Gũtũũria Thayũ na Ũtheru wa Kĩũngano

O MWAKA andũ ngiri nyingĩ nĩ mokaga nyũmba-inĩ ya Jehova ya ũthathaiya mũtheru, o ta ũrĩa ũrathi wa Bibilia wonanagia. (Mik. 4:1, 2) Nĩ tũkenaga mũno kũmanyita ũgeni thĩinĩ wa “kĩũngano kĩa Ngai.” (Atũm. 20:28) Nĩ makenagĩra mweke wa gũtungatĩra Jehova hamwe na ithuĩ na magakenera thayũ na ũtheru ũrĩa ũkoragwo kuo thĩinĩ wa paradiso ya kĩĩroho. Roho mũtheru wa Ngai na ũtaaro wa ũũgĩ ũrĩa ũkoragwo thĩinĩ wa Kiugo gĩake nĩ itũteithagia gũtũũria thayũ na ũtheru wa kĩũngano.​—Thab. 119:105; Zek. 4:6.

² Nĩ twĩhumbaga “ũmũndũ mwerũ” na njĩra ya kũhũthĩra motaaro ma Bibilia. (Kol. 3:10) Tũtitindanagĩra na ngucanio ciĩgiĩ tũmaũndũ tũnini kana kwaga kũiguithania. Rĩrĩa tuona maũndũ na njĩra ya Jehova, nĩ tũreganaga na roho wa gũkũ thĩ wa kũgayania andũ na tũkarutithania wĩra hamwe na ũrũmwe tũrĩ famĩlĩ ya thĩ yothe ya aarĩ na ariũ a Ithe witũ.​—Atũm. 10:34, 35.

³ O na kũrĩ ũguo, rĩmwe na rĩmwe nĩ kuumagĩra moritũ mangĩthũkia thayũ na ũrũmwe wa kĩũngano. Hihi moimagĩra nĩkĩ? Kaingĩ moimagĩra nĩ ũndũ wa kwaga kũrũmĩrĩra motaaro ma Bibilia. Ũndũ ũngĩ nĩ kwaga gũkinyanĩra gwitũ. Ithuothe nĩ twĩhagia. (1 Joh. 1:10) Mũndũ no athiĩ na njĩra ĩtagĩrĩire, na ũndũ ũcio ũthũkie ũtheru wa kĩĩmĩtugo kana wa kĩĩroho wa kĩũngano. No tũhĩtĩrie mũndũ tũngĩaria kana twĩke ũndũ tũtecirĩtie, kana o na tũhĩngwo nĩ ciugo kana ciĩko cia mũndũ ũrĩa ũngĩ. (Rom. 3:23) Rĩrĩa gwathiĩ ũguo-rĩ, tũngĩka atĩa nĩguo tũrũnge maũndũ?

⁴ Nĩ ũndũ wa wendo wake gũtwerekera, Jehova nĩ atwĩrĩte ũrĩa tũngĩka maũndũ-inĩ macio mothe. Kiugo gĩake nĩ kĩrĩ motaaro tũngĩhũthĩra rĩrĩa mathĩna moimĩra. Athuri a kĩũngano nĩ arĩithi a kĩĩroho na nĩ makoragwo mehaarĩirie gũtũhe ũteithio. Tũngĩrũmĩrĩra ũtaaro wao wa Kĩĩmaandĩko, no tũcokie thayũ na arĩa angĩ na tũtũũrie mũrũgamo mwega na Jehova. Tũngĩrũngwo kana tũheo mũkaana nĩ ũndũ wa mahĩtia maitũ, no tũkorũo na ma atĩ kũrũngwo kũu nĩ njĩra ya Ithe witũ wa igũrũ ya gũtuonia wendo.​—Thim. 3:11, 12; Ahib. 12:6.

KŨNIINA TŨMATHĨNA TŨNINI

⁵ Rĩmwe andũ thĩinĩ wa kĩũngano no mahĩtanie nĩ ũndũ wa tũmaũndũ tũnini. Magĩrĩirũo gũcokia thayũ na ihenya na njĩra ya wendo. (Ef. 4:26; Afil. 2:2-4; Kol. 3:12-14) Kaingĩ no tũhote kũniina mathĩna megiĩ kũhĩtania na arĩa angĩ thĩinĩ wa kĩũngano tũngĩrũmĩrĩra ũtaaro ũyũ wa mũtũmwo Petero: “Koragwoi na wendo mũnene harĩ mũndũ na ũrĩa ũngĩ, tondũ wendo nĩ ũhumbagĩra mehia maingĩ.” (1 Pet. 4:8) Bibilia yugaga ũũ: “Ithuothe nĩ tũhĩngagwo maita maingĩ.” (Jak. 3:2) Tũngĩhũthĩra ũtaaro wa Jesu wa gwĩkaga andũ arĩa angĩ maũndũ marĩa tũngĩenda matwĩkage, no tũhote kũmohera na kũriganĩrũo nĩ tũmaũndũ tũnini tũrĩa matwĩkĩte.​—Mat. 6:14, 15; 7:12.

