Ũguni wa Kuuga Woherũo

HARĨA THĨNA ŨKAGĨRA

Ta hũũra mbica o hĩndĩ mwarĩkia gũkararania na ũrĩa mũhikanĩtie nake. Ũkeĩra na ngoro atĩrĩ, ‘Niĩ ndirabatara kuuga njoherũo. Atakĩrĩ niĩ nyambĩrĩirie ngarari icio!’

Mũgatigana na ũhoro ũcio, no ngoro-inĩ mũrĩ o na ũndũ. Ũgeciria o rĩngĩ uuge woherũo, no ũkaremwo kũgweta kiugo, “njohera.”

GŨTHIAGA ŨGUO NĨKĨ?

Mwĩtĩo. Mũthuri ũmwe wĩtagwo Charles oigire ũũ: “Rĩmwe na rĩmwe nĩ nemagwo nĩ kuuga njoherũo nĩ ũndũ wa kwĩyona ndĩ wa bata mũno.”a Mwĩtĩo no ũtũme mũndũ aigue hinya gwĩtĩkĩra atĩ o nake arĩ na mahĩtia.

Mawoni. Nĩ ũhũthũ gwĩciria atĩ wagĩrĩirũo kuuga woherũo o rĩrĩa tu ũhĩtĩtie. Mũtumia ũmwe wĩtagwo Jill oigire ũũ: “Rĩrĩa ndĩramenya atĩ biũ biũ nĩ hĩtĩtie, nĩ hotaga kuuga njoherũo. No hĩndĩ ĩrĩa ithuerĩ twaranĩria ũũru, nĩ nemagwo nĩ gwĩka ũguo. Ndĩyũragia atĩrĩ, niĩ ndĩrakiuga njoherũo nĩkĩ, na ithuerĩ tũrĩ na mahĩtia?”

No wone ta ũtaagĩrĩirũo nĩ kuuga woherũo hĩndĩ ĩrĩa ũramenya atĩ ũrĩa mũhikanĩtie nake nĩwe ũrĩ na mahĩtia. Mũthuri ũmwe wĩtagwo Joseph oigire ũũ: “Rĩrĩa ũramenya wega atĩ tiwe ũrĩ na mahĩtia, no wage kuuga woherũo ũkĩenda kuonania atĩ ndũrĩ na mahĩtia.”

Mũrerere. Hihi no gũkorũo warereirũo famĩlĩ-inĩ ĩtamenyerete gũcũnga mũhera. Nĩ ũndũ ũcio, no ũĩgue hinya gwĩtĩkĩra mahĩtia maku. Tondũ ndwemenyeririe kuuga woherũo ũrĩ mũnini, gwĩka ũguo ũrĩ mũndũ mũgima no ũkorũo ũtarĩ ũndũ mũhũthũ.

ŨRĨA ŨNGĨKA

Wĩcirie ũhoro wa ũrĩa mũhikanĩtie nake. Geria kũririkana hĩndĩ ĩmwe werirũo nĩ mũndũ ũmuohere na ũrĩa wakenire nĩ kwĩrũo ũguo. Na githĩ ndũkĩagĩrĩirũo gũtũma ũrĩa mũhikanĩtie nake aigue o ta ũrĩa waiguire? O na angĩkorũo ndũrona ta ũhĩtĩirie ũrĩa mũhikanĩtie nake-rĩ, no ũmwĩre akuohere angĩkorũo ciugo ciaku nĩ imũtuuririe, kana o na ũtekwenda ciĩko ciaku ciatũma aigue ũũru. Ciugo ta icio no itũme ngoro yake ĩhorere.​—Ũtaaro wa Bibilia: Luka 6:31.

Wĩcirie ũhoro wa kĩhiko kĩanyu. Handũ ha kuona gũcũnga mũhera ta arĩ kũhootwo, wagĩrĩirũo kũwona ũrĩ ũhootani harĩ kĩhiko kĩanyu. Mũndũ angĩiga marakara, Thimo 18:19 yonanagia atĩ ‘nĩ hinya kwĩiguithania nake gũkĩra kwĩgwatĩra itũũra rĩirige.’ Nĩ hinya mũno gũcokia thayũ, handũ harĩ na marakara ta macio. No rĩrĩa woiga woherũo, nĩ ũgiragĩrĩria marakara macio matigatuĩke kĩrĩma. Na njĩra ĩyo, nĩ ũrĩonanagia atĩ kĩhiko kĩanyu nĩ kĩa bata gũgũkĩra.​— Ũtaaro wa Bibilia: Afilipi 2:3.

Hiũhaga gũcũnga mũhera. Kuuga woherũo ti ũndũ mũhũthũ angĩkorũo mahĩtia ti maku wiki. No mahĩtia ma ũrĩa mũhikanĩtie nake matiagĩrĩirũo gũtũma ũhũthie mahĩtia maku mwene. Kwoguo ndũkaage kuuga woherũo ũgĩciria atĩ thutha wa kahinda mahĩtia macio nĩ mekũriganĩra. Kuuga woherũo no gũtũme o na ũrĩa mũhikanĩtie nake akwĩre ũmuohere. Ningĩ o ũrĩa ũremenyeria gũcũnga mũhera, noguo ũrĩonaga arĩ ũhũthũ gwĩka ũguo.​—Ũtaaro wa Bibilia: Mathayo 5:25.

Ĩtĩkĩra mahĩtia maku biũ. Gũtetera mahĩtia maku tikuo gũcũnga mũhera. Ningĩ kwĩra mũndũ ũndũ ta ũyũ na kĩnyũrũri, “kĩnjohere angĩkorũo nĩ warakara” ti gũcũnga mũhera o na hanini! Ĩtĩkĩra mahĩtia maku na wĩtĩkĩre atĩ nĩ marakaririe ũrĩa mũhikanĩtie nake, o na angĩkorũo ndũrona ta ekwagĩrĩirũo nĩ kũrakara.

Gĩa na mawoni marĩa magĩrĩire. Ĩtĩkĩra ũrĩ na wĩnyihia atĩ no ũhĩtie. Ririkana atĩ, gũtirĩ mũndũ ũtahĩtagia! O na angĩkorũo ndũrona ta ũrĩ na mahĩtia ũndũ-inĩ mũna, ririkana atĩ ũrĩa ũrona ũhoro ũcio tiguo mũndũ ũcio ũngĩ arawona. Bibilia yugaga ũũ: “Mwambĩrĩria cira onagwo ta arĩ we wĩ na kĩhooto, ĩndĩ ũrĩa me cira nake okaga agakĩmuururia [kũmũũria ciũria].” (Thimo 18:17) Ũngĩgĩa na mawoni maigananĩru kwĩyerekera na kwerekera mahĩtia maku, ndũrĩiguaga hinya kuuga woherũo.