Kũnyita Mbaru Maũndũ ma Ũthamaki Bũrũri-inĩ Witũ na Thĩinĩ wa Thĩ Yothe

AIRA A JEHOVA nĩ mahingĩtie ũrathi ũrĩa Jesu aarathĩte wĩgiĩ matukũ ma kũrigĩrĩria, tondũ nĩ mahunjĩtie ũhoro ũrĩa mwega “nginya ituri ciothe cia thĩ.” (Atũm. 1:8; Mat. 24:14) Nĩguo mahote gwĩka ũguo, mahũthagĩra mahinda na hinya wao meyendeire nĩguo magayane na andũ maũndũ ma kĩĩroho. Maigaga maũndũ ma Ũthamaki wa Ngai mbere marĩ na wĩtĩkio atĩ Jehova nĩ ekũmahingĩria mabataro mao marĩ arutithania wĩra nake. (Mat. 6:25-34; 1 Kor. 3:5-9) Moimĩrĩro ma wĩra ũcio monanagia atĩ Jehova nĩ ametĩkĩrĩte na nĩ amarathimaga.

ŨRĨA WĨRA WA THĨ YOTHE WA ŨTHAMAKI ŨHINGAGIO

² Andũ amwe mamenya ũrĩa tũrutaga wĩra witũ wa kũhunjia na atĩ tũheanaga Bibilia na mabuku maitũ hatarĩ marĩhi, meyũragia ũũ: “Ũndũ ũcio ũhotekaga atĩa?” Ma nĩ atĩ, gũcaba Bibilia na mabuku maitũ nĩ kũbataraga mbeca. Ningĩ mbeca nĩ ibataranagia gwaka na kũmenyerera wabici cia honge nĩ ũndũ wa arĩa matungataga kuo makĩruta wĩra wa gũcaba, gũtabania wĩra wa kũhunjia, na wĩra ũngĩ o wothe wa gũtwarithia na mbere ũhoro ũrĩa mwega. Makĩria ma ũguo, arori a mũthiũrũrũko, amishonarĩ, mapainia a mwanya na angĩ arĩa marĩ ũtungata-inĩ wa mwanya wa mahinda mothe, nĩ maheagwo ũteithio mũnini wa kũhingia mabataro mao nĩguo mahote gũthiĩ na mbere na wĩra wao. Kwoguo, wĩra wa kũhunjia ũhoro ũrĩa mwega ũmũthĩ, bũrũri-inĩ witũ kana thĩinĩ wa thĩ yothe, nĩ ũbataraga mbeca nyingĩ mũno. Mbeca icio ciothe ciumaga kũ?

³ Andũ aingĩ arĩa makenagio nĩ wĩra wa Aira a Jehova wa kũrutana Bibilia nĩ marutaga mĩhothi nĩ ũndũ wa wĩra ũcio wa thĩ yothe. O na kũrĩ ũguo, Aira a Jehova o ene nĩo mateithagĩrĩria wĩra ũcio na njĩra ĩrĩa nene, na amwe ao matũmaga mĩhothi yao ya kwĩyendera kũrĩ wabici ya rũhonge ya kwao. Monanagia roho wa kwĩyendera o ta ũrĩa warĩ na ndungata cia Ngai cia tene iria ciateithĩrĩirie gwaka handũ ha gũthathaĩria Jehova ciĩyendeire. (Tham. 35:20-29; 1 Maũ. 29:9) Amwe maheanaga mĩgũnda kana ciea kũgerera marũa ma kwĩgaya, na mĩhothi ĩngĩ ĩkarutwo nĩ mũndũ ũmwe ũmwe, ciũngano, na mĩthiũrũrũko, na kaingĩ ĩheanagwo ĩrĩ mũigana mũnini mũnini. Mĩhothi ĩyo yothe yaturanĩrũo nĩyo ĩteithagĩrĩria wĩra wa kũhunjia ũthiĩ na mbere.

