Njĩra cia Kwandandũra Ũtungata Waku

RĨRĨA ihinda rĩakinyire rĩa Jesu gũtũma arutwo ake marĩ ahunjia a Ũthamaki, aameerire ũũ: “Magetha nĩ maingĩ, no aruti wĩra nĩ anini.” Kwarĩ na wĩra mũingĩ wabataraga kũrutwo, na nĩkĩo aacokire akĩmeera: “Hoyai Mwene magetha atũme aruti wĩra magetha-inĩ make.” (Mat. 9:37, 38) Jesu nĩ aataarĩirie arutwo ake ũrĩa maagĩrĩirũo kũhingia ũtungata wao. Ciugo ici ciake cioonanirie atĩ maagĩrĩirũo kũruta wĩra ũcio na mĩtũkĩ: “Mũrũ wa mũndũ agaakinya mũtarĩkĩtie gũthiũrũrũka matũũra-inĩ mothe ma Isiraeli.”​—Mat. 10:23.

² O na mahinda-inĩ maya kũrĩ na wĩra mũingĩ wa kũhunjia ũrabatara kũrutwo. Ũhoro ũyũ mwega wa Ũthamaki nĩ ũrabatara kũhunjio mbere ya mũico ũkinyĩte, na ihinda rĩrĩa itigaru nĩ inini mũno! (Mar. 13:10) O ta Jesu na arutwo ake, tũrĩ na wĩra wa kũhunjia thĩ yothe, ĩndĩ witũ nĩ mũingĩ gũkĩra ũrĩa maarĩ naguo. Tũrĩ anini tũkĩringithanio na andũ bilioni nyingĩ arĩa marĩ thĩinĩ wa thĩ, no tũrĩ na ma atĩ Jehova nĩ egũtũteithia. Ũhoro ũrĩa mwega wa Ũthamaki nĩ ũkũhunjio thĩinĩ wa thĩ yothe, na rĩrĩa ihinda rĩrĩa rĩagĩrĩire rĩa Jehova rĩgaakinya, mũico nĩ ũgooka. Hihi nĩ tũkũiga Ũthamaki wa Ngai mbere ũtũũro-inĩ witũ nĩguo tũhote kũhingia ũtungata witũ biũ? Nĩguo twĩke ũguo-rĩ, nĩ mĩoroto ĩrĩkũ ya kĩĩroho tũngĩthingata?

³ Jesu ooigire ũũ akĩenda kuonania ũndũ ũrĩa Jehova erĩgagĩrĩra kuuma kũrĩ ndungata ciake iria imwĩyamũrĩire: “No mũhaka wende Jehova Ngai waku na ngoro yaku yothe na muoyo waku wothe na meciria maku mothe na hinya waku wothe.” (Mar. 12:30) Jehova endaga tũmũtungatĩre na ngoro itũ yothe. Ũguo nĩ kuuga tuonanie wĩrutĩri witũ na wĩyamũrĩri witũ wa ngoro yothe na njĩra ya gwĩka ũrĩa wothe tũngĩhota ũtungata-inĩ wa Jehova. (2 Tim. 2:15) O ũmwe witũ arĩ na mĩeke ya gwĩka ũguo, kũringana na maũndũ make na ũhoti wake. Ta wĩcirie mĩeke ĩmwe, na wone nĩ mĩoroto ĩrĩkũ ya kĩĩroho ũngĩthingata nĩguo ũhingie ũtungata waku.

GŨTUĨKA MŨHUNJIA KĨŨNGANO-INĨ

⁴ Arĩa othe metĩkagĩra ũhoro ũrĩa wa ma nĩ makoragwo na mweke wa kũhunjia ũhoro ũrĩa mwega. Ũcio nĩguo wĩra ũrĩa mũnene Jesu aaheire arutwo ake. (Mat. 24:14; 28:19, 20) Mũrutwo wa Jesu Kristo ambagĩrĩria kũhunjĩria andũ arĩa angĩ ũhoro ũrĩa mwega aũmenya o ũguo. Ũguo nĩguo Andrea, Filipu, Korinelio, na andũ angĩ meekire. (Joh. 1:40, 41, 43-45; Atũm. 10:1, 2, 24; 16:14, 15, 25-34) Hihi ũguo nĩ kuuga atĩ mũndũ no ahunjĩrie andũ arĩa angĩ ũhoro ũrĩa mwega o na mbere ya kũbatithio? Ĩĩ! Mũndũ angĩagĩrĩra gũtuĩka mũhunjia ũtarĩ mũbatithie thĩinĩ wa kĩũngano, nĩ agĩaga na mweke wa kũhunjia nyũmba kwa nyũmba. Ningĩ, kũringana na ũhoti na maũndũ make no anyitanĩre harĩ kũhunjia na njĩra ingĩ itiganĩte.