⁶ Ũngĩmenya atĩ nĩ ũhĩtĩirie mũndũ kũgerera ciugo kana ciĩko ciaku, wagĩrĩirũo kuoya ikinya rĩa mbere o na ihenya nĩguo ũcokie thayũ. Nĩ wega kũririkana atĩ ũndũ ũcio nĩ ũrahutia nginya ũrata waku na Jehova. Jesu aaheire arutwo ake ũtaaro ũyũ: “Ningĩ, ũngĩkorũo ũgĩtwara kĩheo gĩaku kĩgongona-inĩ na ũrĩ hau ũririkane atĩ mũrũ wa Ithe wanyu arĩ na ũndũ nawe, tiga kĩheo gĩaku hau mbere ya kĩgongona, na ũthiĩ. Amba ũthondeke thayũ na mũrũ wa Ithe wanyu, thutha ũcio ũcoke ũkarute kĩheo gĩaku.” (Mat. 5:23, 24) No kũhoteke kwaga kũiguithania kũroimĩrire nĩ ũndũ wa kwaga gũtaũkĩrũo wega nĩ ũndũ. Angĩkorũo nĩguo, nĩ wega mwarĩrĩrie ũndũ ũcio. Andũ othe thĩinĩ wa kĩũngano mangĩhingũranĩra ngoro, no magirĩrĩrie na maniine mathĩna marĩa moimanaga na kwaga gũkinyanĩra kana kwaga kũiguithania.

KŨHEANA ŨTAARO WA KĨĨMAANDĨKO

⁷ Rĩmwe arori no mone harĩ bata wa kũhe mũndũ ũtaaro nĩgetha marũnge mwĩcirĩrie wake. Ũndũ ũcio ndũkoragwo ũrĩ mũhũthũ hingo ciothe. Mũtũmwo Paulo aandĩkĩire Akristiano a Galatia ũũ: “Ariũ a Ithe witũ, o na mũndũ angĩthiĩ na njĩra ĩtagĩrĩire atarĩ aramenya-rĩ, inyuĩ mũrĩ na ngumo cia kwagĩrĩra kĩĩroho geragiai kũmũrũnga mũrĩ na roho wa ũhooreri.”​—Gal. 6:1.

⁸ Arori mangĩrĩithia ngʼondu cia Jehova, no magitĩre kĩũngano kuumana na mogwati maingĩ ma kĩĩroho na no magirĩrĩrie mathĩna manene matikoimĩre. Athuri nĩ merutanagĩria kũreka ũteithio wao harĩ kĩũngano ũkorũo ũhaana ta ũrĩa Jehova eeranĩire kũgerera Isaia: “O ũmwe wao agaakoragwo atariĩ ta handũ ha kwĩhitha rũhuho, handũ ha kwĩgitia mbura ya kĩhuhũkanio, o ta tũrũũĩ twa maĩ bũrũri-inĩ ũtarĩ maĩ, o ta kĩĩruru kĩa ndũmba nene ya ihiga bũrũri-inĩ mũngʼaru.”​—Isa. 32:2.

GWĨKĨRA MŨNDŨ ŨTARĨ NA MĨTHIĨRE MĨEGA RŨŨRI

⁹ Mũtũmwo Paulo nĩ aaheanire mũkaana wĩgiĩ andũ amwe arĩa mangĩthũkia kĩũngano. Ooigire ũũ: “Tũramũtaara . . . atĩ mũtige gũthiaga thiritũ na mũrũ wa Ithe witũ o wothe ũrathiĩ na mĩthiĩre ĩrĩa ĩtagĩrĩire na ũtarũmagĩrĩra ũrutani ũrĩa mwaamũkĩrire kuuma kũrĩ ithuĩ.” Aataarĩirie ũndũ ũcio makĩria na njĩra ĩno: “Mũndũ o na ũrĩkũ angĩaga gwathĩkĩra kiugo gitũ kĩrĩa kĩrĩ marũa-inĩ maya, mwĩkĩrei rũũri na mũtige gũthiaga thiritũ nake, nĩgetha aconoke. Ĩndĩ o na kũrĩ ũguo mũtikamũtue thũ, no thiĩi na mbere kũmũtaara o ta mũrũ wa Ithe witũ.”​—2 Thes. 3:6, 14, 15.

¹⁰ Rĩmwe no kũgĩe mũndũ ũtekĩte rĩhia iritũ rĩngĩtũma eherio thĩinĩ wa kĩũngano no nĩ aronania ndaratĩa o na hanini ithimi cia Ngai iria ciagĩrĩire gũtũtongoria tũrĩ Akristiano. No akorũo hihi arĩ mũgũũta gũkĩria njano, mũndũ wa kũruta arĩa angĩ mahĩtia, kana mũndũ ũrĩ gĩko. Ningĩ no akorũo arĩ mũndũ ‘wĩingĩragia maũndũ-inĩ matamũkoniĩ.’ (2 Thes. 3:11) O na kana akorũo nĩ ahũthagĩra wara kũheenia andũ nĩguo egune, kana agekenia na maũndũ marĩa matagĩrĩire. Mĩtugo ta ĩyo no ĩthũkie rĩĩtwa rĩa kĩũngano, na no ĩthereme harĩ Akristiano arĩa angĩ.

