Aira a Jehova nĩ Andũ a Mũthemba Ũrĩkũ?

Tũkoragwo tũrĩ ithondeka rĩrĩ thĩinĩ wa thĩ yothe rĩtanyitanĩte na ikundi iria ingĩ cia ndini. O na gũtuĩka wabici itũ ĩrĩa nene ĩkoragwo Amerika (U.S.), Aira a Jehova arĩa aingĩ makoragwo mabũrũri-inĩ mangĩ. Tũkoragwo tũrĩ andũ ta milioni inyanya tũkĩruta andũ Bibilia thĩinĩ wa mabũrũri makĩria ma 230. Twĩkaga ũguo tũgĩathĩkĩra ciugo ici cia Jesu: “Naguo Ũhoro-ũyũ-Mwega wa ũthamaki nĩũkahunjio thĩ yothe, ũtuĩke ũira kũrĩ ndũrĩrĩ ciothe.”—Mathayo 24:14.

Nĩ twathĩkagĩra biũ mawatho ma bũrũri ũrĩa tũrĩ. O na kũrĩ ũguo, tũtinyitaga mbaru mwena o na ũmwe wa gĩũteti. Gĩtũmi nĩ tondũ nĩ tũrũmagĩrĩra ũrĩa Jesu eerire Akristiano atĩ “o ti a gũkũ thĩ.” Nĩ ũndũ ũcio tũtiĩingĩragia maũndũ-inĩ ma gĩũteti kana ma mbaara. (Johana 15:19; 17:16) Hĩndĩ ya Mbaara ya Kerĩ ya Thĩ, Aira a Jehova nĩ moohirũo njera, makĩnyarirũo, na magĩkwo maũndũ mangĩ moru mũno nĩ ũndũ wa itua rĩao rĩa kwaga kũnyita mbaru mwena o na ũrĩkũ. Mũndũ ũmwe warĩ bishobu bũrũri-inĩ wa Njĩrĩmani aandĩkire ũũ: “Acio no o tu mangiuga atĩ nĩ maaregire kwĩingĩria mbaara-inĩ nĩ ũndũ wa thamiri ciao hĩndĩ ya Wathani wa Nazi.”

O na kũrĩ ũguo, tũtiĩyeheranagia na andũ arĩa angĩ. Jesu aahoire Ngai ũũ igũrũ rĩgiĩ arũmĩrĩri ake: “Ndigũkũhoya ũmarute gũkũ thĩ.” (Johana 17:15) Nĩ ũndũ ũcio, no ũtuone tũkĩruta wĩra, tũkĩgũra indo, na tũgĩthiĩ cukuru hamwe na andũ arĩa angĩ.