Jesu Arĩ Mũnini

Jusufu na Mariamu maaikaraga Nazarethi marĩ na Jesu hamwe na ciana icio ingĩ ciao. Jusufu aarutaga wĩra wa mbaũ nĩguo ahote kũhingĩria andũ a famĩlĩ yake mabataro, na nĩ aamarutaga ũhoro wa Jehova na Watho wake. Nĩ aathiaga hamwe na famĩlĩ yake gũthathaiya thunagogi-inĩ, na ningĩ nĩ maathiaga Jerusalemu o mwaka nĩ ũndũ wa Pasaka.

Jesu arĩ na mĩaka 12, famĩlĩ yao nĩ yathiire Jerusalemu o ta ũrĩa maamenyerete gwĩka. Itũũra rĩu rĩarĩ na andũ aingĩ mũno arĩa maathiĩte gũkũngũĩra Pasaka. Thutha ũcio, Jusufu na Mariamu nĩ maambĩrĩirie kũinũka, na meeciragia atĩ Jesu aarĩ gĩkundi-inĩ kĩa andũ arĩa maarĩ nao. No rĩrĩa maamwethire harĩ andũ a famĩlĩ ciao, matiamuonire.

Nĩ maacokire Jerusalemu na magĩetha Jesu ihinda rĩa thikũ ithatũ matekũmuona. Mũthia-inĩ, magĩthiĩ hekarũ-inĩ. Maakorire Jesu kũu aikarĩte thĩ gatagatĩ-inĩ ka arutani, akĩmathikĩrĩria na kinyi na akĩmoragia ciũria. Arutani acio nĩ maakenetio nĩ Jesu mũno nginya makambĩrĩria kũmũũria ciũria, na nĩ maagegagio nĩ macokio make. Nĩ moonaga atĩ nĩ aataũkagĩrũo nĩ Watho wa Jehova.

Jusufu na Mariamu maarĩ na kĩeha mũno. Mariamu aaugire ũũ: ‘Mũrũ wakwa, tũgũcarĩtie kũndũ guothe! Ũrarĩ kũ?’ Nake Jesu akĩmeera: ‘Kaĩ mũtekũmenyaga atĩ no mũhaka ngorũo ndĩ nyũmba-inĩ ya Baba?’

Jesu agĩcoka akĩinũka na aciari ake kwao mũciĩ Nazarethi. Jusufu nĩ aarutire Jesu wĩra wa mbaũ. Ũgwĩciria Jesu aarĩ mũndũ wa mũthemba ũrĩkũ arĩ mũnini? O ũrĩa Jesu aakũraga, noguo aathiaga akĩgĩaga na ũũgĩ na agetĩkĩrĩka nĩ Ngai o na andũ.