4 Kuohanĩra

ŨGUO NĨ KUUGA ATĨA?

Kuohanĩra nĩ kũrekera mũndũ ihĩtia na kwaga kũiga marakara ngoro nĩ ũndũ wa ihĩtia rĩu. Kuohanĩra ti kuuga ũhũthie ihĩtia rĩu rĩkĩtwo kana ũtue atĩ rĩtinekwo.

ŨTAARO WA BIBILIA: “Thiĩi na mbere gũkiranagĩrĩria mũndũ na ũrĩa ũngĩ na kuohanagĩra mwĩyendeire o na angĩkorũo mũndũ arĩ na gĩtũmi gĩa gũteta nĩ ũndũ wa mũndũ ũrĩa ũngĩ.”​—Akolosai 3:13.

“Ũngĩkorũo wendete mũndũ, ndũrĩĩciragia o ũhoro wa mahĩtia make, ithenya rĩa ũguo, ũrĩonaga ngumo iria arerutanĩria gũkũria.”​—Aaron.

ŨNDŨ ŨCIO NĨ WA BATA NĨKĨ?

Ũngĩigaga marakara ngoro-inĩ, no ũgĩe na mathĩna ma mwĩrĩ na ma ngoro, na ningĩ no ũthũkie kĩhiko kĩanyu.

“Hĩndĩ ĩmwe mũthuri wakwa nĩ aahoire mũhera nĩ ũndũ wa ũndũ wanduurithĩtie mũno. Ndwarĩ ũndũ mũhũthũ harĩ niĩ kũmuohera. Thutha-inĩ nĩ ndamuoheire no nĩ nyonaga atĩ kaba ingĩekĩte ũguo o na ihenya. Ũndũ ũcio nĩ watũmĩte tũgĩe na mathĩna matarĩ ma o mũhaka kĩhiko-inĩ gitũ.”​—Julia.

ŨRĨA ŨNGĨKA

WĨTHUTHURIE

Rĩrĩa mũndũ ũrĩa mũhikanĩtie nake arĩka kana oige ũndũ wa gũgũtuurithia, wĩyũrie ũũ:

• ‘Hihi nĩ hiũhaga kũrakara?’

• ‘Hihi ũndũ ũcio nĩ mũritũ mũno ũũ atĩ no mũhaka hoywo mũhera, kana hihi no njage gũtindanĩra naguo?’

ARĨRĨRIAI MAŨNDŨ MAYA NA ŨRĨA MŨHIKANĨTIE NAKE

• Tuoyaga ihinda rĩigana atĩa tũngĩkoohanĩra?

• Tũngĩka atĩa nĩguo tuohanagĩre na ihenya?

GERIA ŨŨ

• Rĩrĩa wahĩtĩrio nĩ ũrĩa mũhikanĩtie nake, ndũgatue atĩ oima na muoroto mũũru.

• Wĩrutanĩrie kũrekagĩra ũrĩa mũhikanĩtie nake rĩrĩa ahĩtia, ũkĩririkanaga atĩ “ithuothe nĩ tũhĩngagwo maita maingĩ.”​—Jakubu 3:2.

“Nĩ ũndũ mũhũthũ kuohanĩra rĩrĩa tũhĩtĩtie ithuerĩ, no ti ũndũ mũhũthũ gwĩka ũguo rĩrĩa kũroneka ta arĩ mũndũ ũmwe ũhĩtĩtie. Mũndũ nĩ abataraga wĩnyihia mũnene nĩguo etĩkĩre mũhera na ohanĩre.”​—Kimberly.

ŨTAARO WA BIBILIA: ‘Mwĩhĩke kũiguana.’​—Mathayo 5:25.