⁵ Thutha wa kũbatithio, mũhunjia nĩ athiaga na mbere gwĩka ũrĩa wothe angĩhota nĩguo ateithie andũ arĩa angĩ merute ũhoro wa ma. Mũndũ o wothe nĩ arĩ na mweke wa gũkorũo na itemi wĩra-inĩ wa kũhunjia. Nĩ kĩrathimo gũkorũo na itemi harĩ gũtwarithia na mbere maũndũ ma Ũthamaki wa Ngai. Mũndũ o wothe ũngĩhota kwandandũra ũtungata wake akinyĩre mĩeke ĩngĩ ya ũtungata nĩ arĩkoragwo na gĩkeno kĩnene.

GŨTUNGATA KŨRĨA KŨRĨ NA BATA MŨNENE

⁶ No kũhoteke atĩ gĩcigo gĩa kĩũngano kĩanyu nĩ kĩhunjagio maita maingĩ na andũ aingĩ nĩ mahunjĩirio ũhoro ũrĩa mwega. Angĩkorũo nĩguo-rĩ, wahota kuona arĩ wega kwandandũra ũtungata waku na njĩra ya gũthamĩra kũrĩa kũrĩ na bata mũnene wa ahunjia. (Atũm. 16:9) Angĩkorũo ihinda-inĩ rĩrĩ nĩ ũratungata ũrĩ mũthuri wa kĩũngano kana ndungata ya kĩũngano, no kũhoteke harĩ kĩũngano kĩngĩ kĩngĩgunĩka mũno nĩ ũteithio waku. Mũrori wanyu wa mũthiũrũrũko no agũteithie kũmenya kĩũngano kĩngĩ thĩinĩ wa mũthiũrũrũko kĩrĩa ũngĩteithĩrĩria. Angĩkorũo no wende gũtungata gĩcigo-inĩ kĩngĩ kĩa bũrũri wanyu, wabici ya rũhonge no ĩkũhe ũhoro ũngĩgũteithia.

⁷ Hihi no wende gũtungata bũrũri-inĩ ũngĩ? Angĩkorũo nĩguo, no ũbatare gwĩciria mũno igũrũ rĩgiĩ ũndũ ũcio. Arĩrĩria ũndũ ũcio na athuri a kĩũngano kĩanyu. Gũthamĩra bũrũri ũngĩ no gũkũhutie na njĩra nene wee mwene o hamwe na arĩa mũngĩthama nao. (Luk. 14:28) Angĩkorũo ndũbangĩte gũthiĩ gũtungata ihinda iraya, no ũkorũo ũrĩ ũndũ wa ũũgĩ gũtungata gĩcigo kĩrĩ bũrũri-inĩ wanyu.

⁸ Mabũrũri-inĩ mamwe, ariũ a Ithe witũ arĩa marahũthĩrũo kũrũgamĩrĩra maũndũ matiikarĩte mũno ũhoro-inĩ wa ma. Nĩ ũndũ wa wĩnyihia, ariũ a Ithe witũ acio nĩ marekaga athuri arĩa marĩ na ũmenyeru arĩa mathamĩire kĩũngano-inĩ kĩao matongorie. Angĩkorũo ũrĩ mũthuri wa kĩũngano na nĩ ũreciria gũthamĩra bũrũri ta ũcio, ririkana atĩ muoroto waku ti gũthiĩ gũtungata ithenya rĩa ariũ a Ithe witũ a kũu. Handũ ha ũguo, tungata hamwe nao. Mekĩre ngoro merutanĩrie gũkinyĩra mĩeke ya ũtungata na metĩkĩre kwĩhokerũo maũndũ thĩinĩ wa kĩũngano. (1 Tim. 3:1) Gĩa na wetereri angĩkorũo maũndũ mamwe matirekwo ta ũrĩa mekagwo kwanyu. Hũthĩra ũmenyeru ũrĩa ũrĩ naguo ũrĩ mũthuri wa kĩũngano gũteithia ariũ a Ithe witũ acio. Weka ũguo, kũngĩtuĩka nĩ ũgũcoka bũrũri wanyu, athuri a kũu nĩ magaakorũo mehaarĩirie kũrũmbũiya kĩũngano.

