Mĩbango Ĩgiĩ Kũndũ gwa Gũthathaĩria

ATHATHAIYA a ma a Jehova mathĩtwo macemanagie hamwe nĩguo marutwo na mekĩrane ngoro. (Ahib. 10:23-25) ‘Gĩikaro kĩrĩa kĩamũre, o kĩo hema ya gũtũnganwo,’ nĩkĩo kĩarĩ handũ ha mbere harĩa Aisiraeli maathathayagĩria Ngai. (Tham. 39:32, 40) Thutha-inĩ Suleimani mũrũ wa Daudi, nĩ aakire nyũmba, kana hekarũ, nĩ ũndũ wa kũgoocithia Ngai. (1 Ath. 9:3) Thutha wa hekarũ ĩyo kwanangwo mwaka wa 607 M.M.M., Ayahudi nĩ maambĩrĩirie gũthathayagĩria Ngai nyũmba-inĩ iria cietagwo thunagogi. Thutha wa ihinda, hekarũ nĩ yaakirũo rĩngĩ na andũ magĩcoka gũthathayagĩria kuo. Jesu nĩ aarutanagĩra thunagogi-inĩ na hekarũ-inĩ. (Luk. 4:16; Joh. 18:20) O na kũrĩ hĩndĩ andũ maacemanĩtie kĩrĩma-inĩ akĩmaruta.​—Mat. 5:1–7:29.

² Thutha wa Jesu gũkua, Akristiano nĩ maacemanagia kũndũ kwa mũingĩ kana mĩciĩ ya andũ kwĩruta Maandĩko na gũkenera ngwatanĩro ya Gĩkristiano. (Atũm. 19:8, 9; Rom. 16:3, 5; Kol. 4:15; Filem. 2) Rĩmwe Akristiano a tene nĩ maabataraga gũcemania kũndũ kwĩhithĩte nĩguo metheme kũmenyeka nĩ arĩa maamanyariraga. Hatarĩ nganja, ndungata njĩhokeku cia tene nĩ ciarĩ na wendi mũnene wa gũcemanĩria kũndũ gwa gũthathaĩria nĩguo ‘irutwo nĩ Jehova.’​—Isa. 54:13.

³ O na mahinda-inĩ maya, mĩcemanio ya Gĩkristiano nĩ ĩkagĩrũo mĩciĩ-inĩ ya andũ na kũndũ kwa mũingĩ. Mĩcemanio ya ũtungata kaingĩ nĩyo ĩkagĩrũo mĩciĩ-inĩ ya andũ. Arĩa maheanaga mĩciĩ yao ĩkĩrũo mĩcemanio ĩyo monaga ũrĩ mweke wa mwanya. Aingĩ ao nĩ maiguaga magunĩkĩte kĩĩroho nĩ ũndũ wa gwĩtĩkĩra mĩciĩ yao ĩhũthĩrũo na njĩra ĩyo.

NYŨMBA YA ŨTHAMAKI

⁴ Kaingĩ Aira a Jehova mekagĩra mĩcemanio yao thĩinĩ wa Nyũmba ya Ũthamaki. Kũgũragwo kĩea, Nyũmba ya Ũthamaki ĩgakwo kana angĩkorũo nĩ harĩ nyũmba yaakĩtwo tene, ĩgathondekwo rĩngĩ. Nĩguo tũhonokie mbeca na tũhũthĩre wega Nyũmba citũ cia Ũthamaki, kũngĩhoteka ciũngano cigana ũna no ihũthĩre nyũmba ĩmwe ya Ũthamaki. Kũndũ kũmwe ciũngano ibataraga gũkombora nyũmba ya gwĩkĩra mĩcemanio. Nyũmba ya Ũthamaki yarĩka gwakwo, kana ĩkorũo nĩ yacokererio na njĩra nene, nĩ ĩbataraga kwamũrĩrũo Jehova. No angĩkorũo Nyũmba ya Ũthamaki yacokererio o hanini tu, gũtikoragwo na bata wa kũmĩamũrĩra Jehova.

⁵ Nyũmba ya Ũthamaki ndĩagĩrĩirũo gwakwo na njĩra ya mwanya atĩ nĩguo ĩgucĩrĩrie andũ. O na gũtuĩka mwakĩre wacio no ũkorũo ũrĩ ngũrani kũringana na kũndũ, muoroto wacio ũkoragwo ũrĩ ũmwe. (Atũm. 17:24) Gũkĩringana na kũrĩa ĩrakwo, Nyũmba ya Ũthamaki yagĩrĩirũo gũkorũo ĩrĩ handũ hega ha gwĩkĩrũo mĩcemanio ya Gĩkristiano.

