Nĩ kĩĩ Kĩngĩteithia Famĩlĩ Kũgĩa na Gĩkeno?

ŨRĨA BIBILIA YUGAGA

“Gũkena-rĩ, nĩ arĩa maiguaga kiugo kĩa Ngai na magakĩrũmia!”—Luka 11:28, New World Translation in Kikuyu.

ŨRĨA ŨNDŨ ŨCIO ŨNGĨGŨTEITHIA

Kũgĩa na wendo wa ma.—Aefeso 5:28, 29.

Gũkoragwo na gĩtĩo kĩa ma.—Aefeso 5:33.

Kũgĩa na ũgitĩri wa ma.—Mariko 10:6-9.

HIHI KŨNA NO TWĨTĨKIE ŨRĨA BIBILIA YUGAGA?

Ĩĩ, nĩ ũndũ wa itũmi itanyihĩire igĩrĩ:

• Ngai nĩwe Kĩhumo kĩa famĩlĩ. Bibilia yugaga atĩ Jehova Ngai nĩwe “ũheete famĩlĩ ciothe rĩĩtwa.” (Aefeso 3:14, 15) Na njĩra ĩngĩ, mũbango wa famĩlĩ wathondekirũo nĩ Jehova. Nĩkĩ ũndũ ũcio nĩ wa bata?

  Ta wĩcirie: Ũngĩkenio nĩ irio irĩ na cama na wende kũmenya kĩrĩa ciĩkĩrĩtwo-rĩ, ũngĩũria ũ? Hatarĩ nganja, nĩ ũrĩa ũkũrugĩte.

  Ũndũ ũmwe na ũcio, nĩguo ũmenye kĩrĩa gĩtũmaga famĩlĩ ĩgĩe na gĩkeno, nĩ wega kũũria Jehova, tondũ nĩwe Kĩhumo kĩa mũbango wa famĩlĩ.—Kĩambĩrĩria 2:18-24.

• Ngai nĩ akũrũmbũyagia. Andũ thĩinĩ wa famĩlĩ no magunĩke mangĩrũmĩrĩra ũtaaro wa Jehova, ũrĩa aheanĩte kũgerera Bibilia. Nĩkĩ? “Tondũ nĩ amũrũmbũyagia.” (1 Petero 5:6, 7) Jehova no ende mũno ũgaacĩre, na ũtaaro wake hĩndĩ ciothe nĩ ũrutaga wĩra!—Thimo 3:5, 6; Isaia 48:17, 18.