Muoyo Thĩinĩ wa Thĩ Njerũ Ĩrĩ na Thayũ

Warora mbica ĩo ĩcoretwo karatathi-inĩ gaka-rĩ, ũreigua atĩa? Githĩ ngoro yaku ndĩrerirĩria thayũ, gĩkeno na ũgaacĩru ũrĩa ũroneka ho? Nĩ ma nĩguo. No rĩrĩ, kĩu no kĩroto tu, kana ũndũ wa kwĩgererio mwega mũno ũtangĩhotekeka, gwĩtĩkia atĩ maũndũ ta macio nĩ kũrĩ hingo magaakorũo gũkũ thĩ?

Andũ aingĩ hihi no mecirie ũguo. Maũndũ marĩa mekuo kũna kũna ũmũthĩ nĩ mbaara, uuni wa watho, ngʼaragu, ndwari, ũkũrũ—tũkĩgweta o manyinyi mamo. Ĩndĩ nĩ kũrĩ gĩtũmi gĩa kũgĩa na mwĩhoko. Ĩkĩrorereria mahinda marĩa mokĩte-rĩ, Bibilia yaragia ũhoro wa ũrĩa “tũtanyaga kuona Igũrũ rĩerũ o na thĩ njerũ, o kuo kũrĩa gũtũũraga ũthingu,” “kũringana na ũrĩa [Ngai] eranĩire.”—2 Petero 3:13; Isaia 65:17.

“Igũrũ rĩerũ” na “thĩ njerũ” icio, kũringana na Bibilia ti igũrũ rĩerũ rĩa biũ kana thĩ njerũ ya biũ. Thĩ na igũrũ iria cionekaga ciathondekirũo irĩ nginyanĩru na Bibilia yonanagia atĩ igũtũũra irĩ o ho tene na tene. (Thaburi 89:36, 37; 104:5) “Thĩ njerũ” ĩgaakorũo ĩrĩ mũingĩ wa andũ athingu gũkũ thĩ narĩo “Igũrũ rĩerũ” rĩgaakokũo rĩrĩ Ũthamaki mũkinyanĩru wa igũrũ, kana thirikari, ĩrĩa ĩgaathana igũrũ rĩa mũingĩ ũyũ wa andũ arĩa magakorũo gũkũ thĩ. No rĩrĩ, kwĩ na gĩtũmi kĩiganu gĩa gwĩtĩkia atĩ no kũhoteke kũgĩe na “thĩ njerũ,” kana kĩrĩndĩ kĩerũ gĩa thĩ kĩrĩ na riri?

Atĩrĩ, cũũrania ma ya atĩ mũtũũrĩre ta ũcio nĩguo warĩ muoroto wa Ngai harĩ thĩ ĩno o kĩambĩrĩria-inĩ. Aaigire andũ erĩ a mbere thĩinĩ wa Paradaisi ya Edeni o gũkũ thĩ na akĩmagaĩra wĩra ũyũ mwega mũno: “Ciarai mũno, mũthegee, mũiyũre thĩ, na mũmĩtorie.” (Kĩambĩrĩria 1:28) Ĩĩni, muoroto wa Ngai warĩ atĩ magĩe na ciana na o marigĩrĩrio-inĩ matheremie Paradaisi yao thĩinĩ wa thĩ yothe. O na gũtuĩka atĩ thutha-inĩ nĩmacagũrire kũremera Ngai, makĩonania na njĩra ĩo atĩ matiagĩrĩire gũtũũre tene na tene, muoroto wa Ngai wa kĩambĩrĩria-inĩ ndwacenjirie. Na no mũhaka ũhingio thĩinĩ kĩrĩndĩ kĩerũ gĩa thĩ!—Isaia 55:11.

