Jesu Angĩcokia Atĩa?

Ahoi Ngai aingĩ nĩ monaga ta ndini ciagĩrĩirũo gũkorũo na itemi maũndũ-inĩ ma gĩũteti. Metĩkĩtie atĩ ndini no iteithie mũno kũniina mathĩna ma andũ. O na kũrĩ ũguo, kũrĩ etĩkia angĩ monaga atĩ ndini na ũteti itiagĩrĩirũo gũtukanio. Hihi wee mwene wonaga atĩa rĩrĩa ndini yagĩa na itemi ũteti-inĩ? Hihi ndini na ũteti nĩ ciagĩrĩirũo gũtukanio?

JESU KRISTO erĩkaga atĩ nĩwe “mũndũ ũrĩa ũkoretwo na igweta inene makĩria historĩ-inĩ ya andũ ĩgiĩ ndini.” Kwoguo, ta tua nĩwe tũroria kĩũria gĩkĩ: Ndini nĩ ciagĩrĩirũo kwĩingĩria maũndũ-inĩ ma gĩũteti? Hihi angĩcokia atĩa? Rĩrĩa aarĩ gũkũ thĩ, nĩ aacokirie kĩũria kĩu kũgerera ciugo na ciĩko ciake. Kwa ngerekano-rĩ, Mĩario-inĩ yake ya Kĩrĩma-inĩ ĩrĩa ĩ ngumo mũno, Jesu nĩ aaheanire mootaro mateithagia arũmĩrĩri ake kũmenya itemi rĩao maũndũ-inĩ ma kĩrĩndĩ. Rekei twarĩrĩrie maũndũ mamwe ma mĩario ĩyo ĩ ngumo.

Kũhutia Ũtũũro wa Andũ Arĩa Angĩ

Jesu nĩ aatarĩirie mwerekera ũrĩa arũmĩrĩri ake magĩrĩirũo gũkorũo naguo harĩ thĩ. Oigire ũũ: ‘Nĩ inyuĩ cumbĩ wa thĩ: no rĩrĩ, cumbĩ ũngĩkorũo ũthirĩte mũcamo waguo-rĩ, wacoka gũcamithio ta cumbĩ na kĩ? Ndũrĩ bata o na wa kĩ, no gũteo ũteo na ũrangwo nĩ andũ. Nĩ inyuĩ ũtheri wa thĩ. Rekei ũtheri wanyu ũtheragĩre andũ, nĩguo mone ciĩko cianyu njega, na magoocage Ithe wanyu ũrĩa wĩ Igũrũ.’ (Mathayo 5:13-16) Nĩ kĩĩ gĩatũmire Jesu aringithanie arũmĩrĩri ake na cumbĩ na ũtheri?

Ciugo cia Jesu cionanagia atĩ arũmĩrĩri ake mahaana ta cumbĩ, ti kũrĩ gakundi kanini tu, ĩndĩ nĩ kũrĩ andũ othe. Mahaana ta ũtheri, ti kũrĩ andũ atare, no nĩ kũrĩ arĩa othe mangĩenda kuona na njĩra njega. Kũgerera ciugo icio cia ngerekano-rĩ, Jesu nĩ onanirie wega atĩ ndeendaga arũmĩrĩri ake meyamũranie na andũ. Nĩkĩ hihi?

Wĩcirie ũndũ ũyũ: Cumbĩ ndũngĩhota kũiga irio itegũthũka ũtangĩtukanio na irio icio. Naguo tawa ndũngĩnina nduma thĩinĩ wa nyũmba ũngĩigwo haraihu na nyũmba ĩyo. Nokĩo Jesu ataigana gwatha arutwo ake mathiĩ kũndũ megũikara meyamũranĩtie na andũ arĩa matetĩkĩtie. O na ndekĩrire ngoro arũmĩrĩri ake matũũre mũtũũrĩre wa kwĩikaria mehingĩrĩte ciikaro-inĩ cia kĩĩndini. Handũ ha ũguo, o ta ũrĩa cumbĩ ũbataraga gũtukanio na irio naguo tawa ũkabatara kũniina nduma-rĩ, noguo Akristiano mabataraga gũkorũo hamwe na andũ arĩa angĩ nĩguo mahutie mũtũũrĩre wao.

“Ti a Gũkũ Thĩ”

O na kũrĩ ũguo, ciugo cia Jesu atĩ arũmĩrĩri ake magĩrĩirũo gũtukana na andũ arĩa angĩ nĩ itũmaga hagĩe kĩũria kĩgiĩ mwerekera wa Mũkristiano harĩ ũteti. Nĩkĩ hihi? Kahinda kanini mbere ya gĩkuũ gĩake, Jesu aahoire Ngai ũũ nĩ ũndũ wa arũmĩrĩri ake: “Ndigũkũhoya ũmarute gũkũ thĩ, no kũmaikaria ũmaikaragie matikanathũkio nĩ ũrĩa mũũru. O ti a gũkũ thĩ, o ta ũguo niĩ na niĩ itarĩ wa gũkũ thĩ.” (Johana 17:15, 16) Kwoguo-rĩ, Akristiano mangĩhota atĩa gũkorũo matarĩ a gũkũ thĩ na hĩndĩ oro ĩyo mahutie mũtũũrĩre wa andũ a itũũra rĩao? Nĩguo tũmenye, rekei twarĩrĩrie ciũria ingĩ ithatũ:

• Jesu aarĩ na mawoni marĩkũ kwerekera ũteti?

• Akristiano magĩrĩirũo gwĩka atĩa ũmũthĩ?

• Ũrutani wa Gĩkristiano ũkoragwo na moimĩrĩro marĩkũ harĩ andũ?