Tũgui Kũheo Mĩthugwiti
NICK, ũrĩa ũikaraga Oregon, Amerika (US), aandĩkire ũũ: “Kĩambĩrĩria-inĩ kĩa mwaka wa 2014, nĩ ndaambĩrĩirie gũceeria tũgui twakwa taũni-inĩ ĩrĩa twaikaraga. Kaingĩ Aira a Jehova maakoragwo gatagatĩ-inĩ ga taũni ĩyo, harĩa maarũgamaga na tũkaari twao twa kũhunjia. Maakoragwo meehumbĩte wega, na maageithagia andũ othe makenete.
“Aira acio a Jehova moonanagia wendo, to kũrĩ andũ tu, no nĩ nginya kũrĩ tũgui twakwa. Mũthenya ũmwe, Elaine, ũrĩa warũgamĩte hakuhĩ na gakaari ga kũhunjia, nĩ aaheire tũgui twakwa twĩrĩ mĩthugwiti. Thutha ũcio, hĩndĩ ciothe tũngĩathiire hakuhĩ na tũkaari tũu twa kũhunjia, tũgui twakwa nĩ tweendaga gũthiĩ harĩ Aira a Jehova nĩguo tũheo kĩndũ.
“Ũndũ ũcio wathiire na mbere kwa ihinda rĩa mĩeri ĩigana ũna. Tũgui twakwa nĩ twakenagĩra mĩthugwiti, na niĩ nĩ ndakenagĩra ndeereti nguhĩ ĩrĩa twakoragwo nayo hamwe na Aira a Jehova. No niĩ ndieendaga kũgĩa ũrata wa hakuhĩ mũno hamwe nao. Ndaarĩ na makĩria ma mĩaka 70, na ndiamenyaga wega maũndũ marĩa Aira a Jehova metĩkĩtie. Tondũ nĩ ndaarakarĩtio nĩ ndini nyingĩ cia Gĩkristiano, ndonaga kaba gwĩthomera Bibilia ndĩ wiki.
“Ihinda-inĩ o rĩu, no ndonaga Aira a Jehova angĩ icigo-inĩ ingĩ cia taũni ĩyo marũgamĩte tũkaari-inĩ twao twa kũhunjia. O nao nĩ meendete andũ mũno. Hĩndĩ ciothe, maanjokagĩria ciũria ciakwa kũgerera Bibilia, na ũndũ ũcio ũgĩtũma ndĩmehoke makĩria.
“Mũthenya ũmwe, Elaine nĩ aanjũririe, ‘Wee nĩ wĩtĩkĩtie atĩ nyamũ nĩ kĩheo kuuma kũrĩ Ngai?’ Ngĩmwĩra, ‘Ĩĩ nĩ njĩtĩkĩtie ũguo!’ Elaine agĩcoka akĩnyonia rĩandĩko rĩa Isaia 11:6-9. Kuuma hĩndĩ ĩyo, ngĩambĩrĩria kũgĩa na wendi wa kwĩruta Bibilia, o na gũtuĩka ndieendaga kuoya mabuku ma Aira a Jehova.
“Thikũ iria ciarũmĩrĩire, nĩ ndakenagĩra kũgĩa na ndeereti njega cia gũcanjamũra hamwe na Elaine na mũthuri wake Brent. Nĩ maanjĩkĩrire ngoro thome ibuku rĩa Mathayo nginya rĩa Atũmwo, nĩguo hote gũtaũkĩrũo nĩ ũrĩa kwĩgerekania na Kristo kuugĩte. Na kwoguo ngĩthoma. Na thutha wa ihinda inini, nĩ ndetĩkĩrire kwĩruta Bibilia hamwe na Brent na Elaine. Kwarĩ mwaka-inĩ wa 2016.
“Nĩ ndakenagĩra mũno kwĩruta Bibilia o kiumia na gũthiĩ mĩcemanio Nyũmba-inĩ ya Ũthamaki. Ndakenaga mũno na ngona arĩ kĩrathimo gũkorũo ngĩĩruta ũrĩa Bibilia yugaga. Thutha wa mwaka ũmwe na kĩndũ, ngĩbatithio na ngĩtuĩka Mũira wa Jehova. Rĩu ndĩ na mĩaka 79, na nĩ njũĩ atĩ ndĩ njĩra-inĩ ĩrĩa yagĩrĩire. Jehova nĩ andathimĩte na njĩra ya kũnjĩtĩkĩria nduĩke ũmwe wa famĩlĩ ya athathaiya ake thĩinĩ wa thĩ yothe.”