⁶ Ciũngano ciothe cia Aira a Jehova nĩ inyitanagĩra harĩ kũrũgamĩrĩra mahũthĩro na kũmenyerera Nyũmba ya Ũthamaki ĩrĩa igaĩirũo. Gũtirĩ mĩhothi yũnganagio na gũtihothithagio mbeca. Nĩ gũkoragwo na ithandũkũ rĩa mĩhothi Nyũmba-inĩ ya Ũthamaki nĩguo arĩa mokĩte mĩcemanio mangĩenda kũhotha nĩ ũndũ wa mahũthĩro ma kĩũngano meke ũguo. Marutaga mĩhothi meyendeire kuuma ngoro.​—2 Kor. 9:7.

⁷ Andũ othe thĩinĩ wa kĩũngano monaga arĩ mweke wa mwanya kũruta mĩhothi nĩ ũndũ wa mahũthĩro ma Nyũmba ya Ũthamaki na kwĩrutĩra kũmĩiga ĩrĩ theru na ĩmenyereirũo wega. Kaingĩ wĩra ũcio ũbangagwo nĩ mũthuri wa kĩũngano kana ndungata ya kĩũngano. Maita maingĩ ũtheru ũbangagwo na ikundi cia kũhunjia, o gĩkundi gĩtongoretio nĩ mũrori wa gĩkundi kana mũteithĩrĩria wake. Nyũmba ya Ũthamaki yagĩrĩirũo gũkorũo ĩrĩ njega thĩinĩ na nja nĩguo ĩgoocithie Jehova na ithondeka rĩake.

⁸ Kũrĩa Nyũmba ya Ũthamaki ĩhũthagĩrũo nĩ makĩria ma kĩũngano kĩmwe, athuri a ciũngano icio nĩ mathondekaga Kamĩtĩ ya Gũtabarĩra Nyũmba ya Ũthamaki ĩrĩa ĩtabanagia maũndũ megiĩ nyũmba ĩyo hamwe na kĩea na indo iria irĩ kĩea-inĩ kĩu. Ciama cia athuri a ciũngano icio ithuuraga mũrũ wa Ithe witũ ũmwe akorũo arĩ mũtabarĩri wa kamĩtĩ ĩyo. Kamĩtĩ ĩyo ĩrutaga wĩra rungu rwa ciama icio cia athuri, na ĩroraga ũtheru wa nyũmba ĩyo ĩgatigĩrĩra atĩ nĩ ĩramenyererũo wega na indo iria irabatarania irĩ kuo cia kũigana. Ũndũ ũcio ũbataraga ciũngano icio inyitanĩre wega.

⁹ Rĩrĩa ciũngano cigana ũna irahũthĩra Nyũmba ĩmwe ya Ũthamaki, no ibatare kũbanga ũrĩa irĩcenjanagia mathaa ma mĩcemanio. Athuri mabangaga mũtaratara ũcio magĩciragia arĩa angĩ na marĩ na wendo. (Afil. 2:2-4; 1 Pet. 3:8) Gũtirĩ kĩũngano kĩagĩrĩirũo gũtuaga matua ithenya rĩa ciũngano iria ingĩ. Rĩrĩa mũrori wa mũthiũrũrũko araceerera kĩũngano kĩmwe harĩ icio, ciũngano icio ingĩ nĩ icenjagia mathaa ma mĩcemanio kiumia-inĩ kĩu kũngĩbatarania.

¹⁰ Nyũmba ya Ũthamaki no ĩhũthĩrũo kũrutĩrũo mĩario ya ũhiki kana ya mathiko harĩ na rũtha rwa Kamĩtĩ ya Ũtungata ya Kĩũngano. Mũndũ angĩhoya kũhũthĩra Nyũmba ya Ũthamaki, kamĩtĩ ĩyo nĩ ĩroraga ũndũ ũcio na kinyi na ĩgatua itua kũringana na ũtongoria ũrĩa ũheanĩtwo nĩ wabici ya rũhonge.

¹¹ Arĩa metĩkĩrio kũhũthĩra Nyũmba ya Ũthamaki na njĩra ta icio magĩrĩirũo gũkorũo na mĩthiĩre ĩrĩa yagĩrĩire Akristiano a ma. Gũtirĩ ũndũ o na ũmwe ũngĩrakaria kĩũngano kana ũcambithie Jehova na rĩĩtwa rĩega rĩa kĩũngano wagĩrĩirũo gwĩkĩrũo Nyũmba-inĩ ya Ũthamaki. (Afil. 2:14, 15) Harĩ na ũtongoria wa wabici ya rũhonge, Nyũmba ya Ũthamaki no ĩhũthĩrũo gwĩkĩra maũndũ mangĩ ma kĩĩroho ta Cukuru ya Ũtungata wa Ũthamaki na Cukuru ya Ũtungata wa Ũpainia.