¹¹ Athuri mambaga gũteithia mũndũ ta ũcio na njĩra ya kũmũhe ũtaaro wa Bibilia. O na kũrĩ ũguo, angĩthiĩ na mbere kũhũthia ithimi cia Bibilia o na thutha wa gũteithio maita maigana ũna, athuri no matue atĩ mĩario ya mũkaana ĩrutwo kĩũngano-inĩ. Athuri nĩ mekũhũthĩra ũtaũku kũrora kana mĩthiĩre ya mũndũ mũna nĩ mĩũru mũno na nĩ ĩrahĩnga arĩa angĩ ũndũ kũngĩbatara kũrutwo mĩario ya mũkaana. Mwaria nĩ ekũheana ũtaaro ũrĩa wagĩrĩire wĩgiĩ mĩthiĩre ĩyo mĩũru, no ndekũgweta rĩĩtwa rĩa mũndũ ũcio. Arĩa moĩ ũhoro wa mĩthiĩre ĩyo mĩũru ĩkwarĩrĩrio mĩario-inĩ, nĩ mekwĩmenyerera kũnyitanĩra na mũndũ ũcio maũndũ-inĩ mangĩ, o na gũtuĩka nĩ megũthiĩ na mbere kũnyitanĩra nake maũndũ-inĩ ma kĩĩroho, ‘makĩmũtaaraga o ta mũrũ wa Ithe witũ.’

¹² Mũrũgamo mũrũmu wa Akristiano ehokeku no ũtũme mũndũ ũcio aconoke nĩ ũndũ wa mĩthiĩre yake na agarũrĩre. Angĩoneka biũ atĩ nĩ agarũrĩire mĩthiĩre yake, ndagĩrĩire kuonwo rĩngĩ ta mũndũ wĩkĩrĩtwo rũũri.

KŨNIINA MATHĨNA MAMWE MARITŨ

¹³ Kwaga gũtindanĩra na mahĩtia ma arĩa angĩ na kuohanĩra ti kuuga atĩ nĩ tũrahũthia mahĩtia kana atĩ nĩ tũramanyita mbaru. Ti mehia mothe moimanaga na kwaga gũkinyanĩra, no ningĩ ti wega kũrekereria mehia maritũ. (Alaw. 19:17; Thab. 141:5) Kĩrĩkanĩro kĩa Watho nĩ kĩoonanagia atĩ mehia mamwe nĩ maritũ kũrĩ marĩa mangĩ, na noguo kũrĩ harĩ mũbango wa Gĩkristiano ũmũthĩ.​—1 Joh. 5:16, 17.

¹⁴ Jesu nĩ oonanirie mũtaratara ũrĩa wagĩrĩirũo kũrũmĩrĩrũo rĩrĩa kwoimĩra mathĩna maritũ gatagatĩ-inĩ ka Akristiano. Ta rora wone makinya marĩa aagwetire: “Mũrũ wa Ithe wanyu angĩkwĩhĩria, [1] thiĩ ũmuonie rĩhia rĩake mũrĩ o inyuerĩ. Angĩkũigua-rĩ, nĩ mwacokanwo na mũrũ wa Ithe wanyu. No angĩaga gũkũigua, [2] thiĩ na mũndũ ũmwe kana erĩ, nĩguo kũgerera ũira wa andũ erĩ kana atatũ, maũndũ mothe mamenyeke wega. Angĩaga kũmaigua-rĩ, [3] ĩra kĩũngano. Na angĩaga kũigua o na nginya kĩũngano, nĩ atuĩke o ta mũndũ wa ndũrĩrĩ kana mwĩtia wa mbeca cia igooti harĩ wee.”​—Mat. 18:15-17.

¹⁵ Tũngĩrora ngerekano ĩrĩa Jesu aacokire kũheana thĩinĩ wa Mathayo 18:23-35, kũroneka atĩ rĩhia rĩmwe rĩa marĩa marĩrĩirio thĩinĩ wa Mathayo 18:15-17, rĩkonainie na mbeca kana indo, hihi ta kwaga kũrĩha thiirĩ kana gũtunyana. Kana rĩkorũo nĩ rĩhia rĩa gũcambia mũndũ ũrĩa ũngĩ nginya rĩĩtwa rĩake rĩgathũka biũ.

¹⁶ Angĩkorũo ũrĩ na ũira atĩ harĩ mũndũ thĩinĩ wa kĩũngano ũkũhĩtĩirie na njĩra ta ĩyo, ndũkahiũhe kwĩra athuri ũhoro ũcio atĩ nĩguo maingĩrĩre maũndũ ithenya rĩaku. O ta ũrĩa Jesu aataaranire, amba warie na mũndũ ũcio ũkũhĩtĩirie. Geriai kũniina ũhoro ũcio mũrĩ o inyuerĩ mũtekũingĩria mũndũ ũngĩ. Ririkana atĩ Jesu ndoigire ‘thiĩ riita rĩmwe tu ũmuonie rĩhia rĩake.’ Nĩ ũndũ ũcio, angĩkorũo thutha wa gũthiĩ kũrĩ we ndanetĩkĩra atĩ nĩ ahĩtĩtie na ndanacũnga mũhera-rĩ, nĩ wega wĩcirie gũthiĩ kũrĩ we hĩndĩ ĩngĩ. Ũngĩhũthĩra njĩra ĩyo gũcokia thayũ, ũcio ũkũhĩtĩirie no akene nĩ kũmenya atĩ ndũnera andũ angĩ ũhoro wa mehia make kana ũkamũthũkĩria rĩĩtwa kĩũngano-inĩ. Na njĩra ĩyo, mũgũkorũo ‘mũcokanĩtwo na mũrũ wa Ithe wanyu.’

