Ndũkanarakarĩre Jehova

1, 2. Nĩkĩ tũtiagĩrĩirũo gũcokereria Jehova mahĩtia nĩ ũndũ wa mathĩna ma andũ? Tarĩria.

TATUA atĩ ũrĩ mũthuri ũkoretwo kĩhiko-inĩ kĩrĩ na gĩkeno mĩaka mĩingĩ. Ĩndĩ mũthenya ũmwe wainũka, ũgakora indo ciothe cia nyũmba yaku iharaganĩtio. Metha na itĩ ikaunangwo, thani na ikombe ikoragwo na mũgeka ũgatarũrangwo. Mũciĩ waku wendete mũno nĩ mũthũkangie biũ. “Nĩ kĩĩ gĩtũmire mũtumia wakwa eke ũũ?” Hihi no ũrie kĩũria ta kĩu kana ũngĩũria, “Nũ wĩkire ũũ?” Hatarĩ nganja, kĩũria kĩrĩa kĩngĩũka meciria-inĩ maku narua nĩ kĩu gĩa kerĩ. Nĩkĩ? Tondũ nĩ ũĩ atĩ mũtumia waku wendete ndangĩka gĩĩko ta kĩu gĩa kwananga.

² Mahinda-inĩ maya, thĩ ĩrĩa tũratũũra nĩ ĩthũkĩtio. Tĩri, maĩ na rĩera nĩ ithũkĩtio. Kũrĩ na ũhinya na waganu mũingĩ. Kũringana na ũrĩa twĩrutĩte thĩinĩ wa Bibilia, nĩ tũmenyete atĩ ti Jehova ũrehaga mathĩna macio. Ombĩte thĩ ĩno ĩtuĩke paradiso. (Kĩam. 2:8, 15) Jehova nĩ Ngai ũrĩ wendo. (1 Joh. 4:8) Kwĩruta Maandĩko nĩ gũtũteithĩtie kũmenya kĩhumo kĩa mĩnyamaro ĩrĩa mĩingĩ thĩinĩ wa thĩ. Kĩhumo kĩu nĩ Shaitani, ũrĩa arĩ we “mũnene wa gũkũ thĩ.”—Joh. 14:30; 2 Kor. 4:4.

3. Nĩ na njĩra ĩrĩkũ mwĩcirĩrie witũ ũngĩkorũo ũrĩ mũhĩtanu?

³ Ona kũrĩ ũguo-rĩ, tũtingiuga atĩ Shaitani nĩwe ũrehaga mathĩna maitũ mothe. Nĩkĩ? Mamwe ma mathĩna maitũ moimanaga na mahĩtia maitũ. (Thoma Gũcokerithia Maathani 32:4-6.) Nĩ ma, no twĩtĩkanie na ũndũ ũcio, ĩndĩ tondũ tũtirĩ akinyanĩru, no tũgĩe na mawoni matagĩrĩire megiĩ mathĩna maitũ na ũndũ ũcio no ũkorũo ũrĩ ũgwati. (Thim. 14:12) Handũ ha gũcokereria Shaitani kana gwĩcokereria mahĩtia nĩ ũndũ wa mathĩna maitũ, no twambĩrĩrie gũcokereria Jehova. Ona twahota ‘kũmũngʼongʼorera kana kũmũrakarĩra.’—Thim. 19:3.

4, 5. Mũkristiano ‘angĩngʼongʼorera kana arakarĩre Jehova’ atĩa?