Ma nĩ atĩ, rĩrĩa ũhoyaga Ihoya rĩa Mwathani kana Ithe Witũ, ũkahoya Ũthamaki wa Ngai ũũke, ũkoragwo ũkĩhoya atĩ thirikari yake ya igũrũ ĩnine waganu thĩinĩ wa thĩ na atĩ yathane igũrũ rĩa kĩrĩndĩ kĩu kĩerũ gĩa thĩ. (Mathayo 6:9, 10) Na no tũgĩe na ma biũ atĩ Ngai nĩarĩcokia ihoya rĩu, nĩũndũ Kiugo gĩake kĩĩranagĩra ũũ: “Arĩa athingu nĩo makagaya thĩ, na gũtũũra mamĩtũũre o nginya tene.”—Thaburi 37:29.

Muoyo Thĩinĩ wa Thĩ Njerũ ya Ngai

Ũthamaki wa Ngai nĩũkarehera thĩ moguni matangĩgerekanĩka, ũhingie maũndũ mothe mega marĩa o kĩambĩrĩria-inĩ Ngai orotete andũ ake makenagĩre o gũkũ thĩ. Rũthũũro na rũmena nĩigathira, na o marigĩrĩrio-inĩ mũndũ o wothe thĩinĩ wa thĩ agakoragũo arĩ mũrata wa ma wa mũndũ ũngĩ o wothe. Thĩinĩ wa Bibilia Ngai eranagĩra atĩ ‘nĩakanina mbaara o nginya ituri cia thĩ.’ “Gũtirĩ rũrĩrĩ rũgacoka gũcomorera rũrĩrĩ rũrĩa rũngĩ rũhiũ rũa njora, o na kana ndũrĩrĩ icoke kwĩĩgithia mbaara rĩngĩ o na rĩ.”—Thaburi 46:9; Isaia 2:4.

O marigĩrĩrio-inĩ thĩ yothe ĩgakorũo ĩcokeirio ũthaka ta wa Paradaisi ĩhaana ta mũgũnda. Bibilia yugaga ũũ: “Werũ, o na kũndũ kũrĩa kwagĩte andũ-rĩ, nĩ gũgakena; o naruo rũngʼũrĩ no rũgakena, na rũagĩre rũmere mahũa ma nyeki-inĩ. . . . Nĩ gũkorũo werũ-inĩ nĩgũgatathũka maĩ, o na kũu rũngʼũrĩ-inĩ gũthererage tũrũũĩ. O naguo mũthanga ũrĩa ũhenahenagia nĩũkagarũrũo ũtuĩke karia ka maĩ, nakuo kũndũ kũrĩa gwĩ tĩri mũnyotu kũgĩe ithima cia maĩ megũtherũka.”—Isaia 35:1, 6, 7.

Nĩ gũgakorũo na gĩtũmi o gĩothe gĩa gũkena thĩinĩ wa thĩ ya Paradaisi. Gũtirĩ hĩndĩ ĩngĩ o na rĩ andũ magacoka kũhũta nĩũndũ wa kwaga irio. “Thĩ nĩĩrutĩte uumithio wayo,” nĩguo Bibilia yugaga. (Thaburi 67:6; 72:16) Andũ othe nĩmagakenagĩra wĩra wa moko mao, o ta ũrĩa Mũũmbi witũ atwĩragĩra: “Na mahande mĩgũnda ya mĩthabibũ, o na marĩage maciaro mayo. Matigaaka . . . o na kana mahande irio, icokage kũrĩo nĩ andũ angĩ.”—Isaia 65:21, 22.

Thĩinĩ wa thĩ njerũ ya Ngai, gũtirĩ hĩndĩ gũgacoka kũgĩa na mũhatĩkano wa andũ thĩinĩ wa nyũmba nene irĩ na tũrumu tũnini tũingĩ twa gũkombora kana icagi ciyũire gĩko, nĩũndũ Ngai orotete ũũ: “Nao nĩmagaaka nyũmba, na macitũũre. . . . Matigaaka nyũmba, na icokage gũtũũrũo nĩ andũ angĩ.” O na ningĩ Bibilia ĩĩranagĩra ũũ: “Matikaruta wĩra wa tũhũ.” (Isaia 65:21-23) Kwoguo andũ magaakoragũo na wĩra wĩ na maciaro, na wa gũkenerũo. Mũtũũrĩre ndũgakoragũo wĩ o mĩnoga mĩtheri.