⁴ Aira a Jehova monaga kĩrĩ gĩtĩo kĩnene kũhũthĩra mbeca na indo ciao nĩguo iteithĩrĩrie wĩra wa kũhunjia. Jesu na arutwo ake nĩ maakoragwo na ithandũkũ rĩa mbeca harĩa maarutaga mbeca cia mahũthĩro mao. (Joh. 13:29) Bibilia nĩ yaragia ũhoro wa atumia maatungatagĩra Jesu na arutwo ake. (Mar. 15:40, 41; Luk. 8:3) Mũtũmwo Paulo nĩ eetĩkagĩra arĩ na ngatho ũteithio wa indo cia kĩĩmwĩrĩ ũrĩa aaheagwo nĩ andũ arĩa maarĩ na wendi wa gũtwarithia ũhoro mwega na mbere, na makenda kũnyita mbaru ũtungata wake. (Afil. 4:14-16; 1 Thes. 2:9) Aira a Jehova nĩ marũmagĩrĩra kĩonereria kĩu gĩa kũhunjia na kĩyo na kuonania ũtaana. Nĩ ũndũ ũcio, arĩa marĩ na mwerekera mwega kũndũ guothe nĩ maheagwo “maĩ ma muoyo hatarĩ marĩhi.”​—Kũg. 22:17.

ŨRĨA MABATARO MA KĨŨNGANO MAHINGAGIO

⁵ Mahũthĩro ma kĩũngano o namo mahingagio na mĩhothi ya kwĩyendera. Gũtirĩ mĩhothi yũnganagio, mũndũ ndatuagĩrũo mbeca iria arĩrutaga, na gũtihothithagio mbeca. Nĩ gũkoragwo na mathandũkũ ma mĩhothi kũrĩa tũthathayagĩria nĩguo mũndũ o wothe agĩe na mweke wa kũruta “o ta ũrĩa atuĩte ngoro-inĩ yake.”​—2 Kor. 9:7.

⁶ Mbeca iria ciahothwo ciambaga kũhũthĩrũo kũrĩhĩra mahũthĩro ma Nyũmba ya Ũthamaki. Kĩama gĩa athuri no gĩtue kana mbeca imwe nĩ igũtũmwo kũrĩ wabici ya rũhonge ya Aira a Jehova nĩ ũndũ wa gũtwarithia na mbere wĩra wa thĩ yothe. Kĩũngano nĩkĩo kĩagĩrĩirũo gũtua nĩ mbeca cigana kĩrĩtũmaga kũrĩ wabici ya rũhonge. Na njĩra ĩyo, ciũngano nyingĩ nĩ ihotaga gũtũma mbeca cia wĩra wa thĩ yothe kaingĩ. Andũ othe mamenya mabataro ma kĩũngano marĩa moimĩraga mahinda kwa mahinda, gũtingĩkorũo na bata wa gũikara gũkĩrutagwo imenyithia ciĩgiĩ mĩhothi.

ŨRĨA MĨHOTHI ĨMENYAGĨRĨRŨO

⁷ Thutha wa o mũcemanio, ariũ a Ithe witũ erĩ nĩ marutaga mbeca ciothe iria irĩ mathandũkũ-inĩ ma mĩhothi na makandĩka rekondi yacio. (2 Ath. 12:9, 10; 2 Kor. 8:20) Kĩama gĩa athuri nĩ kĩbangaga ũrĩa mbeca icio ikũigwo wega nginya rĩrĩa igaatũmwo kũrĩ wabici ya rũhonge kana ihũthĩrũo kũhingia mabataro ma kĩũngano. Mũrũ wa Ithe witũ ũrĩa ũrũmbũyagia mathabu ma mbeca cia kĩũngano ahaaragĩrĩria riboti ya kũmenyithia kĩũngano o mweri, na o thutha wa mĩeri ĩtatũ mũtabarĩri wa kĩama gĩa athuri akabanga failo ya mathabu ĩrorũo kana mathabu nĩ mekĩtwo wega.

MAHŨTHĨRO MA MŨTHIŨRŨRŨKO

⁸ Mahũthĩro ma igomano cia mũthiũrũrũko na mahũthĩro mangĩ ma mũthiũrũrũko, mahingagio na mĩhothi ĩrĩa ĩrutagwo nĩ Aira a Jehova arĩa marĩ thĩinĩ wa mũthiũrũrũko ũcio. Mathandũkũ ma mĩhothi nĩ maigagwo kũrĩa kĩgomano kĩrekĩrũo nĩguo mĩhothi ĩrutwo nĩ ũndũ wa mũthiũrũrũko ũcio. Makĩria ma ũguo, ciũngano no irute mĩhothi mahinda mangĩ nĩ ũndũ wa mahũthĩro mangĩ marĩa makoragwo kuo.