⁴ Hihi no kũhoteke mũndũ ‘angʼongʼorere kana arakarĩre Jehova’? Gwĩka ũguo no wĩra wa tũhũ na gũtingĩtũteithia. (Isa. 41:11) Tũtingĩhota gũcindana na Ngai. Ma nĩ atĩ, no twage kuuga atĩ nĩ tũrakarĩire Jehova, ĩndĩ Thimo 19:3 yugaga atĩ ũkĩgu wa mũndũ “ũhongʼoraga njĩra yake, nayo ngoro yake ĩgagĩcoka kũngʼongʼorera kana kũrakarĩra Jehova.” Hatarĩ nganja, no kũhoteke mũndũ arakarĩre Ngai ngoro-inĩ yake. Mwerekera ũcio no wambĩrĩrie kuoneka na njĩra citeyumĩrĩtie mũno. Mũndũ ahota kũrakarĩra Jehova na nĩ ũndũ ũcio ahoerere ũtungata-inĩ wake kana atige kũnyita mbaru mĩbango ya kĩũngano.

⁵ Nĩ kĩĩ kĩngĩtũma ‘tũngʼongʼorere kana tũrakarĩre Jehova’? Tũngĩĩthema mũtego ũcio atĩa? Harĩ bata tũmenye macokio ma ciũria icio. Nĩkĩ? Tondũ ũndũ ũcio no ũhutie ũrata witũ na Jehova!

NĨ KĨĨ KĨNGĨTŨMA TŨRAKARĨRE JEHOVA?

6, 7. Nĩ kĩĩ gĩatũmire Aisiraeli mambĩrĩrie gũtetia Jehova?

⁶ Nĩ kĩĩ kĩngĩtũma Mũkristiano mwĩhokeku ambĩrĩrie kũrakarĩra Ngai ngoro-inĩ yake? Rekei twarĩrĩrie maũndũ matano na tũthuthurie ngerekano irĩ thĩinĩ wa Bibilia iria cionanĩtie ũrĩa andũ amwe maagũire mũtego-inĩ ũcio.—1 Kor. 10:11, 12.

⁷ Mĩario mĩũru ya andũ angĩ no ĩtũthũkie. (Thoma Gũcokerithia Maathani 1:26-28.) No hĩndĩ Aisiraeli maakoretwo mahonokio kuuma ũkombo-inĩ Misiri. Jehova aareheire rũrĩrĩ rũu rũũru mahũra ikũmi, agĩcoka akĩniina Firauni na thigari ciake thĩinĩ wa Iria Itune. (Tham. 12:29-32, 51; 14:29-31; Thab. 136:15) Andũ a Ngai meeharĩirie biũ kũingĩra Bũrũri wa Kĩĩranĩro. Ona kũrĩ ũguo, ihinda-inĩ rĩu rĩa bata mũno Aisiraeli makĩambĩrĩria gũtetia Jehova. Nĩ kĩĩ gĩatũmire wĩtĩkio wao ũnyihe? Mooragĩtwo ngoro nĩ riboti njũru ĩrĩa maareheirũo nĩ andũ amwe arĩa maatũmĩtwo magatuĩrie ũrĩa bũrũri ũcio watariĩ. (Ndar. 14:1-4) Gwathire atĩa? Rũciaro rũu ruothe rũtietĩkĩririo kũingĩra “bũrũri ũcio mwega.” (Gũcok. 1:34, 35) Hihi rĩmwe na rĩmwe nĩ twĩtĩkagĩria wĩtĩkio witũ ũthũkio nĩ mĩario mĩũru ya andũ angĩ, na nĩ ũndũ ũcio tũgateta nĩ ũndũ wa njĩra iria Jehova ahũthagĩra gũtongoria andũ ake?

8. Nĩ kĩĩ gĩatũmire andũ a Ngai matukũ-inĩ ma Isaia mambĩrĩrie kũrakarĩra Jehova nĩ ũndũ wa mathĩna mao?

⁸ Mathĩna no matũũrage ngoro. (Thoma Isaia 8:21, 22.) Matukũ-inĩ ma Isaia rũrĩrĩ rwa Juda nĩ rwekorire thĩna-inĩ mũnene. Maathiũrũrũkĩirio nĩ thũ na matiarĩ na irio nyingĩ. Andũ aingĩ maarĩ na ngʼaragu. No makĩria ma ũguo, kwarĩ na ngʼaragu ya kĩĩroho. (Amos 8:11) Ona kũrĩ ũguo, handũ ha gũcaria ũteithio wa Jehova nĩguo mahote kũhiũrania na mathĩna macio, maambĩrĩirie ‘kũruma’ mũthamaki wao, o na Ngai wao. Moonaga ta arĩ Jehova wamarehagĩra mathĩna macio. O ũndũ ũmwe na ũguo, tũngĩgĩo nĩ thĩna mũna ũtũũro-inĩ twahota kwambĩrĩria kũrakarĩra Jehova na kuona ta ataatũteithirie rĩrĩa twabataraga ũteithio wake.

