Rutwo Nĩ Kiugo Kĩa Ngai

Jesu Kristo Nũũ?

Gĩcunjĩ gĩkĩ kĩrĩ na ciũria hihi waneyũria na nĩ kĩronania harĩa ũngĩthoma macokio ma ciũria icio thĩinĩ wa Bibilia yaku. Aira a Jehova no makenere kwarĩrĩria macokio macio hamwe nawe.

1. Jesu Kristo Nũũ?

Ngũrani na andũ arĩa angĩ-rĩ, Jesu atanaciarũo gũkũ thĩ, aatũũraga igũrũ arĩ kĩũmbe kĩa roho. (Johana 8:23) Nĩwe waambire kũũmbwo nĩ Ngai, nake agĩteithĩrĩria kũũmba indo iria ingĩ ciothe. Nowe wiki wombirũo ĩmwe kwa ĩmwe nĩ Jehova nĩkĩo etagwo Mwana wa Ngai “wa mũmwe.” Jesu nĩ aahũthagĩrũo arĩ mwaria wa Ngai, nĩkĩo ningĩ etagwo “Ũhoro.”—Johana 1:1-3, 14; thoma Thimo 8:22, 23, 30; Akolosai 1:15, 16.

2. Nĩ kĩĩ gĩatũmire Jesu oke gũkũ thĩ?

Ngai aatũmire Mũrũ wake gũkũ thĩ na njĩra ya gũthamia muoyo wake kuuma igũrũ nginya nda ya mũirĩtu Mũyahudi wetagwo Mariamu. Kwoguo, Jesu ndaarĩ na ithe wa gũkũ thĩ. (Luka 1:30-35) Jesu okire gũkũ thĩ (1) kũrutana ma ĩrĩa ĩgiĩ Ngai, (2) nĩguo atũigĩre kĩonereria harĩ gwĩka wendi wa Ngai na (3) kũruta muoyo wake mũkinyanĩru ũtuĩke ‘ũkũũri.’—Thoma Mathayo 20:28; Johana 18:37.

3. Tũbataraga ũkũũri nĩkĩ?

Ũkũũri nĩ thogora ũrĩa ũrĩhagwo nĩguo mũndũ arekererio kuuma kĩoho-inĩ. Gĩkuũ na ũkũrũ itiarĩ thĩinĩ wa muoroto wa Ngai wĩgiĩ mũndũ. Tũmenyaga ũguo atĩa? Ngai eerire mũndũ wa mbere, Adamu, atĩ angĩehirie, nĩ angĩakuire. Korũo Adamu ndehirie, ndangĩakuire. O na gũtuĩka nĩ aathire na mbere gũtũũra mĩaka mĩingĩ thutha ũcio-rĩ, Adamu aambĩrĩirie gũkua o mũthenya ũrĩa aaremeire Ngai. (Kĩambĩrĩria 2:16, 17; 5:5) Adamu aagaĩire njiarũa ciake ciothe mehia, na gĩkuũ kĩrĩa kiumanaga namo. Nĩ ũndũ ũcio, gĩkuũ “gĩgĩtonya” thĩinĩ wa thĩ kũgerera Adamu. Nĩkĩo tũbataraga ũkũũri.—Thoma Aroma 5:12; 6:23.

4. Jesu aakuire nĩkĩ?

Nũũ ũngĩahotire gũtũrĩhĩra thogora wa ũkũũri nĩguo tũrutwo gĩkuũ-inĩ? Rĩrĩa twakua-rĩ, tũrĩhagĩra o mehia maitũ ithuĩ ene. Gũtirĩ mũndũ ũtarĩ mũkinyanĩru ũngĩhota kũrĩha thogora wa ũkũũri wa mehia ma andũ arĩa angĩ.—Thoma Thaburi 49:7-9.

Tondũ Jesu ndaarĩ na ithe wa gũkũ thĩ-rĩ, ndaagaire mehia, kwoguo aakuire nĩ ũndũ wa mehia ma andũ angĩ no ti make. Tondũ wa wendo Wake mũnene harĩ andũ-rĩ, Ngai nĩ aatũmire Mũrũ wake akue nĩ ũndũ witũ. Ningĩ Jesu nĩ onanirie wendo harĩ ithuĩ na njĩra ya gwathĩkĩra Ithe na kũruta muoyo wake nĩ ũndũ wa mehia maitũ.—Thoma Johana 3:16; Aroma 5:18, 19.

5. Jesu Mahinda-inĩ maya nĩ atĩa areka?

Na njĩra ya kũhonia arũaru, kũriũkia akuũ, hamwe na gũteithia arĩa maarĩ na mathĩna, Jesu onanirie maũndũ marĩa ageekĩra arĩa othe aathĩki. (Luka 18:35-42; Johana 5:28, 29) Thutha wa Jesu gũkua, Ngai nĩ aamũriũkirie arĩ kĩũmbe kĩa roho. (1 Petero 3:18) Ningĩ Jesu agĩikara mwena wa ũrĩo wa Ngai eetereire o nginya rĩrĩa Jehova aamũtuire Mũthamaki igũrũ rĩa thĩ yothe. (Ahibirania 10:12, 13) Mahinda-inĩ maya Jesu arathamaka igũrũ arĩ Mũthamaki, na arũmĩrĩri ake nĩ marahunjia ũhoro ũrĩa mwega thĩinĩ wa thĩ yothe.—Thoma Danieli 7:13, 14; Mathayo 24:14.

Ica ikuhĩ, Jesu nĩ arĩhũthĩra hinya wake arĩ Mũthamaki kũniina mĩnyamaro na arĩa mamĩrehaga. Andũ milioni nyingĩ arĩa monanagia wĩtĩkio harĩ Jesu na makamwathĩkagĩra nĩ marĩkenera muoyo thĩinĩ wa thĩ ĩtuĩkĩte paradiso.—Thoma Thaburi 37:9-11.

Nĩgetha wone ũhoro makĩria, rora gĩcunjĩ gĩa 4, kĩa ibuku rĩrĩ rĩcabĩtwo nĩ Aira a Jehova.BIBILIA ĨRUTANAGA ATĨA Kũna?

Andũ milioni nyingĩ arĩa monanagia wĩtĩkio harĩ Jesu na makamwathĩkagĩra nĩ marĩkenera muoyo thĩinĩ wa thĩ ĩtuĩkĩte paradiso