Wĩhaarĩrie rĩu nĩguo ũgaatũũra thĩinĩ wa thĩ njerũ
Thĩ Njerũ Ĩrĩ Hakuhĩ!
Ngai oombire thĩ nĩguo andũ arĩa athingu matũũre thĩinĩ wayo tene na tene. (Thaburi 37:29) Aaigire mũthuri na mũtumia wa mbere Adamu na Hawa mũgũnda-inĩ mũthaka wa Edeni, na akĩmahe wĩra marĩ na njiarũa ciao wa kũrĩma na kũrũmbũiya thĩ.—Kĩambĩrĩria 1:28; 2:15.
Ũrĩa thĩ ĩhaana ũmũthĩ, nĩ ngũrani mũno na ũrĩa Ngai eendaga ĩkorũo ĩhaana. O na kũrĩ ũguo, Ngai ndarĩ acenjia wendi wake. Hihi akaahingia muoroto ũrĩa aarĩ naguo kĩambĩrĩria atĩa? O ta ũrĩa icunjĩ iria hĩtũku cionania, Ngai ndakaaniina thĩ ĩno tũikaraga, no nĩ ageetĩkĩria andũ arĩa ehokeku matũũre thĩinĩ wayo. Hihi ũtũũro thĩinĩ wa thĩ ũgaakorũo ũhaana atĩa rĩrĩa Ngai akaahingia ciĩranĩro ciake?
Thirikari ya thĩ yothe
Ica ikuhĩ, thirikari ya Ngai ya kũrĩa igũrũ nĩ ĩkwambĩrĩria gwathana gũkũ thĩ, na ĩtũme thĩ ĩkorũo ĩrĩ kũndũ kwega gwa gũikara kũrĩa andũ magaaikaranagia marĩ na ũrũmwe na makenagĩre wĩra wao. Ngai nĩ amũrĩte Jesu Kristo nĩguo agaathana thĩinĩ wa thĩ. Ngũrani na atongoria aingĩ thĩinĩ wa thĩ, Jesu nĩ akaarũmbũiya raiya ake biũ. Agaathanaga na njĩra ya wendo, na agaakorũo arĩ Mũthamaki mũtugi, ũrĩ tha, na kĩhooto.—Isaia 11:4.
Ũrũmwe wa thĩ yothe
Andũ arĩa magaatũũra thĩinĩ wa thĩ, matikagayũkana kĩĩbũrũri kana gĩĩkabira. Andũ othe thĩinĩ wa thĩ magaakorũo na ũrũmwe. (Kũguũrĩrio 7:9, 10) Andũ othe thĩinĩ wa thĩ nĩ magaakorũo mendete Ngai na andũ arĩa angĩ, na nĩ makaanyitanĩra marĩ na ũrũmwe kũhingia muoroto wa Ngai wa kĩambĩrĩria wa kũrũmbũiya thĩ.—Thaburi 115:16.
Kũrũmbũiya indo iria itũrigicĩirie o hamwe na nyamũ
Rĩrĩa Ũthamaki wa Ngai ũkaambĩrĩria gwathana thĩinĩ wa thĩ, Mũũmbi witũ nĩ agaatigĩrĩra atĩ maũndũ marĩa matũrigicĩirie ta rĩera nĩ mararuta wĩra ũrĩa kwagĩrĩire. (Thaburi 24:1, 2) Rĩrĩa Jesu aarĩ gũkũ thĩ, nĩ oonanirie na gĩkĩro kĩnini tu hinya mũingĩ ũrĩa Ngai aamũheete rĩrĩa aahooreririe kĩhuhũkanio. (Mariko 4:39, 41) Rungu rwa wathani wa Ngai, gũtirĩ mũndũ ũgaakorũo na gĩtũmi gĩa gwĩtigĩra indo ta mĩiyũro, ithingithia, kana maũndũ mangĩ ta macio. Rĩrĩa Ũthamaki wa Ngai ũgaakorũo ũgĩathana tũgaatũũraga hamwe na nyamũ, na tũtigathũkia thĩ rĩngĩ.—Hosea 2:18.
Ũgima mũkinyanĩru wa mwĩrĩ na irio nyingĩ
Andũ othe nĩ magaakenera ũgima mũkinyanĩru wa mwĩrĩ. Gũtirĩ mũndũ ũkaarwara, akũre, kana akue. (Isaia 35:5, 6) Andũ nĩ magaakenera gũtũũra kũndũ gũthaka na gũtheru, ta kũrĩa mũthuri na mũtumia wa mbere maaikaraga mũgũnda-inĩ wa Edeni. Thĩinĩ wa thĩ njerũ, o ta ũrĩa kwarĩ mũgũnda-inĩ wa Edeni, thĩ nĩ ĩkaaruta maciaro mayo na andũ othe nĩ magaakorũo na irio cia kũigana. (Kĩambĩrĩria 2:9) O ta ũrĩa kwarĩ harĩ rũrĩrĩ rwa tene rwa Isiraeli, andũ othe thĩinĩ wa thĩ njerũ, ‘nĩ makaarĩaga mũgate wao makaigania.’—Maũndũ ma Alawii 26:4, 5.
