatũũra mwendaine.”​—JOHANA 13:34, 35.

Ũguo nĩ Kuuga Atĩa? Kristo eerire arũmĩrĩri ake mendane o ta ũrĩa we aamendete. Hihi Jesu aamendete atĩa? Wendo wake nĩ waatooretie mũthutũkanio ũrĩa warĩ kuo hĩndĩ yake kwerekera andũ a bũrũri ũngĩ na atumia. (Johana 4:7-10) Wendo watindĩkire Jesu ahũthĩre ihinda, hinya wake, na eiime ikeno nĩguo ateithĩrĩrie andũ arĩa angĩ. (Mariko 6:30-34) Mũthia-inĩ, Kristo akĩonania wendo na njĩra ĩkĩrĩte iria ingĩ. Oigire, “Nĩ niĩ mũrĩithi ũrĩa mwega. Mũrĩithi ũrĩa mwega nĩarutaga muoyo wake nĩ ũndũ wa ngʼondu.”—Johana 10:11.

Ũrĩa Akristiano a Tene Maarũmagĩrĩra Ciugo Icio: Karine-inĩ ya mbere, Akristiano meetanaga “mũrũ” kana “mwarĩ wa Ithe witũ.” (Filemona 1, 2) Andũ a ndũrĩrĩ ciothe nĩ meetĩkagĩrũo kĩũngano-inĩ gĩa Gĩkristiano, amu nĩ meetĩkĩtie atĩ “ũhoro wa gũthuurania Mũyahudi na Mũyunani gũtirĩ: nĩ gũkorũo Mwathani o ro ũcio nowe Mwathani wa andũ othe.” (Aroma 10:11, 12) Thutha wa Bendegothito 33 M.M., arutwo arĩa maarĩ Jerusalemu ‘meendagia ithaka ciao na indo ciao, makagaĩra o mũndũ o mũndũ o ta ũrĩa mabata make maatariĩ.’ Muoroto waarĩ ũrĩkũ? Nĩguo arĩa maakoretwo maabatithio maikaikare Jerusalemu na mathiĩ na mbere ‘gũikara magwatĩirie ũrutani ũrĩa wa atũmwo.’ (Atũmwo 2:41-45) Nĩ kĩĩ kĩamatindĩkaga gwĩka ũguo? Mĩaka ĩnyihĩire 200 thutha wa atũmwo gũkua, Tertullian nĩ aagwetire ũrĩa andũ angĩ mooigaga igũrũ rĩa Akristiano: “Mendanĩte-ĩ . . . nginya nĩ makoragwo mehaarĩirie atĩ mũndũ no akue nĩ ũndũ wa ũrĩa ũngĩ.”

Nĩ a Mareka Ũguo Ũmũthĩ? Ibuku rĩĩtagwo The History of the Decline and Fall of the Roman Empire (1837) rĩonanĩtie atĩ karine-inĩ iria hĩtũku andũ arĩa meĩtaga Akristiano “mageranĩte ngero nene gũkĩra iria maanagerũo nĩ acogothi [matarĩ a ndini].” Ũthuthuria wa ica ikuhĩ wa U.S. ũroonanirie atĩ andũ aingĩ a ndini, na makĩria arĩa meĩtaga Akristiano, nĩ marĩ ũthũ kwerekera andũ a iruka ingĩ. Kaingĩ andũ a kanitha matikoragwo na ũkuruhanu o na ũrĩkũ na andũ a kanitha ũcio a bũrũri ũngĩ na kwoguo nĩ maremagwo kana makaaga wendi wa gũteithia arĩa metĩkĩtie tao rĩrĩa kwagĩa thĩna.

Mwaka wa 2004, thutha wa Florida kũgũmĩrũo nĩ ihuhũkanio igĩrĩ ihinda-inĩ rĩa mĩeri ĩĩrĩ, mũikarĩri-gĩtĩ wa Kamĩtĩ ya Kũhiũrania na Maũndũ ma Hi-na-hi ya Florida, nĩ aatuĩririe akĩenda kũmenya kana indo iria maarĩ nacio nĩ ciahũthĩkaga wega. Oigire atĩ gũtirĩ gĩkundi kĩngĩ kĩarĩ na mũbango mwega ta Aira a Jehova, na akĩĩrutĩra kũheana kĩndũ o gĩothe kĩrĩa maabataraga. Mbere ĩyo, mwaka-inĩ wa 1997, gĩkundi kĩmwe gĩa gũteithia kĩa Aira a Jehova, nĩ gĩathire Bũrũri-inĩ wa Kĩdemokrasia wa Kongo gĩkuuĩte ndawa, irio, na nguo cia gũteithia aarĩ na ariũ a Ithe wao na arĩa angĩ maarĩ na thĩna. Aira a Jehova kuuma rũraya maarutĩte indo ingĩakinyirie mũigana wa dola milioni ĩmwe cia Amerika (U.S.).