Jesu Aaciarirũo Rĩ Na Aaciarĩirũo Kũ?

Mũtongoria wa Roma wĩtagwo Kaisari Augusto nĩ athana atĩ no mũhaka mũndũ wothe eyandĩkithie. Kwoguo Jusufu na Mariamu no mũhaka mathiĩ kũrĩa Jusufu aaciarĩirũo, taũni-inĩ ya Bethilehemu mũhuro wa Jerusalemu.

Bethilehemu kũrĩ na andũ aingĩ mũno mokĩte kwĩyandĩkithia. Kũrĩa tu Jusufu na Mariamu mangĩona gwa gũikara nĩ kiugũ, kũrĩa ndigiri na nyamũ ingĩ cikaraga. Jesu agaciarĩrũo kuo. Mariamu akamũthaya na itama na akamũkomia mũharatĩ-inĩ harĩa nyamũ irĩagĩra.

No mũhaka Ngai akorũo nĩwe ũtũmĩte Kaisari Augusto arute watho ũyũ wa kwĩyandĩkithia. Nĩkĩ? Tondũ nĩguo ũtũmĩte Jesu aciarĩrũo Bethilehemu, taũni ya Mũthamaki Daudi gukawe. Maandĩko nĩ maarathĩte mĩaka mĩingĩ mbere atĩ taũni ĩno nĩyo Mũthamaki ũrĩa weranĩirũo angĩgaaciarĩrũo.​—Mika 5:2.

Ũyũ nĩ ũtukũ wa bata mũno! Gĩkundi kĩa arĩithi kĩrĩ kũndũ nja gĩkĩrĩithia, gĩkaarĩrũo nĩ ũtheri mũingĩ. Ũtheri ũcio nĩ riri wa Jehova! Ũmwe wa araika a Ngai akeera arĩithi acio ũũ: “Mũtigetigĩre, tondũ rĩrĩ, ndoka kũmũmenyithia ũhoro mwega wa gĩkeno kĩnene kĩrĩa andũ othe mekũgĩa nakĩo. Nĩ gũkorũo ũmũthĩ nĩ mũciarĩirũo mũhonokia itũũra-inĩ rĩa Daudi, nĩwe Kristo, ũrĩa Mwathani. Na ũndũ ũrĩa ũgũtũma mũmũmenye nĩ ũyũ: Nĩ mũgũkora gakenge gathaĩtwo na tũtaama na gagakomio mũharatĩ-inĩ.” O rĩmwe makoimĩrĩrũo nĩ araika angĩ aingĩ makoiga ũũ: “Goocai Ngai ũrĩa ũrĩ igũrũ, na andũ arĩa etĩkĩrĩte thĩinĩ wa thĩ marogĩa na thayũ.”​—Luka 2:​10-14.

Araika mathiĩ, arĩithi makerana atĩrĩ: “Nĩ tũthiĩi Bethilehemu o rĩu, tũkeyonere ũrĩa gwĩkĩkĩte, ũguo Jehova atũmenyithia.” (Luka 2:15) Magathiĩ mahiũhĩte na magakora Jesu aciarĩirũo o harĩa mũraika ekũmeerĩte. Arĩithi mataarĩria maũndũ marĩa mũraika ekũmeerĩte, arĩa othe maigua ũhoro ũcio makagega mũno. Nake Mariamu agakenio nĩ maũndũ macio mũno na agecũrania ũhoro wamo.

Andũ aingĩ ũmũthĩ metĩkĩtie atĩ Jesu aaciarirũo Dicemba 25. No gĩcigo-inĩ kĩa Bethilehemu, Dicemba gũkoragwo na mbura na heho. O na rĩmwe mbarabu nĩ ĩgũaga. Ihinda-inĩ ta rĩu nĩ hinya arĩithi gũkorũo nja ũtukũ na ndũũru ciao. Ningĩ ũngĩarĩ ũndũ mũritũ harĩ mũtongoria ũcio wa Roma gwatha andũ meehaarĩirie kũregana na wathani wake mathiĩ rũgendo rwa thikũ nyingĩ hĩndĩ ya heho makeyandĩkithie. No kũhoteke Jesu aaciarirũo mweri-inĩ wa Oktomba.