Korũo wĩ Mwĩhokeku Harĩ Ũrĩa Mũhikanĩtie Nake

Jehova athanĩte ũũ: “Mũtigekanage maũndũ ma ũrĩa-ngʼũũrũ.” (Malaki 2:16) Ũndũ ũcio nĩ wa bata tondũ kũngĩaga wĩhokeku thĩinĩ wa kĩhiko, wendo ndũngĩgaacĩra, tondũ nĩ ũbataraga kwĩhokana.

Ũmũthĩ, wĩhokeku nĩ wagĩte thĩinĩ wa kĩhiko. Nĩguo ũgitĩre kĩhiko gĩaku, nĩ harĩ maũndũ merĩ arĩ o mũhaka wĩke.

1 REKE KĨHIKO GĨAKU GĨKORŨO NĨGUO ŨNDŨ ŨRĨA WA BATA MŨNO

ŨRĨA BIBILIA YUGAGA: “Mũhotage gũkũũrana maũndũ mũgĩthuraga marĩa maagĩrĩire kũrĩ marĩa mangĩ.” (Afilipi 1:10) Kĩhiko gĩaku nĩ kĩndũ kĩmwe kĩa maũndũ marĩa ma bata mũno ũtũũro-inĩ waku. Kwoguo nĩ kĩbataire kũigwo mbere.

Jehova endaga ũrũmbũyagie ũrĩa mũhikanĩtie nake na ‘mũtũũranie nake na gĩkeno.’ (Kohelethu 9:9) Onanĩtie wega atĩ ndangĩenda ũtiganĩrie ũrĩa mũhikanĩtie nake, no endaga inyuerĩ mũcarie ũrĩa mũngĩhota gũkenia mũndũ na ũrĩa ũngĩ. (1 Akorintho 10:24) Reke ũrĩa mũhikanĩtie nake aiguage atĩ nĩ wa bata na nĩ aheetwo gĩtĩo.

ŨRĨA ŨNGĨKA:

• Tigagĩrĩrai atĩ nĩ mwahũthĩra mahinda hamwe, na ũkamũthikagĩrĩria ũkindĩirie

• Wĩciragie ũhoro wa “ithuĩ” handũ ha “niĩ”

2 GITAGĨRA NGORO YAKU

ŨRĨA BIBILIA YUGAGA: “Mũndũ o wothe ũngĩrora mũndũ-wa-nja na amwĩrirĩrie, nĩarĩkĩtie gũtharia nake ngoro-inĩ yake.” (Mathayo 5:28) Gũthiĩ na mbere gwĩciria maũndũ ma waganu nĩ kwaga wĩhokeku harĩ ũrĩa mũhikanĩtie nake.

Jehova oigaga atĩ nĩ wagĩrĩire ‘kũgitagĩra ngoro’ yaku. (Thimo 4:23; Jeremia 17:9) Nĩguo wĩke ũguo, no mũhaka ũgitĩre maitho maku. (Mathayo 5:​29, 30) Rũmĩrĩra kĩonereria kĩa Ayubu, ũrĩa warĩkanĩire na maitho make atĩ, ndakerorera mũirĩtu na njĩra ya kũmwĩrirĩria. (Ayubu 31:1) Tua itua atĩ ndũkerorera mbica kana maũndũ ma ũũra thoni. Ningĩ tigĩrĩra atĩ nĩ ũrethema gũtuma ndũgũ ĩtagĩrĩire na mũndũ ũtarĩ mũthuri kana mũtumia waku.

ŨRĨA ŨNGĨKA:

• Reke andũ othe mamenyage atĩ nĩ wendete ũrĩa mũhikanĩtie nake biũ

• Wĩcirie ũrĩa mũthuri kana mũtumia waku angĩigua, na ũniine na ihenya ndũgũ o yothe ĩrĩa ĩngĩtũma aigue ũũru