¹⁷ Angĩkorũo ũrĩa ũhĩtĩtie nĩ etĩkĩra atĩ nĩ ahĩtĩtie, acũnga mũhera, na oya ikinya rĩa kũrũnga mahĩtia make, ndũrabatara kuoya makinya macio mangĩ. O na gũtuĩka rĩhia rĩu riuma iritũ, ihĩtia rĩa mũthemba ũcio no rĩarĩrĩrio na rĩniinwo nĩ andũ acio erĩ.

¹⁸ Angĩkorũo ndũnahota gũcokanwo na mũrũ wa Ithe wanyu thutha wa kũmuonia ihĩtia rĩake “mũrĩ o inyuerĩ,” no wĩke ta ũrĩa Jesu ooigire, “thiĩ na mũndũ ũmwe kana erĩ,” nĩguo mwarie nake rĩngĩ. Arĩa ũgũthuura mũthiĩ nao, magĩrĩirũo gũkorũo na muoroto wa kũmũteithia mũcokanwo na mũrũ wa Ithe wanyu. Kũngĩhoteka, thiĩ na arĩa maarĩ ho ihĩtia rĩu rĩgĩĩkĩka, na angĩkorũo gũtirĩ mũndũ warĩ ho, no ũthuure mũndũ ũmwe kana erĩ matuĩke aira mũkĩaria na mũrũ wa Ithe wanyu. No makorũo na ũmenyeru wĩgiĩ ũndũ ta ũcio, na kwoguo no mahote kũmenya kana hihi harĩ na mehia mekĩtwo. Ũngĩthuura athuri a kĩũngano matuĩke aira, matingĩkorũo makĩrũgamĩrĩra kĩũngano ũndũ-inĩ ũcio nĩ gũkorũo matitũmĩtwo nĩ kĩama gĩa athuri.

¹⁹ Angĩkorũo mũtinaiguana o na thutha wa kũgeria maita maigana ũna, ũgakorũo nĩ warĩtie nake mũrĩ inyuerĩ, ũgathiĩ na mũira ũmwe kana erĩ, na ndũraigua ta ũngĩrekereria ũhoro ũcio, menyithia arori a kĩũngano. Ririkana atĩ muoroto wa arori acio nĩ gũtũũria thayũ na ũtheru wa kĩũngano. Thutha wa kwĩra athuri a kĩũngano, nĩ wega ũmatigĩre ũhoro ũcio na wĩhoke biũ atĩ Jehova nĩ egũtongoria maũndũ. Ndũkanareke mĩtugo ya mũndũ ũngĩ ĩkũhĩnge kana ĩtũme wage gĩkeno ũgĩtungatĩra Jehova.​—Thab. 119:165.

²⁰ Arĩithi a ngʼondu cia Jehova nĩ megũtuĩria ũhoro ũcio. Kũngĩoneka atĩ nĩ ma mũndũ ũcio nĩ akwĩhĩirie rĩhia iritũ na ndaronania nĩ aherete, na ndehaarĩirie kũrũnga mahĩtia make, kamĩtĩ ya ciira no ĩbatare kũmweheria thĩinĩ wa kĩũngano. Na njĩra ĩyo makagitĩra ngʼondu na magatũũria ũtheru wa kĩũngano.​—Mat. 18:17.

GŨTUA CIIRA WĨGIĨ MEHIA MARITŨ

²¹ Mehia mamwe maritũ ta ngomanio itagĩrĩire, ũtharia, ngomanio cia arũme kwa arũme na atumia gwa atumia, kũruma Ngai, ũregenyũki, ũhoi mĩhianano, na mehia mangĩ ta macio maritũ, mabataraga makĩria ma kuoherũo nĩ mũndũ ũrĩa ũhĩtĩirio. (1 Kor. 6:9, 10; Gal. 5:19-21) Tondũ ũtheru wa kĩĩroho na wa kĩĩmĩtugo wa kĩũngano ũkoragwo ũrĩ ũgwati-inĩ, no mũhaka athuri a kĩũngano mamenyithio ũhoro wa mehia ta macio maritũ nĩguo moe ikinya. (1 Kor. 5:6; Jak. 5:14, 15) Andũ amwe nĩ mathiaga kũrĩ athuri kumbũra mehia mao ene kana kuuga ũndũ ũrĩa mangĩkorũo moĩ wĩgiĩ mehia ma andũ angĩ. (Alaw. 5:1; Jak. 5:16) Gũtekũmakania njĩra ĩrĩa athuri mamenyete nayo ũhoro wa mehia maritũ marĩa mekĩtwo nĩ mũhunjia mũbatithie, athuri erĩ a kĩũngano nĩ mekwamba gũtuĩria ũhoro ũcio wega. Kũngĩoneka atĩ ũhoro ũcio nĩ wa ma, na harĩ na ũira ũronania atĩ mehia maritũ nĩ mekĩtwo, kĩama gĩa athuri nĩ gĩgũthondeka kamĩtĩ ya ciira ĩrĩa ĩgũkorũo na athuri matanyihĩire atatũ nĩguo marũmbũiye ũndũ ũcio.

