Mũũmbi Witũ Ũrĩ Wendo nĩ Atũrũmbũyagia

1. MŨŨMBI WITŨ NĨ ATŨMAGA RIŨA RĨARE

Ta geria gwĩciria ũrĩa thĩ ĩngĩkorũo ĩhaana korũo riũa rĩtiaraga. Riũa nĩ rĩheaga mĩmera hinya ũrĩa ĩrabatara nĩguo ĩrute mathangũ, mahũa, matunda, na mbegũ. Ningĩ hinya wa riũa nĩ ũteithagia mĩtĩ kũgucia maĩ kuuma tĩri-inĩ kũgerera harĩ mĩri, ĩgatwara harĩ mathangũ na thutha-inĩ maĩ macio magathiĩ rĩera-inĩ.

2. MŨŨMBI WITŨ NĨ ATŨMAGA MBURA YURE

Mbura nĩ kĩheo kĩega kuuma kũrĩ Ngai, na nĩ ĩteithagia thĩ ĩrute irio iria tũrĩaga. Ngai nĩ atũheaga mbura kuuma igũrũ na imera irĩ na maciaro, agatũhũnia na irio na akaiyũria ngoro citũ gĩkeno.

3. MŨŨMBI WITŨ NĨ ATŨHEAGA IRIO NA GĨA KWĨHUMBA

Athuri aingĩ nĩ matangĩkaga igũrũ rĩgiĩ ũrĩa mekuona irio na nguo cia kũigana famĩlĩ ciao. Maandĩko moigaga ũũ: “Rorai na kinyi nyoni cia rĩera-inĩ; itihandaga mbegũ kana ikagetha kana ikaiga irio makũmbĩ, no Ithe wanyu wa igũrũ nĩ aciheaga gĩa kũrĩa. Githĩ inyuĩ mũtikĩrĩ a bata gũcikĩra?”—Mathayo 6:25, 26.

“Mwĩrutei na ũrĩa mahũa ma werũ-inĩ ma itoka makũraga . . . ; no ngũmwĩra atĩrĩ, o na [Mũthamaki] Suleimani na riri wake wothe ndaagemete ta rĩmwe rĩamo. Rĩu-rĩ, angĩkorũo ũguo nĩguo Ngai ahumbaga mĩmera ya werũ-inĩ . . . , githĩ inyuĩ ndarĩkĩmũhumbaga o na makĩria.”—Mathayo 6:28-30.

Tondũ Ngai no ahote gũtũhe irio na gĩa kwĩhumba, nĩ kuonania atĩ no ahote gũtũhe mabataro marĩa mangĩ tũbataraga. Angĩkorũo nĩ tũrĩkaga wendi wa Ngai, nĩ arĩrathimaga kĩyo gitũ rĩrĩa twahanda irio, kana agatũteithĩrĩria kuona wĩra nĩguo tũhote kũgũra kĩrĩa tũrabatara.—Mathayo 6:32, 33.

Gwĩciria ũhoro wĩgiĩ riũa, mbura, tũnyoni, na mahũa, no gũtũhe itũmi njega cia kwenda Ngai. Gĩcunjĩ kĩrĩa kĩrũmĩrĩire nĩ gĩkwarĩrĩria ũrĩa Mũũmbi witũ aranagĩria na andũ.