Meerutĩire Meyendeire Bũrũri-inĩ wa Brazil

MĨAKA ĩigana ũna mĩhĩtũku, Rúbia (1), mwarĩ wa Ithe witũ ũrĩa rĩu wĩna mĩaka 30, nĩ aatumire rũgendo agaceerere Sandra (2), painia waatungataga kĩũngano-inĩ kĩmwe kĩnini gĩcigo-inĩ kĩa Brazil ya mũhuro. Hĩndĩ ya iceera rĩu, harĩ ũndũ weekĩkire ũkĩhutia ngoro ya Rúbia mũno nginya ũgĩcenjia mũtũũrĩre wake. Hihi warĩ ũrĩkũ? Rekei tũigue kuuma kũrĩ Rúbia we mwene.

“NDIETĨKAGIA ŨRĨA NDAIGUIRE”

“Hĩndĩ ĩmwe nĩ twaathire na Sandra gũceerera mũtumia ũmwe meerutaga Bibilia nake. Rĩrĩa twathomaga, mũtumia ũcio akiuga atĩrĩ: ‘Sandra, harĩ airĩtu atatũ tũrutithanagia wĩra marenda kwĩruta Bibilia, no ndĩraamerire atĩ no mũhaka meterere hĩndĩ yao ĩkinye. Nĩ njũĩ ndũngĩona mahinda ma kwĩruta na andũ angĩ mwaka ũyũ.’ Ndietĩkagia ũrĩa ndaiguire. Atĩ andũ marenda kwĩruta ũhoro wĩgiĩ Jehova makerũo meterere! Kĩũngano-inĩ gĩa gwitũ, kuona o na mũndũ ũmwe ingĩerutire nake warĩ ũndũ mũritũ. O hĩndĩ ĩyo, tũrĩ o kwa mũrutwo ũcio wa Bibilia, nĩ ndaiguire ndĩna wendi mũnene wa gũteithia andũ taũni-inĩ ĩyo yao nini. Kahinda kanini thutha ũcio, ngĩthama taũni nene ĩrĩa ndaikaraga ngĩthiĩ taũni ĩrĩa Sandra aatungataga e painia.”

Hihi maũndũ ma Rúbia maathire atĩa? Oigaga ũũ: “Ihinda-inĩ rĩa mĩeri ĩĩrĩ kuuma ndathiĩ kuo, ndeerutaga Bibilia na andũ 15—na wĩtĩkie kana ũrege—kahinda gatanathianga, o na niĩ ndaakoragwo na andũ metereire, o ta Sandra!”

NĨ AATINDĨKIRŨO GŨTHUTHURIA RĨNGĨ ŨTUNGATA WAKE

Diego (3), mũrũ wa Ithe witũ wa ũkũrũ wa mĩaka 20 na kĩndũ, nĩ aaceereire mapainia maatungataga gĩcigo-inĩ kĩa Prudentópolis, gataũni kamwe ka Brazil ya mũhuro. Iceera rĩu nĩ rĩatũmire ecirie mũno; agĩtindĩkwo gũthuthuria rĩngĩ ũtungata wake wa Gĩkristiano. Ataaragĩria ũũ: “Ndierutanagĩria kĩũngano-inĩ kĩrĩa ndaakoragwo, ndaahũthagĩra o mathaa manini kũhunjia o mweri. No rĩrĩa ndaaceereire mapainia acio na ngĩigua maũndũ marĩa meyoneire, hatarĩ nganja ngĩona maarĩ na gĩkeno kĩnene gũkĩra kĩrĩa ndaakoragwo nakĩo ũtungata-inĩ. Ndona ũrĩa marĩ na gĩkeno na magacanjamũka, ngĩĩrirĩria kũgĩa na mũtũũrĩre ũrĩ na muoroto o ta wao.” Thutha wa iceera rĩu, Diego akĩambĩrĩria ũpainia.