Thutha wa ihinda rĩna Ũthamaki wa Ngai o na nĩũgacokia ũkuruhanu wa thayũ ta ũrĩa warĩ mũgũnda-inĩ wa Edeni gatagatĩ-inĩ ka nyamũ, na na gatagatĩ-inĩ ka nyamũ na andũ. Bibilia yugaga ũũ: “Njũi ĩgatũũranagia na kagondu, na ngarĩ ĩkomanagie na kori, ningĩ gacaũ ka ngʼombe o na ka mũrũthi, o na kanyamũ ga gĩcegũ tũikaranagie hamwe; na rĩrĩ, tũgatongoragio nĩ kaana kanini.”—Isaia 11:6-9; Hosea 2:18.

Ta wĩciirie tu, thĩinĩ wa thĩ ya Paradaisi ndwari na wonje wa mwĩrĩ o wothe o naguo nĩũkahonio. Kiugo kĩa Ngai gĩtwĩkagĩrĩra ma ũũ: “Nake mũndũ ũrĩa ũtũũraga bũrũri ũcio ndarĩ hingo agacoka kuuga ũũ: Ndĩ mũrũaru.” (Isaia 33:24) “Nake [Ngai] nĩekũmagiria maithori mothe mathire maitho mao; nakĩo gĩkuũ gĩtirĩ hingo gĩgacoka kũgĩa, o na gũtirĩ hingo gũgacoka kũgĩa na kĩeha, kana kĩrĩro, kana ruo; maũndũ marĩa ma mbere nĩ mathengu magathira.”—Kũguũrĩrio 21:4.

Ūrĩa Kũngĩhoteka Kũrĩ Wee

Hatarĩ nganja ngoro yaku no mũhaka ĩgucĩrĩrio nĩ ciĩranĩro cia Ngai ikoniĩ mũtũũrĩre thĩinĩ wa thĩ yake njerũ ya ũthingu. Na o na gũtuĩka andũ angĩ no mone irathimo ta icio ta itangĩhoteka-rĩ, no kũhoteke ciume guoko-inĩ kwa Mũũmbi witũ Mwendani.—Thaburi 145:16; Mika 4:4.

Hatirĩ nganja atĩ, nĩharĩ na maũndũ tũbatiĩ kũhingia nĩguo tũtũũre tene na tene thĩinĩ wa Paradaisi ĩo yũkĩte ya gũkũ thĩ. Jesu nĩonanirie ũndũ ũmwe wa bata mũno, akiuga ũũ ihoya-inĩ kũrĩ Ngai: “Naguo muoyo wa tene na tene nĩ atĩrĩ, nĩ makũmenye wee Ngai ũrĩa ũmwe wa ma, na mamenye ũrĩa warekirie, na nĩwe Jesu Kristo.”—Johana 17:3.

Kwoguo angĩkorũo kũna kũna nĩtũkwenda gũtũũra thĩinĩ wa thĩ njerũ ya Ngai, no mũhaka twambe twĩrute wendi wa Ngai na tũcoke tũũhingie. Tondũ nĩ ma atĩ: Ĩno “thĩ nĩ gũthira ĩrathira, o na mwĩrirĩrio wayo; no rĩrĩ, ũrĩa wĩkaga ũrĩa Ngai endaga, ũcio nĩ wa gũtũũra nginya tene o na tene,” akenagĩre mĩndĩ na mĩndĩ irathimo iria irĩitũrũrũo gũkũ thĩ nĩ Mũũmbi witũ Mwendani.—1 Johana 2:17.

Tiga hakorirũo honanĩtio ũndũ ũngĩ, icunjĩ iria ikobetio irutĩtwo thĩinĩ wa The Bible in Kikuyu.