‘Andũ Arĩa Matariĩ Ũguo, Matĩagei’
KUUMA 1992, Kĩama Kĩrĩa Gĩtongoragia nĩ gĩkoretwo gĩkĩamũra athuri Akristiano marĩ na ũmenyeru, mateithagĩrĩrie kamĩtĩ ciakĩo kũhingia wĩra wacio.a Ateithia acio nĩ amwe a “ngʼondu ingĩ” na nĩ manyitaga mbaru biũ Kĩama Kĩrĩa Gĩtongoragia. (Joh. 10:16) Nĩ mathiaga mĩcemanio-inĩ ya o Kiumia thĩinĩ wa kamĩtĩ iria makoragwo, makaheana ũhoro ũrĩa ũngĩbatarania na makaruta mawoni mao. Athuri a Kĩama Kĩrĩa Gĩtongoragia nĩo matuaga matua ma mũico, nao ateithia ao magatigĩrĩra atĩ matua marĩa matuwo nĩ mararũmĩrĩrũo. Ateithia acio makoragwo meharĩirie kũruta wĩra o ũrĩa wothe maaheo. Ningĩ ateithia acio nĩ mathiaga na athuri a Kĩama Kĩrĩa Gĩtongoragia rĩrĩa marathiĩ igomano-inĩ cia mwanya na cia kĩĩmabũrũri. Ningĩ nĩ harĩ hĩndĩ maceragĩra wabici cia honge matũmĩtwo nĩ Kĩama Kĩrĩa Gĩtongoragia.
Ũmwe wa ateithia acio ũtungatĩte kuuma rĩrĩa mũbango ũcio waambĩrĩirie oigire ũũ: “Rĩrĩa ndaaruta mawĩra marĩa ndĩhokeirũo, athuri a Kĩama Kĩrĩa Gĩtongoragia nĩ mahotaga kũrũmbũiya biũ maũndũ ma kĩĩroho.” Mũrũ wa Ithe witũ ũngĩ ũtungatĩte arĩ mũteithia mĩaka 20 oigire ũũ: “Gĩkoretwo kĩrĩ gĩtĩo kĩa mwanya itangĩringithania na ũndũ ũngĩ o wothe.”
Athuri a Kĩama Kĩrĩa Gĩtongoragia nĩ mehokagĩra ateithia acio mawĩra maingĩ na nĩ makenagĩra mũno mawĩra marĩa mahingagio nĩ ariũ a Ithe witũ acio ehokeku na marĩ kĩyo. Rekei ithuothe tũtĩage ‘andũ arĩa matariĩ ũguo.’—Afil. 2:29.
a Rora gathandũkũ ka “Ũrĩa Kĩama Kĩrĩa Gĩtongoragia Kĩrũmbũyagia Mabataro ma Ũthamaki” nĩ getha wone mawĩra marĩa marutagwo nĩ kamĩtĩ iria ithathatũ cia Kĩama Kĩrĩa Gĩtongoragia rora karatathi ka 131 thĩinĩ wa ibuku Ũthamaki wa Ngai nĩ Ũrathana!