Hũthĩra Mĩoroto ya Kĩĩroho Kũgoocithia Mũũmbi Waku

MWANDĨKI ũmwe wa tene waheetwo gĩtĩo ooigire, “Angĩkorũo ndũramenya kũrĩa ũrathiĩ, gũtirĩ kĩndũ kĩngĩgũteithia gũkinya kuo, o na maũndũ maku mangĩkorũo makwagĩrĩire atĩa.”

Bibilia nĩ ĩtwĩraga ũhoro wa andũ aingĩ maarĩ na mĩoroto na makĩĩrutanĩria mũno nĩguo mamĩkinyĩre. Nuhu aarutire wĩra mĩaka ta 50, “agĩaka thabina ya kũhonokeria andũ a nyũmba yake.” Musa “aaigĩte maitho make harĩ kwamũkĩra ngerenwa.” (Ahibirania 11:7, 26) Ningĩ Jehova nĩ aaheire Joshua wĩra wa gũtooria bũrũri wa Kanaani.—Gũcokerithia Maathani 3:21, 22, 28; Joshua 12:7-24.

Hĩndĩ ya karine ya mbere, mũtũmwo Paulo o nake nĩ eeigĩire mĩoroto. Nĩ aamenyaga atĩ Jesu aaugĩte atĩ “ũhoro ũyũ mwega wa Ũthamaki nĩ ũkaahunjio thĩ yothe ĩrĩa ĩikaragwo.” (Mathayo 24:14) Jesu eerire Paulo amenyithie ndũrĩrĩ ũhoro wake [wa Jesu] na Paulo agĩteithĩrĩria kwambĩrĩria ciũngano kũndũ kũingĩ.—Atũmwo 9:15; Akolosai 1:23.

Ndungata cia Jehova nĩ ikoretwo ikĩmũtĩithia na njĩra ya kwĩigĩra mĩoroto na kũmĩkinyĩra. Tũngĩigĩra mĩoroto ya kĩĩroho atĩa mahinda-inĩ maya? Nĩ mĩoroto ĩrĩkũ tũngĩĩrutanĩria gũkinyĩra, na tũngĩoya makinya marĩkũ nĩguo tũmĩkinyĩre?

Wĩigĩre Mĩoroto Ĩrĩa Yagĩrĩire

Andũ no meigĩre mĩoroto mĩingĩ ngũrani. No andũ arĩa mathathayagia Jehova makoragwo na mĩoroto ngũrani na andũ arĩa matamũthathayagia. Harĩ andũ aingĩ, mĩoroto ĩrĩa ya bata makĩria nĩ gũkorũo na mbeca nyingĩ na ũnene. No ĩyo tiyo mĩoroto ĩrĩa twagĩrĩirũo gũkorũo nayo! Nĩ tũtĩithagia Jehova rĩrĩa tweigĩra mĩoroto ĩrĩa ĩrĩtũteithagia kũmũtungatĩra. (Mathayo 6:33) Twĩigagĩra mĩoroto ĩyo tondũ nĩ twendete Ngai na andũ arĩa angĩ.—Mathayo 22:37-39; 1 Timotheo 4:7.

No twĩigĩre muoroto wa gũtungatĩra Jehova makĩria, kana wa kwagagĩria ngumo citũ cia Gĩkristiano. Gũtekũmakania mĩoroto ĩrĩa twĩ nayo, hingo ciothe twagĩrĩirũo kwĩigĩra mĩoroto tondũ nĩ twendete Jehova na andũ arĩa angĩ. No o na tũngĩka ũguo, rĩmwe no tũritũhĩrũo nĩ gũkinyĩra mĩoroto ĩyo. Nĩ kĩĩ kĩngĩtũteithia kũmĩkinyĩra?

Nĩ Kĩĩ Kĩngĩtũteithia Twende Gũkinyĩra Mĩoroto Itũ?

