Caria Ũtongoria wa Ngai Ũgĩe na Gĩkeno Kĩhiko-inĩ

Jehovaa Ngai nĩwe wambĩrĩirie kĩhiko kĩa mbere. Bibilia ĩtwĩraga atĩ ombire mũtumia wa mbere “agĩcoka akĩmũtwara kwĩ mũndũ ũcio.” Adamu aakenire mũno nginya akiuga atĩrĩrĩ: “Rĩu kaĩ ũyũ nĩwe ihĩndĩ rĩmwe riumĩte mahĩndĩ-inĩ makwa, o na nyama yumĩte nyama-inĩ ya mwĩrĩ wakwa-ĩ!” (Kĩambĩrĩria 2:​22, 23) Jehova o na rĩu no endaga arĩa mahikanĩtie makorũo na gĩkeno.

Mwahikania, mwahota gwĩciria atĩ mũgũtũũra o na gĩkeno tu. No ũrĩa kũrĩ nĩ atĩ, o na mũthuri na mũtumia arĩa mendanĩte mũno no marĩgĩaga na mathĩna. (1 Akorintho 7:28) Ũngĩhũthĩra motaaro ma Bibilia marĩa marĩ kabuku-inĩ gaka, kĩhiko gĩaku na famĩlĩ yaku no ĩkorũo na gĩkeno.​—Thaburi 19:​8-11.

1 ĨTĨKĨRA ITEMI RĨRĨA JEHOVA AKŨHEETE

ŨRĨA BIBILIA YUGAGA: Mũthuri nĩwe mũtwe wa famĩlĩ.​—Aefeso 5:23.

Angĩkorũo nĩ ũhikanĩtie, Jehova erĩgagĩrĩra ũrũmbũiye mũtumia waku na njĩra ya wendo. (1 Petero 3:7) Aamũmbire nĩguo mũteithanagie na endaga ũmũrũmbũiye na njĩra ya gĩtĩo na wendo. (Kĩambĩrĩria 2:18) No mũhaka wende mũtumia waku ũũ atĩ nĩ ũrĩigaga maũndũ make mbere ya maku.​—Aefeso 5:​25-29.

Angĩkorũo ũrĩ mũhiku, Jehova erĩgagĩrĩra ũtĩage mũthuri waku na ũmũteithagĩrĩrie kũhingia itemi rĩake. (1 Akorintho 11:3; Aefeso 5:33) Nyitaga mbaru matua make na ngoro yothe na ũkanyitanagĩra nake. (Akolosai 3:18) Weka ũguo, ũrĩonekaga ũrĩ mũthaka maitho-inĩ make, na ũgakenia Jehova.​—1 Petero 3:​1-6.

ŨRĨA ŨNGĨKA:

• Ũria ũrĩa mũhikanĩtie nake ũrĩa ũngĩka nĩguo ũtuĩke mũthuri kana mũtumia mwega makĩria. Mũthikĩrĩrie wega, ũcoke wĩrutanĩrie gwĩka ũguo

• Gĩa na wetereri. Nĩ gũgũkuua ihinda mũtarĩ mũramenya ũrĩa mũngĩka nĩgetha o mũndũ akenagie ũrĩa ũngĩ

2 RŨMBŨYAGIA BIŨ ŨRĨA MŨTHURI KANA MŨTUMIA WAKU ARAIGUA

ŨRĨA BIBILIA YUGAGA: Nĩ ũrabatara kũrũmbũiya maũndũ ma ũrĩa mũhikanĩtie nake. (Afilipi 2:​3, 4) Muonage arĩ wa bata, ũkĩririkanaga atĩ Jehova endaga ndungata ciake ‘citugage andũ othe.’ (2 Timotheo 2:​24, The Holy Bible in Gĩkũyũ Language) “Kũrĩ kanua kaaragia gatecirĩtie ta gũthecanga kwa rũhiũ, no rũrĩmĩ rũa mũndũ mũũgĩ nĩrũrehage ũgima.” Nĩ ũndũ ũcio, thuuraga ciugo ciaku wega. (Thimo 12:18) Roho wa Jehova nĩ ũrĩgũteithagia kwaria na njĩra ya ũhooreri na ya wendo.​—Agalatia 5:​22, 23; Akolosai 4:6.

ŨRĨA ŨNGĨKA:

• Hoya nĩguo ũhote gũikara ũhooreire na wĩhaarĩirie kũgarũrĩra mwĩcirĩrie waku mũtanarĩrĩria maũndũ maritũ na ũrĩa mũhikanĩtie nake

• Wĩcirie wega maũndũ marĩa ũkuuga na ũrĩa ũkũmoiga

3 GĨAI NA MWĨCIRĨRIE ŨMWE

ŨRĨA BIBILIA YUGAGA: Rĩrĩa mwahikania, mũtuĩkaga “mwĩrĩ ũmwe.” (Mathayo 19:5) O na kũrĩ ũguo, mũrĩ andũ erĩ ngũrani na no mũkorũo na mawoni matiganĩte. Nĩ ũndũ ũcio, mũbatiĩ kwĩruta gũkoragwo na mwĩcirĩrie na muonere o ũmwe. (Afilipi 2:2) Ũrũmwe nĩ wa bata mũno rĩrĩa mũratua matua. Bibilia yugaga ũũ: ‘Ũndũ o wothe ũgĩthugundwo nĩ ũrũmagio nĩ kũrĩĩrũo kĩrĩra.’ (Thimo 20:18) Rekagai motaaro ma Bibilia mamũtongoragie hĩndĩ ĩrĩa mũratua matua ma bata.​—Thimo 8:​32, 33.

ŨRĨA ŨNGĨKA:

• Ĩra ũrĩa mũhikanĩtie nake ũrĩa ũraigua, to kũmũhe ũhoro na kũmwĩra mawoni maku

• Ũtanatua matua o mothe, ambaga kũũria mũthuri kana mũtumia waku