⁹ Mĩthiũrũrũko nĩ yagĩrĩirũo kũhota kũrĩhĩra mahũthĩro marĩa mangĩbatarania, na mbeca iria ciatigara ikahothwo wĩra-inĩ wa thĩ yothe. Angĩkorũo akaunti ya mũthiũrũrũko ndĩrĩ na mbeca cia kũigana kũrĩhĩra mahũthĩro ma kĩgomano kana kũrĩhĩra mahũthĩro mamwe ma kĩgomano kĩrĩa kĩrũmĩrĩire, ta kũigithia kũrĩa kĩgomano gĩgeekĩrũo, mũrori wa mũthiũrũrũko no abange ciũngano ciũrio irute mĩhothi. O kĩama gĩa athuri nĩ gĩkwarĩrĩria ũndũ ũcio nĩgetha kĩone mbeca iria kĩũngano kĩngĩhota kũruta nĩ ũndũ wa mbeca cia mũthiũrũrũko. Thutha ũcio kĩũngano gĩgetĩkanĩria mbeca iria kĩrĩrutaga.

¹⁰ Kũngiumĩra maũndũ megiĩ mbeca marabatara kwarĩrĩrio nĩ athuri thĩinĩ wa mũthiũrũrũko, nĩ gwĩkagwo mũcemanio wa athuri a mũthiũrũrũko ũcio hĩndĩ ya kĩgomano kĩa mũthiũrũrũko. Matua mothe tiga marĩa mahutĩtie mahũthĩro mamwe ma mũthiũrũrũko mabatiĩ gwĩtĩkanĩrio nĩ athuri a mũthiũrũrũko. Mbeca iria cietĩkanĩrio ciagĩrĩire kwandĩkwo mũigana wacio, na rĩrĩa rĩothe mbeca cia mũthiũrũrũko ikũhũthĩrũo nĩ ciagĩrĩire kwamba kũhĩtũkio.

¹¹ Thutha wa ihinda nĩ kũbangagwo nĩguo failo ya mathabu ma mũthiũrũrũko ĩrorũo kana mathabu nĩ mekĩtwo wega.

GŨTEITHĨRĨRIA ARĨA ATHĨNI

¹² Muoroto ũmwe wa Jesu na arutwo ake gũkorũo na ithandũkũ rĩa mbeca warĩ gũteithĩrĩria arĩa athĩni. (Mar. 14:3-5; Joh. 13:29) Akristiano nĩ magĩrĩirũo gwĩkaga ũguo, tondũ Jesu ooigire ũũ: “Athĩni mũkoragwo nao hĩndĩ ciothe.” (Mar. 14:7) Aira a Jehova mekaga atĩa nĩguo mateithĩrĩrie arĩa athĩni?

¹³ Rĩmwe na rĩmwe, aarĩ na ariũ a Ithe witũ arĩa ehokeku kĩũngano-inĩ no mabatare ũteithio wa indo cia kĩĩmwĩrĩ nĩ ũndũ wa ũkũrũ, mũrimũ, kana ũndũ ũngĩ matangĩhota kũhiũrania naguo. Andũ ao a famĩlĩ o hamwe na andũ angĩ arĩa moĩ ũndũ ũcio no mende kũmateithĩrĩria. Ũndũ ũcio nĩ ũratwarana na ciugo ici cia mũtũmwo Johana: “Mũndũ o wothe ũrĩ na indo cia thĩ ĩno na akona mũrũ wa Ithe arĩ na thĩna no akarega kũmũcaĩra-rĩ, wendo wa Ngai ũngĩgĩkorũo thĩinĩ wake atĩa? Twana tũtũ, ithuĩ tũtiagĩrĩirũo kwendana na ciugo kana na kanua, ĩndĩ twagĩrĩirũo kwendana na ciĩko na ma.” (1 Joh. 3:17, 18; 2 Thes. 3:6-12) Ũthathaiya wa ma nĩ hamwe na kũrũmbũiya aarĩ na ariũ a Ithe witũ ehokeku arĩa mangĩbatara ũteithio wa indo cia kĩĩmwĩrĩ.​—Jak. 1:27; 2:14-17.

