Thĩ Njerũ Ĩrĩa Ngai Eranĩire

KIUGO kĩa Ngai, Bibilia, nĩ gĩtũheaga mwĩhoko rĩrĩa gĩkuuga ũũ: “Kũringana na ũrĩa eranĩire, nĩ gũtanya tũtanyaga kuona Igũrũ rĩerũ o na thĩ njerũ, o kuo kũrĩa gũtũũraga ũthingu.”—2 Petero 3:13.

‘Igũrũ rĩu rĩerũ’ nĩ kĩĩ? Bibilia ĩkonanagia igũrũ na wathani. (Atũmwo 7:49) ‘Igũrũ rĩu rĩerũ’ nĩ thirikari njerũ ĩrĩa ĩgathamaka thĩ. Nĩ njerũ tondũ nĩyo ĩgakorũo ithenya rĩa thirikari iria cirĩ kuo; ningĩ nĩ ikinya rĩerũ rĩa kũhingia itanya rĩa Ngai. Ũcio nĩguo Ũthamaki ũrĩa Jesu atũrutire tũhoyage. (Mathayo 6:10) Tondũ Ngai nĩwe kĩhumo kĩa guo na aikaraga igũrũ, nĩkĩo wĩtagwo ‘ũthamaki wa Igũrũ.’—Mathayo 7:21.

‘Thĩ ĩyo njerũ’ nĩ kĩĩ? Ti thĩ ĩngĩ ĩkombwo, nĩ tondũ Bibilia yugĩĩte wega atĩ thĩ ĩno ĩgũtũũrũo tene na tene. ‘Thĩ ĩyo njerũ’ nĩ mũtabarĩre mwerũ wa andũ arĩa magakorũo thĩ. Ĩgakorũo ĩ njerũ tondũ andũ arĩa oru magakorũo maninĩtwo. (Thimo 2:21, 22) Arĩa othe magakorũo kuo nĩmagatĩa na gwathĩkĩra ũrĩa wamombire na matũũre mekaga wendi wake. (Thaburi 22:27) Andũ a ndũrĩrĩ ciothe rĩu nĩmarorio merute wendi wake na matũũre kũringana naguo. Wee nĩũreka ũguo?

Thĩini wa thĩ njerũ, andũ othe nĩmagatĩa wathani wa Ngai. Wendo waku kwĩ Ngai nĩũtũmaga ũmwathĩkĩre? (1 Johana 5:3) Wee nĩwonanagia ũguo rĩrĩa wĩ mũciĩ? wĩra-inĩ? cukuru? na ũtũũro-inĩ waku?

Thĩinĩ wa thĩ ĩyo njerũ, andũ othe nĩ magakorũo na ũũrũmwe ũthathaiya-inĩ wa Ngai ũrĩa wa ma. Wee ũhoyaga Mũũmbi wa igũrũ na thĩ? Ũthathaiya waku nĩũtũmaga ũkorũo na ũrũmwe na arĩa mũthathayagia nao kuuma ndũrĩrĩ ciothe, nduka ciothe, na thiomi ciothe?—Thaburi 86:9, 10; Isaia 2:2-4; Zefania 3:9.

[Gathandũkũ karatathi ka 17]

Ngai Ũrĩa Wĩranĩire Maũndũ Macio

We nĩwe wombire igũrũ na thĩ. Nĩwe ũrĩa Jesu Kristo etire “Ngai ũrĩa ũmwe wa ma.”—Johana 17:3.

Andũ aingĩ mahoyaga ngai cia gwĩthondekera. Aingĩ mainamagĩrĩra mĩhianano ĩtarĩ muoyo. Angĩ matũgagĩria ciama cia andũ, meciria ma andũ, kana merirĩria mao ene. Ona arĩa moigaga atĩ nĩ metĩkĩtie Bibilia, ti othe matũmagĩra rĩĩtwa rĩa ũrĩa yonanagia atĩ “nĩwe Ngai.”—Gũcokerithia Maathani 4:35.

