Jesu Gũtũma Arutwo 70 Makahunjie

Mwaka wa 32 rĩu ũkiriĩ gũthira, na nĩ mĩaka ta ĩtatũ kuuma Jesu abatithio. Ica ikuhĩ, we na arutwo ake mararĩ Gĩathĩ-inĩ gĩa Ithũnũ thĩinĩ wa Jerusalemu. No kũhoteke marĩ o kũu gũkuhĩ na Jerusalemu. (Luka 10:38; Johana 11:1) Jesu akahũthĩra ihinda rĩrĩa inene rĩa mĩeri ĩtandatũ ĩrĩa ĩtigarĩte ya ũtungata wake thĩinĩ wa Judea, kana mũrĩmo ũcio ũngĩ wa Rũĩ rwa Jorodani gĩcigo-inĩ kĩa Perea. Gĩcigo kĩu o nakĩo nĩ kĩrabatara kũhunjio.

Hau kabere thutha wa Pasaka ya mwaka wa 30, Jesu aahũthĩrire mĩeri ĩigana ũna kũhunjia thĩinĩ wa Judea na gũthiĩ atuĩkanĩirie Samaria. Thutha ũcio ihinda-inĩ rĩa Pasaka ya mwaka wa 31, Ayahudi thĩinĩ wa Jerusalemu makĩgeria kũmũũraga. Mwaka ũmwe na nuthu ũrĩa warũmĩrĩire, Jesu aarutanire makĩria mwena wa rũgongo, thĩinĩ wa Galili. Ihinda-inĩ rĩu, andũ aingĩ magĩtuĩka arũmĩrĩri ake. Thĩinĩ wa Galili nĩ aamenyeririe atũmwo ake agĩcoka akĩmatũma mathiĩ makahunjie akĩmeera: “Hunjiai mũkiugaga ũũ: ‘Ũthamaki wa igũrũ nĩ ũkuhĩrĩirie.’” (Mathayo 10:​5-7) Rĩu akabanga kambĩini ya kũhunjia thĩinĩ wa Judea.

Nĩguo wĩra ũcio wambĩrĩrie, Jesu agathuura arutwo 70 na akamatũma marĩ erĩ erĩ. Kwoguo gũkagĩa na ikundi 35 cia ahunjia a Ũthamaki gĩcigo-inĩ kĩu kĩrĩa kĩrĩ na ‘magetha maingĩ, no aruti wĩra nĩ anini.’ (Luka 10:2) Mabatiĩ gũthiĩ icigo-inĩ iria Jesu hihi egũcoka athiĩ. Ningĩ acio 70 nĩ magĩrĩirũo kũhonia arĩa arwaru na mahunjie ndũmĩrĩri ĩrĩa Jesu akoretwo akĩhunjia.

Arutwo acio matiagĩrĩirũo kũhunjia mũno thĩinĩ wa thunagogi. Jesu akameera makahunjĩrie andũ mĩciĩ-inĩ yao. Akamataara akameera: “Kũrĩa guothe mũkũingĩra thĩinĩ wa nyũmba, ambai muuge: ‘Nyũmba ĩno ĩrogĩa na thayũ.’ Na angĩkorũo kũu nĩ kũrĩ na mũrata wa thayũ, thayũ wanyu nĩ ũkũgĩa hamwe nake.” Hihi magĩrĩirũo kũheana ndũmĩrĩri ĩrĩkũ? Jesu akoiga: “Mũmeere: ‘Ũthamaki wa Ngai nĩ ũmũkuhĩrĩirie.’”​—Luka 10:​5-9.

Motaaro macio Jesu ahe arutwo acio 70 no ta marĩa aaheanire rĩrĩa aatũmire atũmwo ake 12 ta mwaka ũmwe mũthiru. Akameera atĩ ti andũ othe mekũmamũkĩra na njĩra njega. O na kũrĩ ũguo, wĩra wao nĩ ũkũhaarĩria arĩa marĩ na ngoro njega nĩgetha rĩrĩa Jesu arĩũka thutha wa kahinda kanini, andũ aingĩ makorũo mehaarĩirie gũthikĩrĩria Mwathani na kwĩruta kuuma kũrĩ we.

Thutha wa ihinda, ikundi icio 35 cia ahunjia a Ũthamaki igacoka kũrĩ Jesu. Makamwĩra ũũ makenete: “Mwathani, o na ndaimono nĩ iratwathĩkĩra twaciatha na rĩĩtwa rĩaku.” Ũhoro ũcio mwega ũgakenia Jesu, ũgatũma oige: “Nĩ ndona Shaitani arĩkĩtie kũharũrũka ta rũheni kuuma igũrũ. Atĩrĩrĩ, inyuĩ nĩ ndĩmũheete wathani wa gũkinyangĩrĩria nyoka na tũngʼaurũ.”​—Luka 10:​17-19.

Nĩ ũndũ ũcio Jesu akomĩrĩria arutwo ake atĩ nĩ marĩhotaga gũtooria maũndũ maritũ, makinyangagĩrĩrie na njĩra ya mũhaano nyoka na tũngʼaurũ. Makĩria ma ũguo, no makorũo na ma atĩ Shaitani nĩ akaaharũrũkio kuuma igũrũ ihinda rĩrĩa rĩũkĩte. Jesu ningĩ agateithia acio 70 kuona ũndũ ũrĩa wa bata kũna nĩ ũrĩkũ. Akameera ũũ: “Mũtigakene tondũ maroho nĩ maramwathĩkĩra, no kenai nĩ gũkorũo marĩĩtwa manyu nĩ mandĩkĩtwo kũrĩa igũrũ.”​—Luka 10:20.

Jesu agakena mũno na akagooca Ithe arĩ mbere ya andũ tondũ wa kũhũthĩra andũ acio a kĩrathi gĩa thĩ na njĩra nene ũguo. Akahũgũkĩra arutwo ake akameera: “Gũkena-rĩ, nĩ maitho marĩa marona maũndũ marĩa inyuĩ mũrona. Nĩ ũndũ ngũmwĩra atĩrĩ, anabii aingĩ na athamaki nĩ meeriragĩria kuona maũndũ marĩa inyuĩ mũrona no matiamonire, na kũigua maũndũ marĩa mũraigua no matiamaiguire.”​—Luka 10:​23, 24.