9. Nĩ kĩĩ gĩatũmĩte Aisiraeli matukũ-inĩ ma Ezekieli magĩe na muonere mũru?

⁹ Tũtingĩmenya maũndũ mothe. Nĩ ũndũ wa gũkorũo matekũmenya maũndũ mothe, Aisiraeli matukũ-inĩ ma Ezekieli mooigaga atĩ matuĩro ma Jehova “matithiĩte ũndũ ũmwe kana ti mega.” (Ezek. 18:29) O na matekũmenya itũmi ciothe cia Ngai, maatuagĩra Jehova makĩhũthĩra ithimi ciao. Rĩmwe na rĩmwe tũngĩaga gũtaũkĩrũo wega nĩ ũrutani mũna thĩinĩ wa Bibilia, kana twage kũmenya kĩrĩa kĩratũma tũkorũo na mathĩna-rĩ, hihi no twambĩrĩrie kuuga ngoro-inĩ atĩ matuĩro ma Jehova ti ma kĩhooto, “matithiĩte ũndũ ũmwe kana ti mega”?—Ayub. 35:2.

10. Mũndũ angĩrũmĩrĩra kĩonereria kĩũru kĩa Adamu na njĩra ĩrĩkũ?

¹⁰ Gũcokereria andũ angĩ mahĩtia na mehia maitũ. Adamu nĩ aacokereirie Ngai mahĩtia make. (Kĩam. 3:12) Ona gũtuĩka nĩ aamenyaga wega moimĩrĩro ma kuuna watho wa Ngai, aawunire na rũtũrĩko, agĩcoka gũcokereria Jehova mahĩtia make. Eeteteire atĩ nĩ Jehova wamũheete mũtumia mũũru. Kuuma hĩndĩ ĩyo andũ angĩ nĩ makoretwo makĩrũmĩrĩra kĩonereria kĩa Adamu gĩa gũcokereria Ngai mahĩtia mao. Nĩ wega kwĩyũria ũũ: ‘Hihi gũkua ngoro na kũigua ũũru nĩ ũndũ wa mahĩtia makwa no gũtũme ndaakario nĩ ithimi cia Jehova?’

11. Tũngĩĩruta atĩa kuuma kũrĩ Jona?

¹¹ Mũndũ gwĩciria mũno ũhoro wa maũndũ make kĩũmbe. Mũnabii Jona ndaakenirio nĩ Jehova kũiguĩra andũ a Nineve tha. (Jona 4:1-3) Nĩkĩ hihi? No kũhoteke eeciragia ũrĩa andũ mangĩamuonire Ngai angĩagire kũhingia ituĩro rĩrĩa aahunjĩtie rĩa kũniina itũũra rĩu. Handũ ha kũiguĩra andũ arĩa meerirĩte a Nineve tha, Jona eeciragia mũno ũhoro wa ngumo yake. O ta Jona-rĩ, hihi ithuĩ no twĩcirie mũno ũhoro wa maũndũ maitũ nginya tũrakarĩre Jehova nĩ ũndũ wa kwaga kũrehe mũico na ihenya? Angĩkorũo kwa ihinda rĩa mĩaka mĩingĩ tũkoretwo tũkĩhunjia atĩ mũthenya wa Jehova ũrĩ hakuhĩ-rĩ, hihi no twambĩrĩrie kũrakarĩra Jehova rĩrĩa andũ maratũnyũrũria nĩ ũndũ wa kũhunjia ũrĩa Bibilia yugĩte?—2 Pet. 3:3, 4, 9.