No twĩrute ũhoro wĩgiĩ mĩoroto kuumana na ũrĩa Jehova oombire indo. Jehova aabangire wĩra wake na mahinda ma ũũmbi marĩa eetire mĩthenya. (Kĩambĩrĩria 1:5, 8, 13, 19, 23, 31) O kĩambĩrĩria kĩa ihinda rĩa ũũmbi, nĩ aamenyaga wega muoroto wake, kana ũndũ ũrĩa eendaga kũhingia, mũthenya ũcio. Na Ngai akĩhingia muoroto wake wa kũũmba indo. (Kũguũrĩrio 4:11) Ayubu aaugire ũũ: “[Jehova] angĩenda gwĩka ũndũ, ndagaga kũwĩka.” (Ayubu 23:13) No mũhaka akorũo Jehova nĩ aaiguire aiganĩire mũno rĩrĩa oonire “indo iria ciothe oombĩte” na akiuga atĩ “ciarĩ njega mũno”!—Kĩambĩrĩria 1:31.

Nĩguo tũkinyĩre mĩoroto itũ, no mũhaka tũkorũo na wendi mũnene wa kũmĩkinyĩra. Hihi nĩ kĩĩ kĩngĩtũteithia gũkũria wendi ũcio? O na Jehova atanarĩkia kũũmba thĩ, nĩ aamenyaga atĩ nĩ ĩngĩakorirũo ĩrĩ thaka. Tũngĩĩgerekania na Jehova na twĩcirie ũhoro wa moimĩrĩro na moguni ma gũkinyĩra muoroto witũ, nĩ tũgũkorũo na wendi mũnene wa kũũkinyĩra. Ta wĩcirie ũhoro wa ũndũ ũyũ wonetwo wĩgiĩ Tony, ũrĩa ũrĩ na mĩaka 19. Rĩrĩa aaceerire wabici ya rũhonge ya Aira a Jehova ya Western Europe, nĩ eeciririe na njĩra ndikĩru maũndũ marĩa oonire kũu. Thutha wa iceera rĩu, Tony aaikaraga akĩyũragia, ‘Mũndũ angĩigua atĩa agĩikara na agatungata arĩ kũndũ ta kũu?’ Tondũ wa gũikara agĩciragia ũhoro ũcio, nĩ aagĩire wendi wa gũtungata kũu, na agĩthiĩ na mbere kwĩrutanĩria gũkinyĩra muoroto ũcio. Thutha wa mĩaka ĩigana ũna, nĩ aaheirũo mweke wa gũtungata thĩinĩ wa wabici ĩyo ya rũhonge, na nĩ aakenire mũno.

Njĩra ĩngĩ ya kuongerera wendi witũ wa gũkinyĩra muoroto witũ nĩ kũhũthagĩra mahinda na andũ arĩa makinyĩrĩte muoroto ta ũcio. Jayson, ũrĩa ũrĩ na mĩaka 30, ndaakenagio nĩ wĩra wa kũhunjia arĩ mũnini. No nĩ eerutire kwenda ũtungata, na arĩkia cukuru agĩtuĩka painia wa hĩndĩ ciothe. Nĩ kĩĩ gĩateithirie Jayson gũkũria wendi wa gũtuĩka painia? Aaugire ũũ: “Kwaragia na andũ arĩa matuĩkĩte mapainia na kũhunjia hamwe nao nĩ kwandeithirie mũno.”

Kwandĩka Mĩoroto Itũ no Gũtũteithie Kũmĩhingia

Nĩ ũndũ mũhũthũ gũtaũkĩrũo nĩ maũndũ marĩa tũreciria rĩrĩa twamandĩka. Suleimani aandĩkire thĩinĩ Bibilia atĩ ciugo cia ũũgĩ no itũteithie gũtua matua mega ũtũũro-inĩ witũ. (Kohelethu 12:11) Rĩrĩa twandĩka ciugo icio, ũndũ ũcio nĩ ũrĩtũteithagia gũikara tũgĩciĩciragia. Kĩu nĩkĩo gĩatũmire Jehova athe athamaki a Isiraeli meyandĩkĩre kobĩ ya Watho. (Gũcokerithia Maathani 17:18) No twandĩke mĩoroto itũ na ũrĩa tũrabanga kũmĩkinyĩra. O na no twandĩke moritũ marĩa tũngĩcemania namo na ũrĩa tũngĩmatooria. Ningĩ rĩrĩa twathuthuria maũndũ marĩa tũrabatara kwĩruta na tũgacaria ũteithio kuuma kũrĩ andũ arĩa angĩ, no ũkorũo ũrĩ ũndũ mũhũthũ harĩ ithuĩ gũkinyĩra muoroto witũ.

