Mĩoroto nĩ ta mũcoro wa mwako; ũngĩĩrutanĩria no ũhote kũmĩhingia
KŨRĨ ANDŨ ETHĨ
12 Kwĩigĩra Mĩoroto
ŨGUO NĨ KUUGA ATĨA?
Gũkorũo na muoroto to kwĩrirĩria tu ũndũ wĩkĩke. Kũhutĩtie kũbanga, gũkorũo wĩhaarĩirie kũgarũrũkana kũringana na ũrĩa maũndũ mahaana, na kũruta wĩra na kĩyo.
Mĩoroto ĩmwe no yoe ihinda inini kũhingia, hihi thikũ kana ciumia cigana ũna, nayo ĩngĩ no yoe ihinda rĩa mĩeri ĩigana ũna, na ĩngĩ ihinda iraihu ta rĩa mwaka kana makĩria. Muoroto wa ihinda iraihu no ũkinyĩrũo kũgerera gũkorũo na mĩoroto ya ihinda inini ya gũgũteithia kũhingia muoroto ũcio.
ŨNDŨ ŨCIO NĨ WA BATA NĨKĨ?
Kũhingia mĩoroto yaku no gũgũteithie kũgĩa na ũmĩrĩru makĩria, gũkũria ũrata, na kũgĩa na gĩkeno makĩria.
Ũmĩrĩru: Rĩrĩa weigĩra mĩoroto mĩnini na wamĩkinyĩra, nĩ ũgĩaga na ũmĩrĩru wa gũkinyĩra mĩoroto mĩnene. Ningĩ nĩ ũgĩaga na ũmĩrĩru wa kũhiũrania na moritũ ma o mũthenya, hihi ta kũregana na hatĩka cia andũ a riika rĩaku.
Ũrata: Andũ nĩ mendete gũkorũo hakuhĩ na mũndũ ũkoragwo na mĩoroto ũtũũro-inĩ na wĩrutanagĩria kũmĩhingia. Makĩria ma ũguo, njĩra ĩmwe njega ya kũgĩa na ũrata mũrũmu, nĩ kũrutithania wĩra hamwe na mũndũ mũgĩkinyĩra muoroto ũmwe.
Gĩkeno: Rĩrĩa weigĩra mĩoroto na wamĩkinyĩra, nĩ ũiguaga atĩ nĩ kũrĩ ũndũ wahingia.
“Nĩ nyendete kwĩigĩra mĩoroto. Nĩ ĩtũmaga ngorũo na ũndũ wa gwĩka na ngorũo na ũndũ ndĩrageria gũkinyĩra. Na rĩrĩa wahingia muoroto mũna, mũndũ aiguaga wega akoiga, ‘Nĩ ndĩrahotire! Nĩ ndĩrahingirie ũndũ ũrĩa ndĩrendaga kũhingia.’”—Christopher.
ŨTAARO WA BIBILIA: “Mũndũ ũrĩa ũroraga rũhuho ndakaahanda mbeũ, na ũrĩa ũroraga matu ndakaagetha.”—Kohelethu 11:4.
ŨRĨA ŨNGĨKA
Oya makinya maya marũmĩrĩire nĩguo wĩigĩre mĩoroto na ũmĩkinyĩre.
Thuura muoroto. Andĩka mĩoroto ĩrĩa ũngĩenda gũkinyĩra ĩrũmanĩrĩire, wambĩrĩirie na ĩrĩa ũngĩenda kwamba gũkinyĩra.
Banga. Harĩ o muoroto, ĩka maũndũ maya:
Banga nĩ rĩ ũngĩhota kũrĩkia.
Banga nĩ maũndũ marĩkũ marabatarania.
Wĩcirie moritũ marĩa ũngĩcemania namo na wĩhaarĩrie ũrĩa ũngĩhiũrania namo.
Oya ikinya. Ndũgeterere nginya rĩrĩa maũndũ mothe marĩkorũo marĩ mega atĩ nĩguo wambĩrĩrie. Wĩyũrie, ‘Ũndũ wa mbere ũrĩa ingĩka nĩguo nginyĩre muoroto wakwa nĩ ũrĩkũ?’ Ũcoke wĩke ũndũ ũcio. Ikara ũkĩroraga harĩa ũkinyĩte harĩ gũkinyĩra muoroto waku.
ŨTAARO WA BIBILIA: “Mĩbango ya mũndũ ũrĩ kĩyo hatarĩ nganja nĩ ĩrehaga ũgaacĩru.”—Thimo 21:5.