Ũrĩa Mũngĩniina Mathĩna

Wona mwaingĩra thĩinĩ wa kĩhiko, mathĩna matiganĩte nĩ mariumagĩra. Mathĩna macio no moimane na ngũrani mwĩcirĩrie-inĩ wanyu, ũrĩa mũiguaga, na ũrĩa mũhiũranagia na maũndũ ũtũũro-inĩ. O na kana no moimane na maũndũ marĩ nja ya famĩlĩ, na maũndũ materĩgĩrĩirũo.

No twĩcirie kweherera mathĩna, no Bibilia ĩtũtaaraga tũhiũranie namo. (Mathayo 5:​23, 24) Mwahũthĩra motaaro ma Bibilia nĩ mũkuona kĩhonia kĩega kĩa mathĩna manyu.

1 ARĨRĨRIAI THĨNA ŨCIO

ŨRĨA BIBILIA YUGAGA: Nĩ kũrĩ “hĩndĩ ya kwaria.” (Kohelethu 3:​1, 7) Tigĩrĩrai atĩ nĩ mwahũthĩra mahinda kwarĩrĩria thĩna ũcio. Reke ũrĩa mũhikanĩtie nake amenye wega ũrĩa ũraigua kwerekera thĩna ũcio. Hingo ciothe “mwaranagĩrie ũhoro wa ma” na ũrĩa mũhikanĩtie nake. (Aefeso 4:25) O na hĩndĩ ĩrĩa ũraigua ũcinĩtwo nĩ marakara, geria kwĩgirĩrĩria. Gũcokia na ũhooreri no gũteithie ndeereti njega ndĩgatuĩke haaro.​—Thimo 15:4; 26:20.

O na akorũo ndũretĩkania na ũrĩa mũthuri kana mũtumia waku aroiga, ikara ũhooreire, na ndũkariganĩrũo kũmuonia wendo na gĩtĩo. (Akolosai 4:6) Geriai gũthondeka maũndũ na ihenya o ũrĩa kwahoteka na mũtigatige kwaranĩria. ​—Aefeso 4:26.

ŨRĨA ŨNGĨKA:

• Etha mahinda marĩa magĩrĩire ma kwarĩrĩria thĩna ũcio

• Rĩakinya ihinda rĩaku rĩa gũthikĩrĩria, wĩtheme gũtinia ũrĩa ũngĩ na mĩario. Ihinda rĩaku rĩa kwaria nĩ rĩgũkinya

2 THIKĨRĨRIA NA WĨĨKĨRE IRATŨ-INĨ CIAKE

ŨRĨA BIBILIA YUGAGA: ‘Mũndũ nĩ endage ũrĩa ũngĩ na ngoro ya uuma-andũ; na ha ũhoro wa gĩtĩo, mũndũ nĩendage ũrĩa ũngĩ atĩwo mbere yake.’ (Aroma 12:10) Njĩra ĩrĩa ũrathikĩrĩria nayo nĩ ya bata mũno. Geria gũtaũkĩrũo nĩ mawoni ma ũrĩa mũhikanĩtie nake, “mũiguanagĩre tha,” na “mũikarage mwĩnyihĩtie.” (1 Petero 3:8; Jakubu 1:19) Ndũgetue atĩ nĩ ũrathikĩrĩria. Kũngĩhoteka, tigana na ũrĩa ũreka wambe ũthikĩrĩrie mũthuri kana mũtumia waku, kana ũmũũrie mwarĩrĩrie ũndũ ũcio thutha-inĩ. Ũngĩona ũrĩa mũhikanĩtie nake arĩ wa gũgũteithia kũhiũrania na thĩna ũcio handũ ha kũmuona arĩ wa kuongerera thĩna-rĩ, ‘ndũkũhiũha kũrakara.’​—Kohelethu 7:9.

ŨRĨA ŨNGĨKA:

• Thiĩ na mbere gũthikĩrĩria wĩhaarĩirie gũcenjia mawoni maku o na angĩkorũo ũndũ ũrĩa aroiga ndũragũkenia

• Geria gũtaũkĩrũo nĩ kĩrĩa aroiga, to ciugo tu. Geria kũrora ũthiũ wake na ũthikĩrĩrie mũgambo wake

3 ĨKAI KŨRINGANA NA ŨRĨA MWATUA

ŨRĨA BIBILIA YUGAGA: “Wĩra o wothe mũritũ gũtirĩ ũtarĩ na uumithio, ĩndĩ mũhũũro wa kanua ũciaraga wagi mũtheri.” (Thimo 14:23) Kũiguithanĩria tu ũhoro wa kĩhonia gĩa thĩna ti kũiganu. Nĩ mũrabatara gwĩka kũringana na ũguo mwatua. Ũndũ ũcio no ũbatare wĩra na kĩyo kĩnene, no gwĩka ũguo nĩ kũrĩ moimĩrĩro mega. (Thimo 10:4) Mũngĩrutithania wĩra mũrĩ hamwe, ‘nĩ mũrĩonaga uumithio mwega wa gwĩtungumania kwanyu.’​—Kohelethu 4:9.

ŨRĨA ŨNGĨKA:

• Tuai nĩ makinya marĩkũ o ũmwe wanyu ekuoya nĩguo mũniine mathĩna manyu

• Ikaragai mũkĩroraga makinya marĩa mũkinyũkĩtie