ITHOMO RĨA 16

Ndungata cia Kĩũngano Ikoragwo na Itemi Rĩrĩkũ?

Ndungata ya kĩũngano ĩgĩteithia kũheana mabuku — Myanmar

Ndungata ya kĩũngano ĩkĩruta mĩario — Mũcemanio-inĩ

Ndungata ya kĩũngano ĩgĩtongoria mũcemanio — Gĩkundi gĩa kũhunjia

Ndungata ya kĩũngano ĩgĩteithia kũiga Nyũmba ya Ũthamaki ĩrĩ theru — Kũiga Nyũmba ya Ũthamaki ĩrĩ njega

Bibilia yonanagia kũrĩ ikundi igĩrĩ cia arũme Akristiano arĩa marũmbũyagia maũndũ thĩinĩ wa kĩũngano—⁠“arori na ndungata cia kĩũngano.” (Afilipi 1:⁠1) Kaingĩ nĩ gũkoragwo na ariũ a Ithe witũ ta acio matungatagĩra thĩinĩ wa o kĩũngano. Ndungata cia kĩũngano irutaga wĩra ũrĩkũ nĩgetha tũgunĩke?

Nĩ iteithagĩrĩria kĩama gĩa athuri. Ndungata cia kĩũngano nĩ andũ marũmbũyagia maũndũ ma kĩĩroho, ehokeku, na arũngĩrĩru, amwe nĩ akũrũ nao angĩ nĩ ethĩ. Nĩ marũmbũyagia mawĩra ma bata marĩa matarĩ ma ũrutani kana ma kũrĩithia rũũru rwa Ngai, marĩa mabataraga gwĩkwo kĩũngano-inĩ. Ũndũ ũcio nĩ ũhotithagia athuri gũthingata wĩra wa kũrĩithia na kũrutana.

Nĩ irutaga wĩra wa gũtũguna. Ndungata imwe cia kĩũngano nĩ iheagwo wĩra wa kũnyita ũgeni andũ arĩa othe mokaga mĩcemanio. Ingĩ nacio ikaheo wĩra wa macini cia mũgambo, kũheana mabuku, kũrora mathabu ma kĩũngano, na kũhe ahunjia a kĩũngano icigo iria mekũhunjia. Ningĩ nĩ iteithagĩrĩria kũiga Nyũmba ya Ũthamaki ĩrĩ njega. Kũrĩ hĩndĩ athuri mangĩũria ndungata cia kĩũngano iteithĩrĩrie andũ arĩa akũrũ. Ndungata cia kĩũngano ikoragwo ciĩhaarĩirie kũruta wĩra o wothe ingĩheo, na kĩũngano nĩ gĩciheete gĩtĩo nĩ ũndũ wa kĩyo na mwerekera ũcio.—⁠1 Timotheo 3:⁠13.

Nĩ ikoragwo irĩ kĩonereria kĩega kĩa arũme Akristiano. Ndungata cia kĩũngano ciamũragwo nĩ ũndũ wa ngumo ciacio njega cia Gĩkristiano. Nĩ ciĩkĩraga wĩtĩkio witũ hinya kũgerera icunjĩ iria irutaga mĩcemanio-inĩ. Kĩonereria kĩega kĩa ndungata cia kĩũngano wĩra-inĩ wa kũhunjia, nĩ gĩtwĩkĩraga ngoro gĩgatũma tũgĩe na kĩyo makĩria. Tondũ wa ũnyitanĩri mwega wa ndungata cia kĩũngano, nĩ kũgĩaga na gĩkeno na ũrũmwe. (Aefeso 4:16) Thutha wa ihinda, ndungata icio cia kĩũngano no ciagĩrĩre gũtuĩka athuri a kĩũngano.

Ndungata cia kĩũngano ikoragwo na ngumo irĩkũ?
Ndungata cia kĩũngano iteithagia atĩa nĩguo maũndũ mekĩke wega kĩũngano-inĩ?