Jesu Kristo Nũũ?

1. Ũtũũro wa Jesu waambĩrĩirie atĩa?

Ngũrani na andũ, Jesu aatũũraga igũrũ arĩ kĩũmbe kĩa roho atanaciarũo gũkũ thĩ. (Johana 8:23) Nĩwe waambire kũũmbwo nĩ Ngai, na nĩ aateithĩrĩirie indo iria ingĩ ciothe ikĩũmbwo. Nowe wiki wombirũo ĩmwe kwa ĩmwe nĩ Jehova, nĩkĩo etagwo Mũrũ wa Ngai “wa mũmwe.” (Johana 1:14) Jesu nĩ aahũthagĩrũo arĩ Mwaria wa Ngai, nĩkĩo ningĩ etagwo “Kiugo.”​—Thoma Thimo 8:22, 23, 30; Akolosai 1:15, 16.

2. Nĩ kĩĩ gĩatũmire Jesu oke gũkũ thĩ?

Ngai aatũmire Mũrũ wake gũkũ thĩ na njĩra ya gũthamia muoyo wake kuuma igũrũ nginya nda ya mũirĩtu Mũyahudi wetagwo Mariamu. Kwoguo, Jesu ndaarĩ na ithe mũmũciari. (Luka 1:30-35) Jesu ookire gũkũ thĩ nĩguo (1) arutane ũhoro wa ma wĩgiĩ Ngai, (2) atũigĩre kĩonereria gĩa gwĩka wendi wa Ngai nginya rĩrĩa tũrĩ na moritũ, na (3) arute muoyo wake mũkinyanĩru ũtuĩke “ũkũũri.”​—Thoma Mathayo 20:28.

3. Tũbataraga ũkũũri nĩkĩ?

Ũkũũri nĩ thogora ũrĩa ũrĩhagwo nĩguo mũndũ arekererio ndakae kũũragwo. (Thama 21:29, 30) Gĩkuũ na ũkũrũ itiarĩ thĩinĩ wa muoroto wa Ngai wĩgiĩ andũ. Tũmenyaga ũguo atĩa? Ngai eerire mũndũ wa mbere, Adamu, atĩ angĩekire ũndũ ũrĩa Bibilia ĩtaga “mehia,” nĩ angĩakuire. Kwoguo korũo Adamu ndeehirie, ndangĩakuire. (Kĩambĩrĩria 2:16, 17; 5:5) Kũringana na Bibilia, gĩkuũ ‘gĩatonyire’ thĩinĩ wa thĩ kũgerera Adamu. Kwoguo, akĩgaĩra njiarũa ciake ciothe mehia, na gĩkuũ kĩrĩa kiumanaga namo. Tũbataraga ũkũũri nĩguo tũrekererio kuuma harĩ gĩkuũ kĩrĩa twagaire kuuma kũrĩ Adamu.​—Thoma Aroma 5:12; 6:23.

Nũũ ũngĩahotire kũrĩha thogora wa ũkũũri nĩguo tũkũũrũo kuuma harĩ gĩkuũ? Rĩrĩa twakua-rĩ, tũrĩhagĩra o mehia maitũ ithuĩ ene. Gũtirĩ mũndũ ũtarĩ mũkinyanĩru ũngĩhota kũrĩhĩra mehia ma andũ arĩa angĩ.​—Thoma Thaburi 49:7-9.

4. Jesu aakuire nĩkĩ?

Ngũrani na ithuĩ, Jesu aarĩ mũkinyanĩru. Kwoguo ndaabataraga gũkua nĩ ũndũ wa mehia make—gũtirĩ mehia eekĩte. Ithenya rĩa ũguo, Jesu aakuire nĩ ũndũ wa mehia ma andũ angĩ. Ngai oonanirie wendo mũnene harĩ andũ na njĩra ya gũtũma Mũrũ wake nĩguo akue nĩ ũndũ witũ. O na Jesu nĩ oonanirie wendo harĩ ithuĩ na njĩra ya gwathĩkĩra Ithe akĩruta muoyo wake nĩ ũndũ wa mehia maitũ.​—Thoma Johana 3:16; Aroma 5:18, 19.

Wĩrorere video ya Jesu Aakuire Nĩkĩ?

5. Jesu areka atĩa mahinda-inĩ maya?

Rĩrĩa aarĩ gũkũ thĩ, Jesu nĩ aahonagia arwaru, akariũkia akuũ, na agateithia arĩa maarĩ na mathĩna. Na njĩra ĩyo akĩonania ũrĩa ageekĩra andũ arĩa othe athĩki mahinda marĩa maroka. (Mathayo 15:30, 31; Johana 5:28) Thutha wa Jesu gũkua, Ngai aamũriũkirie arĩ kĩũmbe kĩa roho. (1 Petero 3:18) Jesu agĩcoka agĩikara guoko-inĩ kwa ũrĩo kwa Ngai etereire o nginya rĩrĩa Jehova aamũheire hinya wa gwathana arĩ Mũthamaki igũrũ rĩa thĩ yothe. (Ahibirania 10:12, 13) Rĩu Jesu arathamaka igũrũ arĩ Mũthamaki, na arũmĩrĩri ake nĩ marahunjia ũhoro ũcio mwega thĩinĩ wa thĩ yothe.​—Thoma Danieli 7:13, 14; Mathayo 24:14.

Ica ikuhĩ, Jesu nĩ ekũhũthĩra hinya wake arĩ Mũthamaki kũniina mĩnyamaro yothe na arĩa mamĩrehaga. Andũ arĩa othe monanagia wĩtĩkio harĩ Jesu na njĩra ya kũmwathĩkĩra nĩ makaaheo muoyo thĩinĩ wa thĩ ĩrĩ paradiso.​—Thoma Thaburi 37:9-11.