¹⁴ Marũa-inĩ ma mbere ma mũtũmwo Paulo kũrĩ Timotheo nĩ aataarĩirie ũrĩa ũteithio wa indo cia kĩĩmwĩrĩ ũngĩheo arĩa magĩrĩire. No ũthome ũtaaro ũcio thĩinĩ wa 1 Timotheo 5:3-21. Mũkristiano nĩwe ũkoragwo na itemi inene harĩ kũrũmbũiya mabataro ma famĩlĩ yake. Arĩa akũrũ kana arĩa marĩ na mathĩna ma mwĩrĩ magĩrĩirũo kũheo ũteithio nĩ ciana ciao, ciana cia ciana ciao, kana andũ angĩ a famĩlĩ. Rĩmwe nĩ gũkoragwo na ũteithio kuuma kũrĩ thirikari kana ikundi cia gũteithia mũingĩ, na kwoguo andũ a famĩlĩ kana angĩ no mateithĩrĩrie ũrĩa ũrĩ na thĩna ahoe ũteithio ũcio. No kuumĩre ũndũ ũngĩtũma kĩũngano gĩothe kĩbatare kũheana ũteithio mũna kũrĩ aarĩ na ariũ a Ithe witũ amwe arĩa makoretwo marĩ ehokeku ihinda iraya. Angĩkorũo gũtirĩ na andũ a famĩlĩ kana andũ angĩ a hakuhĩ mangĩmateithĩrĩria na gũtirĩ ũteithio wa kũigana kuuma kũrĩ thirikari, kĩama gĩa athuri no gĩĩke mĩbango ĩrĩa ĩngĩagĩrĩra ya kũmateithia. Akristiano nĩ monaga arĩ gĩtĩo gũteithĩrĩria arĩa marabatara ũteithio.

¹⁵ Aarĩ na ariũ a Ithe witũ aingĩ no mabatare ũteithio nĩ ũndũ wa kũnyarirũo, mbaara, ithingithia, mũiyũro, ngʼaragu, kana icanjama ingĩ iria cionekaga matukũ-inĩ maya maritũ. (Mat. 24:7-9) Ciũngano no ikorũo itarĩ na ũhoti wa gũteithania, kwoguo Kĩama Kĩrĩa Gĩtongoragia nĩ kĩbangaga ũrĩa aarĩ na ariũ a Ithe witũ a kũndũ kũngĩ mangĩteithĩrĩria. Ũndũ ũcio ũtariĩ ta ũrĩa Akristiano a Asia Nini maaheanire ũteithio wa irio kũrĩ Akristiano a Judea hĩndĩ ya ngʼaragu. (1 Kor. 16:1-4; 2 Kor. 9:1-5) Rĩrĩa twarũmĩrĩra kĩonereria kĩu kĩao, tuonanagia kũna atĩ nĩ twendete aarĩ na ariũ a Ithe witũ na tũkonania atĩ tũrĩ arutwo a ma a Jesu Kristo.​—Joh. 13:35.

ŨHORO WĨGIĨ MABUKU MAITŨ

¹⁶ Bibilia hamwe na mabuku maitũ nĩ ihingagia itemi rĩa bata mũno harĩ gũtheremia ndũmĩrĩri ya Ũthamaki. Kaingĩ kĩama gĩa athuri nĩ kĩheaga ndungata ya kĩũngano wĩra wĩgiĩ mabuku marĩa marahũthĩrũo. Ariũ a Ithe witũ arĩa maheetwo wĩra ũcio nĩ mawoyaga na ũritũ. Nĩ maigaga rekondi njega nĩguo matigĩrĩre atĩ kĩũngano gĩtiraga mabuku marĩa kĩrabatara.

¹⁷ Tũrĩ Akristiano meyamũrĩire Ngai, nĩ tũĩ atĩ mahinda, meciria na hinya witũ, ũhoti na indo citũ cia kĩĩmwĩrĩ, o hamwe na muoyo witũ nĩ iheo kuuma kũrĩ Ngai na endaga tũcihũthĩre kũmũtungatĩra. (Luk. 17:10; 1 Kor. 4:7) Kũhũthĩra indo citũ ciothe na njĩra ĩrĩa yagĩrĩire kuonanagia ũrĩa twendete Jehova. Nĩ twendaga mũno gũtĩithia Jehova na indo citũ cia goro tondũ nĩ tũmenyaga atĩ nĩ akenagio nĩ kĩheo o gĩothe kĩronania wĩrutĩri wa ngoro yothe. (Thim. 3:9; Mar. 14:3-9; Luk. 21:1-4; Kol. 3:23, 24) Jesu ooigire ũũ: “Mũheetwo tũhũ, heanagai tũhũ.” (Mat. 10:8) Twerutĩra na twahũthĩra indo citũ ũtungata-inĩ wa Jehova, nĩ tũgĩaga na gĩkeno kĩnene.​—Atũm. 20:35.