ITHOMO RĨA 10
Jesu Aathĩkaga Hingo Ciothe
Hihi ũkoragwo ũrĩ ũndũ mũhũthũ gwathĩkĩra aciari aku hingo ciothe?— Rĩmwe na rĩmwe ti ũndũ mũhũthũ. Nĩ ũĩ atĩ Jesu nĩ aathĩkagĩra Jehova na agathĩkĩra aciari ake?— Kĩonereria gĩake no gĩgũteithie gwathĩkagĩra aciari aku o na rĩrĩa atarĩ ũndũ mũhũthũ gwĩka ũguo. Ta reke twĩrute ũhoro ũcio makĩria.
Jesu atanoka gũkũ thĩ, aatũũraga igũrũ marĩ hamwe na Ithe, Jehova. No ningĩ Jesu nĩ aarĩ na aciari gũkũ thĩ. Meetagwo Jusufu na Mariamu. Hihi nĩ ũĩ ũrĩa maatuĩkire aciari ake?—
Jehova aathamirie muoyo wa Jesu kuuma igũrũ nginya thĩinĩ wa nda ya Mariamu nĩguo Jesu aciarũo na aikare gũkũ thĩ. Kĩu kĩarĩ kĩama! Jesu agĩkũra arĩ thĩinĩ wa nda ya Mariamu o ta ũrĩa twana tũrĩa tũngĩ tũkũraga tũrĩ thĩinĩ wa nda cia manyina. Thutha wa mĩeri kenda, Jesu agĩciarũo. Ũguo nĩguo Mariamu marĩ na mũthuri wake Jusufu maatuĩkire aciari ake a gũkũ thĩ.
Rĩrĩa Jesu aarĩ na mĩaka ikũmi na ĩĩrĩ, nĩ eekire ũndũ woonanirie ũrĩa eendete Ithe, Jehova. Ũndũ ũcio wekĩkire rĩrĩa Jesu na famĩlĩ yao maathiire rũgendo rũraihu nginya Jerusalemu nĩguo makahoe Jehova. Na marĩ njĩra-inĩ makĩinũka, Jusufu na Mariamu makĩaga Jesu. Nĩ ũĩ kũrĩa aarĩ?—
Jesu eekaga atĩa thĩinĩ wa hekarũ?
Jusufu na Mariamu magĩcoka Jerusalemu na ihenya makĩmwetha kũndũ guothe. Nĩ maamakĩte mũno tondũ matiamuonaga. No thutha wa thikũ ithatũ, makĩmũkora thĩinĩ wa hekarũ! Hihi nĩ ũĩ kĩrĩa gĩatũmĩte Jesu akorũo thĩinĩ wa hekarũ?— Tondũ arĩ kũu nĩ angĩerutire ũhoro wĩgiĩ Ithe, Jehova. Nĩ eendete Jehova na nĩ eendaga kwĩruta ũrĩa angĩmũkenia. O na rĩrĩa aatuĩkire mũndũ mũgima, Jesu nĩ aathĩkagĩra Jehova hingo ciothe. Jesu nĩ aathĩkaga nginya rĩrĩa ũtaarĩ ũndũ mũhũthũ, o na akĩmenyaga atĩ gwĩka ũguo nĩ gũgũtũma acemanie na mathĩna. Hihi Jesu nĩ aathĩkagĩra nginya Jusufu na Mariamu?— Ĩĩ, Bibilia yugaga atĩ nĩ aamathĩkagĩra.
Ũngĩĩruta ũndũ ũrĩkũ kuumana na kĩonereria kĩa Jesu?— Ũrabatara gwathĩkagĩra aciari aku o na rĩrĩa ũtarĩ ũndũ mũhũthũ gwĩka ũguo. Nĩ ũrĩmaathĩkagĩra?—