Jesu nĩ “Eerutire Wathĩki”

Jesu atũũrĩte arĩ mwathĩki harĩ Jehova. (Joh. 8:29) No hihi nĩ kĩĩ gĩtũmaga Bibilia yuge: “Nĩ eerutire wathĩki kuumana na maũndũ marĩa aanyamarĩkire nĩmo”?—Ahib. 5:8.

Jesu arĩ gũkũ thĩ, nĩ aahiũranirie na maũndũ ataacemanĩtie namo arĩ kũrĩa igũrũ. Aarerirũo nĩ aciari meendete Jehova, no matiarĩ akinyanĩru. (Luk. 2:51) Ningĩ nĩ aanyaririrũo moko-inĩ ma atongoria oru a kĩĩndini na anene a thirikari mataarũmagĩrĩra kĩhooto. (Mat. 26:59; Mar. 15:15) Na aakuire gĩkuũ kĩrĩ na ruo mũno. Bibilia yugaga: “Eenyihirie na agĩathĩka o nginya gĩkuũ.”—Afil. 2:8.

Maũndũ macio Jesu aagereire nĩ maamũrutire gwathĩka na njĩra ateerutĩte arĩ kũrĩa igũrũ. Kwoguo agaakorũo arĩ Mũthamaki ũrĩa mwega biũ na Mũthĩnjĩri-Ngai Ũrĩa Mũnene ũngĩhota gũtũiguĩra tha. (Ahib. 4:15; 5:9) Jesu nĩ aatuĩkire wa goro o na makĩria harĩ Jehova thutha wa kwĩruta wathĩki kuumana na maũndũ marĩa aanyamarĩkire nĩmo. O na ithuĩ no tũtuĩke a goro makĩria harĩ Jehova na tũhũthĩke na njĩra nene wĩra-inĩ o wothe angĩtũhe, tũngĩtũũra tũrĩ athĩki nginya rĩrĩa tũracemania na moritũ.—Jak. 1:4.