Kũhũthĩra Ũũgĩ Kũbanga Maũndũ Kabere

Ngerekano ĩrĩa Jesu akorũo aheana ya mwana ũrĩa worĩte, nĩ ĩbatiĩ kuonia etia a mbia cia igooti, andĩki-Watho, na Afarisai arĩa maramũthikĩrĩria atĩ Ngai akoragwo ehaarĩirie kuohera ehia arĩa merirĩte. (Luka 15:​1-7, 11) Jesu rĩu akaria na arutwo ake. Riita rĩrĩ akahũthĩra ngerekano ĩngĩ, ya mũndũ mũtongu wamenyire atĩ mũramati wa nyũmba yake nĩ ekĩte maũndũ matarĩ mega.

Jesu akoiga atĩ mũramati ũcio aathitangĩtwo atĩ nĩ ahũthĩrĩte ũũru indo cia mwathi wake. Kwoguo mwathi ũcio akoiga atĩ mũramati ũcio nĩ ekũingatwo. Mũramati ũcio akeyũria: “Ĩ ngwĩka atĩa rĩu kuona atĩ mwathi wakwa nĩ ekũndunya ũramati? Ndirĩ na hinya wa kũrĩma, na nĩ ngũigua thoni kũhoyahoya.” Nĩguo akaahota kũhiũrania na maũndũ, akoiga: “Nĩ ndamenya ũrĩa ngwĩka, nĩguo rĩrĩa ndĩrĩehererio wĩra wa ũramati, andũ makanyamũkĩra kwao mĩciĩ.” O rĩo ageta arĩa marĩ na thiirĩ, akamoria: “Wee ũrĩ na thiirĩ ũigana atĩa wa mwathi wakwa?”​—Luka 16:​3-5.

Mũndũ wa mbere akoiga: “Ithimi igana rĩmwe cia maguta ma mĩtamaiyũ.” No kũhoteke aarĩ na mũgũnda wa mĩtamaiyũ kana eendagia maguta ma mĩtamaiyũ. Mũramati akamwĩra: “Ke marũa maku ma thiirĩ na ũikare thĩ wandĩke narua mĩrongo ĩtano.”​—Luka 16:6.

Mũramati ũcio akoria mũndũ ũngĩ: “Wee ũrĩ na thiirĩ ũigana atĩa?” Nake akoiga: “Ithimi nene igana rĩmwe cia ngano.” Icio nĩ ta lita 22,000. Mũramati akamwĩra: “Ke marũa maku ma thiirĩ wandĩke mĩrongo ĩnana.” Kwoguo akanyihia thiirĩ ũcio na gĩcunjĩ kĩa 20 harĩ 100.​—Luka 16:7.

Mũramati ũcio nowe ũrũgamĩrĩire maũndũ ma mbeca ma mwathi wake, kwoguo arĩ na ũhoti wa kũnyihĩria arĩa angĩ thiirĩ ũrĩa marĩ naguo wa mwathi wake. Agĩka ũguo, mũramati ũcio arathondeka ũrata na andũ arĩa mangĩmũteithia rĩrĩa agaatunywo wĩra.

Thutha wa ihinda mwathi wake akamenya ũrĩa gwathiĩ. O na gũtuĩka ũndũ ũcio nĩ hathara harĩ we, agakenio nĩ mũramati ũcio na akamũgathĩrĩria tondũ ‘o na gũtuĩka ti mũthingu,’ nĩ ‘ahũthĩrĩte ũũgĩ.’ Jesu akongerera akoiga: “Ciana cia mũtabarĩre ũyũ wa maũndũ nĩ ihũthagĩra ũũgĩ harĩ andũ a mahinda ma cio gũkĩra ciana cia ũtheri.”​—Luka 16:8.

Jesu ti kũgathĩrĩria aragathĩrĩria ciĩko cia mũramati ũcio, kana kuonania atĩ nĩ wega kũhũthĩra waara biacara-inĩ. Nĩ ũndũ ũrĩkũ arakĩenda kũrutana? Akeera arutwo ake: “Mwĩthondekerei arata kũgerera ũtonga ũrĩa ũtarĩ wa ũthingu, nĩguo hĩndĩ ĩrĩa ũgaathira, makaamwamũkĩra thĩinĩ wa ciikaro cia tene na tene.” (Luka 16:9) Ciugo icio iratũruta bata wa mũndũ kuona kabere na kũhũthĩra ũũgĩ. Ndungata cia Ngai, na nĩcio “ciana cia ũtheri,” ibatiĩ kũhũthĩra indo ciao na njĩra ya ũũgĩ, ikĩririkanaga ihinda rĩtarĩ mũthia rĩrĩa rĩũkĩte.

No Jehova Ngai tu na Mũrũ wake mangĩamũkĩra mũndũ Ũthamaki-inĩ wa igũrũ kana Paradiso gũkũ thĩ rungu rwa Ũthamaki ũcio. Twagĩrĩirũo kwĩrutanĩria gũthondeka ũrata hamwe nao na njĩra ya kũhũthĩra indo iria tũrĩ nacio kũnyita mbaru maũndũ ma Ũthamaki. Tweka ũguo, nĩ tũrĩkoragwo na ma atĩ nĩ tũkaaheo muoyo wa tene na tene rĩrĩa thahabu, betha, na indo ingĩ cia kĩĩmwĩrĩ igaathira.

Jesu ningĩ akoiga atĩ arĩa ehokeku harĩ kũhũthĩra na kũmenyerera indo iria marĩ nacio kana ũtonga no makorũo marĩ ehokeku harĩ kũmenyerera maũndũ ma bata makĩria. Akoiga: “Nĩ ũndũ ũcio, angĩkorũo mũtiĩyonanĩtie atĩ mũrĩ ehokeku ũhoro-inĩ wa ũtonga ũrĩa ũtarĩ wa ũthingu-rĩ, nũ ũngĩmwĩhokera ũtonga ũrĩa wa ma [ta maũndũ ma Ũthamaki]?”​—Luka 16:11.

Jesu aronia arutwo ake atĩ nĩguo makaamũkĩrũo ‘thĩinĩ wa ciikaro cia tene na tene,’ maũndũ maingĩ nĩ makeerĩgĩrĩrũo kuuma kũrĩ o. Mũndũ ndangĩkorũo arĩ ndungata ya ma ya Ngai o agĩtungatagĩra ũtonga ũtarĩ wa ũthingu wa indo cia kĩĩmwĩrĩ. Jesu akarĩkĩrĩria na kuuga: “Gũtirĩ ndungata ĩngĩtungatĩra athani erĩ, nĩ gũkorũo ĩgũthũũra ũmwe na yende ũcio ũngĩ, kana ĩĩgwatanie na ũmwe na ĩnyarare ũcio ũngĩ. Mũtingĩtungatĩra Ngai na mũtungatĩre Ũtonga.”​—Luka 16:​9, 13.