Harĩ ũhoro wake mwene, Mũũmbi ekuuga ũũ: “Niĩ nĩ niĩ Jehova; rĩu nĩrĩo rĩĩtwa rĩakwa.” (Isaia 42:5, 8) Thĩinĩ wa Bibilia ta ũrĩa yarĩ na thiomi cia mbere, rĩĩtwa rĩu rĩonekaga maita 7,000. Jesu Kristo arutire arũmĩrĩri ake kũhoya ũũ: “Ithe witũ wĩ Igũrũ, Rĩĩtwa rĩaku nĩrĩamũrũo.”—Mathayo 6:9.

Ngumo cia Ngai wa ma nĩ irĩkũ? Eyaragia akoiga we nĩ Ngai “ũiguanagĩra tha mũno, na agakinyĩria andũ wega wake, na ndahiũhaga kũrakara, na nĩaiyũirũo nĩ tha, na ũhoro-wa-ma,” na ndagaga kũrũithia arĩa moinaga maathani make na rũtũrĩko. (Thama 34:6, 7) Ciugo icio nĩciĩkĩrĩirũo kinyi nĩ ũrĩa Ngai akoretwo agĩĩkuruhania na andũ.

Rĩĩtwa rĩu nĩ rĩagĩrĩirũo nĩ kwamũrũo, kana kũonwo rĩrĩ itheru, o hamwe na ũrĩa wĩtanagio narĩo. Nĩtwagĩrĩirũo nĩ kũmwathĩkagĩra na kũmũthathaiya tondũ nĩwe Mũũmbi na Mwathani wa Igũrũ na Thĩ. Wee nĩwĩkaga ũguo?

[Mbica/Gathandũkũ karatathi ka 18]

Nĩ Ũgarũrũku Ũrĩkũ Ũkarehwo nĩ “Igũrũ Rĩerũ o na Thĩ Njerũ”?

Thĩ kũgarũrũo ĩtuĩke Paradiso Luka 23:43, NW

Wĩra wĩna umithio na irio nyingĩ Isaia 25:6; 65:17, 21-23

Thĩ ĩna ũrũmwe ũthathaiya-inĩ wa Ngai wa ma Kũguũrĩrio 15:3, 4

[Box/Pictures on page 19]

Wee Nĩũkagunĩka?

Ngai ndangĩhenania!—Tito 1:2.

Jehova oigĩte ũũ: “Ũhoro ũrĩa ũkoima kanua gakwa . . . ndũkanjokerera o ro ũguo tũhũ, no nĩ kũhingia ũkahingia ũndũ ũrĩa nyendete wĩkwo, na ũrute wĩra ũrĩa ndaũrekeirie, wagĩre wega.”—Isaia 55:11.

Jehova nĩambĩrĩirie gũthondeka “igũrũ rĩerũ o na thĩ njerũ.” Thirikari ya igũrũ nĩyambĩrĩirie gũthamaka. Mũthingi wa “thĩ njerũ” nĩũigĩtwo.

Ibuku rĩa Kũguũrĩrio rĩonanagia mamwe ma maũndũ mega na ma kũgegania marĩa magakorũo thĩini wa “igũrũ rĩerũ o na thĩ njerũ.” Rĩonanagia Ngai, Mwathani wa Igũrũ na Thĩ, we mwene akiuga ũũ: “Nĩ atĩrĩ, maũndũ mothe nĩ kũmerũhia ndĩramerũhia.” Nake akiuga: “Andĩka; amu ciugo icio nĩ cia kwĩhokwo na nĩ cia ma.”—Kũguũrĩrio 21:1, 5.

Kĩũria kĩrĩa kĩa bata nĩ rĩrĩ, Nĩtũrarũngĩrĩria mĩthiĩre iitũ nĩgetha twoneke twagĩrĩire gũtuĩka amwe a gũgatũũra “thĩ njerũ” rungu rwa “igũrũ rĩerũ”?