²² Athuri makoragwo marĩ maitho nĩguo magitĩre ngʼondu cia Jehova kuumana na ũndũ o wothe ũngĩcithũkia kĩĩroho. Ningĩ nĩ merutanagĩria kũhũthĩra Kiugo kĩa Ngai na ũũgĩ kũrũnga mũndũ o wothe ũhĩtĩtie nĩguo mamũteithĩrĩrie acokerere ũgima wa kĩĩroho. (Jud. 21-23) Ũndũ ũcio ũringaine na ũtaaro ũyũ mũtũmwo Paulo aaheire Timotheo: “Ndagwatha mbere ya Ngai na Kristo Jesu, o ũcio ũgaatuĩra arĩa marĩ muoyo na arĩa akuũ, . . . Rũngaga andũ, ũkamakaania, na ũkamataaraga ũrĩ na wetereri wothe o na ũhoti mwega wa kũrutana.” (2 Tim. 4:1, 2) Gwĩka ũguo no kũhũthĩre mahinda maingĩ, no ũcio nĩ ũmwe wa mawĩra maritũ marĩa athuri marutaga. Andũ thĩinĩ wa kĩũngano nĩ makenagio nĩ kĩyo kĩa athuri na makamona “magĩrĩire kũheo gĩtĩo maita merĩ.”​—1 Tim. 5:17.

²³ Hĩndĩ ciothe rĩrĩa kwamenyeka wega atĩ mũndũ nĩ ehĩtie, muoroto ũrĩa mũnene wa arori ũkoragwo ũrĩ kũmũteithia acokerere ũgima wake wa kĩĩroho. Angĩkorũo nĩ erirĩte biũ na athuri nĩ mahotete kũmũteithia, mũkaana o wothe mangĩmũhe arĩ wiki kana mbere ya mũndũ o wothe ũrarutire ũira hĩndĩ ya ciira ũcio, ũkoragwo ũrĩ wa kũmũrũnga na gũtũma arĩa angĩ metigĩre kwĩhia. (2 Sam. 12:13; 1 Tim. 5:20) Rĩrĩa rĩothe mũndũ aheo mũkaana nĩ kamĩtĩ ya ciira, nĩ harĩ maũndũ agiragĩrĩrio. Na njĩra ĩyo, ũrĩa ũhĩtĩtie no ateithĩrĩrio ‘kũrũnga njĩra’ cia makinya make thutha-inĩ. (Ahib. 12:13) Thutha wa ihinda, maũndũ marĩa agirĩrĩirio nĩ mathiaga makĩeheragio o ũrĩa aroneka atĩ nĩ arahona kĩĩroho.

KĨMENYITHIA KĨGIĨ KŨHEO MŨKAANA

²⁴ Kamĩtĩ ya ciira ĩngĩona atĩ ũrĩa wĩhĩtie nĩ erirĩte biũ ĩndĩ kĩũngano kana andũ angĩ nja ya kĩũngano nĩ mekũmenya ũhoro wa rĩhia rĩake kana atĩ andũ thĩinĩ wa kĩũngano nĩ marabatara kwĩmenyerera mwĩhia ũcio wĩrirĩte, nĩ kwagĩrĩire gũthomwo kĩmenyithia gĩkuhĩ hĩndĩ ya Mũcemanio wa Ũtũũro na Ũtungata. Kĩagĩrĩire kuuga ũũ: “[Rĩĩtwa rĩa mũndũ] nĩ aaheo mũkaana.”

ANGĨKORŨO ITUA NĨ KWEHERIA MŨNDŨ KĨŨNGANO-INĨ

²⁵ Rĩmwe na rĩmwe ũrĩa wĩhĩtie aahota gũkorũo arikĩire mũno mehia-inĩ make ũũ atĩ ndaretĩkĩra ũteithio ũrĩa araheo. ‘Ciĩko ironania atĩ nĩ erirĩte’ no ciage kuoneka wega hĩndĩ ĩrĩa arĩ mbere ya kamĩtĩ ya ciira. (Atũm. 26:20) Hĩndĩ ta ĩyo kwagĩrĩire gũthiĩ atĩa? Nĩ harĩ bata kweheria mwĩhia ũcio ũtarerira thĩinĩ wa kĩũngano nĩguo atige kũnyitanĩra na andũ atheru a Jehova. Ũgucania wa mwĩhia ũcio nĩ weheragio thĩinĩ wa kĩũngano, na kwoguo ũtheru wa kĩĩmĩtugo na wa kĩĩroho wa kĩũngano ũkagitĩrũo, o hamwe na rĩĩtwa rĩega rĩa kĩũngano. (Gũcok. 21:20, 21; 22:23, 24) Rĩrĩa mũtũmwo Paulo aamenyire atĩ harĩ mũndũ thĩinĩ wa kĩũngano gĩa Korintho wekĩte mehia maritũ, eerire athuri a kĩũngano kĩu ‘maneane mũndũ ta ũcio kũrĩ Shaitani nĩguo roho wa kĩũngano ũkaahonokio.’ (1 Kor. 5:5, 11-13) Ningĩ Paulo nĩ aagwetire andũ angĩ meeheririo thĩinĩ wa kĩũngano karine-inĩ ya mbere nĩ ũndũ wa kũregana na ũhoro wa ma.​—1 Tim. 1:20.

