Ciũria Kuuma Kũrĩ Athomi

Hihi nĩ wega Akristiano gũcina kĩimba?

Bibilia nĩ yonanagia atĩ kũrĩ hĩndĩ mĩĩrĩ kana mahĩndĩ ma andũ akuũ maanacinwo. (Josh. 7:25; 2 Maũ. 34:4, 5) No kũhoteke ũndũ ũcio woonanagia atĩ andũ acio maatiagĩrĩirũo gũthikwo na gĩtĩo. O na kũrĩ ũguo, ti hingo ciothe gũcinwo kuoonanagia ũndũ ũcio.

Ũndũ ũcio nĩ wonekaga wega kuumana na ũhoro wa gĩkuũ kĩa Mũthamaki Saulu na ariũ ake atatũ. Othe ana maakuĩrĩire mbaara-inĩ makĩrũa na Afilisti. Ũmwe wa ariũ acio ake aarĩ Jonathani, na aarĩ mũrata mwĩhokeku wa Daudi na nĩ aamũnyitaga mbaru. Rĩrĩa Aisiraeli arĩa maaikaraga Jabeshi-gileadi maamenyire atĩ Saulu na ariũ ake nĩ moragĩtwo, maagĩrire mĩĩrĩ yao, makĩmĩcina, magĩcoka magĩthika mahĩndĩ macio. Thutha-inĩ Daudi nĩ aagathĩrĩirie Aisiraeli acio nĩ ũndũ wa gwĩka ũguo.—1 Sam. 31:2, 8-13; 2 Sam. 2:4-6.

Kũringana na Bibilia, kĩĩrĩgĩrĩro kĩa arĩa makuĩte nĩ kũriũka—mũndũ gũcokio muoyo nĩ Ngai. O na mũndũ mũkuũ angĩcinwo kana age gũcinwo, Ngai ndangĩremwo nĩ kũmũriũkia arĩ na mwĩrĩ ũngĩ mwerũ. Hĩndĩ ĩrĩa Mũthamaki Nebukadinezaru aathanire atĩ Ahibirania arĩa atatũ ehokeku maikio icua-inĩ rĩa mwaki, matietigĩrire atĩ hihi mahĩa nĩ mwaki Ngai nĩ akaaremwo nĩ kũmariũkia. (Dan. 3:16-18) No taguo kwarĩ harĩ ndungata njĩhokeku cia Jehova iria cioragirũo na igĩcinwo na mwaki kambĩ-inĩ cia kũherithĩria andũ cia Nazi. Kũrĩ ndungata nyingĩ njĩhokeku cia Jehova cianakua hĩndĩ ya mĩtuthũko ya indo kana na njĩra ingĩ na mĩĩrĩ yao ĩgathira biũ. O na kũrĩ ũguo, Jehova no akaamariũkia.—Kũg. 20:13.

Jehova ndarabatara gũcokanĩrĩria ciĩga cia mwĩrĩ ũrĩa mũndũ aarĩ naguo atĩ nĩguo amũriũkie. Ũndũ ũcio nĩ wonanagio wega nĩ ũrĩa Ngai ariũkagia Akristiano arĩa aitĩrĩrie maguta nĩguo mathiĩ igũrũ. O ta ũrĩa Jesu aariũkirio arĩ na mwĩrĩ wa “roho,” no taguo Akristiano aitĩrĩrie maguta mariũkagio marĩ o andũ arĩa, ĩndĩ marĩ na mĩĩrĩ ya roho. Matithiaga igũrũ na mĩĩrĩ ya nyama ĩrĩa maarĩ nayo gũkũ thĩ.—1 Pet. 3:18; 1 Kor. 15:42-53; 1 Joh. 3:2.

Kĩĩrĩgĩrĩro giitũ gĩa kũriũka gĩtiĩhocetie harĩ ũrĩa kĩimba kĩngĩkwo, ĩndĩ kĩĩhocetie harĩ wĩtĩkio atĩ Ngai arĩ na ũhoti na nĩ eriragĩria kũhingia ciĩranĩro ciake. (Atũm. 24:15) Ma nĩ atĩ, no twage gũtaũkĩrũo biũ ũrĩa Ngai aaringaga ciama cia kũriũkia arĩa akuũ mahinda-inĩ ma tene kana ũrĩa akaaringa ciama icio mahinda marĩa maroka. O na kũrĩ ũguo, nĩ twĩhokete Jehova biũ. Nĩ ‘aatũmenyithirie’ atĩ nĩ akaariũkia andũ nĩ ũndũ wa ũrĩa aariũkirie Jesu.—Atũm. 17:31; Luk. 24:2, 3.

Nĩ harĩ bata Akristiano gwĩciria ũhoro wa ũndũire, mawoni ma andũ, na watho wa thirikari ya kwao ũhoro-inĩ wĩgiĩ gũthika mũndũ mũkuũ. (2 Kor. 6:3, 4) Marĩkia gwĩka ũguo, itua rĩa gũcina kana kwaga gũcina kĩimba nĩ rĩa famĩlĩ kana mũndũ kĩũmbe.