Geoffrey aarĩ painia wa mwanya thĩinĩ wa Asia kwa ihinda iraihu. Kwĩigĩra mĩoroto nĩ kwamũteithagia kũigua arĩ na thayũ. Rĩrĩa mũtumia wake aakuire aterĩgĩrĩirũo, ũtũũro wake nĩ waritũhire mũno. Geoffrey nĩ ooire ihinda gwĩka mogarũrũku. Thutha ũcio nĩ aatuire itua rĩa kwĩigĩra mĩoroto ĩrĩa ingĩamũteithirie gũkoragwo na maũndũ maingĩ ma gwĩka ũtungata-inĩ. Nĩ aandĩkire mĩbango yake, na akĩhoya igũrũ rĩgiĩ mĩbango ĩyo. Eendaga kwambĩrĩria wĩruti wa Bibilia na andũ atatũ gũkinyĩria mũico wa mweri ũcio. O mũthenya nĩ aaroraga wĩra wake na o thutha wa thikũ ikũmi akarora maũndũ marĩa ahingĩtie. Hihi nĩ aakinyĩire muoroto wake? Ĩĩ. Geoffrey nĩ aakenire mũno kũgĩa na arutwo ana erũ a Bibilia!

Wĩigĩre Mĩoroto Mĩnini ĩrĩa Ĩngĩgũteithia Gũkinyĩra Mĩoroto Mĩnene

No tuone arĩ ũndũ mũritũ mũno gũkinyĩra mĩoroto ĩmwe. Tony ũrĩa ũkũgwetetwo, nĩ eendaga gũtungata thĩinĩ wa wabici ya rũhonge ya Aira a Jehova, no oonaga ta atangĩakinyĩire muoroto ũcio wake. Aaiguaga ta atangĩahotire gũkinyĩra muoroto wake tondũ aarĩ na mogarũrũku maingĩ aabataraga gwĩka ũtũũro-inĩ wake, na ndeyamũrĩire Ngai. No nĩ aatuire itua rĩa gwĩka mogarũrũku marĩa maabataranagia nĩguo abatithio. Thutha wa kũbatithio, aatuire itua rĩa gũtuĩka painia wa gũteithĩrĩria na thutha ũcio atuĩke painia wa hĩndĩ ciothe, na akĩandĩka karenda-inĩ yake rĩrĩa eendaga kũhingia o muoroto. Thutha wa kũpainia kwa ihinda, Tony rĩu nĩ oonaga atĩ nĩ no ahote gũkinyĩra muoroto wake wa gũtungata thĩinĩ wa wabici ya rũhonge.

O na ithuĩ no tũkinyĩre mĩoroto itũ ĩrĩa mĩnene tũngĩambĩrĩria na kwĩigĩra mĩoroto mĩnini. Rĩrĩa twakinyĩra mĩoroto ĩyo mĩnini nĩ tũrĩonaga maũndũ marĩa tũhingĩtie, na ũndũ ũcio ũgatwĩkĩra ngoro gũkinyĩra mĩoroto itũ ĩrĩa mĩnene. Tũngĩroraga kaingĩ maũndũ marĩa tũhingĩtie, ũndũ ũcio nĩ ũrĩtũteithagia kwĩrutanĩria gũkinyĩra muoroto witũ. Tũngĩikara tũkĩhoyaga Jehova igũrũ rĩgiĩ mĩoroto itũ, nĩ arĩtũteithagia. Paulo atwĩkĩraga ngoro ‘tũhoyage hingo ciothe.’—1 Athesalonike 5:17.

