Ithomo rĩa 14

Ũrĩa Aira a Jehova Matuĩtwo Ithondeka

Nĩ rĩ Aira a Jehova maarĩ na kĩambĩrĩria kĩao kĩa matukũ maya? (1)

Mĩcemanio ya Aira a Jehova ĩtongoragio atĩa? (2)

Mahũthĩro mahangʼagĩrũo atĩa? (3)

Nĩa matongoragia thĩinĩ wa gĩkundi o gĩkundi? (4)

Nĩ mĩcemanio ĩrĩkũ mĩnene makĩria ĩĩkagwo mwaka o mwaka? (5)

Nĩ wĩra ũrĩkũ ũrutagwo thĩinĩ wa gĩikaro kĩnene kĩao na thĩinĩ wa honge cia mawabici? (6)

1. Aira a Jehova maarĩ na kĩambĩrĩria kĩao kĩa matukũ maya mĩaka-inĩ ya 1870. Kĩambĩrĩria-inĩ, metagwo Arutwo a Bibilia. No thĩinĩ wa 1931 nĩmeetĩkĩrire na makĩambĩrĩria kũhũthĩra rĩĩtwa rĩa Kĩmaandĩko Aira a Jehova. (Isaia 43:10) Kuuma kĩambĩrĩria kĩnini ithondeka nĩrĩkũrĩte rĩgakinya Aira mamilioni, arĩa me na kĩyo makĩhunjia thĩinĩ wa mabũrũri makĩria ma 230.

2. Ikundi nyingĩ cia Aira a Jehova icemanagia maita matatũ o kiumia. Nĩũkũũrio ũthiĩ mũcemanio-inĩ o wothe wa ĩo. (Ahibirania 10:24, 25) Bibilia nĩyo mũthingi wa maũndũ marĩa marutanagwo. Mĩcemanio ĩhingũragwo na ĩkahingwo na mahoya. “Nyĩmbo cia kĩĩroho” cia kũhutia ngoro nĩ ciinagwo mĩcemanio-inĩ mĩingĩ. (Aefeso 5:18, 19, NW) Kũingĩra gũtirĩhagio, na gũtirĩ mĩhothi yũnganagio.—Mathayo 10:8.

3. Ikundi nyingĩ ciĩkagĩra mĩcemanio thĩinĩ wa Nyũmba ya Ũthamaki. Ĩo nĩ mĩako mĩhũthũ yakagwo nĩ Aira merutĩire. Thĩinĩ wa Nyũmba ya Ũthamaki ndũngĩona mĩhianano, mĩtharaba, kana indo ingĩ ta icio. Mahũthĩro marĩhagĩrũo na maruta ma kwĩendera. Nĩgũkoragwo na ithandũkũ rĩa mĩhothi, nĩũndũ wa arĩa mangĩenda kũruta.—2 Akorintho 9:7.

4. Thĩinĩ wa gĩkundi o gĩkundi, kwĩ na athuri, kana arori. Acio matongoragia harĩ kurutana gĩkundi-nĩ. (1 Timotheo 3:1-7; 5:17) Mateithagio nĩ atungati a huduma. (1 Timotheo 3:8-10, 12, 13) Arũme acio matitũũgagĩrio igũrũ rĩa arĩa angĩ gĩkundi-inĩ. (2 Akorintho 1:24) Acio matiheagwo marĩĩtwa ma mwanya ma ũnene. (Mathayo 23:8-10) Matiĩhumbaga ngũũrani na arĩa angĩ. Na matirĩhagwo mũcara nĩũndũ wa wĩra wao. Athuri mahingagia na kwĩendera mabataro ma kĩroho ma gĩkundi. No mahote kũheana rĩũmĩrĩria na ũtongoria mahinda-inĩ ma thĩna.—Jakubu 5:14-16; 1 Petero 5:2, 3.

5. O na ningĩ Aira a Jehova nĩmakoragwo na ciũngano nini na ciũngano nene o mwaka. Mahinda-inĩ macio ikundi nyingĩ nĩciũnganaga nĩũndũ wa programu ya mwanya ya ũrutani wa Bibilia. Kũbatithio kwa arutwo erũ nĩ gĩcunjĩ kĩa ndũire gĩa programu ciothe cia kĩũngano kĩnini kana kĩũngano kĩnene.—Mathayo 3:13-17; 28:19, 20.

6. Gĩikaro kĩnene gĩa thĩ yothe kĩa Aira a Jehova kĩrĩ thĩinĩ wa New York. Nĩkuo gũkoragwo Kĩama Kĩrĩa Gĩtongoragia, gĩkundi kĩnene kĩa athuri marĩ na ũmenyeru arĩa marũgamagĩrĩra gĩkundi gĩa thĩ yothe. Ningĩ nĩ kũrĩ honge cia mawabici makĩria ma 100 thĩinĩ wa thĩ yothe. Thĩinĩ wa kũndũ kũu, erutĩri mateithagia gũcaba na gũtũma mabuku makoniĩ Bibilia. O na ningĩ ũtongoria wa kũbanga wĩra wa kũhunjia nĩũheanagwo. Ũkwaga kũbanga ũceerere rũhonge rwa wabici ĩrĩa ĩrĩ hakuhĩ nawe nĩkĩ?