⁹ Wabici ya rũhonge ĩtanakũhe marĩĩtwa ma ciũngano iria ũngĩteithĩrĩria, Kamĩtĩ ya Ũtungata ya Kĩũngano kĩanyu nĩ ĩkũbatara gũtũma marũa ma kuonania atĩ nĩ wagĩrĩire. Marũa macio nĩ mabataranagia o na angĩkorũo ũratungata ũrĩ mũthuri wa kĩũngano, ndungata ya kĩũngano, painia, kana mũhunjia. Kamĩtĩ ya ũtungata yagĩrĩirũo gũtũma marũa ma kuonania atĩ nĩ wagĩrĩire hamwe na marũa maku ĩmwe kwa ĩmwe kũrĩ wabici ya rũhonge ya bũrũri ũrĩa ũrenda gũthiĩ gũtungata.

KŨHUNJIA NA RŨTHIOMI RŨNGĨ

¹⁰ Nĩguo wandandũre ũtungata waku, no wone arĩ wega kwĩruta rũthiomi rũngĩ, ta rũthiomi rwa kwaria na ciĩko. Angĩkorũo ũrĩ na muoroto wa kwĩruta kũhunjia na rũthiomi rũngĩ, aria na athuri a kĩũngano o hamwe na mũrori wa mũthiũrũrũko. No magwĩkĩre ngoro na makũhe motaaro marĩa mangĩbatarania. Mĩthiũrũrũko ĩmwe nĩ ĩbangaga irathi cia kũruta ahunjia na mapainia arĩa marĩ na ũhoti ũrĩa mangĩhunjia na rũthiomi rũngĩ, harĩ na ũtongoria wa wabici ya rũhonge.

ŨTUNGATA WA ŨPAINIA

¹¹ Ahunjia othe nĩ magĩrĩirũo kũmenya maũndũ marĩa mabataranagia nĩguo mũndũ atuĩke painia wa gũteithĩrĩria, wa hĩndĩ ciothe, wa mwanya, o hamwe na mĩthemba ĩngĩ ya ũtungata wa mahinda mothe. Painia agĩrĩirũo gũkorũo arĩ Mũkristiano mũbatithie ũkoragwo arĩ kĩonereria kĩega, na maũndũ make no mamwĩtĩkĩrie kũhũthĩra mathaa marĩa matuĩtwo kũhunjia ũhoro ũrĩa mwega. Kamĩtĩ ya Ũtungata ya Kĩũngano nĩyo yamũraga mapainia a gũteithĩrĩria na a hĩndĩ ciothe, nao mapainia a mwanya mamũragwo nĩ wabici ya rũhonge.

¹² Mapainia a gũteithĩrĩria no mamũrũo matungate ihinda rĩtanyihĩire mweri ũmwe, mĩeri ĩigana ũna ĩrũmanĩrĩire, kana ihinda iraihu rĩtagwetetwo ũrĩa rĩigana, kũringana na maũndũ mao. Ahunjia aingĩ nĩ makenagĩra gũtungata marĩ mapainia a gũteithĩrĩria mahinda-inĩ ma mwanya ta hĩndĩ ya Kĩririkano, kana mweri ũrĩa marĩ na iceera rĩa mũrori wa mũthiũrũrũko. Amwe mathuuraga gũtuĩka mapainia a gũteithĩrĩria hĩndĩ ya rũtha. Ahunjia abatithie arĩa marĩ cukuru no matuĩke mapainia a gũteithĩrĩria hĩndĩ ĩrĩa mahingĩte cukuru. Ahunjia no matuĩke mapainia a gũteithĩrĩria na mathuure kũhingia mũigana ũrĩa ũnyihĩtio wa mathaa mĩeri-inĩ ya Machi na Ĩpuro na mweri wa iceera rĩa mũrori wa mũthiũrũrũko. O ũrĩa maũndũ maku mangĩkorũo matariĩ, angĩkorũo ũrĩ na mĩthiĩre mĩega, na no ũhote kũhunjia mathaa marĩa matuĩtwo, na nĩ ũrona atĩ no ũhote gũtuĩka painia wa gũteithĩrĩria mweri ũmwe kana makĩria, no ũiyũrie fomu ya painia wa gũteithĩrĩria na ũnengere athuri a kĩũngano kĩanyu.