²⁶ Kamĩtĩ ya ciira ĩngĩtua itua rĩa kweheria mũndũ ũtarerira thĩinĩ wa kĩũngano, nĩ yagĩrĩirũo kũmenyithia mũndũ ũcio itua rĩu, na ĩmũtaarĩrie wega gĩtũmi kana itũmi cia Kĩĩmaandĩko cia kũmweheria. Thutha wa kũmũmenyithia itua rĩu, kamĩtĩ ĩyo ningĩ nĩ yagĩrĩirũo kũmwĩra atĩ angĩkorũo nĩ arona ta harĩ mahĩtia manene marekirũo harĩ gũtua ciira ũcio na no ende gũcokia ciira riiko, agĩrĩirũo gwĩka ũguo na njĩra ya kwandĩka marũa, ataarĩrie wega itũmi ciake cia gũcokia ciira riiko. Agĩrĩirũo kũheo thikũ mũgwanja cia gwĩka ũguo, kuuma rĩrĩa aamenyithirio itua rĩa kamĩtĩ ĩyo. Angĩneana marũa ma gũcokia ciira riiko, kĩama gĩa athuri nĩ gĩkwĩra mũrori wa mũthiũrũrũko, nake nĩ egũcagũra athuri arĩa magĩrĩire makorũo kamĩtĩ-inĩ ya gũcokia ciira riiko nĩguo mathikĩrĩrie ciira ũcio rĩngĩ. Nĩ megwĩka ũrĩa wothe mangĩhota nĩgetha mathikĩrĩrie ciira ũcio ihinda-inĩ rĩa kiumia kĩmwe kuuma rĩrĩa marũa ma gũcokia ciira riiko maamũkĩrirũo. Angĩkorũo ciira nĩ wacokio riiko, kĩmenyithia gĩa kũmweheria kĩũngano-inĩ gĩtikwamba kwanĩrĩrũo. Ihinda-inĩ rĩu, mũndũ ũcio ũratuĩka atĩ nĩ ehĩtie ndagĩrĩirũo gũcokia ciũria kana kũhoithia mĩcemanio-inĩ kana gũtungata mĩeke-inĩ ya mwanya.

²⁷ Mũbango wa gũcokia ciira riiko ũkoragwo ũrĩ wa kuonania ũtugi harĩ mũndũ ũcio ũratuĩka atĩ nĩ ehĩtie, na nĩ ũmũheaga mweke wa gũthikĩrĩrio rĩngĩ. Kwoguo, ũrĩa wĩhĩtie angĩrega gũthiĩ mbere ya kamĩtĩ ya gũcokia ciira riiko, nĩ kwagĩrĩire kwanĩrĩrũo atĩ nĩ eherio kĩũngano-inĩ thutha wa athuri kwĩrutanĩria kwaranĩria nake.

²⁸ Angĩkorũo ũrĩa wĩhĩtie ndarenda gũcokia ciira riiko, kamĩtĩ ya ciira nĩ ĩkũmũtaarĩria bata wa kwĩrira na makinya marĩa agĩrĩirũo kuoya nĩguo acokio kĩũngano-inĩ thutha wa ihinda. Gwĩka ũguo nĩ njĩra ya kũmũteithia na kũmuonia ũtugi, na athuri magĩrĩirũo kũmũtaarĩria marĩ na mwĩhoko atĩ nĩ ekũgarũrĩra mĩthiĩre yake na thutha-inĩ agĩrĩre gũcoka ithondeka-inĩ rĩa Jehova.​—2 Kor. 2:6, 7.

KĨMENYITHIA KĨGIĨ KWEHERIO KĨŨNGANO-INĨ

²⁹ Rĩrĩa kwabatarania mwĩhia ũtarerira eherio thĩinĩ wa kĩũngano, nĩ kwagĩrĩire gũthomwo kĩmenyithia gĩkuhĩ kĩroiga ũũ: “[Rĩĩtwa rĩa mũndũ] rĩu ti Mũira wa Jehova.” Ũndũ ũcio ũteithagia andũ arĩa ehokeku thĩinĩ wa kĩũngano nĩguo matige kũnyitanĩra na mũndũ ũcio.​—1 Kor. 5:11.

KWĨYEHERIA KĨŨNGANO-INĨ

³⁰ “Kwĩyeheria kĩũngano-inĩ” nĩ rĩrĩa Mũira wa Jehova mũbatithie akaana mũrũgamo wake wa Gĩkristiano eyendeire na njĩra ya kuuga atĩ ndarenda gũtuĩka Mũira wa Jehova kana ndarenda gwĩtanio na rĩĩtwa rĩu rĩngĩ. Kana no onanie na ciĩko ciake atĩ nĩ eyeheretie thĩinĩ wa kĩũngano gĩa Gĩkristiano, hihi na njĩra ya kũnyitanĩra na ithondeka rĩreka maũndũ mareganĩte na morutani ma Bibilia na kwoguo nĩ rĩtuĩrĩirũo nĩ Jehova Ngai.​—Isa. 2:4; Kũg. 19:17-21.

