Kũhunjia Thĩinĩ Wa Galili Na Kũmenyeria Atũmwo

Jesu akoretwo akĩhunjia na kĩyo ihinda ta rĩa mĩaka ĩĩrĩ. Hihi rĩu nĩ ekũnyihanyihia kĩyo kĩu? Handũ ha ũguo, Jesu akandandũra wĩra wake wa kũhunjia na njĩra ya ‘gũthiĩ mataũni-inĩ na matũũra-inĩ mothe ma Galili, akĩrutanaga thĩinĩ wa thunagogi na akĩhunjagia ũhoro ũrĩa mwega wa Ũthamaki na akĩhonagia andũ mĩrimũ ya mĩthemba yothe.’ (Mathayo 9:35) Maũndũ marĩa areyonera magatũma one bata wa kwandandũra wĩra wa kũhunjia. No hihi ekũhingia ũndũ ũcio atĩa?

O agĩthiaga, Jesu akona atĩ andũ nĩ marabatara kũhonio kĩĩroho na kũũmĩrĩrio. Matariĩ o ta ngʼondu itarĩ na mũrĩithi, irutĩtwo rũa na igatiganĩrio. Akamaiguĩra tha na akeera arutwo ake ũũ: “Magetha nĩ maingĩ, no aruti wĩra nĩ anini. Kwoguo-rĩ, hoyai Mwene magetha atũme aruti wĩra magetha-inĩ make.”​—Mathayo 9:​37, 38.

Jesu nĩ oĩ ũndũ ũrĩa ũgũteithia. Ageeta atũmwo arĩa 12 na akamagayania erĩ erĩ, magakorũo marĩ ngurubu ithathatũ cia ahunjia. Agacoka akamahe motaaro maya: “Mũtigathiĩ kũrĩ andũ a ndũrĩrĩ, na mũtigatonye taũni-inĩ o yothe ya Asamaria, ithenya rĩa ũguo, thiĩi mũgacarie ngʼondu iria ciũrĩte cia nyũmba ya Isiraeli. Na mũgĩthiĩ-rĩ, hunjiai mũkiugaga ũũ: ‘Ũthamaki wa igũrũ nĩ ũkuhĩrĩirie.’”​—Mathayo 10:​5-7.

Ũthamaki ũrĩa magĩrĩire kũhunjia, nĩ ũrĩa Jesu aagwetire ihoya-inĩ rĩa Mwathani. ‘Ũthamaki nĩ ũkuhĩrĩirie’ na njĩra ya atĩ Mũthamaki ũrĩa Ngai athurĩte, nĩwe Jesu Kristo nĩ arĩkĩtie gũũka. No nĩ ũndũ ũrĩkũ ũkuonania kũna atĩ arutwo ake marũgamĩrĩire Ũthamaki ũcio? Jesu akamahe ũhoti wa kũhonia arĩa arwaru o na kũriũkia arĩa akuũ mategwĩtia marĩhi. No hihi atũmwo acio mekũhota atĩa kũhingia mabataro mao, ta kuona irio cia o mũthenya?

Jesu akeera arutwo ake atĩ matigecarĩrie indo cia gũkuua nĩ ũndũ wa rũgendo rũu rwa kũhunjia. Matiagĩrĩire gũkuua thahabu, betha, kana gĩcango mondo-inĩ ciao. O na matiagĩrĩire gũkuua mondo cia irio kana nguo cia gũcenjia kana iratũ. Nĩkĩ hihi? Jesu akameera ũũ: “Mũruti wĩra nĩ agĩrĩire kũheo irio.” (Mathayo 10:10) Andũ arĩa mekũhunjĩria na makenio nĩ ũhoro wao nĩ mekũrũmbũiya mabataro ma arutwo acio. Jesu akoiga: “Rĩrĩa mwatonya mũciĩ mũna, ikaragai kuo o nginya rĩrĩa mũkoima itũũra rĩu.”​—Mariko 6:10.

Jesu ningĩ akamahe motaaro megiĩ ũrĩa magĩrĩirũo kwambĩrĩria kwaranĩria na andũ ndũmĩrĩri ya Ũthamaki, akameera: “Mwaingĩra nyũmba, geithiai ene kuo. Angĩkorũo nyũmba ĩyo nĩ yagĩrĩire, rekei thayũ wanyu ũgĩe harĩ yo, no angĩkorũo ndĩagĩrĩire, rekei thayũ wanyu ũmũcokerere. Na rĩrĩa mũndũ o wothe aaga kũmũnyita ũgeni kana kũmũthikĩrĩria, mũkiuma gwake kana itũũra-inĩ rĩu, ringithiai magũrũ manyu thĩ rũkũngũ rũitĩke.”​—Mathayo 10:​12-14.

No gũthiĩ ũndũ itũũra rĩothe kana gĩcagi kĩrege ndũmĩrĩri yao. Ũndũ ũcio ũngĩkorũo na moimĩrĩro marĩkũ harĩ kũndũ ta kũu? Jesu akaguũria atĩ no gũtuĩrũo ituĩro iritũ mũno. Agataarĩria ũũ: “Matũũra ma Sodomu na Gomora nĩ makaiguĩrũo tha Mũthenya wa Cira gũkĩra itũũra rĩu.”​—Mathayo 10:15.