¹³ Nĩguo wagĩrĩre gũtuĩka painia wa hĩndĩ ciothe, no mũhaka ũkorũo wĩhaarĩirie kũhingia mathaa marĩa matuĩtwo ma o mwaka. Ũrĩ painia wa hĩndĩ ciothe wagĩrĩirũo kũrutithania wĩra na kĩũngano kĩanyu. Mapainia arĩa marĩ kĩyo nĩ kĩrathimo harĩ kĩũngano tondũ nĩ matũmaga ahunjia arĩa angĩ makenere wĩra wa kũhunjia na magekĩra arĩa angĩ ngoro matuĩke mapainia. O na kũrĩ ũguo, mbere ya kũiyũria fomu ya painia wa hĩndĩ ciothe no mũhaka ũkorũo ũrĩ mũhunjia ũkoragwo arĩ kĩonereria kĩega, na ũkorũo ũniinĩte mĩeri itandatũ kuuma wabatithio.

¹⁴ Kaingĩ mapainia a mwanya mathuuragwo kuuma kũrĩ mapainia a hĩndĩ ciothe arĩa makoretwo na moimĩrĩro mega ũtungata-inĩ. Magĩrĩirũo gũkorũo mehaarĩirie gũtungata o kũrĩa guothe wabici ya rũhonge ĩngĩmatũma. Kaingĩ matũmagwo kũndũ kũrĩa gũtahunjĩtio nĩguo macarie andũ arĩa marĩ na wendi wa kwĩruta ũhoro wa ma na mambĩrĩrie ciũngano. Rĩmwe na rĩmwe nĩ matũmagwo ciũngano-inĩ iria irabatara gũteithĩrĩrio kũhunjia icigo ciacio. Mapainia amwe a mwanya arĩa makoragwo marĩ athuri a kĩũngano nĩ matũmagwo magateithĩrĩrie ciũngano iria nini, o na angĩkorũo itirĩ na bata mũnene wa ahunjia. Mapainia a mwanya nĩ maheagwo tũbeca tũnini twa mahũthĩro mao. Mapainia amwe a mwanya mamũragwo matungate kwa ihinda.

AMISHONARĨ ARĨA MARĨ ŨTUNGATA-INĨ WA KŨHUNJIA

¹⁵ Kamĩtĩ ya Ũtungata ya Kĩama Kĩrĩa Gĩtongoragia nĩyo yamũraga amishonarĩ, nayo Kamĩtĩ ya Wabici ya Rũhonge ya kũrĩa matũmwo ĩkamatũma icigo-inĩ iria ikoragwo na andũ aingĩ mũno bũrũri-inĩ ũcio. Nĩ mahingagia maũndũ maingĩ harĩ kũgaacĩrithia wĩra wa kũhunjia na maũndũ ma kĩũngano. Kaingĩ amishonarĩ acio makoragwo mamenyeretio Cukuru-inĩ ya Ahunjia a Ũthamaki. Nĩ mateithagĩrĩrio na ha gũikara na makaheo tũbeca tũnini twa mahũthĩro mao.