³¹ Mũtũmwo Johana aandĩkire ũũ ũhoro-inĩ wĩgiĩ andũ arĩa maakaanire wĩtĩkio wao wa Gĩkristiano matukũ-inĩ make: “Acio nĩ mooimire gatagatĩ-inĩ gaitũ tondũ matiarĩ a mũthemba witũ; nĩ ũndũ korũo maarĩ a mũthemba witũ, nĩ mangĩatũũrire hamwe na ithuĩ.”​—1 Joh. 2:19.

³² Maitho-inĩ ma Jehova, mũndũ wĩyeheretie kĩũngano-inĩ akoragwo arĩ ngũrani mũno na Mũkristiano ũhwererekeire kĩĩroho agatiga kũhunjia. Mũndũ no ahwererekere kĩĩroho tondũ wa kwaga kwĩruta Kiugo kĩa Ngai ategũtĩĩrĩria. Kana akorũo nĩ acemanĩtie na mathĩna kana ũkararia ũgatũma kĩyo gĩake gĩa gũtungatĩra Jehova gĩthire. Athuri o hamwe na arĩa angĩ thĩinĩ wa kĩũngano nĩ mathiaga na mbere kũheana ũteithio wa kĩĩroho kũrĩ mũndũ ũhwererekeire.​—Rom. 15:1; 1 Thes. 5:14; Ahib. 12:12.

³³ Mũgarũ na ũguo, Mũkristiano angĩthuura kwĩyeheria kĩũngano-inĩ, kĩũngano nĩ gĩthomagĩrũo kĩmenyithia gĩkuhĩ kĩroiga ũũ: “[Rĩĩtwa rĩa mũndũ] rĩu ti Mũira wa Jehova.” Mũndũ ũcio onagwo o ta mũndũ weheretio kĩũngano-inĩ.

GŨCOKIO KĨŨNGANO-INĨ

³⁴ Mũndũ weheretio kĩũngano-inĩ kana ũrĩa wĩyeheretie, no acokio kĩũngano-inĩ angĩonania biũ atĩ nĩ erirĩte na akonania kwa ihinda atĩ nĩ atiganĩte na mĩthiĩre yake mĩũru. Nĩ onanĩtie atĩ nĩ arerirĩria kũgĩa na ũrata mwega hamwe na Jehova. Athuri a kĩũngano nĩ magĩrĩirũo kũreka ihinda rĩiganu rĩhĩtũke, hihi rĩa mĩeri mĩingĩ, mwaka, kana o na makĩria gũkĩringana na maũndũ matiganĩte, nĩguo mũndũ ũcio onanie atĩ nĩ erirĩte kuuma ngoro. Rĩrĩa kĩama gĩa athuri kĩamũkĩra marũa ma mũndũ ũrenda gũcokio kĩũngano-inĩ, kamĩtĩ ya gũcokia mũndũ nĩ yaragia nake. Kamĩtĩ ĩyo nĩ ĩkũrora kana arĩ na ‘ciĩko ironania atĩ nĩ erirĩte,’ na ĩtue kana nĩ ĩkũmũcokia hĩndĩ ĩyo kana nĩ arabatara ihinda makĩria.​—Atũm. 26:20.

³⁵ Angĩkorũo mũndũ ũrĩa ũrahoya gũcokio eeheririo arĩ kĩũngano-inĩ kĩngĩ, kamĩtĩ ya gũcokia mũndũ ya kĩũngano kĩrĩa arĩ nĩyo yagĩrĩirũo gũcemania nake nĩgetha yarĩrĩrie ihoya rĩu rĩake. Kamĩtĩ ĩyo ĩngĩona atĩ nĩ agĩrĩire gũcokio, yagĩrĩirũo kwaranĩria na kĩama gĩa athuri gĩa kĩũngano kĩrĩa eehereirio ĩmamenyithie mawoni mao. Kamĩtĩ icio cierĩ ciagĩrĩirũo kũrutithania wĩra nĩguo itigĩrĩre atĩ maũndũ mothe nĩ mathuthurio nĩgetha ikinyĩrĩre itua rĩa kĩhooto. O na kũrĩ ũguo, itua rĩa kũmũcokia kĩũngano-inĩ rĩagĩrĩire gũtuwo nĩ kamĩtĩ ya gũcokia mũndũ ya kĩũngano kĩrĩa eehereirio.