¹² Hĩndĩ ciothe andũ thĩinĩ wa kĩũngano magĩrĩirũo gũtĩaga harĩa mathathayagĩria. Mĩĩhumbĩre, mĩĩgemerie, na mĩthiĩre yao yagĩrĩire kuonania gĩtĩo kĩrĩa kĩagĩrĩire harĩ ũthathaiya wa Jehova. (Koh. 5:1; 1 Tim. 2:9, 10) Rĩrĩa twahũthĩra ũtaaro ũrĩa tũheetwo ũhoro-inĩ ũcio, tuonanagia atĩ nĩ tũtĩĩte mĩcemanio itũ ya Gĩkristiano.

¹³ Gũkorũo na mĩbango mĩega hĩndĩ ya mĩcemanio nĩ ũndũ wa bata mũno. Nĩ wega ciana gũikarania hamwe na aciari a cio. Aciari arĩa marĩ na ciana nini no mekĩrũo ngoro maikarage harĩa mategũthumbũra andũ mũno mangĩbatara kũruta ciana nja magacirũnge kana nĩ ũndũ wa maũndũ mangĩ.

¹⁴ Ariũ a Ithe witũ arĩa magĩrĩire nĩ maheagwo wĩra wa ũnyitani ũgeni Nyũmba-inĩ ya Ũthamaki hĩndĩ ya mĩcemanio. Magĩrĩirũo gũkorũo marĩ maitho, monanie ũrata na makorũo na ũtaũku. Wĩra wao ũkoniĩ kũgeithia ageni na gũtũma maigue maiganĩire, kuonia arĩa moka macereirũo harĩa megũikara, gũtara na kwandĩka mũigana wa arĩa mokĩte mĩcemanio, na gũtigĩrĩra atĩ Nyũmba ya Ũthamaki ĩrĩ na rĩera rĩega na rĩa kũigana. Rĩrĩa kwabatarania, anyitani ũgeni nĩ maririkanagia aciari marore ciana ciao itigatengʼere Nyũmba-inĩ ya Ũthamaki mbere kana thutha wa mĩcemanio, kana gũthakĩra harĩa mbere. Akĩhũthĩra ũũgĩ na gĩtĩo, mũnyitani ũgeni no ere mũciari wa mwana ũrathumbũra andũ amũrute nja nĩguo meciria ma athikĩrĩria matigatahwo. Wĩra wa anyitani ũgeni nĩ ũteithagia andũ othe mahote gũkenera mĩcemanio. Nĩ wega kũhũthĩra athuri a kĩũngano na ndungata cia kĩũngano marĩ anyitani ũgeni.

GWAKA NYŨMBA CIA ŨTHAMAKI

¹⁵ Karine-inĩ ya mbere, Akristiano amwe maarĩ na ũhoti mũnene wa kĩĩmbeca gũkĩra arĩa angĩ, na nĩkĩo mũtũmwo Paulo aandĩkire ũũ: “Na njĩra ya kũiganania, kũingĩhĩrũo kwanyu ihinda-inĩ rĩrĩ gũteithĩrĩrie wagi wao, nĩgetha kũingĩhĩrũo kwao gũteithĩrĩrie kũnyihĩrũo kwanyu, nĩguo kũgĩe na ũigananĩru.” (2 Kor. 8:14) O na ũmũthĩ, ũndũ o ta ũcio wa “kũiganania” nĩ wĩkagwo. Mbeca iria ihothagwo nĩ ciũngano thĩinĩ wa thĩ yothe nĩ icokanagĩrĩrio nĩguo ihũthĩrũo gũteithĩrĩria gwaka na gũcokereria Nyũmba cia Ũthamaki. Ithondeka rĩa Jehova hamwe na ciũngano iria igunĩkaga nĩ mĩhothi ĩyo nĩ ikenagĩra mũno ũtaana wa aarĩ na ariũ a Ithe witũ arĩa mahothaga.

¹⁶ Wabici ya rũhonge nĩyo ĩgayagĩra kĩũngano Nyũmba ya Ũthamaki ĩrĩa gĩkũhũthĩra kũringana na gĩcigo. Ningĩ wabici ya rũhonge nĩyo ĩtuaga nĩ rĩ na nĩ kũ gũgwakwo Nyũmba cia Ũthamaki na nĩ irĩkũ igũcokererio thĩinĩ wa gĩcigo kĩrĩa kĩrĩ rungu rwayo. Rĩrĩa kwoimĩra icanjama, mĩbango nĩ ĩkagwo nĩguo Nyũmba cia Ũthamaki iria ithũkangĩtio ithondekwo, na rĩmwe o na mĩciĩ ya aarĩ na ariũ a Ithe witũ nĩ ĩthondekagwo.