WĨRA WA GŨTHIŨRŨRŨKĨRA CIŨNGANO

¹⁶ Arĩa mamũragwo nĩ Kĩama Kĩrĩa Gĩtongoragia matuĩke arori a mũthiũrũrũko mamenyeragio na njĩra ya kwamba gũtungata marĩ arori a mũthiũrũrũko a gũteithĩrĩria. Arũme acio nĩ mendete wĩra wa kũhunjia na makenda aarĩ na ariũ a Ithe witũ. Nĩ mapainia marĩ kĩyo, merutaga Bibilia na kĩyo, na nĩ marĩ ũmenyeru wa kũrutana. Nĩ monanagia maciaro ma roho ũtũũro-inĩ wao, na makonania ũigananĩru na ũtaũku. Angĩkorũo mũrũ wa Ithe witũ nĩ ahikanĩtie, mũtumia wake agĩrĩirũo gũkorũo arĩ painia ũrĩ mĩthiĩre mĩega na ũrũmbũyanagia na andũ arĩa angĩ na njĩra njega. Agĩrĩirũo gũkorũo arĩ mũhunjia ũrĩ na moimĩrĩro mega. Ningĩ, arĩ mũtumia Mũkristiano agĩrĩirũo kwĩnyihĩria mũthuriwe, na arĩ andũ-inĩ ndagĩrĩirũo gũkoragwo atĩ nowe ũraaria hĩndĩ ciothe, kana etue mwaria wa mũthuriwe. Arori a mũthiũrũrũko na atumia ao nĩ makoragwo na mawĩra maingĩ mũno, kwoguo mũndũ ũrenda gũkinyĩra mweke ũcio agĩrĩirũo gũkorũo na ũgima mwega wa mwĩrĩ. Mapainia matiandĩkaga marũa kũhoya gũtungata wĩra-inĩ wa gũthiũrũrũkĩra ciũngano. Ithenya rĩa ũguo, magĩrĩirũo kũmenyithia mũrori wao wa mũthiũrũrũko wendi wao nĩguo amateithie kũmenya ũrĩa mabatiĩ gwĩka.

CUKURU CIA GĨTHEOKRASI

¹⁷ Cukuru ya Ahunjia a Ũthamaki: Kũrĩ na bata mũnene wa ahunjia a gũtungata icigo iria itahunjagio kaingĩ na gwĩkĩra ciũngano hinya. Nĩ ũndũ ũcio, aarĩ na ariũ a Ithe witũ arĩa mataingĩrĩte kĩhiko-inĩ, o hamwe na arĩa mahikanĩtie no maiyũrie fomu ya gũthiĩ Cukuru ya Ahunjia a Ũthamaki nĩguo mamenyerio. Marĩkia cukuru ĩyo, aarĩ na ariũ a Ithe witũ matũmagwo icigo-inĩ iria irĩ na bata mũnene wa ahunjia bũrũri-inĩ wao magatungate marĩ mapainia a hĩndĩ ciothe. O na kũrĩ ũguo, arĩa mangĩhota no maheo mawĩra mangĩ bũrũri-inĩ wao kana bũrũri-inĩ ũngĩ. Nao amwe no matũmwo marĩ mapainia a mwanya a ihinda inini kana a ihinda iraihu. Mapainia arĩa mangĩenda gũthiĩ cukuru ĩno no mamenye maũndũ marĩa mabataranagia hĩndĩ ya mũcemanio wa arĩa mangĩenda gũthiĩ cukuru ĩyo ũrĩa wĩkagwo kĩgomano-inĩ gĩa thikũ ithatũ.

¹⁸ Cukuru ya Bibilia ya Gileadi: Aarĩ na ariũ a Ithe witũ arĩa mataingĩrĩte kĩhiko-inĩ, na arĩa marĩ kĩhiko-inĩ arĩa mathuuragwo nĩguo mathiĩ cukuru ĩyo magĩrĩirũo gũkorũo moĩ Gĩthũngũ na makorũo marĩ ũtungata-inĩ wa mwanya wa mahinda mothe. Nĩ makoragwo na ũhoti wa gũteithia na gwĩkĩra hinya ciũngano kana wabici ya rũhonge. Nĩ monanĩtie atĩ nĩ makenagĩra gũtungatĩra aarĩ na ariũ a Ithe witũ, na marĩ na ũhoti wa gũteithia andũ angĩ na njĩra ya wendo kwĩruta na kũrũmĩrĩra motaaro ma Bibilia na ũtongoria wa gĩtheokrasi. Kamĩtĩ ya Wabici ya Rũhonge nĩyo yũragia arĩa maroneka magĩrĩire maiyũrie fomu ya gũthiĩ cukuru ĩyo. Arutwo maarĩkia cukuru ĩyo matũmagwo makahunjie, kana magatũmwo wabici-inĩ ya rũhonge ya bũrũri wao kana ya bũrũri ũngĩ.