Thayũ wa ma na ũgitĩri
Rungu rwa thirikari ya Ngai, andũ othe nĩ magaakorũo na thayũ na marũmbũyanagie na njĩra ya ũtugi na kĩhooto. Gũtigakoragwo na mbaara, gũtirĩ mũndũ ũkaahũthagĩra ũnene ũũru, na andũ othe nĩ magaakoragwo na kĩrĩa marabatara. Bibilia ĩranĩire ũũ: “Magaaikaraga thĩ, o mũndũ rungu rwa mũthabibũ wake na rungu rwa mũtĩ wake wa mũkũyũ, na gũtirĩ mũndũ ũgaatũma maigue guoya.”—Mika 4:3, 4.
Kũndũ gwa gũikara na wĩra mwega
Famĩlĩ o yothe nĩ ĩgaakoragwo na mũciĩ wayo ĩtegwĩtigĩra atĩ nĩ harĩ mũndũ ũgũka kũmaingata, na wĩra o wothe tũkaarutaga nĩ ũgaakoragwo na maciaro. O ta ũrĩa Bibilia yugaga, andũ arĩa magaatũũra thĩinĩ wa thĩ njerũ ya Ngai, “matikaaruta wĩra wa tũhũ.”—Isaia 65:21-23.
Gĩthomo kĩrĩa kĩega biũ
Bibilia ĩranĩire ũũ: “Thĩ nĩ ĩkaaiyũrũo nĩ ũmenyo wĩgiĩ Jehova.” (Isaia 11:9) Andũ arĩa magaatũũra rungu rwa Ũthamaki wa Ngai, nĩ makeeruta maũndũ maingĩ kuumana na ũũgĩ mũnene wa Mũũmbi wao Jehova na kuuma kũrĩ indo thaka iria ombĩte. Matikaahũthĩra ũmenyo wao gũthondeka matharaita kana gwĩka andũ arĩa angĩ maũndũ moru. (Isaia 2:4) Handũ ha ũguo, nĩ makeeruta gũtũũrania marĩ na ũrũmwe na kũrũmbũiya thĩ.—Thaburi 37:11.
Ũtũũro ũtarĩ mũthia
Ngai aathondekire thĩ na njĩra njega mũno ũndũ andũ mangĩkenera ũtũũro o mũthenya. Muoroto wake nĩ andũ matũũre thĩinĩ wa thĩ tene na tene. (Thaburi 37:29; Isaia 45:18) Nĩguo ahingie muoroto ũcio aarĩ naguo kuuma o kĩambĩrĩria, Ngai nĩ “akaameria gĩkuũ tene na tene.” (Isaia 25:8) Bibilia yugaga ũũ: “Gĩkuũ gĩtigaacoka gũkorũo kuo rĩngĩ, o na gũcakaya kana kĩrĩro kana ruo.” (Kũguũrĩrio 21:4) Andũ arĩa makaahonoka hĩndĩ ĩrĩa thĩ ĩno njũru ĩgoka kũniinwo o hamwe na arĩa makaariũkio thĩinĩ wa thĩ njerũ, nĩ makaaheo mweke wa gũtũũra tene na tene.—Johana 5:28, 29; Atũmwo 24:15.
Ũmũthĩ ũyũ, andũ milioni nyingĩ thĩinĩ wa thĩ, nĩ marehaarĩria gũtũũra rungu rwa Ũthamaki wa Ngai ũrĩa ũrĩ hakuhĩ gwathana. O na gũtuĩka ti akinyanĩru, nĩ marerutanĩria gũtuĩka andũ arĩa Ngai angĩenda magaatũũra thĩinĩ wa thĩ yake njerũ. Mareka ũguo na njĩra ya kwĩruta igũrũ rĩgiĩ Jehova Ngai, na ũrĩa aatũmire nĩwe Jesu Kristo.—Johana 17:3.
Wĩrute ũhoro makĩria wĩgiĩ ũrĩa ũngĩka nĩguo ũkaahonoka mũthia wa thĩ ĩno, na ũtũũre thĩinĩ wa thĩ njega ĩrĩa ĩrĩ hakuhĩ gũka. Nĩguo wĩke ũguo, wĩrute Bibilia na Mũira wa Jehova hatarĩ marĩhi mũkĩhũthĩra ibuku rĩa Kenera Ũtũũro Tene na Tene!