ŨRĨA TŨNGĨĨTHEMA KŨRAKARĨRA JEHOVA

12, 13. Tũngĩambĩrĩria gwĩkĩrĩra nganja njĩra imwe cia Jehova cia gwĩka maũndũ-rĩ, twagĩrĩirũo gwĩka atĩa?

¹² Tũngĩka atĩa tũngĩambĩrĩria gwĩkĩrĩra nganja njĩra cia Jehova cia gwĩka maũndũ? Nĩ wega kũririkana atĩ gwĩka ũguo ti ũndũ mwega. Bibilia ĩngĩ ĩtaũrĩte Thimo 19:3 ũũ: ‘Mũndũ mũkĩgu nĩ we wĩthũkagĩria na mĩthiĩre yake, nayo ngoro yake ĩkanugunĩra Jehova.’ (The Holy Bible in Gĩkũyũ Language) Tũrĩ na ũndũ ũcio meciria-inĩ, rekei twarĩrĩrie maũndũ matano marĩa mangĩtũteithia tũtikanareke moritũ ma ũtũũro matũme tũrakarĩre Jehova.

¹³ Ndũkanareke ũrata waku na Jehova ũthũke. No tũhote gwĩthema mwerekera wa kũrakarĩra Jehova tũngĩtũũria ũrata wa hakuhĩ nake. (Thoma Thimo 3:5, 6.) Nĩ tũkũbatara kwĩhoka Jehova. Ningĩ nĩ tũkũbatara gwĩthema kwĩhoka ũũgĩ witũ kana gwĩciria ũhoro wa maũndũ maitũ tu. (Thim. 3:7; Koh. 7:16) Tweka ũguo, tũtirĩrakaragĩra Jehova rĩrĩa maũndũ moru mekĩka.

14, 15. Nĩ kĩĩ kĩrĩtũteithagia tũtigathũkio nĩ mĩario mĩũru ya andũ angĩ?

¹⁴ Ndũkanareke mĩario mĩũru ya andũ ĩgũthũkie. Aisiraeli a hĩndĩ ya Musa maarĩ na itũmi njiganu cia gwĩtĩkia atĩ Jehova nĩ angĩamatongoririe nginya maingĩre Bũrũri wa Kĩĩranĩro. (Thab. 78:43-53) Ĩndĩ rĩrĩa maareheirũo riboti njũru nĩ athigani arĩa ikũmi, ‘matiaririkanire guoko gwake.’ (Thab. 78:42) Tũngĩikara tũgĩĩcũranagia mawĩko ma Jehova, tũkaririkanaga maũndũ mothe mega marĩa atwĩkĩire, ũrata witũ nake ũrĩthiaga ũkĩrũmaga. Nĩ ũndũ ũcio, tũtirĩrekaga mĩario mĩũru ya andũ angĩ ĩthũkie ũrata witũ na Jehova.—Thab. 77:11, 12.

¹⁵ Ningĩ, tũngĩkorũo na mawoni moru kwerekera Akristiano arĩa angĩ, ũrata witũ na Jehova no ũthũke. (1 Joh. 4:20) Kwa ngerekano-rĩ, rĩrĩa Aisiraeli maatetire nĩ ũndũ wa kwamũrũo kwa Haruni, Jehova oigire atĩ nĩwe maatetirie. (Ndar. 17:10) O ũndũ ũmwe na ũcio, tũngĩambĩrĩria kũnugunĩka na gũteta nĩ ũndũ wa arĩa Jehova arahũthĩra gũtongoria ithondeka rĩake gũkũ thĩ, tũngĩkorũo tũgĩtetia Jehova.—Ahib. 13:7, 17.

16, 17. Twagĩrĩire kũririkana ũndũ ũrĩkũ rĩrĩa tũrĩ na mathĩna?

