Ithandũkũ rĩa Kĩũria

◼ Tũngĩtigĩrĩra atĩa, atĩ Nyũmba citũ cia Ũthamaki irĩ na ũgitĩri?

Tondũ tũratũũra matukũ-inĩ ma ũgwati, nĩ tũrabatara ũtaũku ũhoro-inĩ wĩgiĩ ũgitĩri wa Nyũmba ya Ũthamaki. O ta ũrĩa tuoyaga makinya ma kwĩgitĩra mĩciĩ-inĩ iitũ, noguo twagĩrĩirũo gwĩka Nyũmba-inĩ cia Ũthamaki. Athuri a kĩũngano nĩo magĩrĩirũo gũtigĩrĩra atĩ Nyũmba cia Ũthamaki irĩ na ũgitĩri mwega. Nĩ ũndũ wa riboti nyingĩ ciĩgiĩ kũrũkio kwa Nyũmba cia Ũthamaki, harĩ bata wa gwĩciria na ũritũ ũhoro ũcio wĩgiĩ ũgitĩri.

Makinya marĩa tũngĩoya nĩguo twĩke ũguo, nĩ gũtigĩrĩra atĩ thutha wa kũhũthĩra Nyũmba ya Ũthamaki, nĩ twahinga wega mĩrango, ihingo na ndirica ciothe. Ariũ a Ithe witũ arĩa mangĩhokeka nĩo magĩrĩire kũrũgamĩrĩra mĩbango ta ĩyo ya ũgitĩri hingo ciothe rĩrĩa Nyũmba ya Ũthamaki ĩrahũthĩrũo. Mĩbango ta ĩyo yagĩrĩirũo gũkorũo kuo hĩndĩ ciothe kũrĩ na mĩcemanio ya kĩũngano, mohiki kana rĩrĩa kũrĩ na ũtheru wa Nyũmba ya Ũthamaki.

Angĩkorũo Nyũmba yanyu ya Ũthamaki nĩ ĩkoragwo na handũ ha kũiga ngaari, nĩ wega hagaakagio thitima mahinda marĩa magĩrĩire. Ũndũ ũcio nĩ ũkũgirĩrĩria indo cia ngaari itikaiyũo, na ũnyihanyihie ũgwati ũrĩa ariũ na aarĩ a Ithe witũ mangĩona makiuma Nyũmba-inĩ ya Ũthamaki. Ciũngano imwe nĩ cionaga arĩ wega gũkorũo na ariũ a Ithe witũ maracenjania kũrũgama nja hĩndĩ ya mĩcemanio, nĩguo matigĩrĩre atĩ kũrĩ na ũgitĩri.

Ciũngano imwe nĩ cionaga arĩ wega kũhinga mĩrango hĩndĩ ya mĩcemanio. Angĩkorũo nĩ mwĩkaga ũguo kwanyu, anyitani ũgeni arĩa mangĩhokeka magĩrĩire kũrũgama mũrango-inĩ hĩndĩ ya mĩcemanio, nĩguo mamenye nĩa maraingĩra Nyũmba-inĩ ya Ũthamaki. Kĩama gĩa athuri nĩkĩo kĩagĩrĩire gũtua matua marĩa mekũrũmĩrĩrũo megiĩ ũgitĩri, marĩa maringaine na mawatho ma bũrũri. Kũngĩgĩa na mũbango ta ũcio kĩũngano kĩagĩrĩire kũmenyithio kabere nĩguo mamenye atĩ mĩrango ya Nyũmba ya Ũthamaki nĩ ĩrĩhingagwo.

No twende mũno ariũ na aarĩ Ithe witũ, na arĩa mokaga mĩcemanio maigue marĩ agitĩre, o tũkĩgitagĩra indo iria irĩ Nyũmba-inĩ ya Ũthamaki. Kwoguo, athuri a ciũngano magĩrĩire gwĩciria mabataro ma kwao megiĩ ũgitĩri, na moe makinya marĩa magĩrĩire nĩguo magitĩre indo na andũ othe arĩa moka mĩcemanio.