¹⁷ Wabici ya rũhonge nĩ ĩbangaga erutĩri arĩa megũteithĩrĩria harĩ gũcaria kĩea, gũcora Nyũmba ya Ũthamaki, gwetha marũa ma gwaka, gwaka, na kũmenyerera. Tondũ kũrĩ na bata mũnene wa Nyũmba cia Ũthamaki mabũrũri-inĩ maingĩ, erutĩri aingĩ nĩ marabatarania. Ahunjia othe abatithie arĩa magĩrĩire na marĩ na wendi wa gũteithĩrĩria nĩ marekĩrũo ngoro maiyũrie fomu ya kwĩrutĩra na manengere Kamĩtĩ ya Ũtungata ya Kĩũngano gĩa kwao. O na ahunjia matarĩ abatithie no mateithĩrĩrie gwaka kana gũcokereria Nyũmba ya Ũthamaki ya kwao.

NYŨMBA CIA IGOMANO

¹⁸ Akristiano a tene kaingĩ maacemanagia marĩ ikundi nini. O na kũrĩ ũguo, rĩmwe nĩ maacemanagia marĩ “kĩrĩndĩ kĩnene.” (Atũm. 11:26) Ũndũ ũmwe na ũcio, mahinda-inĩ maya andũ a Jehova nĩ macemanagia marĩ ikundi nene hĩndĩ ya igomano cia mũthiũrũrũko na cia thikũ ithatũ. Nĩ gũkomboragwo kũndũ gwa gwĩkĩrũo igomano, no kũngĩaga kũndũ kwagĩrĩire, nĩ gwakagwo Nyũmba ya Kĩgomano.

¹⁹ Rĩmwe na rĩmwe nyũmba nĩ ĩgũragwo, ĩgathondekwo, na ĩkahũthĩrũo ĩrĩ Nyũmba ya Kĩgomano. No kaingĩ nĩ kĩea kĩgũragwo na Nyũmba ya Kĩgomano ĩgakwo. Nyũmba cia Igomano itikoragwo ciganaine tondũ ciakagwo kũringana na mabataro ma gĩcigo kĩrĩa irĩ. Wabici ya rũhonge ĩtuaga itua rĩa kũgũra kana gwaka nyũmba thutha wa gũtuĩria wega mbeca iria ikũhũthĩka na ũrĩa nyũmba ĩyo ĩrĩhũthagĩrũo.

²⁰ Wabici ya rũhonge nĩ yamũraga ariũ a Ithe witũ a kũroraga na kũmenyerera Nyũmba ya Kĩgomano. Mĩbango nĩ ĩkagwo nĩguo mĩthiũrũrũko ĩtheragie Nyũmba ya Kĩgomano kaingĩ, ĩkage ũtheru maita merĩ harĩ mwaka, na ĩrorage na ĩgathondeka indo iria ihũthĩkaga kuo. Nĩ wega aarĩ na ariũ a Ithe witũ merutagĩre kũruta mawĩra macio. Nĩ ũndũ ũcio, ciũngano nĩ ciĩkagĩrũo ngoro kũnyita mbaru mĩbango ĩyo na ngoro yothe.​—Thab. 110:3; Mal. 1:10.

²¹ Ningĩ Nyũmba ya Kĩgomano no ĩhũthĩrũo rĩmwe na rĩmwe nĩ ũndũ wa maũndũ mangĩ ma gĩtheokrasi ta cukuru cia Bibilia na mĩcemanio ya mwanya ya arori a mũthiũrũrũko. O ta Nyũmba ya Ũthamaki, Nyũmba ya Kĩgomano nĩ handũ hatheru ha gũthathaĩria. Twagĩrĩirũo kuonania gĩtĩo kũgerera mĩĩhumbĩre, mĩĩgemerie, na mĩthiĩre itũ rĩrĩa tũcemanĩtie Nyũmba-inĩ ya Kĩgomano, o ta ũrĩa twĩkaga rĩrĩa tũcemanĩtie Nyũmba-inĩ ya Ũthamaki nĩ ũndũ wa ũthathaiya.

²² Ihinda-inĩ rĩrĩ rĩa mũthia rĩa matukũ ma kũrigĩrĩria, andũ aingĩ nĩ maroka ithondeka-inĩ rĩa Jehova. Ũcio nĩ ũira wa kĩrathimo kĩa Jehova. (Isa. 60:8, 10, 11, 22) Kwoguo nĩ twagĩrĩirũo kũnyita mbaru mĩbango ya kũgĩa na handũ hega ha gũthathaĩria, kũhatheragia na kũhamenyagĩrĩra. Tweka ũguo, tuonanagia ngatho citũ nĩ ũndũ wa itemi rĩrĩa nyũmba icio ikoragwo narĩo harĩ gũtũteithia gwĩkĩrana ngoro, o ũrĩa tũrona mũthenya wa Jehova ũgĩkuhĩrĩria.