Macokio ma Ciũria cia Bibilia
Hihi ndini ciothe nĩ itĩithagia Ngai?
Ũgĩthikĩrĩria mohoro kuuma kũndũ gũtiganĩte thĩinĩ wa thĩ, no gũkorũo nĩ ũiguĩte maũndũ moru marĩa marekwo nĩ andũ megwatanĩtie na ndini. Ti ndini ciothe ciumanĩte na Ngai ũrĩa wa ma. (Mathayo 7:15) Ũhoro wa ma nĩ atĩ, andũ aingĩ mũno nĩ mahĩtithĩtio.—Thoma 1 Johana 5:19.
O na kũrĩ ũguo, Ngai nĩ onaga andũ arĩa mendete maũndũ marĩa mega na makenda ma. (Johana 4:23) Ngai nĩ areta andũ ta acio nĩguo merute Kiugo gĩake, Bibilia.—Thoma 1 Timotheo 2:3-5.
Ũngĩkũũrana atĩa ndini ĩrĩa ya ma?
Jehova Ngai nĩ aracokanĩrĩria andũ kuuma ndini itiganĩte na njĩra ya kũmaruta ũhoro wa ma, na kũmaruta kwendana o ene. (Mika 4:2, 3) Kwoguo, no ũhote gũkũũrana athathaiya a ndini ya ma ũngĩrora ũrĩa marũmbũyanagia.—Thoma Johana 13:35.
Jehova Ngai nĩ aracokanĩrĩria andũ a mĩthemba yothe kũgererera ũthathaiya wa ma.—Thaburi 133:1
Ũtũũro na wĩtĩkio wa athathaiya a ma ũtongoragio nĩ Bibilia. (2 Timotheo 3:16) Ningĩ nĩ matĩĩte rĩĩtwa rĩa Ngai. (Thaburi 83:18) Na nĩ mahunjagia atĩ Ũthamaki wa Ngai noguo tu kĩhonia kĩa mathĩna ma andũ. (Danieli 2:44) Marũmagĩrĩra kĩonereria kĩa Jesu gĩa kũreka ‘ũtheri wao ũtheragĩre andũ,’ na njĩra ya gwĩkĩra andũ arĩa angĩ maũndũ mega. (Mathayo 5:16) Nĩ ũndũ ũcio, athathaiya a ma no ũmakũũrane nĩ ũndũ nĩ maceeragĩra andũ kwao mĩciĩ makĩmahunjĩria ũhoro ũrĩa mwega wa Ũthamaki wa Ngai.—Thoma Mathayo 24:14; Atũmwo 5:42; 20:20.