Ithondeka Rĩao na Wĩra Wao thĩ Yothe

NĨ KŨRĨ njĩra nyingĩ ihũthagĩrũo cia gũtongoria wĩra wa kũruta ũira thĩinĩ wa makĩria ya mabũrũri 230. Ũtongoria wothe uumaga kũrĩ Njama Ĩrĩa Nene thĩinĩ wa hendikuota ya thĩ yothe ĩrĩa ĩrĩ Brooklyn, New York. Njama Ĩo Nene nĩĩtũmaga arũgamĩrĩri mwaka o mwaka mabũrũri-inĩ mwanya mwanya thĩinĩ wa thĩ yothe gũtereta na arũgamĩrĩri a honge cia wabici. Thĩinĩ wa honge cia wabici, nĩgũkoragũo na kamĩtĩĩ ya wabici ya andũ atatũ ngĩnyagia mũgwanja arĩa marũgamagĩrĩra wĩra mabũrũri-inĩ marĩa marĩ rungu rwao. Honge ingĩ nĩ ikoragwo na mĩtambo ya gũcaba, imwe nĩ ikoragwo na mĩtambo icabaga na ihenya mũno. Bũrũri kana gĩcunjĩ kĩrĩa gĩtungatagĩrũo nĩ rũhonge rũa wabici nĩ ũgayanĩtĩo thĩinĩ wa disitrikiti, ningĩ igacoka ikagayanio na mĩthiũrũko. O mũthiũrũrũko ũkoragwo na ikundi ta 20. Mũrũgamĩrĩri wa disitrikiti aceeragĩra mĩthiũrũrũko ya disitrikiti yake. O mwaka Ciũngano igĩrĩ nĩ igomanagwo thĩinĩ wa o mũthiũrũrũko. Ningĩ nĩ kũrĩ mũrũgamĩrĩri wa mũthiũrũrũko, na aceragĩra gĩkundi o gĩkundi maita merĩ mwaka thĩinĩ wa mũthiũrũrũko wake, agĩteithagia Aira harĩ kũbanga na kũruta wĩra wa kũhunjia gĩcunjĩ kĩrĩa kĩhetwo gĩkundi kĩu.

Gĩkundi gĩa kwanyu na Kingdom Hall yakĩo, nĩho gatagatĩ ga kũmemerekeria ũhoro ũrĩa mwega thĩinĩ wa itũũra rĩanyu. Icunjĩ iria irĩ rungu rwa o gĩkundi iheetwo tũmĩhaka tũnini tũnini. Tũu tũgayagĩrũo Aira ũmwe ũmwe arĩa mageragia gũcerera na kwaria na andũ thĩinĩ wa mĩciĩ yao. O gĩkundi gĩkoragwo na Aira anyinyi a nginyagia 200, na gĩgakorũo na athuri arĩa marũgamagĩrĩra mawĩra maingĩ. Thĩinĩ wa ithondeka rĩa Aira a Jehova, mũhunjia ũmwe ũmwe arĩ bata mũno. Mũira o wothe, kana araruta wĩra thĩinĩ wa hendikuota, kana thĩinĩ wa honge cia wabici, o na kana thĩinĩ wa ikundi, no mũhaka arute wĩra ũyũ we kĩũmbe wa kwĩra andũ arĩa angĩ ũhoro wa Ũthamaki wa Ngai.

Mũthia-inĩ riboti ya wĩra ũcio wa kũhunjia nĩĩkinyagĩra hendikuota ya thĩ yothe, na Ibuku rĩa Mwaka rĩkaharĩrio na rĩgacabwo. Na ningĩ, o mwaka mũtaratara wa wĩra nĩ ũcabagwo thĩinĩ wa ngathĩti ya The Watchtower ya Januari 1. Mabuku macio merĩ nĩ maheanaga riboti ngima ya wĩra ũrĩa ũrutĩtwo o mwaka wa kũheana ũira wa Jehova na Ũthamaki wake rungu rwa Kristo Jesu. Mĩaka ya ica ikuhĩ Aira na andũ arĩa magucagĩrĩrio nĩ ũhoro ũcio ta 14,000,000 nĩ makoretwo magĩthiĩ Kĩririkano-inĩ gĩa gĩkuũ kĩa Jesu kĩa o mwaka. Aira a Jehova matũmagĩra makĩria ya mathaa 1,000,000,000 o mwaka makĩmemerekia ũhoro mwega, na makĩria ya andũ 300,000 erũ makabatithio. Kũheanwo kwa mabuku makĩrĩte kobi milioni magana maingĩ.