¹⁶ Ririkana atĩ ti Jehova ũtũrehagĩra mathĩna. O na gũtuĩka Aisiraeli a hĩndĩ ya Isaia nĩ maatiganĩirie Jehova, we no eendaga kũmateithia. (Isa. 1:16-19) O na tũngĩkorũo na thĩna ũrĩkũ, no tũũmĩrĩrio nĩ kũmenya atĩ Jehova nĩ atũrũmbũyagia na nĩ eharĩirie gũtũteithia. (1 Pet. 5:7) Atwĩraga atĩ nĩ arĩtũheaga hinya ũrĩa tũrabatara nĩguo tũhote gũthiĩ na mbere gũkirĩrĩria.—1 Kor. 10:13.

¹⁷ Angĩkorũo nĩ tũranyamarĩka nĩ ũndũ wa maũndũ matarĩ ma kĩhooto o ta ũrĩa Ayubu aanyamarĩkire-rĩ, nĩ wega kũririkana atĩ ti Jehova ũratũma tũnyamarĩke. Jehova nĩ athũire wagi wa kĩhooto ĩndĩ nĩ endete maũndũ ma ũthingu. (Thab. 33:5) Rekei tugage o ta Elihu mũrata wa Ayubu, ũrĩa woigire: “Kũrogira Mũrungu angĩĩka ũndũ mwaganu! Mwene-Hinya-rĩ, kũrogira angĩĩka ũndũ wa wogogi!” (Ayub. 34:10) Handũ ha gũtũrehera mathĩna-rĩ, Jehova ‘atũheaga maũndũ o mothe mega, na kĩheo o gĩothe kĩrĩa kĩagĩrĩire kũna.’—Jak. 1:13, 17.

18, 19. Nĩkĩ tũtiagĩrĩirũo o na hanini nĩ gũtuĩra Jehova? Heana ngerekano.

¹⁸ Ndũkanatuĩre Jehova. Ngai nĩ mũkinyanĩru, na meciria make timo meciria maitũ. (Isa. 55:8, 9) Nĩ ũndũ ũcio, kwĩnyihia no gũtũteithie gwĩtĩkĩra atĩ ũtaũku witũ nĩ ũrĩ mĩhaka. (Rom. 9:20) Nĩ maita matare tũkoragwo tũkĩmenya maũndũ mothe megiĩ ũndũ mũna. Hatarĩ nganja nĩ wĩyoneire ũũma wa ciugo cia thimo ĩno: “Mwambĩrĩria cira onagwo ta arĩ we wĩ na kĩhooto, ĩndĩ ũrĩa me cira nake okaga agakĩmuururia.”—Thim. 18:17.

¹⁹ Kwa ngerekano-rĩ, hihi no ũtuĩre mũrata waku wĩhokete atĩ nĩ ehĩtie angĩka ũndũ ũtarataũkĩrũo nĩguo wega, kana ũndũ ũrona ndwagĩrĩire gwĩkwo na njĩra ĩyo? No wage kũmũtuĩra, makĩria angĩkorũo nĩ mũndũ mũyaine mĩaka mĩingĩ. Angĩkorũo ũguo nĩguo tũngĩkĩra arata aitũ matarĩ akinyanĩru-rĩ, na githĩ tũtikĩagĩrĩirũo kwĩhoka Ithe witũ wa igũrũ makĩria, tondũ njĩra na meciria make nĩ ma igũrũ gũkĩra maitũ!

20, 21. Nĩkĩ harĩ bata kũririkana kĩhumo kĩa mathĩna?