ŨTUNGATA WA BETHELI

¹⁹ Gũtungata Betheli nĩ mweke wa mwanya mũno. Rĩĩtwa Betheli riugĩte “Nyũmba ya Ngai,” na hatarĩ nganja rĩĩtwa rĩu nĩ rĩagĩrĩire nĩ ũndũ wa wĩra ũrĩa ũrutagĩrũo kuo. Aarĩ na ariũ a Ithe witũ arĩa matungataga Betheli nĩ marutaga wĩra wa bata mũno ũkonainie na gũtaũra, gũcaba, na gũkinyĩria andũ mabuku marĩ na ũhoro uumĩte Bibilia-inĩ. Wĩra wao nĩ ũteithagia mũno Kĩama Kĩrĩa Gĩtongoragia, kĩrĩa kĩrũgamagĩrĩra na gĩkaheana ũtongoria kũrĩ ciũngano thĩinĩ wa thĩ yothe. Andũ aingĩ arĩa marutaga wĩra wa gũtaũra maikaraga na makarutĩra wĩra wao icigo-inĩ cia wabici ya rũhonge iria rũthiomi rũrĩa mataũraga rwaragio. Ũndũ ũcio nĩ ũmahotithagia kũigua rũthiomi rũu rũkĩario nĩ andũ marĩ maũndũ-inĩ mao ma o mũthenya. Ningĩ nĩ mahotaga kwĩyonera kana andũ nĩ marataũkĩrũo nĩ rũthiomi rũrĩa rũhũthĩrĩtwo mabuku-inĩ marĩa mataũrĩtwo.

²⁰ Wĩra mũingĩ ũrĩa ũrutagwo Betheli nĩ ũbataraga hinya mũingĩ. Nĩ ũndũ ũcio arĩa metagwo Betheli kaingĩ makoragwo marĩ ariũ a Ithe witũ abatithie, ethĩ, marĩ na hinya, na ũgima mwega wa mwĩrĩ. Angĩkorũo kũrĩ na ũbataro wabici-inĩ ya rũhonge ĩrĩa ĩrũgamĩrĩire bũrũri wanyu na no wende gũtungata kuo, no ũmenye maũndũ marĩa mabataranagia kuuma kũrĩ athuri a kĩũngano kĩanyu.

WĨRA WA MĨAKO

²¹ Wĩra wa gwaka nyũmba iria ihũthagĩrũo maũndũ-inĩ ma gĩtheokrasi nĩ ũtungata mũtheru, na ũtariĩ o ta wĩra ũrĩa warutirũo wa gwaka hekarũ ya Suleimani. (1 Ath. 8:13-18) Aarĩ na ariũ a Ithe witũ aingĩ nĩ monanagia kĩyo kĩnene na njĩra ya kwĩrutĩra kũhũthĩra mahinda na indo ciao wĩra-inĩ ũcio.

²² Hihi maũndũ maku no magwĩtĩkĩrie gũteithĩrĩria? Angĩkorũo ũrĩ mũhunjia mũbatithie na no wende kũruta wĩra ũcio, ariũ a Ithe witũ arĩa marũgamagĩrĩra wĩra wa mĩako gĩcigo-inĩ kĩanyu no makene mũno nĩ ũteithio waku, na no makũmenyerie o na angĩkorũo ndũĩ wĩra ũcio. Na githĩ to ũmenyithie athuri a kĩũngano kĩanyu atĩ no wende gũteithĩrĩria? Ahunjia amwe abatithie na nĩ cionereria njega, nĩ mathiĩte gũteithĩrĩria gwaka mĩako ya gĩtheokrasi nginya mabũrũri-inĩ mangĩ.

²³ Kũrĩ na mĩeke mĩingĩ ya gũteithĩrĩria wĩra-inĩ wa mĩako. Ahunjia abatithie arĩa marĩ na mũrũgamo mwega na nĩ marĩ ũmenyo mũnini wĩgiĩ mĩako, no merutĩre wĩra-inĩ wa mĩako hakuhĩ na kũrĩa maikaraga marĩ erutĩri a Rũhonge rwa Gũcora/Mĩako. Angĩ no mahote kwĩrutĩra kwa ihinda inini kũndũ kũraihu na kũrĩa maikaraga, na mamũragwo nĩ wabici ya rũhonge matungate kwa ihinda rĩa kuuma ciumia igĩrĩ nginya mĩeri ĩtatũ marĩ erutĩri a wĩra wa mĩako. Arĩa mamũragwo matungate kwa ihinda iraya metagwo ndungata cia mĩako. Mũndũ angĩheo wĩra wa mĩako bũrũri-inĩ ũngĩ etagwo ndungata ya mĩako ya bũrũri ũngĩ. Gĩkundi kĩa Mĩako gĩkoragwo kĩrĩ na ndungata cia mĩako o hamwe na erutĩri a wĩra wa mĩako, na nĩo matongoragia maũndũ mwako-inĩ magĩteithĩrĩrio nĩ erutĩri a Rũhonge rwa Gũcora/Mĩako na erutĩri kuuma kĩũngano-inĩ kĩrĩa kĩrakwo. Gĩkundi kĩa Mĩako gĩakaga kũndũ kũmwe, kĩarĩkia gĩgathiĩ kũndũ kũngĩ gĩcigo-inĩ kĩrĩa kĩrũgamĩrĩirũo nĩ wabici ĩyo ya rũhonge.