Wĩrutanĩrie na Ndũgakue Ngoro

Gũkorũo na mĩbango mĩega na wendi mũnene nĩ kũrĩtũteithagia, no rĩmwe na rĩmwe no tuone ta tũtangĩhota gũkinyĩra mĩoroto itũ. No twĩrute na kĩonereria kĩa mũrutwo ũrĩa wetagwo Mariko. Nĩ eendaga gũthiĩ hamwe na Paulo rũgendo-inĩ rwake rwa kerĩ rwa ũmishonarĩ, no Paulo ndeendaga gũthiĩ hamwe nake na no mũhaka akorũo ũndũ ũcio nĩ watũmire Mariko akue ngoro mũno! (Atũmwo 15:37-40) Mariko nĩ aabataraga kwĩruta kuumana na ũndũ ũcio na agarũrĩre mĩoroto yake. Kũroneka atĩ nĩ eerutire kuumana naguo tondũ thutha-inĩ Paulo nĩ aaririe maũndũ mega mamwĩgiĩ. Ningĩ nĩ aahotire kũrutithania wĩra na mũtũmwo Petero thĩinĩ wa Babuloni. (2 Timotheo 4:11; 1 Petero 5:13) Makĩria ma ũguo, Mariko nĩ aaheirũo mweke wa mwanya wa kwandĩka ũhoro wĩgiĩ ũtũũro na ũtungata wa Jesu.

O na ithuĩ no tũcemanie na moritũ rĩrĩa tũrerutanĩria gũkinyĩra mĩoroto itũ ya kĩĩroho. Handũ ha gũkua ngoro, twagĩrĩirũo kũroraga maũndũ marĩa tũhingĩtie na twĩke mogarũrũku marĩa marabatarania harĩ mĩoroto itũ. Tũrabatara gũthiĩ na mbere kwĩrutanĩria gũkinyĩra mĩoroto itũ na tũtigakue ngoro. Mũthamaki Suleimani aaugire ũũ: “Rekagĩrĩria Jehova ũndũ o wothe ũrĩkaga, na mĩbango yaku nĩ ĩrĩgaacagĩra.”—Thimo 16:3.

No rĩmwe na rĩmwe, kũrĩ maũndũ mangĩtũma tũremwo gũkinyĩra muoroto witũ. Kwa ngerekano, no tũrware kana tũkorũo na maũndũ ma famĩlĩ tũrabatara kũrũmbũiya, na ũndũ ũcio ũtũme tũremwo nĩ gũkinyĩra mĩoroto ĩmwe itũ. No twagĩrĩirũo kũririkana atĩ muoroto witũ ũrĩa mũnene nĩ kũgĩa na muoyo wa tene na tene—kũrĩa igũrũ kana thĩinĩ wa Paradiso gũkũ thĩ. (Luka 23:43; Afilipi 3:13, 14) Bibilia nĩ ĩtwĩraga ũrĩa tũngĩka nĩguo tũgĩe muoyo wa tene na tene. Mũtũmwo Johana aandĩkire ũũ: “Mũndũ ũrĩa wĩkaga wendi wa Ngai atũũraga tene na tene.” (1 Johana 2:17) O na gũtuĩka maũndũ maitũ no matũme tũremwo gũkinyĩra muoroto mũna, no tũhote ‘gwĩtigĩra Ngai ũrĩa wa ma na twathĩkagĩre maathani make.’ (Kohelethu 12:13) Mĩoroto ya kĩĩroho nĩ ĩtũteithagia kũiga meciria maitũ harĩ gwĩka wendi wa Ngai. Nĩ ũndũ ũcio, rekei tũmĩhũthagĩre kũgoocithia Mũũmbi witũ.

[Gathandũkũ]

Mĩoroto ya Kĩĩroho Ĩrĩa Ũngĩĩigĩra

○ Gũthomaga Bibilia o mũthenya

○ Gũthomaga ngathĩti o yothe ya Mũrangĩri na ya Amkeni! yoima

○ Kwagagĩria mahoya maku

○ Kuonanagia maciaro ma roho

○ Kuongerera ũtungata witũ

○ Kwagagĩria njĩra cia kũhunjia na kũrutana

○ Kwagagĩria ũhoti wa kũhunjia na thimũ, rĩrĩa tũtarĩ ũtungata-inĩ, na kũndũ kwa biacara