O ta Diego-rĩ, hihi wee wĩ Mũira wa Jehova mwĩthĩ ũhunjagia na agathiĩ mĩcemanio ya Gĩkristiano ĩndĩ ũkonaga ta ũtungata waku ũtuĩkĩte o mũtugo, ũkaga kũũkenera? Angĩkorũo nĩguo-rĩ, hihi no ũgarũrĩre mũtũũrĩre waku ũndũ ũgũkũhotithia gũcama gĩkeno kĩrĩa kiumanaga na gũtungata kũrĩa kũrĩ na bata makĩria wa ahunjia a Ũthamaki? Nĩ ma, rĩciria rĩa atĩ no ũtiganĩrie mũtũũrĩre mwega no rĩtũme ũgĩe na guoya. O na kũrĩ ũguo, andũ aingĩ ethĩ nĩ matuĩte itua rĩa gwĩka ũguo. Nĩ mehete ũcamba makagarũrĩra mĩoroto na merirĩria mao nĩguo mahote gũtungatĩra Jehova na njĩra nene makĩria. Ta wĩcirie kĩonereria kĩa Bruno.

NĨ MŨINI NJORUA-Ĩ, KANA MŨHUNJIA?

Mĩaka ĩigana ũna mĩhĩtũku, Bruno (4), ũrĩa rĩu ũrĩ na mĩaka 28, aathomeire cukuru ĩmwe ya ũini ĩ ngumo, arĩ na muoroto wa gũtuĩka mũinithia wa gĩkundi kĩa aini. Ũrĩa kũrĩ nĩ atĩ, aagacĩrire wega mathomo-inĩ make ũũ atĩ maita maigana ũna nĩ eetagwo akainithie gĩkundi kĩnene kĩa aini. Aarorete kũgĩa na wĩra mwega mũno. Bruno oigaga, “O na kũrĩ ũguo, nĩ ndaiguaga harĩ na kĩndũ kĩraga ũtũũro-inĩ wakwa. Nĩ ndakoretwo ndĩyamũrĩire Jehova, ĩndĩ nĩ ndaamenyaga atĩ ndiamũtungatagĩra na ngoro yakwa yothe, na ũndũ ũcio nĩ waathĩnagia. Nĩ ndeerire Jehova mahoya-inĩ ũrĩa ndaiguaga, na ngĩaria na ariũ a Ithe witũ arĩa maarĩ na ũmenyeru kĩungano-inĩ. Thutha wa gwĩciria ũndũ ũcio na njĩra nditũ, nĩ ndaatuire itua rĩa kũiga ũtungata wakwa mbere handũ ha ũini, ngĩtiga cukuru ĩyo ya ũini, na ngĩthiĩ kũhunjia kũndũ kwarĩ na bata mũnene wa ahunjia a Ũthamaki.” Itua rĩake rĩarĩ na moimĩrĩro marĩkũ?

Bruno aathamĩire taũni-inĩ ya Guapiara (ĩkoragwo na aikari ta 7,000), kiromita hakuhĩ 260 kuuma taũni nene ya São Paulo. Ũcio warĩ ũgarũrũku mũnene. Oigaga ũũ: “Ndaathamĩire kanyũmba kanini gataarĩ na frinji, TV, kana Intaneti. O na kũrĩ ũguo, nyũmba ĩyo yarĩ na maũndũ mangĩ itaakoretwo namo—kamũgũnda ka nyeni na matunda!” Agĩtungata kĩũngano-inĩ kĩmwe kĩnini kũu, rita rĩmwe harĩ kiumia Bruno nĩ eekagĩra irio, maĩ na mabuku mondo-inĩ yake akoya nduthi yake o nginya mĩgũnda-inĩ kũhunjia. Andũ aingĩ gĩcigo-inĩ kĩu matiakoretwo maiguĩte ũhoro ũrĩa mwega. Oigaga, “Ndeerutaga Bibilia na andũ 18, na kuona mogarũrũku marĩa arutwo acio meekaga ũtũũro-inĩ wao nĩ gwatũmire ngĩe na gĩkeno kĩingĩ mũno!” Agacoka akongerera ũũ: “Hĩndĩ ĩyo, nĩrĩo ndamenyire atĩ nĩ nyonete kĩrĩa ndaagĩte mũtũũrĩre-inĩ wakwa—kũiganĩra kũrĩa kuumanaga na kũiga maũndũ ma Ũthamaki mbere. Ndingĩkona gĩkeno ta gĩkĩ korũo ndathingatire maũndũ ma kĩĩmwĩrĩ.” No hihi Bruno aahingagia atĩa mabataro make ma kĩĩmbeca arĩ kũu Guapiara? Oigire ũũ akenete: “Ndutanaga kũhũũra ngita.” Na njĩra ĩngĩ, aarĩ o mũini njorua.