MĨOROTO YAKU YA KĨĨROHO NĨ ĨRĨKŨ?

²⁴ Angĩkorũo nĩ wĩyamũrĩire Jehova, wendi waku nĩ kũmũtungatĩra tene na tene. O na kũrĩ ũguo-rĩ, ũkoragwo na mĩoroto ĩrĩkũ ũtũũro-inĩ? Gũkorũo na mĩoroto ya kĩĩroho nĩ kũrĩgũteithagia kũhũthĩra hinya na indo ingĩ na njĩra ĩrĩa yagĩrĩire. (1 Kor. 9:26) Kwĩigĩra mĩoroto ta ĩyo nĩ kũrĩgũteithagia gũkũra kĩĩroho na gũgagũteithia kũiga meciria maku harĩ maũndũ marĩa ma bata makĩria, o ũgĩkinyagĩra mĩeke ĩngĩ ya ũtungata.​—Afil. 1:10; 1 Tim. 4:15, 16.

²⁵ Mũtũmwo Paulo nĩ aatũigĩire kĩonereria kĩega tũngĩrũmĩrĩra tũgĩtungatĩra Ngai. (1 Kor. 11:1) Paulo nĩ eerutanagĩria mũno ũtungata-inĩ wa Jehova. Nĩ aamenyaga atĩ Jehova nĩ aamũheete mĩeke mĩingĩ ya ũtungata. Aandĩkĩire Akristiano a Korintho ũũ: “Nĩ hingũrĩirũo mũrango mũnene wa ũtungata.” Na githĩ ũguo toguo kũrĩ harĩ ithuĩ? Tũrĩ na mĩeke mĩingĩ ya gũtungatĩra Jehova hamwe na kĩũngano, makĩria wĩra-inĩ wa kũhunjia ũhoro ũrĩa mwega wa Ũthamaki. No o ta Paulo, tũkĩgerera ‘mũrango-inĩ ũcio mũnene,’ nĩ tũrĩcemanagia na “akararia aingĩ.” (1 Kor. 16:9) Paulo nĩ aakoragwo ehaarĩirie kwĩima biũ. Ooigire ũũ: “Nĩ kũhũũra hũũraga mwĩrĩ wakwa na ngaũtongoria ta ngombo.” (1 Kor. 9:24-27) Hihi wee nĩ ũkoragwo na mwerekera ta ũcio?

²⁶ O mũndũ ekĩragwo ngoro athingate mĩoroto ya kĩĩroho kũringana na ũrĩa maũndũ make mwene mekũmwĩtĩkĩria. Andũ aingĩ ũmũthĩ marĩ ũtungata-inĩ wa mahinda mothe tondũ nĩ meeigĩire mĩoroto ya kĩĩroho o tene. O na marĩ o ciana, nĩ meekĩrirũo ngoro nĩ aciari ao na andũ angĩ meke ũguo. Nĩ ũndũ ũcio, nĩ magĩĩte na gĩkeno kĩnene ũtungata-inĩ wa Jehova na matiĩriraga. (Thim. 10:22) Mĩoroto ĩngĩ tũngĩigĩra nĩ ta kũhunjia o kiumia, kwambĩrĩria na gũtongoria wĩruti wa Bibilia na mũndũ, kana kũhũthĩra mahinda maingaingĩ kũhaarĩria mĩcemanio. Ũndũ ũrĩa wa bata nĩ gũikara twĩhandĩte kĩĩroho na tũhingagie ũtungata witũ biũ. Tweka ũguo, nĩ tũrĩtĩithagia Jehova, na nĩ tũgũkinyĩra muoroto witũ ũrĩa mũnene wa kũmũtungatĩra tene na tene.​—Luk. 13:24; 1 Tim. 4:7b, 8.