Ngai Akoragwo na Gĩkundi kĩa Andũ kana Ithondeka Nĩkĩ?

1. Ngai aacokanĩrĩirie Aisiraeli marĩ rũrĩrĩ nĩkĩ?

Ngai aacokanĩrĩirie njiarũa cia mũthuri wa tene Iburahimu marĩ rũrĩrĩ agĩcoka akĩmahe mawatho. Eetire rũrĩrĩ rũu “Isiraeli” na akĩrwĩhokera wĩra wa kũgitĩra ũthathaiya wa ma hamwe na kiugo gĩake. (Thaburi 147:19, 20) Nĩ ũndũ ũcio, andũ a ndũrĩrĩ ciothe nĩ mangĩagunĩkire kuuma harĩ Isiraeli.​—Thoma Kĩambĩrĩria 22:18.

Ngai aathuurire Aisiraeli nĩguo matuĩke aira ake. Historĩ yao nĩ yonanagia ũrĩa andũ magunĩkaga maathĩkĩra mawatho ma Ngai. (Gũcokerithia Maathani 4:6) Kwoguo kũgerera harĩ Aisiraeli, andũ angĩ nĩ mangĩamenyire Ngai ũrĩa wa ma.​—Thoma Isaia 43:10, 12.

2. Akristiano a ma macokanĩrĩirio marĩ gĩkundi nĩkĩ?

Thutha wa ihinda, Aisiraeli nĩ maaregirũo nĩ Jehova, na ithenya rĩao akĩambĩrĩria kĩũngano gĩa Gĩkristiano. (Mathayo 21:43; 23:37, 38) Mahinda-inĩ maya, handũ ha Aisiraeli, Akristiano a ma matungataga marĩ aira a Jehova.​—Thoma Atũmwo 15:14, 17.

Jesu aacokanĩrĩirie arũmĩrĩri ake marĩ gĩkundi nĩguo mahunjagie na matuage andũ a ndũrĩrĩ ciothe arutwo. (Mathayo 10:7, 11; 24:14; 28:19, 20) Wĩra ũcio ũkirie gũkinya mũthia, hĩndĩ ya ithirĩro rĩa mũtabarĩre wa maũndũ. Jehova nĩ atũmĩte andũ milioni nyingĩ a kuuma ndũrĩrĩ-inĩ ciothe magĩe na ũrũmwe ũthathaiya-inĩ wa ma, ũndũ ũtarĩ wekĩka hĩndĩ ĩngĩ o yothe. (Kũguũrĩrio 7:9, 10) Akristiano a ma macokanĩrĩirio marĩ gĩkundi nĩguo mateithanagie na magekĩrana ngoro. Makoragwo na programu ĩhaanaine ya morutani ma Bibilia thĩinĩ wa thĩ yothe mĩcemanio-inĩ yao.​—Thoma Ahibirania 10:24, 25.

3. Ithondeka rĩa Aira a Jehova rĩa mahinda maya rĩaambĩrĩirie atĩa?

Mĩaka-inĩ ya 1870 gakundi kanini ka arutwo a Bibilia nĩ kaambĩrĩirie gũtaũkĩrũo nĩ ma cia Bibilia iria itaamenyekete ihinda iraya. Nĩ mooĩ atĩ Jesu aacokanĩrĩirie kĩũngano gĩa Gĩkristiano nĩguo kĩrute wĩra wa kũhunjia, kwoguo makĩambĩrĩria wĩra wa kũhunjia ũhoro wa Ũthamaki thĩinĩ wa thĩ yothe. Mwaka wa 1931 nĩ maambĩrĩirie gwĩtwo Aira a Jehova.​—Thoma Atũmwo 1:8; 2:1, 4; 5:42.

4. Aira a Jehova makoragwo mabangĩtwo atĩa?

Hĩndĩ ya karine ya mbere ciũngano cia Gĩkristiano mabũrũri-inĩ maingĩ ciagunĩkaga nĩ ũtongoria wa kĩama kĩrĩa gĩatongoragia kĩrĩa gĩetĩkĩrĩte Jesu arĩ we Mũtwe wa kĩũngano. (Atũmwo 16:4, 5) O na ũmũthĩ, Aira a Jehova thĩinĩ wa thĩ yothe nĩ magunĩkaga nĩ ũtongoria wa Kĩama Kĩrĩa Gĩtongoragia kĩa athuri marĩ na ũmenyeru. Kĩama kĩu kĩrũgamagĩrĩra wabici cia honge cia Aira a Jehova iria itaũraga, igacaba, na igakinyĩria andũ indo irĩ na ũhoro wa Bibilia na thiomi makĩria ma 600. Kwoguo Kĩama Kĩrĩa Gĩtongoragia nĩ kĩheanaga motaaro ma Kĩĩmaandĩko ma gwĩkĩra andũ ngoro o hamwe na ũtongoria kũrĩ ciũngano makĩria ma 100,000 thĩinĩ wa thĩ yothe. Thĩinĩ wa ciũngano icio, arũme arĩa magĩrĩire matungataga marĩ athuri a kĩũngano kana arori. Athuri acio marũmbũyagia rũũru rwa Ngai marĩ na wendo.​—Thoma 1 Petero 5:2, 3.

Aira a Jehova macokanĩrĩirio marĩ gĩkundi nĩguo mahunjie ũhoro ũrĩa mwega na matue andũ arutwo. O ta ũrĩa atũmwo meekaga, tũhunjagia nyũmba kwa nyũmba. (Atũmwo 20:20) Ningĩ nĩ twĩrutagĩra gũteithia andũ arĩa mendete ũhoro wa ma mamenye Bibilia. No Aira a Jehova to ithondeka kana gĩkundi kĩa andũ. Tũkoragwo tũrĩ famĩlĩ ĩrĩ na Ithe witũ ũtwendete. Tũrĩ aarĩ na ariũ a Ithe witũ marũmbũyanagia. (2 Athesalonike 1:3) Tondũ andũ a Jehova macokanĩrĩirio marĩ gĩkundi nĩguo makenagie Ngai na mateithagie andũ arĩa angĩ-rĩ, makoragwo marĩ famĩlĩ ĩrĩa ngenu mũno thĩinĩ wa thĩ.​—Thoma Thaburi 33:12; Atũmwo 20:35.