²⁰ Ririkana kĩhumo kĩa mathĩna. Nĩkĩ nĩ wega gwĩka ũguo? Tondũ mathĩna mamwe moimanaga na mahĩtia maitũ. Nĩguo tũtigacokererie Jehova mahĩtia maitũ, nĩ tũkũbatara gwĩtĩkĩra ũndũ ũcio. (Gal. 6:7) Ndũkanagerie gũcokereria Jehova mahĩtia nĩ ũndũ wa mathĩna. Nĩkĩ gwĩka ũguo ti ũndũ wa ũũgĩ? Ta wĩcirie ũhoro wa ngerekano ĩno: Ngaari no ĩkorũo ĩthondeketwo ũndũ ĩngĩhota gũtengʼera kiromita nyingĩ harĩ ithaa rĩmwe. Ta hũũra mbica ndereba amĩtwarithĩtie na ihenya gũkĩra ũrĩa gwĩtĩkĩrĩtio arĩ gĩthioro-inĩ kĩnene. Ngaari ĩyo ĩkagũa. Hihi mũthondeki wa ngaari ĩyo no acokererio mahĩtia. Aca. O ũndũ ũmwe na ũcio-rĩ, Jehova aatũmbire tũrĩ na wĩyathi wa kwĩyamũrĩra. O na kũrĩ ũguo, nĩ atũheaga mootaro ma gũtũteithia gũtua matua mega. Gũkĩrĩ ũguo-rĩ, hihi nĩ tũkĩagĩrĩirũo gũcokereria Mũũmbi witũ mahĩtia maitũ?

²¹ Ma nĩ atĩ, ti mathĩna maitũ mothe moimanaga na mahĩtia kana mehia maitũ. “Ihinda na ũndũ ũterĩgĩrĩirũo,” nĩ itũmaga maũndũ mamwe mahanĩke. (Koh. 9:11, New World Translation) O na kũrĩ ũguo, tũtiagĩrĩirũo nĩ kũriganĩrũo atĩ Shaitani nĩwe kĩhumo kĩrĩa kĩnene kĩa maũndũ moru. (1 Joh. 5:19; Kũg. 12:9) Mũcukani nĩwe thũ no ti Jehova!—1 Pet. 5:8.

GITĨRA BIŨ ŨRATA WAKU NA JEHOVA

22, 23. Nĩ ũndũ ũrĩkũ twagĩrĩirũo nĩ kũririkana tũngĩkua ngoro nĩ ũndũ wa mathĩna maitũ?

²² Ririkanaga kĩonereria kĩa Joshua na Kalebu hĩndĩ ĩrĩa ũrahiũrania na mathĩna. Ngũrani na athigani arĩa ikũmi, athuri acio erĩ ehokeku maarehire riboti njega. (Ndar. 14:6-9) Nĩ moonanirie atĩ maarĩ na wĩtĩkio harĩ Jehova. O na kũrĩ ũguo, no mũhaka mangĩacangacangire mĩaka 40 werũ-inĩ hamwe na Aisiraeli acio angĩ. Hihi Joshua na Kalebu nĩ maarakarire, magĩteta, kana makĩona ta ũndũ ũcio ũtaarĩ wa kĩhooto? Aca. Meehokire Jehova. Hihi nĩ maarathimirũo? Hatirĩ nganja! O na gũtuĩka rũciaro rũu ruothe nĩ rwathirĩire werũ-inĩ, athuri acio erĩ nĩ maaingĩrire Bũrũri wa Kĩĩranĩro. (Ndar. 14:30) O ũndũ ũmwe na ũcio, nĩ tũrĩrathimagwo nĩ Jehova tũngĩaga ‘kũnogio’ nĩ gwĩka wendi wake.—Gal. 6:9; Ahib. 6:10.

²³ Wagĩrĩirũo gwĩka atĩa angĩkorũo nĩ ũraigua ũkuĩte ngoro nĩ ũndũ wa mathĩna, mahĩtia ma andũ angĩ kana maku? Wĩcũranie ũhoro wa ngumo cia Jehova cia magegania. Wĩcirie ũhoro wa kĩrĩgĩrĩro kĩrĩa Jehova akũheete. Wĩyũrie ũũ: ‘Ũtũũro wakwa ũngĩtariĩ atĩa korũo ndirĩ na ũrata wa hakuhĩ na Jehova?’ Gitagĩra ũrata waku nake hingo ciothe, na ndũkanareke ngoro yaku ĩmũrakarĩre!