“NO MŨHAKA INGĨAIKARANGIRE”

Mariana (5), ũrĩa ũrorete gũkinyia mĩaka 30, eekorire ũndũ-inĩ o ta wa Bruno. Aarĩ wakiri, ĩndĩ o na arĩ na wĩra mwega, ndaaiguaga aiganĩire biũ. Oigaga ũũ: “Ndonaga ta arĩ o ‘gwĩthĩnia gũtheri.’” (Koh. 1:17) Aarĩ na ariũ a Ithe witũ nĩ maamwĩkĩrire ngoro ecirie ũtungata wa ũpainia. Thutha wa gwĩciria ũndũ ũcio, Mariana, hamwe na arata ake Bianca (6), Caroline (7), na Juliana (8), nĩ maatuire itua mahũthĩre ihinda rĩna gũteithia kĩũngano kĩarĩ taũni-inĩ yarĩ haraihu ya Barra do Bugres, hakuhĩ na Bolivia, mairo ngiri nyingĩ kuuma kwao mũciĩ. Gwacokire gũgĩthiĩ atĩa?

Mariana oigaga ũũ: “Ndaabangĩte gũikara kũu mĩeri ĩtatũ. No ihinda rĩu rĩgĩũka gũthira, ndeerutaga Bibilia na andũ 15! Hatarĩ nganja, arutwo acio nĩ maabataraga ũteithio makĩria nĩguo makũre kĩĩroho. Nĩ ũndũ ũcio, ndingĩahotire kũũmĩrĩria kũmeera atĩ nĩ ngũthiĩ. No mũhaka ingĩaikarangire.” Na ũguo nĩguo aarĩ acio a Ithe witũ ana meekire. No hihi wĩra ũcio mwerũ nĩ waatũmire ũtũũro wa Mariana ũgĩe na muoroto? Oigaga ũũ: “Kuona atĩ Jehova nĩ arahũthĩra gũteithia andũ kũgarũrĩra mĩtũũrĩre yao nĩ gũtũmaga njigue wega mũno. Nĩ kĩrathimo kũmenya atĩ rĩu ndĩrahũthĩra ihinda na hinya wakwa gwĩka ũndũ wa bata kũna.” Akĩaria ũhoro wĩgiĩ ũrĩa aarĩ acio ana a Ithe witũ maiguaga, Caroline oigire ũũ: “Rĩrĩa ndakoma ũtukũ, njiguaga njiganĩire mũno ndamenya atĩ nĩ ndĩĩheanĩte nĩguo thingate maũndũ ma Ũthamaki. Ũndũ ũrĩa wa bata mũno mũtũũrĩre-inĩ wakwa nĩ gũteithia arĩa ndutaga Bibilia. Nĩ ũndũ mwega mũno kuona magĩthiĩ na mbere. Nĩ ndĩreyonera ũũma wa ciugo ici: ‘Camai muone atĩ Jehova nĩ mwega.’”—Thab. 34:8.

No mũhaka Jehova akorũo nĩ akenaga mũno kuona aarĩ na ariũ a Ithe witũ ethĩ, arĩa “meerutagĩra meyendeire” kũhunjia ũhoro ũrĩa mwega wa Ũthamaki kũndũ kũrĩa kũraihĩrĩirie magĩthiĩ mongererekete thĩ yothe! (Thab. 110:3; Thim. 27:11) Acio othe merutagĩra meyendeire wĩra-inĩ ũcio, nĩ meyonagĩra irathimo nyingĩ cia Jehova.—Thim. 10:22.