Icanjama cia Ndũire Hihi Cionanagia Atĩ Ngai Ndarĩ Tha?

ŨRĨA ANDŨ MOIGAGA: “Ngai nĩwe wathanaga thĩ ĩno, kwoguo nĩwe ũrehaga icanjama cia ndũire; kwoguo no mũhaka akorũo ndarĩ tha.”

ŨRĨA BIBILIA ĨRUTANAGA: “Nakĩo kĩrĩndĩ gĩa thĩ gĩothe nĩgĩtũire kĩnyitĩtwo nĩ ũcio mũũru.” (1 Johana 5:19) “Ũcio mũũru” nũũ? Bibilia yonanagia nĩ Shaitani. (Mathayo 13:19; Mariko 4:15) Hihi ũhoro ũcio nĩ wa ma? Ta wĩcirie ũndũ ũyũ: Angĩkorũo nĩ Shaitani wathanaga thĩ ĩno, nĩwe ũtũmaga andũ mamũtũkie gũtuĩka eendi, akoroku, na maage ũmenyo. Na githĩ ũndũ ũcio ndũronania kĩrĩa gĩtũmĩte andũ manange thĩ na gĩkĩro kĩnene? Ataaramu aingĩ moigaga atĩ kwanangwo gwa thĩ nĩ gũkuruhaine mũno na icanjama cia ndũire, hihi na njĩra ya gũtũma igĩe, ciĩhe mũno kana gũgatũma andũ makorũo marĩ ũgwati-inĩ makĩria.

Ngai etĩkĩrĩtie Shaitani aathane nĩkĩ? Thĩna wambĩrĩirie rĩrĩa Adamu na Hawa maareganire na wathani wa Ngai. Kuuma hĩndĩ ĩyo andũ aingĩ nĩ mareganĩte na wathani wake. Nĩ ũndũ wa itua rĩu, makoretwo marĩ rungu rwa wathani wa thũ ĩyo ya Ngai, Shaitani. Nĩkĩo Jesu eetire Shaitani “mũnene wa gũkũ thĩ.” (Johana 14:30) Hihi Shaitani egũtũũra athanaga? Aca!

Jehovaa nĩ arũmbũyagia andũ o na Shaitani amarehera mĩnyamaro. Ũhoro wa ma nĩ atĩ, Ngai nĩ acayagĩra andũ mũno rĩrĩa maranyamarĩka. Kwa ngerekano, rĩrĩa rũũrĩrĩ rwa Isiraeli rwarĩ na mathĩna maritũ, Bibilia yugaga ũũ: “[Ngai] nĩaathĩnĩkire mathĩna-inĩ mao mothe.” (Isaia 63:9) Nĩ ũndũ wa tha ciake, Ngai nĩ abangĩte kweheria wathani wa Shaitani ica ikuhĩ! Nĩ athuurĩte Mũriũ wake Jesu Kristo, atuĩke Mũthamaki wĩ kĩhooto na ũthingu tene na tene.

ŨRĨA ŨNDŨ ŨCIO ŨGŨKONIĨ: O na gũtuĩka wathani wa Shaitani nĩ ũremetwo kũgitĩra andũ kuumana na icanjama cia ndũire, wathani wa Jesu nĩ ũkaahota. Mũthenya ũmwe Jesu nĩ aagitĩire arutwo ake kuumana na kĩhuhũkanio kĩnene. Bibilia yugaga ũũ: ‘Nake . . . agĩgĩkũũma rũhuho, na akĩĩra iria atĩrĩ: “Kira! Horera!” Naruo rũhuho rũgĩtuĩka, gũkĩhorera o kũhorera.’ Nao arutwo makiuga ũũ: “Kaĩ mũndũ ũyũ akĩrĩ ũ, kuona atĩ o na rũhuho na iria nĩimũiguaga?” (Mariko 4:37-41) Ũndũ ũcio ũtũheaga ũũma wa atĩ Jesu nĩ akagitĩra andũ othe athingu hĩndĩ ya wathani wake arĩ Mũthamaki.—Danieli 7:13, 14.