KĨMENYITHIA KĨGIĨ GŨCOKIO KĨŨNGANO-INĨ

³⁶ Kamĩtĩ ya gũcokia mũndũ ĩngĩona atĩ mũndũ weheretio kana wĩyeheretie kĩũngano-inĩ nĩ erirĩte kuuma ngoro na nĩ agĩrĩirũo gũcokio, kĩmenyithia gĩa gũcokio kĩũngano-inĩ nĩ gĩthomagwo thĩinĩ wa kĩũngano kĩrĩa eehereirio. Angĩkorũo mũndũ ũcio rĩu arĩ kĩũngano-inĩ kĩngĩ, kĩmenyithia kĩu nĩ kĩagĩrĩire gũthomwo nginya kĩũngano-inĩ kĩu arĩ. Kĩmenyithia kĩu kĩagĩrĩirũo kuuga ũũ: “[Rĩĩtwa rĩa mũndũ] rĩu nĩ Mũira wa Jehova.”

MWANA MŨBATITHIE ANGĨKA MEHIA MARITŨ

³⁷ Mwana mũbatithie angĩka mehia maritũ, athuri nĩ magĩrĩirũo kũmenyithio. Rĩrĩa athuri mararia na mwana wĩkĩte mehia maritũ, nĩ wega aciari ake makorũo ho angĩkorũo nĩ Aira a Jehova. Aciari acio magĩrĩirũo kũnyitanĩra na kamĩtĩ ya ciira matekũgeria kũhithĩrĩra mwana wao ndakoerũo ikinya rĩrĩa rĩngĩbatarania. O ta ũrĩa kamĩtĩ ya ciira ĩĩrutanagĩria kũrũnga mũndũ mũgima ũhĩtĩtie na kũmũteithia acokererie kĩĩroho, noguo ĩkaga harĩ mwana. O na kũrĩ ũguo, mwana ũcio angĩaga kuonania nĩ erirĩte, agĩrĩire kweherio kĩũngano-inĩ.

MŨHUNJIA ŨTARĨ MŨBATITHIE ANGĨKA MEHIA MARITŨ

³⁸ Kwagĩrĩire gũthiĩ atĩa mũhunjia ũtarĩ mũbatithie angĩka mehia maritũ? Tondũ ti Mũira wa Jehova mũbatithie, ndangĩeherio kĩũngano-inĩ. O na kũrĩ ũguo, angĩheo ũtaaro na njĩra ya wendo ahota ‘kũrũnga njĩra’ ya makinya make tondũ no akorũo atataũkĩirũo wega nĩ ithimi cia Bibilia.​—Ahib. 12:13.

³⁹ Mũhunjia ũtarĩ mũbatithie angĩaga kwĩrira o na thutha wa athuri erĩ kũgeria kũmũteithia, harĩ bata wa kũmenyithia kĩũngano. Kwagĩrĩire gũthomwo kĩmenyithia gĩkuhĩ kĩroiga ũũ: “[Rĩĩtwa rĩa mũndũ] rĩu ti mũhunjia ũtarĩ mũbatithie.” Kĩũngano kĩagĩrĩirũo kuona mũndũ ũcio wĩhĩtie atariĩ ta mũndũ wa gũkũ thĩ. O na gũtuĩka ndeheretio kĩũngano-inĩ, andũ thĩinĩ wa kĩũngano nĩ mekwĩmenyerera kũnyitanĩra nake maũndũ-inĩ. (1 Kor. 15:33) Ndagĩrĩirũo kũruta riboti ya ũtungata.

⁴⁰ Thutha wa ihinda, mũndũ ũtarĩ mũbatithie watigithĩtio gũkorũo arĩ mũhunjia no erirĩrie gũtuĩka mũhunjia rĩngĩ. Kũngĩthiĩ ũguo, athuri erĩ nĩ megũcemania nake nĩguo marore ũrĩa arathiĩ na mbere kĩĩroho. Angĩkorũo nĩ agĩrĩire gũtuĩka mũhunjia rĩngĩ, kwagĩrĩire gũthomwo kĩmenyithia gĩkuhĩ kĩroiga ũũ: “[Rĩĩtwa rĩa mũndũ] rĩu nĩ mũhunjia ũtarĩ mũbatithie.”

JEHOVA NĨ ARATHIMAGA ŨTHATHAIYA MŨTHERU NA ŨRĨ NA THAYŨ

⁴¹ Arĩa othe manyitanagĩra na kĩũngano kĩa Ngai nĩ makenagĩra paradiso ya kĩĩroho ĩrĩa Jehova aheete andũ ake. Metha itũ ya kĩĩroho ĩiyũire irio nyingĩ cia kĩĩroho na maĩ maingĩ ma ũhoro ũrĩa wa ma. Ningĩ nĩ tũgitagĩrũo nĩ Jehova kũgerera mũbango wa gĩtheokrasi ũrĩa ũtongoragio nĩ Kristo. (Thab. 23; Isa. 32:1, 2) Nĩ tũiguaga tũgitĩirũo matukũ-inĩ maya maritũ ma kũrigĩrĩria tũrĩ thĩinĩ wa paradiso ya kĩĩroho.

⁴² Rĩrĩa twatũũria thayũ na ũtheru wa kĩũngano, nĩ tũrekaga ũtheri witũ wĩgiĩ ma cia Ũthamaki ũthiĩ na mbere kwara. (Mat. 5:16; Jak. 3:18) Tũrĩ na kĩrathimo kĩa Jehova, nĩ tũgũkenera kuona andũ aingĩ makĩmũmenya na magĩũka tũnyitanĩre nao gwĩka wendi wake.