Hihi nĩ Kũrĩ Araika Oru?

Ĩĩ nĩ kũrĩ araika oru. Moimire kũ? Ririkana atĩ Ngai ombire araika marĩ na wĩyathi wa gwĩthuurĩra. Kahinda kanini thutha wa Ngai kũũmba mũthuri na mũtumia wa mbere, Adamu na Hawa, mũraika ũmwe mũkinyanĩru nĩ aahũthĩrire ũũru wĩyathi wake wa gwĩthuurĩra na agĩcogera ũremi thĩinĩ wa thĩ. Nĩ aahotire gũtũma Adamu na Hawa maremere Ngai. (Kĩambĩrĩria 3:​1-7; Kũguũrĩrio 12:9) Bibilia ndiugaga rĩĩtwa rĩrĩa mũraika ũcio eetagwo kana gaturũa karĩa aarĩ nako kũu igũrũ mbere ya ũremi wake. No thutha wa ũremi wake, Bibilia ĩmwĩtĩte Shaitani, rĩĩtwa rĩrĩa riugĩte “Mũkararia,” na Mũcukani, rĩrĩa riugĩte “Mũcambania.”​—Mathayo 4:​8-11.

Ũndũ wa kĩeha nĩ atĩ, kũremera Ngai kũu gũtiathirĩire hau. Matukũ-inĩ ma Nuhu, araika amwe tũtoĩ mũigana wao nĩ maatigire “gĩikaro kĩao kĩrĩa kĩagĩrĩire” famĩlĩ-inĩ ya Ngai kũrĩa igũrũ. Mokire gũkũ thĩ na makĩĩhumba mĩĩrĩ ya andũ nĩguo mathingate mĩthiĩre mĩũru na ya waganu handũ ha kũhingia muoroto ũrĩa watũmĩte mombwo.​—Judasi 6; Kĩambĩrĩria 6:​1-4; 1 Petero 3:​19, 20.

Gwathire atĩa harĩ araika acio aganu? Rĩrĩa Ngai aarehire mũiyũro nĩguo atherie thĩ, araika acio maacokereire mĩĩrĩ yao ya kĩĩroho na magĩcoka ciikaro-inĩ cia roho. O na kũrĩ ũguo, Ngai ndetĩkĩririe araika acio aganu macoke “handũ hao harĩa maagaĩirũo o kĩambĩrĩria.” Ithenya rĩa ũguo, maikirio “nduma-inĩ ndumanu [ya kĩĩroho]” ĩrĩa yũĩkaine ta Tarataro. (Judasi 6; 2 Petero 2:4) Ndaimono icio cieigire rungu rwa ũtongoria wa Shaitani ũrĩa Mũcukani, “mũnene wa ndaimono,” ũrĩa ũikaraga “agĩĩtuaga mũraika wa ũtheri.”​—Mathayo 12:24; 2 Akorintho 11:14.

Bibilia ĩrutanaga atĩ Ũthamaki wa Ngai wa Kĩĩmesia, na nĩguo thirikari ya igũrũ, wahandirũo mwaka-inĩ wa 1914.a Nĩ ũndũ ũcio, Shaitani na ndaimono ciake nĩ maingatirũo kuuma kũrĩa igũrũ magĩikio gũkũ thĩ ũndũ matangĩacokire igũrũ rĩngĩ. Maũndũ ma waganu marĩa maingĩhĩte mũno na mĩtugo mĩingĩ ya ũũra thoni ĩrĩa ĩrĩ thĩinĩ wa thĩ ũmũthĩ nĩ ũira wa ũgucania mũru na marũrũ ma Shaitani na ndaimono ciake.​—Kũguũrĩrio 12:​9-12.

O na kũrĩ ũguo, kũingĩha kwa waganu na ciĩko ikĩrĩte njano cia ũhinya kũronania atĩ mũico wa ndaimono icio ũrĩ hakuhĩ. Ica ikuhĩ, ciũmbe icio cia kĩĩroho ihinyagĩrĩria andũ nĩ ikweherio. Thutha wa Ũthamaki wa Ngai gwathana igũrũ rĩa thĩ ĩrĩ paradiso kwa ihinda rĩa mĩaka 1,000, ciũmbe icio njũru nĩ ikarekererio gwa kahinda kanini nĩguo igerie andũ riita rĩa mũico. Thutha ũcio, ciũmbe icio nĩ ikaaniinwo kaimana.​—Mathayo 25:41; Kũguũrĩrio 20:​1-3, 7-10.